ਜਾਣੋ ਕਿੱਥੇ ਐ ‘ਹਰਾਮੀ ਨਾਲ਼ਾ’?
ਨਵੀਂ ਦਿੱਲੀ: ਜੰਮੂ-ਕਸ਼ਮੀਰ ਵਿਚੋਂ ਧਾਰਾ 370 ਹਟਾਏ ਜਾਣ ਮਗਰੋਂ ਭਾਰਤ-ਪਾਕਿ ਵਿਚਕਾਰ ਚੱਲ ਰਹੇ ਤਣਾਅ ਦੇ ਚਲਦਿਆਂ ਹੁਣ ਕੇਂਦਰੀ ਖ਼ੁਫ਼ੀਆ ਏਜੰਸੀਆਂ ਵੱਲੋਂ ਹਾਈ ਅਲਰਟ ਜਾਰੀ ਕੀਤਾ ਗਿਆ ਹੈ ਕਿ ਪਾਣੀ ਦੇ ਅੰਦਰ ਹਮਲਾ ਕਰਨ ਵਿਚ ਸਮਰੱਥ ਪਾਕਿਸਤਾਨ ਦੇ ਟ੍ਰੇਂਡ ਕਮਾਂਡੋ ਗੁਜਰਾਤ ਤੱਟ ’ਤੇ ਕੱਛ ਦੀ ਖਾੜੀ ਨੇੜੇ ਭਾਰਤ ਵਿਚ ਦਾਖ਼ਲ ਹੋ ਸਕਦੇ ਹਨ। ਉਹ ਵੀ ਸਰਕ੍ਰੀਕ ਇਲਾਕੇ ਵਿਚ ਪੈਂਦੇ ‘ਹਰਾਮੀ ਨਾਲੇ’ ਦੇ ਜ਼ਰੀਏ। ਇਸ ਦੇ ਚਲਦਿਆਂ ਸਾਰੀਆਂ ਬੰਦਰਗਾਹਾਂ ਅਤੇ ਮਹੱਤਵਪੂਰਨ ਥਾਂਵਾਂ ਦੀ ਸੁਰੱਖਿਆ ਵਧਾ ਦਿੱਤੀ ਗਈ ਹੈ। ਆਓ ਜਾਣਦੇ ਹਾਂ ਕਿ ਕੀ ਹੈ ‘ਹਰਾਮੀ ਨਾਲਾ ਅਤੇ ਕਿਉਂ ਗੁਜਰਾਤ ਹੈ ਨਿਸ਼ਾਨੇ ’ਤੇ?
Harami Nala
‘ਹਰਾਮੀ ਨਾਲਾ’ ਗੁਜਰਾਤ ਦੇ ਕੱਛ ਇਲਾਕੇ ਵਿਚ ਭਾਰਤ ਅਤੇ ਪਾਕਿਸਤਾਨ ਨੂੰ ਵੰਡਣ ਵਾਲਾ 22 ਕਿਲੋਮੀਟਰ ਲੰਬਾ ਸਮੁੰਦਰੀ ਚੈਨਲ ਹੈ। ਇਹ ਦੋਵੇਂ ਦੇਸ਼ਾਂ ਦੇ ਵਿਚਕਾਰ ਸਰਕ੍ਰੀਕ ਇਲਾਕੇ ਦੀ 96 ਕਿਲੋਮੀਟਰ ਵਿਵਾਦਤ ਸਰਹੱਦ ਦਾ ਹਿੱਸਾ ਹੈ। ਦਰਅਸਲ ਇਹ ‘ਹਰਾਮੀ ਨਾਲਾ’ ਘੁਸਪੈਠੀਆਂ ਅਤੇ ਤਸਕਰਾਂ ਲਈ ਸਵਰਗ ਦੇ ਬਰਾਬਰ ਮੰਨਿਆ ਜਾਂਦਾ ਹੈ। ਇਸੇ ਵਜ੍ਹਾ ਕਰਕੇ ਇਸ ਦਾ ਨਾਮ ‘ਹਰਾਮੀ ਨਾਲਾ’ ਰੱਖਿਆ ਗਿਆ ਹੈ। ਇੱਥੇ ਪਾਣੀ ਦਾ ਪੱਧਰ ਜਵਾਰ ਭਾਟੇ ਅਤੇ ਮੌਸਮ ਕਾਰਨ ਲਗਾਤਾਰ ਬਦਲਦਾ ਰਹਿੰਦਾ ਹੈ। ਇਸ ਲਈ ਇਸ ਨੂੰ ਬੇਹੱਦ ਖ਼ਤਰਨਾਕ ਵੀ ਮੰਨਿਆ ਜਾਂਦਾ ਹੈ।
Enemy commandos can enter India from Harami Nala
ਭਾਵੇਂ ਕਿ ‘ਹਰਾਮੀ ਨਾਲੇ’ ਦੇ ਅੰਦਰ ਝੀਂਗਾ ਮੱਛੀ ਅਤੇ ਰੈੱਡ ਸੈਮੈਨ ਮੱਛੀਆਂ ਕਾਫ਼ੀ ਮਾਤਰਾ ਵਿਚ ਪਾਈਆਂ ਜਾਂਦੀਆਂ ਹਨ, ਜਿਨ੍ਹਾਂ ਦੀ ਕਾਫ਼ੀ ਮੰਗ ਹੈ। ਇਸ ਕਰਕੇ ਇਹ ‘ਹਰਾਮੀ ਨਾਲਾ’ ਭਾਰਤ ਅਤੇ ਪਾਕਿਸਤਾਨ ਦੇ ਮਛੇਰਿਆਂ ਲਈ ਪਸੰਦੀਦਾ ਜਗ੍ਹਾ ਮੰਨਿਆ ਜਾਂਦਾ ਹੈ ਪਰ ਇੱਥੇ ਮੱਛੀਆਂ ਫੜਨ ’ਤੇ ਰੋਕ ਲਗਾਈ ਹੋਈ ਹੈ। 2008 ਵਿਚ ਪਾਕਿਸਤਾਨੀ ਅਤਿਵਾਦੀਆਂ ਨੇ ਇਸੇ ਖੇਤਰ ਵਿਚੋਂ ਭਾਰਤੀ ਕਿਸ਼ਤੀ ਜ਼ਬਤ ਕਰਕੇ ਮੁੰਬਈ ’ਤੇ ਹਮਲਾ ਕੀਤਾ ਸੀ।
Enemy commandos can enter India from Harami Nala
ਇਹ ਅਲਰਟ ਅਜਿਹੇ ਸਮੇਂ ਵਿਚ ਕੀਤਾ ਗਿਆ ਹੈ ਜਦੋਂ ਜੰਮੂ ਕਸ਼ਮੀਰ ਦਾ ਵਿਸ਼ੇਸ਼ ਦਰਜਾ ਖ਼ਤਮ ਕਰਨ ਤੋਂ ਬਾਅਦ ਪਾਕਿਸਤਾਨ ਵੱਲੋਂ ਪਰਮਾਣੂ ਯੁੱਧ ਦੀ ਧਮਕੀ ਦਿੱਤੀ ਜਾ ਰਹੀ ਹੈ, ਇਸ ਤੋਂ ਪਹਿਲਾਂ 27 ਅਗਸਤ ਨੂੰ ਨੇਵੀ ਚੀਫ਼ ਐਡਮਿਰਲ ਕਰਮਬੀਰ ਸਿੰਘ ਨੇ ਖ਼ੁਫ਼ੀਆ ਸੂਚਨਾ ਦੇ ਹਵਾਲੇ ਨਾਲ ਕਿਹਾ ਸੀ ਕਿ ਜੈਸ਼ ਏ ਮੁੰਹਮਦ ਨੇ ਅਪਣਾ ਸਮੁੰਦਰੀ ਵਿੰਗ ਬਣਾਇਆ ਹੈ ਜੋ ਅਤਿਵਾਦੀਆਂ ਨੂੰ ਪਾਣੀ ਦੇ ਅੰਦਰ ਹਮਲਾ ਕਰਨ ਦੀ ਟ੍ਰੇਨਿੰਗ ਦੇ ਰਿਹਾ ਹੈ।
Harami Nala
ਦੱਸ ਦਈਏ ਕਿ ਗੁਜਰਾਤ ਦੇ ਕੱਛ ਇਲਾਕੇ ਵਿਚ ਕਈ ਤੇਲ ਰਿਫਾਈਨਰੀਆਂ ਹਨ, ਜਿਨ੍ਹਾਂ ਵਿਚ ਰਿਲਾਇੰਸ ਇੰਡਸਟ੍ਰੀਜ਼, ਮੁੰਦਰਾ ਅਤੇ ਦੀਨ ਦਿਆਲ ਪੋਰਟ ਅਤੇ ਕਈ ਵੱਡੇ ਪਾਵਰ ਪਲਾਂਟ ਲੱਗੇ ਹੋਏ ਹਨ, ਇਸ ਤੋਂ ਇਲਾਵਾ ਦੁਆਰਕਾ ਵਿਚ ਸ੍ਰੀ ਕ੍ਰਿਸ਼ਨ ਦਾ ਵਿਸ਼ਵ ਪ੍ਰਸਿੱਧ ਮੰਦਰ ਵੀ ਹੈ, ਜਿੱਥੇ ਹਰ ਸਾਲ ਲੱਖਾਂ ਸ਼ਰਧਾਲੂ ਆਉਂਦੇ ਹਨ। ਖ਼ੁਫ਼ੀਆ ਸੂਚਨਾ ਮੁਤਾਬਕ ਜੈਸ਼ ਅਤਿਵਾਦੀਆਂ ਦੇ ਨਿਸ਼ਾਨੇ ’ਤੇ ਖੰਭਾਤ ਦੀ ਬੇਹੱਦ ਰੁਝੇਵਿਆਂ ਭਰੀ ਖਾੜੀ ਵੀ ਹੋ ਸਕਦੀ ਹੈ, ਜਿੱਥੋਂ ਵਰਤਮਾਨ ਸਮੇਂ ਰੋਜ਼ਾਨਾ ਕਰੀਬ 50 ਜਹਾਜ਼ ਲੰਘਦੇ ਹਨ ਜਦਕਿ ਕੱਛ ਦੀ ਖਾੜੀ ਵਿਚ 100 ਵੱਡੇ ਜਹਾਜ਼ ਅਤੇ 300 ਦੇ ਕਰੀਬ ਕਿਸ਼ਤੀਆਂ ਖੜ੍ਹੀਆਂ ਰਹਿੰਦੀਆਂ ਹਨ। ਇਨ੍ਹਾਂ ਸਾਰੀਆਂ ਥਾਵਾਂ ਨੂੰ ਟਾਰਗੈੱਟ ਕਰਨ ਲਈ ‘ਹਰਾਮੀ ਨਾਲਾ’ ਅਤਿਵਾਦੀਆਂ ਲਈ ਆਸਾਨ ਰਸਤਾ ਹੋ ਸਕਦਾ ਹੈ, ਜਿਸ ਕਰਕੇ ਪੂਰੇ ਗੁਜਰਾਤ ਤੱਟ ਦੀ ਸੁਰੱਖਿਆ ਚੌਕਸੀ ਵਧਾ ਦਿੱਤੀ ਗਈ ਹੈ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।
