ਕੰਜ਼ਿਊਮਰ ਕਮਿਸ਼ਨ ਨੇ ਕਿਹਾ, ਦੇਹ ਨੂੰ ‘ਬੰਧਕ’ ਬਣਾ ਕੇ ਰੱਖਣਾ ਅਣਮਨੁੱਖੀ
Fortis Hospital To Pay Compensation: ਫੋਰਟਿਸ ਹਸਪਤਾਲ ਵਲੋਂ ਪੈਸੇ ਨਾ ਮਿਲਣ ਕਾਰਨ ਸੇਵਾਮੁਕਤ ਸਰਕਾਰੀ ਮੁਲਾਜ਼ਮ ਦੀ ਲਾਸ਼ ਪ੍ਰਵਾਰ ਨੂੰ ਨਾ ਦੇਣ ਦੇ ਮਾਮਲੇ ਵਿਚ ਯੂਟੀ ਸਟੇਟ ਕੰਜ਼ਿਊਮਰ ਡਿਸਪਿਊਟ ਰਿਡਰੈਸਲ ਕਮਿਸ਼ਨ ਨੇ ਹਸਪਤਾਲ ਨੂੰ 4 ਲੱਖ ਰੁਪਏ ਦਾ ਹਰਜਾਨਾ ਦੇਣ ਦੇ ਨਿਰਦੇਸ਼ ਦਿਤੇ ਹਨ।
ਮੁਆਵਜ਼ੇ ਦੀ ਰਕਮ ਤੋਂ ਇਲਾਵਾ ਕਮਿਸ਼ਨ ਦੇ ਚੇਅਰਮੈਨ ਰਾਜਸ਼ੇਖਰ ਅਤਰੀ ਦੀ ਅਦਾਲਤ ਨੇ ਮੁਕੱਦਮੇਬਾਜ਼ੀ ਦੇ ਖਰਚੇ ਵਜੋਂ 35,000 ਰੁਪਏ ਹੋਰ ਅਦਾ ਕਰਨ ਲਈ ਕਿਹਾ ਹੈ। ਸ਼ਿਕਾਇਤਕਰਤਾ ਦੇ ਵਕੀਲ ਪੰਕਜ ਚਾਂਦਗੋਠੀਆ ਨੇ ਚੰਡੀਗੜ੍ਹ ਜ਼ਿਲ੍ਹਾ ਖਪਤਕਾਰ ਕਮਿਸ਼ਨ ਅੱਗੇ ਸ਼ਿਕਾਇਤ ਦਾਇਰ ਕਰਦਿਆਂ ਕਿਹਾ ਸੀ ਕਿ ਹਸਪਤਾਲ ਨੇ ਮ੍ਰਿਤਕ ਦੇ ਪ੍ਰਵਾਰ ਨੂੰ ਅਣਮਨੁੱਖੀ ਤਰੀਕੇ ਨਾਲ ਪ੍ਰੇਸ਼ਾਨ ਕੀਤਾ ਹੈ। ਪੈਸੇ ਨਾ ਦੇਣ ਦੇ ਬਦਲੇ ਉਸ ਨੇ ਲਾਸ਼ ਨੂੰ ਸੌਂਪਣ ਤੋਂ ਵੀ ਇਨਕਾਰ ਕਰ ਦਿਤਾ। ਦੇਹ ਲੈਣ ਲਈ ਮ੍ਰਿਤਕ ਦੇ ਪ੍ਰਵਾਰ ਨੂੰ 58,931 ਰੁਪਏ ਦਾ ਚੈੱਕ ਦੇਣਾ ਪਿਆ। ਇਸ ਤੋਂ ਬਾਅਦ ਹੀ ਹਸਪਤਾਲ ਨੇ ਸੂਰਤ ਸਿੰਘ ਦੀ ਲਾਸ਼ ਪ੍ਰਵਾਰ ਨੂੰ ਸੌਂਪੀ।
ਕੇਂਦਰ ਸਰਕਾਰ ਦੀ ਸਿਹਤ ਯੋਜਨਾ ਦੇ ਅਧਿਕਾਰੀਆਂ ਦੇ ਕਹਿਣ 'ਤੇ ਇਸ ਚੈੱਕ ਦੀ ਅਦਾਇਗੀ ਰੋਕ ਦਿਤੀ ਗਈ ਸੀ ਕਿਉਂਕਿ ਇਹ ਪੈਸੇ ਮਰੀਜ਼ ਦੇ ਪ੍ਰਵਾਰ ਵਲੋਂ ਨਹੀਂ ਦਿਤੇ ਜਾਣੇ ਸਨ। ਪਰ ਇਸ ਤੋਂ ਬਾਅਦ ਵੀ ਹਸਪਤਾਲ ਨਹੀਂ ਮੰਨਿਆ ਅਤੇ ਪ੍ਰਵਾਰ ਵਿਰੁਧ ਚੈੱਕ ਬਾਊਂਸ ਦਾ ਅਪਰਾਧਿਕ ਮਾਮਲਾ ਦਰਜ ਕਰ ਦਿਤਾ। ਪ੍ਰਵਾਰ ਨੇ ਇਹ ਰਕਮ ਨਕਦ ਰੂਪ ਵਿਚ ਦਿਤੀ। ਇਸ ਤੋਂ ਬਾਅਦ ਐਡਵੋਕੇਟ ਚੰਦਗੋਠੀਆ ਨੇ ਸੀਜੀਐਚਐਸ ਅਤੇ ਹਸਪਤਾਲ ਨੂੰ ਕਾਨੂੰਨੀ ਨੋਟਿਸ ਭੇਜ ਕੇ ਮਾਮਲੇ ਵਿਚ ਕਾਰਵਾਈ ਦੀ ਮੰਗ ਕੀਤੀ ਹੈ। CGHS ਨੇ ਹਸਪਤਾਲ ਨੂੰ ਗਲਤ ਕਰਾਰ ਦਿਤਾ ਅਤੇ ਉਨ੍ਹਾਂ 'ਤੇ 50,000 ਰੁਪਏ ਦਾ ਵਾਧੂ ਜੁਰਮਾਨਾ ਲਗਾਇਆ।
ਇਸ ਮਾਮਲੇ ਵਿਚ ਜ਼ਿਲ੍ਹਾ ਖਪਤਕਾਰ ਕਮਿਸ਼ਨ ਦੀ ਕਾਰਵਾਈ ਮਾਰਚ 2019 ਵਿਚ ਸ਼ੁਰੂ ਹੋਈ ਸੀ। ਚੰਦਗੋਠੀਆ ਨੇ ਦਲੀਲ ਦਿਤੀ ਕਿ ਸ਼ਿਕਾਇਤਕਰਤਾ ਨੂੰ ਸੀਜੀਐਚਐਸ ਦੁਆਰਾ ਲਗਾਏ ਗਏ ਜੁਰਮਾਨੇ ਤੋਂ ਕੋਈ ਰਾਹਤ ਨਹੀਂ ਮਿਲੀ ਹੈ। ਜ਼ਿਲ੍ਹਾ ਕਮਿਸ਼ਨ ਨੇ ਕਿਹਾ ਕਿ ਸੀਜੀਐਚਐਸ ਅਥਾਰਟੀ ਨੇ ਇਸ ਮਾਮਲੇ ਵਿਚ ਹਸਪਤਾਲ ਨੂੰ ਦੋਸ਼ੀ ਠਹਿਰਾਇਆ ਹੈ। ਹਸਪਤਾਲ ਨੇ ਇਸ ਫੈਸਲੇ ਨੂੰ ਕਿਤੇ ਵੀ ਚੁਣੌਤੀ ਨਹੀਂ ਦਿਤੀ ਹੈ। ਇਸ ਲਈ, ਇਹ ਸਪੱਸ਼ਟ ਹੈ ਕਿ ਮ੍ਰਿਤਕ ਦੇ ਪ੍ਰਵਾਰ ਨੂੰ ਨਾਜਾਇਜ਼ ਤੌਰ 'ਤੇ ਪ੍ਰੇਸ਼ਾਨ ਕੀਤਾ ਗਿਆ ਹੈ, ਜਿਸ ਲਈ ਉਹ 1 ਲੱਖ ਰੁਪਏ ਦੇ ਮੁਆਵਜ਼ੇ ਦੇ ਹੱਕਦਾਰ ਹਨ। ਸ਼ਿਕਾਇਤਕਰਤਾ ਅਤੇ ਹਸਪਤਾਲ ਨੇ ਫੈਸਲੇ ਦੇ ਵਿਰੁਧ ਸਟੇਟ ਕਮਿਸ਼ਨ ਕੋਲ ਅਪੀਲ ਕੀਤੀ ਸੀ।
ਸੀਜੀਐਚਐਸ ਲਾਭਪਾਤਰੀ ਸੈਕਟਰ-40ਸੀ ਦਾ ਸੂਰਤ ਸਿੰਘ ਦਿਲ ਦੀ ਬਿਮਾਰੀ ਦੇ ਇਲਾਜ ਲਈ ਫੋਰਟਿਸ ਹਸਪਤਾਲ ਗਿਆ ਸੀ। CGHS ਨੇ ਉਸ ਨੂੰ ਇਲਾਜ ਲਈ ਉਥੇ ਰੈਫਰ ਕਰ ਦਿਤਾ ਸੀ। ਉਸ ਨੂੰ 24 ਨਵੰਬਰ 2017 ਨੂੰ CGHS ਦੁਆਰਾ ਰੈਫਰ ਕੀਤਾ ਗਿਆ ਸੀ। ਉਸ ਦੀ ਸਰਜਰੀ ਦੌਰਾਨ 3 ਦਸੰਬਰ 2017 ਨੂੰ ਮੌਤ ਹੋ ਗਈ ਸੀ। ਇਸ ਤੋਂ ਬਾਅਦ ਉਸ ਦੀ ਪਤਨੀ ਬੇਗੋ ਦੇਵੀ ਅਤੇ ਪੁੱਤਰ ਰਜਿੰਦਰ ਸਿੰਘ ਰਾਵਤ ਨੇ ਹਸਪਤਾਲ ਤੋਂ ਲਾਸ਼ ਮੰਗੀ ਪਰ ਹਸਪਤਾਲ ਨੇ 2,05,067 ਰੁਪਏ ਦਾ ਬਿੱਲ ਸੌਂਪ ਦਿਤਾ। ਇਸ ਵਿਚੋਂ ਹਸਪਤਾਲ ਨੇ 58,931 ਰੁਪਏ ਦੇਣ ਤੋਂ ਬਾਅਦ ਹੀ ਪ੍ਰਵਾਰ ਨੂੰ ਦੇਹ ਸੌਂਪੀ।
(For more news apart from Fortis Hospital To Pay Compensation, stay tuned to Rozana Spokesman)
