ਪੀਆਰ ਨੈਨ ਨੇ ਮੈਡੀਕਲ ਭੇਜਿਆ ਹੈ ਪਰ ਵਿਪਾਸਨਾ ਨੇ ਕੁੱਝ ਨਹੀਂ ਭੇਜਿਆ ਤੇ ਕੋਈ ਜਵਾਬ ਨਹੀਂ ਦਿੱਤਾ
ਲੁਧਿਆਣਾ: ਫਰੀਦਕੋਟ ਨੇੜੇ ਬੁਰਜ ਜਵਾਹਰ ਸਿੰਘ ਵਾਲਾ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਸਰੂਪ ਦੀ ਚੋਰੀ ਅਤੇ ਬੇਅਦਬੀ ਮਾਮਲੇ ਵਿਚ ਡੇਰਾ ਸੱਚਾ ਸੌਦਾ ਸਿਰਸਾ ਦੀ ਚੇਅਰਪਰਸਨ ਵਿਪਾਸਨਾ ਇੰਸਾ ਅਤੇ ਪ੍ਰਬੰਧਕ ਪੀਆਰ ਨੈਨ ਐਸਆਈਟੀ ਵੱਲੋਂ ਤੀਜੇ ਸੰਮਨ ਦੇ ਬਾਵਜੂਦ ਵੀ ਪੇਸ਼ ਨਹੀਂ ਹੋਏ। ਜਿਸ ਤੋਂ ਬਾਅਦ ਹੁਣ ਐਸਆਈਟੀ ਸਿਰਸਾ ਜਾ ਕੇ ਉਹਨਾਂ ਤੋਂ ਪੁੱਛਗਿੱਛ ਕਰੇਗੀ। ਇਸ ਸਬੰਧੀ ਐਸਆਈਟੀ ਮੁਖੀ ਅਤੇ ਆਈਜੀ ਐਸਪੀਐਸ ਪਰਮਾਰ ਨੇ ਦੱਸਿਆ ਕਿ ਇਸ ਕੇਸ ਵਿਚ ਵਿਪਾਸਨਾ ਇੰਸਾ ਅਤੇ ਪੀਆਰ ਨੈਨ ਨੂੰ ਭੇਜਿਆ ਗਿਆ ਇਹ ਤੀਜਾ ਸੰਮਨ ਸੀ।
Vipassana Insan
ਇਨ੍ਹਾਂ ਵਿਚੋਂ ਪੀਆਰ ਨੈਨ ਨੇ ਮੈਡੀਕਲ ਭੇਜਿਆ ਹੈ ਪਰ ਵਿਪਾਸਨਾ ਨੇ ਕੁੱਝ ਨਹੀਂ ਭੇਜਿਆ ਤੇ ਕੋਈ ਜਵਾਬ ਨਹੀਂ ਦਿੱਤਾ। ਨੈਨ ਦੀ ਮੈਡੀਕਲ ਰਿਪੋਰਟ ਮੁਤਾਬਿਕ ਉਸ ਨੂੰ ਡਾਕਟਰ ਨੇ ਚਾਰ ਦਿਨਾਂ ਲਈ ਬੈੱਡ ਰੈਸਟ ਲਈ ਕਿਹਾ ਹੈ। ਐਸਆਈਟੀ ਹੁਣ ਉਸ ਹਿਸਾਬ ਨਾਲ ਸਮਾਂ ਤੈਅ ਕਰੇਗੀ ਅਤੇ ਸਿਰਸਾ ਸਥਿਤ ਡੇਰਾ ਸੱਚਾ ਸੌਦਾ ਵਿਖੇ ਉਹਨਾਂ ਤੋਂ ਪੁੱਛਗਿੱਛ ਕਰੇਗੀ।
SIT
ਐਸਆਈਟੀ ਆਉਣ ਵਾਲੇ ਦਿਨਾਂ ਵਿਚ ਡੇਰੇ ਵਿਚ ਜਾ ਕੇ ਦੋਹਾਂ ਤੋਂ ਪੁੱਛਗਿੱਛ ਕਰੇਗੀ। ਜ਼ਿਕਰਯੋਗ ਹੈ ਕਿ ਪੂਰਾ ਮਾਮਲਾ 2015 ਦਾ ਹੈ ਤੇ ਮਾਮਲੇ ਦੀ ਜਾਂਚ ਐਸਆਈਟੀ ਕਰ ਰਹੀ ਹੈ ਡੇਰਾ ਮੁਖੀ ਤੋਂ ਪੁੱਛਗਿੱਛ ਕਰਨ ਤੋਂ ਬਾਅਦ ਹੁਣ ਐਸਆਈਟੀ ਡੇਰੇ ਨਾਲ ਬੇਅਦਬੀਆਂ ਦੇ ਲਿੰਕ ਲੱਭ ਰਹੀ ਹੈ। ਇਸ ਦੇ ਨਾਲ ਹੀ ਦੱਸ ਦਈਏ ਕਿ ਸੌਦਾ ਸਾਧ ਨੇ ਪੁੱਛਗਿੱਛ ਦੌਰਾਨ ਕਿਹਾ ਸੀ ਕਿ ਉਨ੍ਹਾਂ ਦਾ ਕੰਮ ਸਿਰਫ਼ ਸਤਿਸੰਗ ਕਰਵਾਉਣਾ ਹੈ, ਜਦਕਿ ਡੇਰੇ 'ਚ ਕਿਸੇ ਵੀ ਤਰ੍ਹਾਂ ਦੇ ਹੁਕਮਾਂ ਅਤੇ ਪ੍ਰਬੰਧਾਂ ਦੀ ਜ਼ਿੰਮੇਵਾਰੀ ਪ੍ਰਬੰਧਕ ਕਮੇਟੀ ਦੀ ਹੁੰਦੀ ਹੈ। ਇਸ ਤੋਂ ਬਾਅਦ ਐਸਆਈਟੀ ਚੇਅਰਪਰਸਨ ਵਿਪਾਸਨਾ ਇੰਸਾਂ ਅਤੇ ਮੈਨੇਜਰ ਪੀਆਰ ਨੈਨ ਨੂੰ ਪੁੱਛਗਿੱਛ ਲਈ ਬੁਲਾ ਰਹੀ ਹੈ ਪਰ ਉਹ 3 ਸੰਮਨਾਂ ਦੇ ਬਾਅਦ ਵੀ ਪੁਛਗਿੱਛ ਲਈ ਨਹੀਂ ਆਏ।
