ਇਸਲਾਮਾਬਾਦ, 4 ਜਨਵਰੀ : ਪਾਕਿਸਤਾਨ ਨੇ ਜਾਸੂਸੀ ਦੇ ਦੋਸ਼ ਹੇਠ ਮੌਤ ਦੀ ਸਜ਼ਾ ਦਾ ਸਾਹਮਣਾ ਕਰ ਰਹੇ ਨਾਗਰਿਕ ਕੁਲਭੂਸ਼ਣ ਜਾਧਵ ਦੀ ਅੱਜ ਇਕ ਹੋਰ ਵੀਡੀਉ ਜਾਰੀ ਕੀਤੀ। ਇਸ ਵਿਚ ਜਾਧਵ ਕਥਿਤ ਤੌਰ 'ਤੇ ਇਹ ਕਹਿੰਦਾ ਨਜ਼ਰ ਆ ਰਿਹਾ ਹੈ ਕਿ ਮੁਲਾਕਾਤ ਦੌਰਾਨ ਉਨ੍ਹਾਂ ਦੇ ਪਰਵਾਰ ਨਾਲ ਮੌਜੂਦ ਰਾਜਦੂਤ ਉਸ ਦੀ ਮਾਂ ਨੂੰ ਝਿੜਕ ਰਹੇ ਸਨ। ਵੀਡੀਉ ਵਿਚ ਜਾਧਵ ਨੇ ਕਥਿਤ ਤੌਰ 'ਤੇ ਕਿਹਾ ਹੈ ਕਿ ਉਹ ਭਾਰਤੀ ਫ਼ੌਜ ਦਾ ਅਧਿਕਾਰੀ ਹੈ ਅਤੇ ਉਸ ਦੀ ਸੇਵਾ ਸਮਾਪਤ ਨਹੀਂ ਹੋਈ। ਉਸ ਨੇ ਭਾਰਤ ਨੂੰ ਪੁਛਿਆ ਕਿ ਉਹ ਝੂਠ ਕਿਉਂ ਬੋਲ ਰਿਹਾ ਹੈ ਕਿ ਉਹ ਇਕ ਗੁਪਤਚਰ ਏਜੰਸੀ ਲਈ ਕੰਮ ਕਰ ਰਿਹਾ ਹੈ।
ਉਂਜ ਇਸ ਵੀਡੀਉ ਦੀ ਵਾਸਤਵਿਕਤਾ ਦਾ ਪਤਾ ਨਹੀਂ ਚੱਲ ਸਕਿਆ। ਜਾਧਵ ਕਹਿੰਦਾ ਹੈ, 'ਮੈਂ ਅਪਣੀ ਮਾਂ ਦੀਆਂ ਅੱਖਾਂ ਵਿਚ ਡਰ ਵੇਖ ਸਕਦਾ ਹਾਂ। ਜਦ ਮੇਰੀ ਮਾਂ ਬਾਹਰ ਜਾ ਰਹੀ ਸੀ ਤਦ ਭਾਰਤੀ ਡਿਪਲੋਮੈਟ ਉਸ 'ਤੇ ਚੀਖ ਰਹੇ ਸਨ। ਇਹ ਮੁਲਾਕਾਤ ਹਾਂਪੱਖੀ ਚੀਜ਼ ਸੀ, ਇਸ ਲਈ ਮੇਰੀ ਮਾਂ ਖ਼ੁਸ਼ ਹੋਵੇਗੀ ਅਤੇ ਮੈਂ ਵੀ ਖ਼ੁਸ਼ ਹੋਵਾਂਗਾ।' ਉਧਰ, ਭਾਰਤ ਨੇ ਕਿਹਾ ਹੈ ਕਿ ਪਾਕਿਸਤਾਨ ਵਲੋਂ ਜਾਰੀ ਕੀਤੀ ਗਈ ਵੀਡੀਉ ਭਰੋਸੇਯੋਗ ਨਹੀਂ ਹੈ। ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਰਵੀਸ਼ ਕੁਮਾਰ ਨੇ ਕਿਹਾ, 'ਇਹ ਹੈਰਾਨੀਜਨਕ ਨਹੀਂ ਹੈ। ਪਾਕਿਸਤਾਨ ਜਬਰਨ ਬਿਆਨ ਵਾਲੀਆਂ ਵੀਡੀਉਜ਼ ਜਾਰੀ ਕਰਦਾ ਹੈ। ਉਸ ਨੂੰ ਸਮਝਣਾ ਚਾਹੀਦਾ ਹੈ ਕਿ ਇਸ ਤਰ੍ਹਾਂ ਦੇ ਕੂੜਪ੍ਰਚਾਰ ਵਾਲੇ ਕਾਰੇ ਦੀ ਕੋਈ ਭਰੋਸੇਯੋਗਤਾ ਨਹੀਂ ਹੈ। (ਏਜੰਸੀ)
