ਪੰਜਾਬ ਵਿਧਾਨ ਸਭਾ ਦਾ ਇਕ ਰੋਜ਼ਾ ਸੈਸ਼ਨ ਇਸੇ ਮਹੀਨੇ ਸੱਦਿਆ ਜਾ ਰਿਹਾ ਹੈ................
ਚੰਡੀਗੜ੍ਹ : ਪੰਜਾਬ ਵਿਧਾਨ ਸਭਾ ਦਾ ਇਕ ਰੋਜ਼ਾ ਸੈਸ਼ਨ ਇਸੇ ਮਹੀਨੇ ਸੱਦਿਆ ਜਾ ਰਿਹਾ ਹੈ। ਸੂਤਰਾਂ ਮੁਤਾਬਕ ਜੀਐਸਟੀ ਬਾਰੇ ਕੇਂਦਰ 'ਚ ਸੰਵਿਧਾਨਕ ਬਦਲਾਅ ਇਸ ਇਕ ਦਿਨਾ ਸੰਖੇਪ ਸੈਸ਼ਨ ਦਾ ਮੁੱਖ ਏਜੰਡਾ ਰਹਿਣ ਜਾ ਰਿਹਾ ਹੈ। ਇਹ ਵੀ ਜਾਣਕਾਰੀ ਮਿਲੀ ਹੈ ਕਿ ਸਾਰੀਆਂ ਪ੍ਰਾਂਤਕ ਸਰਕਾਰਾਂ ਵਲੋਂ ਇਸ ਸਿਲਸਿਲੇ 'ਚ ਸੈਸ਼ਨ ਸੱਦੇ ਜਾਣੇ ਹਨ। ਜਾਣਕਾਰ ਸੂਤਰਾਂ ਮੁਤਾਬਕ 15 ਤੋਂ 20 ਸਤੰਬਰ ਦੇ ਆਸ-ਪਾਸ ਸੱਦਿਆ ਜਾਣ ਵਾਲਾ ਇਹ ਇਕ ਬੇਹੱਦ ਸੰਖੇਪ ਅਤੇ ਨਿਸ਼ਚਿਤ ਏਜੰਡਾ ਅਧਾਰਤ ਹੋਵੇਗਾ, ਪਰ ਹਾਲੀਆ ਮਾਨਸੂਨ ਸੈਸ਼ਨ ਦੌਰਾਨ ਵਾਪਰੇ ਘਟਨਾਕ੍ਰਮ ਦਾ ਪ੍ਰਭਾਵ ਹਾਲ ਦੀ ਘੜੀ ਸਰਕਾਰੇ ਦਰਬਾਰੇ ਤਾਂ ਹਾਲੇ ਵੀ ਕਾਇਮ ਹੈ ਹੀ ਸਗੋਂ ਮਾਨਸੂਨ ਸੈਸ਼ਨ 'ਚ
ਬੇਅਦਬੀ ਅਤੇ ਗੋਲੀਕਾਂਡ ਬਾਰੇ ਜਸਟਿਸ (ਸੇਵਾਮੁਕਤ) ਰਣਜੀਤ ਸਿੰਘ ਕਮਿਸ਼ਨ ਦੀ ਰੀਪੋਰਟ 'ਤੇ ਹੋਈ ਬਹਿਸ ਅਤੇ ਸੀਬੀਆਈ ਤੋਂ ਕੇਸ ਵਾਪਸੀ ਦੇ ਮਤੇ ਤੇ ਸੂਬਾ ਭਰ 'ਚ ਲੋਕ ਦਿਲਚਸਪੀ ਪੂਰੀ ਤਰਾਂ ਵਧੀ ਹੋਈ ਹੈ। ਇਸੇ ਦੌਰਾਨ 5 ਸਤੰਬਰ ਤੋਂ ਬਾਅਦ ਕਿਸੇ ਵੇਲੇ ਵੀ ਐਸਵਾਈਐਲ ਉਤੇ ਸੁਪਰੀਮ ਕੋਰਟ ਦਾ ਸੰਭਾਵੀ ਫ਼ੈਸਲਾ ਆਉਣ ਦੀ ਸੂਰਤ 'ਚ ਸੂਬਾਈ ਸਿਆਸਤ ਕੋਈ ਵੀ ਰੰਗ ਵਟਾ ਸਕਦੀ ਹੈ। ਜਿਸ ਤੋਂ ਸੰਭਵ ਹੈ ਕਿ ਆਗਾਮੀ ਇਕ ਰੋਜ਼ਾ ਵਿਸ਼ੇਸ਼ ਸੈਸ਼ਨ ਸੂਬੇ ਦੇ ਤਾਜਾ ਸਮੀਕਰਨਾਂ ਦੇ ਪ੍ਰਭਾਵ ਤੋਂ ਅਭਿੱਜ ਨਹੀਂ ਰਹੇਗਾ।
