ਟੌਹੜਾ ਵਾਂਗ ਉਭਰੇ ਸੁਖਦੇਵ ਸਿੰਘ ਢੀਂਡਸਾ ਨਾਲ ਹੀ ਸਰਗਰਮ ਹੋਏ ਪਰਮਿੰਦਰ ਢੀਂਡਸਾ
ਚੰਡੀਗੜ੍ਹ (ਸਪੋਕਸਮੈਨ ਸਮਾਚਾਰ ਸੇਵਾ) : ਅਪਣਾ 100 ਸਾਲਾ ਸਥਾਪਨਾ ਦਿਵਸ ਮਨਾ ਰਹੇ ਅਕਾਲੀ ਦਲ ਨੂੰ ਭਾਵੇਂ ਬੀਤੇ ਸਾਲ 'ਚ ਹੀ ਕਈ ਝਟਕੇ ਲੱਗ ਗਏ ਸਨ ਪਰ ਪਾਰਟੀ ਦੀ ਲੀਡਰਸ਼ਿਪ ਨੇ ਉਸ ਤੋਂ ਸਬਕ ਨਹੀਂ ਲਿਆ ਜਿਸ ਕਾਰਨ 2020 'ਚ ਵੀ ਉਸੇ ਤਰ੍ਹਾਂ ਪਾਰਟੀ ਦੇ ਕਈ ਸੀਨੀਅਰ ਆਗੂ ਪਾਰਟੀ ਨੂੰ ਅਲਵਿਦਾ ਕਹਿ ਰਹੇ ਹਨ ਤੇ ਉਨ੍ਹਾਂ ਦਾ ਦਾਅਵਾ ਹੈ ਕਿ ਪਾਰਟੀ ਪ੍ਰਧਾਨ ਦੀ ਤਾਨਾਸ਼ਾਹੀ ਕਾਰਨ ਬਹੁਤ ਸਾਰੇ ਪਾਰਟੀ ਆਗੂ ਤੇ ਵਰਕਰ ਅਪਣੇ ਘਰਾਂ 'ਚ ਬੈਠ ਗਏ ਹਨ।
Shiromani Akali Dal
ਉਨ੍ਹਾਂ ਦਾ ਇਹ ਵੀ ਦਾਅਵਾ ਹੈ ਕਿ ਪਾਰਟੀ 'ਤੇ ਇਕ ਪਰਵਾਰ ਦੇ ਹਾਵੀ ਹੋ ਜਾਣ ਕਾਰਨ ਟਕਸਾਲੀਆਂ ਦੀ ਪੁਛਗਿੱਛ ਨਹੀਂ ਰਹੀ ਤੇ ਬਹੁਤ ਸਾਰੇ ਹੋਰ ਆਗੂ ਵੀ ਪਾਰਟੀ ਨੂੰ ਅਲਵਿਦਾ ਕਹਿਣਗੇ ਪਰ ਫ਼ਿਲਹਾਲ ਉਨ੍ਹਾਂ ਨੂੰ ਕੋਈ ਵਿਕਲਪ ਨਹੀਂ ਮਿਲ ਰਿਹਾ ਇਸ ਲਈ ਪਾਰਟੀ ਦੇ ਅੰਦਰ ਹੀ ਖ਼ਾਮੋਸ਼ ਰਹਿ ਕੇ ਸਮਾਂ ਲੰਘਾ ਰਹੇ ਹਨ ਤਾਕਿ ਸਿਆਸੀ ਭਵਿੱਖ ਖ਼ਤਰੇ 'ਚ ਨਾ ਪਵੇ।
Jathedar Gurcharan Singh Tohra
ਇਨ੍ਹਾਂ ਆਗੂਆਂ ਦੀ ਗੱਲਬਾਤ ਤੋਂ ਇਹੀ ਲਗਦਾ ਹੈ ਕਿ ਬਾਦਲਾਂ ਦੇ ਅਕਾਲੀ ਦਲ ਨੂੰ ਨਵੇਂ ਸਾਲ ਅੰਦਰ ਕਈ ਹੋਰ ਝਟਕੇ ਵੀ ਲੱਗ ਸਕਦੇ ਹਨ। ਇਸ ਦੇ ਪਿਛੇ ਇਹ ਵੀ ਦਲੀਲ ਦਿਤੀ ਜਾ ਰਹੀ ਹੈ ਕਿ ਬਾਗ਼ੀ ਹੋਈ ਟਕਸਾਲੀ ਆਗੂ ਸੁਖਦੇਵ ਸਿੰਘ ਢੀਂਡਸਾ ਨੂੰ ਕਈ ਅਕਾਲੀ ਆਗੂ ਮਰਹੂਮ ਜਥੇਦਾਰ ਗੁਰਚਰਨ ਸਿੰਘ ਟੌਹੜਾ ਦੀ ਥਾਂ ਦੇਖਣ ਲੱਗ ਪਏ ਹਨ।
Parminder Singh Dhindsa
ਭਾਵੇਂ ਅਕਾਲੀ ਆਗੂ ਕਿੰਨਾ ਵੀ ਕਹੀ ਜਾਣ ਕਿ ਢੀਂਡਸਾ ਪੱਲੇ ਕੁੱਝ ਨਹੀਂ ਪਰ ਉਹ ਇਹ ਵੀ ਜਾਣਦੇ ਹਨ ਕਿ ਜੇਕਰ ਢੀਂਡਸਾ ਆਪ ਸੱਤਾ ਤਕ ਨਾ ਪਹੁੰਚ ਸਕੇ ਤਾਂ ਅਕਾਲੀ ਦਲ ਨੂੰ ਵੀ ਸੱਤਾ 'ਚ ਜਾਣ ਤੋਂ ਰੋਕ ਸਕਦੇ ਹਨ।
ਉਧਰ ਟਕਸਾਲੀ ਅਕਾਲੀ ਆਗੂਆਂ ਨੇ 18 ਜਨਵਰੀ ਨੂੰ ਦਿੱਲੀ 'ਚ ਹਮਖ਼ਿਆਲੀਆਂ ਦੀ ਮੀਟਿੰਗ ਬੁਲਾ ਲਈ ਹੈ ਤੇ ਇਸ ਮੀਟਿੰਗ ਨੂੰ ਸਫ਼ਲ ਬਣਾਉਣ ਲਈ ਦਿੱਲੀ ਅੰਦਰ ਬਾਦਲਾਂ ਦੇ ਸੱਭ ਤੋਂ ਵੱਡੇ ਵਿਰੋਧੀ ਮਨਜੀਤ ਸਿੰਘ ਜੀਕੇ ਪੱਬਾਂ ਭਾਰ ਹਨ ਤੇ ਉਹ ਦਾਅਵਾ ਕਰ ਰਹੇ ਹਨ ਕਿ ਮਾਸਟਰ ਤਾਰਾ ਸਿੰਘ ਦੀ ਸੋਚ ਨਾਲ ਜੁੜੇ ਦਿੱਲੀ ਦੇ ਅਕਾਲੀ ਆਗੂ ਤੇ ਵਰਕਰ ਇਸ ਮੀਟਿੰਗ 'ਚ ਹਿੱਸਾ ਲੈਣਗੇ ਅਤੇ ਬਾਦਲਾਂ ਦੀਆਂ ਚੂਲਾਂ ਹਿਲਾ ਦੇਣਗੇ।
Manjit Singh GK
ਇਸ ਮੀਟਿੰਗ ਲਈ ਸੱਭ ਤੋਂ ਪਹਿਲਾਂ ਬਾਗ਼ੀ ਹੋਏ ਜਥੇਦਾਰ ਬ੍ਰਹਮਪੁਰਾ, ਜਥੇਦਾਰ ਸੇਵਾ ਸਿੰਘ ਸੇਖਵਾਂ, ਜਥੇਦਾਰ ਅਜਨਾਲਾ ਸਮੇਤ ਦੂਜੇ ਟਕਸਾਲੀ ਆਗੂ ਵੀ ਪੂਰੀ ਤਰ੍ਹਾਂ ਸਰਗਰਮ ਹਨ। ਟਕਸਾਲੀਆਂ ਦੀ ਇਸ ਮੀਟਿੰਗ ਅੰਦਰ ਕੀ ਸਹਿਮਤੀ ਬਣਦੀ ਹੈ ਤੇ ਭਵਿੱਖ ਬਾਰੇ ਕਿਹੜੀ ਰਣਨੀਤੀ ਬਣਦੀ ਹੈ, ਉਹ ਅਕਾਲੀ ਦਲ ਦਾ ਭਵਿੱਖ ਤੈਅ ਕਰੇਗੀ ਤੇ ਟਕਸਾਲੀ ਦੀ ਭੂਮਿਕਾ ਸਪੱਸ਼ਟ ਹੋ ਜਾਵੇਗੀ।
Sukhdev Dhindsa
ਇਹ ਮੀਟਿੰਗ ਇਹ ਵੀ ਤੈਅ ਕਰ ਦੇਵੇਗੀ ਕਿ ਸਾਰੇ ਟਕਸਾਲੀ ਆਗੂ ਸੁਖਦੇਵ ਸਿੰਘ ਢੀਂਡਸਾ ਨੂੰ ਗੁਰਚਰਨ ਸਿੰਘ ਟੌਹੜਾ ਵਾਂਗ ਅਗਵਾਈ ਦਿੰਦੇ ਹਨ ਜਾਂ ਨਹੀਂ।
ਉਧਰ ਪਿਤਾ ਦੇ ਨਕਸ਼ੇ ਕਦਮਾਂ 'ਤੇ ਤੁਰੇ ਪਰਮਿੰਦਰ ਸਿੰਘ ਢੀਂਡਸਾ ਵੀ ਹੁਣ ਬਾਦਲਾਂ ਵਿਰੁਧ ਪੂਰੀ ਤਰ੍ਹਾਂ ਸਰਗਰਮ ਹੋ ਗਏ ਹਨ। ਅਕਾਲੀ ਦਲ ਨੂੰ ਝਟਕਾ ਦੇਣ ਤੋਂ ਬਾਅਦ ਹੁਣ ਪਰਮਿੰਦਰ ਢੀਂਢਸਾ ਛੇਤੀ ਹੀ ਕੋਈ ਵੱਡਾ ਧਮਾਕਾ ਕਰਨ ਦੀ ਤਿਆਰੀ ਵਿਚ ਹਨ।
Simarjit Singh Bains
ਇਸ ਬਾਬਤ ਤਿਆਰੀ ਵੀ ਸ਼ੂਰੂ ਹੋ ਗਈ ਹੈ। ਕਿਆਸਰਾਈਆਂ ਤੇਜ਼ ਹਨ ਕਿ ਹੁਣ ਇਕ ਹੋਰ ਵੱਡਾ ਫ਼ਰੰਟ ਖੜਾ ਕਰਨ ਦੀ ਤਿਆਰੀ ਹੋ ਰਹੀ ਹੈ, ਜੋ ਕਿ ਅਕਾਲੀ ਦਲ ਨੂੰ ਟੱਕਰ ਦੇਵੇਗਾ। ਇਸੇ ਨੂੰ ਲੈ ਕੇ ਅੱਜ ਚੰਡੀਗੜ੍ਹ ਵਿਖੇ ਪਰਮਿੰਦਰ ਢੀਂਡਸਾ ਤੇ ਸਿਮਰਜੀਤ ਬੈਂਸ ਵਿਚਾਲੇ ਮੀਟਿੰਗ ਹੋਈ। ਬੈਂਸ ਵਿਧਾਨ ਸਭਾ ਕਮੇਟੀ ਦੀ ਅਪਣੀ ਮੀਟਿੰਗ ਤੋਂ ਬਾਅਦ ਢੀਂਡਸਾ ਨਾਲ ਭਵਿੱਖ ਦੀ ਸਿਆਸਤ ਦੀ ਚਰਚਾ ਕਰਨ ਪਹੁੰਚੇ।
Akali Dal
ਇਸ ਤੋਂ ਪਹਿਲਾਂ ਨਵੀਂ ਪੱਕ ਰਹੀ ਸਿਆਸੀ ਖਿਚੜੀ ਬਾਰੇ ਬੈਂਸ ਬੋਲੇ ਕਿ ਖਿਚੜੀ ਨਹੀਂ ਇਹ ਤਾਂ ਖੀਰ ਬਣ ਰਹੀ ਹੈ। ਗੱਲਬਾਤ ਤਾਂ ਲਗਾਤਾਰ ਜਾਰੀ ਹੀ ਸੀ, ਪਰ ਹੁਣ ਛੇਤੀ ਹੀ ਕੋਈ ਮੁਕਾਮ ਹਾਸਲ ਹੋਣ ਵਾਲਾ ਹੈ, ਜਿਸ ਬਾਰੇ ਦਸਿਆ ਜਾਵੇਗਾ। ਸਾਰੇ ਹਮਖਿਆਲੀ ਇਕ ਥਾਂ ਨਹੀਂ ਬਲਕਿ ਕਈ ਹੋਰ ਅਕਾਲੀ ਵੀ ਹੁਣ ਨਾਲ ਆਉਣ ਵਾਲੇ ਹਨ।
ਇਸ ਸਾਰੀ ਕਹਾਣੀ ਤੋਂ ਇਹੀ ਸਿੱਧ ਹੋ ਰਿਹਾ ਹੈ ਕਿ ਅਕਾਲੀ ਦਲ ਬਾਦਲ ਨੂੰ ਟੱਕਰ ਦੇਣ ਲਈ ਕਈ ਧਿਰਾਂ ਇਕ ਮੰਚ 'ਤੇ ਆਉਣ ਲਈ ਉਤਾਵਲੀਆਂ ਹਨ। ਜੇਕਰ ਇਸ ਫ਼ਰੰਟ 'ਚ ਕਿਧਰੇ 'ਆਪ' ਵਾਲੇ ਸ਼ਾਮਲ ਹੋ ਗਏ ਤਾਂ ਪੰਜਾਬ ਦੇ ਸਿਆਸੀ ਭਵਿੱਖ ਹੀ ਕੁੱਝ ਹੋਰ ਹੋਵੇਗਾ।
