ਇਸ ਮਹੀਨੇ ਤੋਂ ਪੈ ਸਕਦੈ ਆਮ ਜਨਤਾ ਦੀ ਜੇਬ 'ਤੇ ਵਾਧੂ ਭਾਰ
ਮੋਟਰ ਬੀਮਾ ਪ੍ਰੀਮੀਅਮ, ਐਲਪੀਜੀ ਗੈਸ ਸਿਲੰਡਰ ਦੀ ਕੀਮਤ ਵਿਚ ਹੋਣਗੇ ਬਦਲਾਅ
ਨਵੀਂ ਦਿੱਲੀ, 30 ਮਈ : ਜੂਨ ਮਹੀਨੇ ਦੀ ਸ਼ੁਰੂਆਤ 'ਚ ਕੁਝ ਵੱਡੇ ਨਿਯਮ ਬਦਲਣ ਜਾ ਰਹੇ ਹਨ ਜਿਸ ਦਾ ਸਿੱਧਾ ਅਸਰ ਤੁਹਾਡੀ ਜੇਬ 'ਤੇ ਪਵੇਗਾ | 1 ਜੂਨ ਤੋਂ ਗੋਲਡ ਹਾਲਮਾਰਕਿੰਗ, ਐਸਬੀਆਈ ਹੋਮ ਲੋਨ, ਐਕਸਿਸ ਬੈਂਕ ਬੱਚਤ ਖਾਤੇ ਦੇ ਨਿਯਮਾਂ, ਮੋਟਰ ਬੀਮਾ ਪ੍ਰੀਮੀਅਮ ਅਤੇ ਐਲਪੀਜੀ ਗੈਸ ਸਿਲੰਡਰ ਦੀ ਕੀਮਤ ਵਿਚ ਬਦਲਾਅ ਹੋਣ ਜਾ ਰਹੇ ਹਨ |
ਦੇਸ਼ ਦੇ ਸੱਭ ਤੋਂ ਵੱਡੇ ਬੈਂਕ ਸਟੇਟ ਬੈਂਕ ਆਫ਼ ਇੰਡੀਆ ਨੇ ਹੋਮ ਲੋਨ ਲਈ ਐਕਸਟਰਨਲ ਬੈਂਚਮਾਰਕ ਲੈਂਡਿੰਗ ਰੇਟ ਵਧਾ ਦਿਤਾ ਹੈ | ਹੁਣ ਇਹ ਬੈਂਚਮਾਰਕ ਦਰ 0.40 ਫ਼ੀ ਸਦੀ ਵਧ ਕੇ 7.05 ਫ਼ੀ ਸਦੀ ਹੋ ਗਈ ਹੈ | ਸਟੇਟ ਬੈਂਕ ਦੀ ਅਧਿਕਾਰਤ ਵੈਬਸਾਈਟ ਮੁਤਾਬਕ ਵਧੀਆਂ ਵਿਆਜ ਦਰਾਂ 1 ਜੂਨ ਤੋਂ ਲਾਗੂ ਹੋਣਗੀਆਂ |
ਤੁਹਾਡਾ ਮੋਟਰ ਬੀਮਾ ਪ੍ਰੀਮੀਅਮ 1 ਜੂਨ ਤੋਂ ਮਹਿੰਗਾ ਹੋ ਜਾਵੇਗਾ | ਕੇਂਦਰ ਸਰਕਾਰ ਨੇ ਥਰਡ ਪਾਰਟੀ ਮੋਟਰ ਵਹੀਕਲ ਇੰਸ਼ੋਰੈਂਸ ਲਈ ਪ੍ਰੀਮੀਅਮ ਵਧਾ ਦਿਤਾ ਹੈ | ਹੁਣ 1000 ਸੀਸੀ ਇੰਜਣ ਸਮਰੱਥਾ ਵਾਲੀਆਂ ਕਾਰਾਂ ਨੂੰ 2,094 ਰੁਪਏ ਦਾ ਬੀਮਾ ਪ੍ਰੀਮੀਅਮ ਅਦਾ ਕਰਨਾ ਹੋਵੇਗਾ | ਇਸ ਦੇ ਨਾਲ ਹੀ 1,000 ਸੀਸੀ ਤੋਂ 1500 ਸੀਸੀ ਤਕ ਦੇ ਇੰਜਣ ਵਾਲੀਆਂ ਕਾਰਾਂ ਲਈ ਬੀਮਾ ਪ੍ਰੀਮੀਅਮ 3221 ਰੁਪਏ ਤੋਂ ਵਧਾ ਕੇ 3416 ਰੁਪਏ ਕਰ ਦਿਤਾ ਗਿਆ ਹੈ | ਗੋਲਡ ਹਾਲਮਾਰਕਿੰਗ ਦਾ ਦੂਜਾ ਪੜਾਅ 1 ਜੂਨ ਤੋਂ ਲਾਗੂ ਹੋਵੇਗਾ | ਹੁਣ 32 ਨਵੇਂ ਜ਼ਿਲਿ੍ਹਆਂ ਵਿਚ ਹਾਲਮਾਰਕਿੰਗ ਕੇਂਦਰ ਖੋਲ੍ਹੇ ਜਾਣਗੇ | ਪਹਿਲਾਂ 256 ਜ਼ਿਲਿ੍ਹਆਂ ਵਿਚ ਹਾਲਮਾਰਕਿੰਗ ਕੇਂਦਰ ਸਨ | ਹੁਣ 288 ਜ਼ਿਲਿ੍ਹਆਂ ਵਿਚ ਸਿਰਫ਼ 20 ਤੋਂ 24 ਕੈਰੇਟ ਦਾ ਹਾਲਮਾਰਕ ਵਾਲਾ ਸੋਨਾ ਹੀ ਵਿਕੇਗਾ |
ਹੁਣ ਹਾਲਮਾਰਕਿੰਗ ਤੋਂ ਬਿਨਾਂ ਸੋਨਾ ਵੇਚਣਾ ਸੰਭਵ ਨਹੀਂ ਹੋਵੇਗਾ |
ਗਰੀਬਾਂ ਲਈ ਮੁਫਤ ਰਾਸ਼ਨ ਯਾਨੀ ਕਣਕ ਦਾ ਕੋਟਾ ਘਟਾਇਆ ਗਿਆ ਹੈ | ਉੱਤਰ ਪ੍ਰਦੇਸ਼, ਬਿਹਾਰ ਅਤੇ ਕੇਰਲ ਨੂੰ ਹੁਣ 1 ਜੂਨ ਤੋਂ 3 ਕਿਲੋ ਕਣਕ ਅਤੇ 2 ਕਿਲੋ ਚੌਲ ਦੀ ਬਜਾਏ 5 ਕਿਲੋ ਚੌਲ ਦਿਤੇ ਜਾਣਗੇ | ਹਰ ਮਹੀਨੇ ਦੀ ਪਹਿਲੀ ਤਰੀਕ ਨੂੰ ਗੈਸ ਸਿਲੰਡਰ ਦੀਆਂ ਕੀਮਤਾਂ 'ਚ ਬਦਲਾਅ ਹੁੰਦਾ ਹੈ | ਕੌਮਾਂਤਰੀ ਬਾਜ਼ਾਰ 'ਚ ਗੈਸ ਦੀਆਂ ਕੀਮਤਾਂ ਵਧਣ ਦੇ ਮੱਦੇਨਜ਼ਰ ਇਸ ਦਾ ਅਸਰ ਘਰੇਲੂ ਬਾਜ਼ਾਰ 'ਚ ਵੀ ਦੇਖਣ ਨੂੰ ਮਿਲ ਸਕਦਾ ਹੈ | (ਏਜੰਸੀ)
