ਵਿਦੇਸ਼ ਜਾਣ ਲਈ ਜਸਮੀਤ ਸਿੰਘ ਨੇ ਨੌਕਰੀ ਛੱਡ ਦਿੱਤੀ ਪਰ ਕੁਝ ਦਿਨ ਪਹਿਲਾਂ ਉਸ ਦੀ ਪਤਨੀ ਨੇ ਤਲਾਕ ਦੇ ਕਾਗਜ਼ ਭੇਜ ਦਿੱਤੇ।
ਧੂਰੀ: ਵਿਦੇਸ਼ ਜਾਣ ਦੀ ਤਿਆਰੀ ਕਰ ਰਹੇ ਨੌਜਵਾਨ ਨੇ ਪਤਨੀ ਵੱਲੋਂ ਭੇਜਿਆ ਤਲਾਕ ਦਾ ਨੋਟਿਸ ਮਿਲਣ ਮਗਰੋਂ ਖੁਦਕੁਸ਼ੀ ਕਰ ਲਈ। ਇਹ ਮਾਮਲਾ ਧੂਰੀ ਦੇ ਪਿੰਡ ਕਾਂਝਲਾ ਦਾ ਹੈ। ਮ੍ਰਿਤਕ ਜਸਮੀਤ ਸਿੰਘ (34) ਦੇ ਤਾਏ ਦੇ ਮੁੰਡੇ ਇਕਬਾਲ ਸਿੰਘ ਨੇ ਦੱਸਿਆ ਕਿ ਜਸਮੀਤ ਸਿੰਘ ਵਿਆਹ ਉਪਰੰਤ ਸਾਲ 2019 ’ਚ ਆਪਣੀ ਪਤਨੀ ਨਾਲ ਵਿਜੀਟਰ ਵੀਜਾ ’ਤੇ ਆਸਟ੍ਰੇਲੀਆ ਗਿਆ ਸੀ, ਜਿਸ ਤੋਂ ਬਾਅਦ ਉਸ ਨੇ ਪਤਨੀ ਦਾ ਸਟਡੀ ਵੀਜ਼ਾ ਲਗਵਾ ਦਿੱਤਾ। ਲੜਕੀ ਦਾ ਵਿਦੇਸ਼ ਜਾਣ ਦਾ ਸਾਰਾ ਖਰਚਾ ਲੜਕੇ ਦੇ ਪਰਿਵਾਰ ਵੱਲੋਂ ਕੀਤਾ ਗਿਆ।
ਪਤਨੀ ਦਾ ਵੀਜ਼ਾ ਲੱਗਣ ਤੋਂ ਕਰੀਬ ਮਹੀਨੇ ਬਾਅਦ ਜਸਮੀਤ ਸਿੰਘ ਵਾਪਸ ਪਰਤ ਆਇਆ। ਕੁਝ ਸਮੇਂ ਪਹਿਲਾਂ ਜਸਮੀਤ ਦੀ ਪਤਨੀ ਨੇ ਜਸਮੀਤ ਨੂੰ ਵਿਦੇਸ਼ ਬੁਲਾਉਣ ਦੀ ਗੱਲ ਕਹੀ। ਜਸਮੀਤ ਪੀਏਡੀਬੀ ਬੈਂਕ ਸੰਗਰੂਰ ਵਿਖੇ ਨੌਕਰੀ ਕਰ ਰਿਹਾ ਸੀ। ਵਿਦੇਸ਼ ਜਾਣ ਲਈ ਜਸਮੀਤ ਸਿੰਘ ਨੇ ਨੌਕਰੀ ਛੱਡ ਦਿੱਤੀ ਪਰ ਕੁਝ ਦਿਨ ਪਹਿਲਾਂ ਉਸ ਦੀ ਪਤਨੀ ਨੇ ਤਲਾਕ ਦੇ ਕਾਗਜ਼ ਭੇਜ ਦਿੱਤੇ।
ਇਸ ਦੇ ਨਾਲ ਹੀ ਜਸਮੀਤ ਸਿੰਘ ਨੂੰ ਖਾਤੇ ’ਚੋਂ ਸਾਰੇ ਪੈਸੇ ਕਢਵਾਉਣ ਦਾ ਮੈਸੇਜ ਮਿਲਿਆ। ਇਸ ਕਾਰਨ ਉਹ ਪਰੇਸ਼ਾਨ ਰਹਿਣ ਲੱਗਿਆ ਅਤੇ ਉਸ ਨੇ ਖ਼ੁਦਕੁਸ਼ੀ ਕਰ ਲਈ। ਥਾਣਾ ਸਦਰ ਧੂਰੀ ਦੇ ਐੱਸਐੱਚਓ ਸੁਖਵਿੰਦਰ ਸਿੰਘ ਗਿੱਲ ਨੇ ਘਟਨਾ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਮ੍ਰਿਤਕ ਕੋਲੋਂ ਸੁਸਾਈਡ ਨੋਟ ਵੀ ਮਿਲਿਆ ਹੈ। ਉਹਨਾਂ ਦੱਸਿਆ ਕਿ ਪਰਿਵਾਰਕ ਮੈਂਬਰਾਂ ਦੇ ਬਿਆਨਾਂ ਦੇ ਆਧਾਰ ’ਤੇ ਕਾਰਵਾਈ ਕੀਤੀ ਜਾ ਰਹੀ ਹੈ।
