ਰਾਂਚੀ, 4 ਜਨਵਰੀ: ਚਾਰਾ ਘਪਲੇ ਨਾਲ ਜੁੜੇ ਅਤੇ ਦੇਵਧਰ ਖ਼ਜ਼ਾਨੇ 'ਚੋਂ 89 ਲੱਖ 27 ਹਜ਼ਾਰ ਰੁਪਏ ਦੀ ਨਾਜਾਇਜ਼ ਨਿਕਾਸੀ ਦੇ ਮੁਕੱਦਮੇ 'ਚ ਬਿਹਾਰ ਦੇ ਸਾਬਕਾ ਮੁੱਖ ਮੰਤਰੀ ਅਤੇ ਆਰ.ਜੇ.ਡੀ. ਮੁਖੀ ਲਾਲੂ ਪ੍ਰਸਾਦ ਯਾਦਵ, ਆਰ.ਕੇ. ਰਾਣਾ, ਜਗਦੀਸ਼ ਸ਼ਰਮਾ ਅਤੇ ਤਿੰਨ ਸਾਬਕਾ ਆਈ.ਏ.ਐਸ. ਅਧਿਕਾਰੀਆਂ ਸਮੇਤ 16 ਦੋਸ਼ੀਆਂ ਦੀ ਸਜ਼ਾ ਦੇ ਸਮੇਂ 'ਤੇ ਅਦਾਲਤ ਨੇ ਫ਼ੈਸਲਾ ਕਲ ਤਕ ਲਈ ਮੁਲਤਵੀ ਕਰ ਦਿਤਾ ਹੈ।ਸੀ.ਬੀ.ਆਈ. ਦੇ ਵਿਸ਼ੇਸ਼ ਜੱਜ ਸ਼ਿਵਪਾਲ ਸਿੰਘ ਦੀ ਅਦਾਲਤ 'ਚ ਅੱਜ 11 ਵਜੇ ਚਾਰਾ ਘਪਲੇ ਦੇ ਇਸ ਮਾਮਲੇ 'ਚ ਦੋਸ਼ੀ ਕਰਾਰ ਦਿਤੇ ਸਾਰੇ 16 ਜਣਿਆਂ ਦੀ ਸਜ਼ਾ ਦੇ ਸਮੇਂ ਬਾਰੇ ਬਹਿਸ ਸ਼ੁਰੂ ਹੋਣੀ ਸੀ ਪਰ ਅਦਾਲਤ ਨੇ ਕਾਰਵਾਈ ਸ਼ੁਰੂ ਹੋਣ ਤੋਂ ਬਾਅਦ ਇਸ ਲਈ ਦੁਪਹਿਰ ਬਾਅਦ ਦੋ ਵਜੇ ਦਾ ਸਮਾਂ ਤੈਅ ਕੀਤਾ। ਇਸ ਕਰ ਕੇ ਸੁਰੱਖਿਆ ਕਾਰਨਾਂ ਦੇ ਮੱਦੇਨਜ਼ਰ ਆਰ.ਜੇ.ਡੀ. ਮੁਖੀ ਲਾਗੂ ਪ੍ਰਸਾਦ ਯਾਦਵ ਨੂੰ ਹੋਤਵਾਰ ਸਥਿਤ ਬਿਰਸਾ ਮੁੰਡਾ ਜੇਲ ਤੋਂ ਦੁਪਹਿਰ ਪੌਣੇ ਦੋ ਵਜੇ ਸੀ.ਬੀ.ਆਈ. ਅਦਾਲਤ 'ਚ ਪੇਸ਼ ਕੀਤਾ ਗਿਆ। 

ਲਾਲੂ ਨਾਲ ਇਸ ਮਾਮਲੇ ਦੇ ਸਾਰੇ 16 ਮੁਲਜ਼ਮਾਂ ਨੂੰ ਅਦਾਲਤ 'ਚ ਪੇਸ਼ ਕੀਤਾ ਗਿਆ ਜਿਥੇ ਸਾਰਿਆਂ ਦੀ ਸਜ਼ਾ ਦੇ ਸਮੇਂ 'ਤੇ ਉਨ੍ਹਾਂ ਦੇ ਵਕੀਲਾਂ ਨੇ ਬਹਿਸ ਕੀਤੀ ਹਾਲਾਂਕਿ ਅਦਾਲਤ ਦੀ ਸੂਚੀ ਅਨੁਸਾਰ ਦੋਸ਼ੀਆਂ ਦੀ ਸਜ਼ਾ 'ਤੇ ਬਹਿਸ ਸੁਣਨ ਦੇ ਫ਼ੈਸਲੇ ਕਰ ਕੇ ਲਾਲੂ ਦੀ ਸਜ਼ਾ ਦੇ ਸਮੇਂ 'ਤੇ ਬਹਿਸ ਸ਼ੁਰੂ ਨਹੀਂ ਹੋ ਸਕੀ। ਉਨ੍ਹਾਂ ਨੂੰ ਅਦਾਲਤ ਨੇ ਪੌਣੇ ਤਿੰਨ ਵਜੇ ਦੇ ਲਗਭਗ ਵਾਪਸ ਜੇਲ ਭੇਜਣ ਦੇ ਹੁਕਮ ਦੇ ਦਿਤੇ।  ਲਾਲੂ ਪ੍ਰਸਾਦ ਯਾਦਵ ਨੇ ਜੇਲ ਜਾਣ ਤੋਂ ਪਹਿਲਾਂ ਕਿਹਾ ਕਿ ਉਨ੍ਹਾਂ ਨੂੰ ਕਿਸੇ ਸਾਜ਼ਸ਼ ਤਹਿਤ ਫਸਾਇਆ ਗਿਆ ਹੈ ਅਤੇ ਇਸ ਫ਼ੈਸਲੇ ਵਿਰੁਧ ਉਹ ਹਾਈ ਕੋਰਟ ਜਾਣਗੇ ਜਿਥੇ ਉਨ੍ਹਾਂ ਨੂੰ ਨਿਆਂ ਮਿਲੇਗਾ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਨਿਆਂਪਾਲਿਕਾ ਉਤੇ ਪੂਰਾ ਭਰੋਸਾ ਹੈ।     (ਪੀਟੀਆਈ)