ਪੰਜਾਬ ਦੀ ਆਰਥਿਕ ਮਹਾਂਨਗਰੀ ਵਜੋਂ ਜਾਣੇ ਜਾਂਦੇ ਲੁਧਿਆਣਾ ਵਿਚ ਆਏ ਦਿਨ ਕਤਲ, ਲੁੱਟ ਖੋਹ ਅਤੇ ਚੋਰੀ ਦੀਆਂ ਵਾਰਦਾਤਾਂ ਸਾਹਮਣੇ ਆ ਰਹੀਆਂ ਹਨ।
ਲੁਧਿਆਣਾ : ਪੰਜਾਬ ਦੀ ਆਰਥਿਕ ਮਹਾਂਨਗਰੀ ਵਜੋਂ ਜਾਣੇ ਜਾਂਦੇ ਲੁਧਿਆਣਾ ਵਿਚ ਆਏ ਦਿਨ ਕਤਲ, ਲੁੱਟ ਖੋਹ ਅਤੇ ਚੋਰੀ ਦੀਆਂ ਵਾਰਦਾਤਾਂ ਸਾਹਮਣੇ ਆ ਰਹੀਆਂ ਹਨ। ਹੁਣ ਫਿਰ ਸਥਾਨਕ ਕਿਸ਼ੋਰ ਨਗਰ ਇਲਾਕੇ ਵਿਚ ਦਿਨ-ਦਿਹਾੜੇ ਇਕ ਕਤਲ ਦੀ ਵਾਰਤਾਦ ਸਾਹਮਣੇ ਆਈ ਹੈ, ਜਿਸ ਨੂੰ ਲੁੱਟ ਕਰਨ ਲਈ ਅੰਜ਼ਾਮ ਦਿਤਾ ਗਿਆ। ਲੁੱਟ ਦੀ ਇਸ ਵਾਰਦਾਤ ਨੂੰ ਅੰਜ਼ਾਮ ਦੇਣ ਸਮੇਂ ਲੁਟੇਰੇ ਨੇ ਤਿੰਨ ਕਤਲ ਕਰ ਦਿਤੇ। ਇਹ ਘਟਨਾ ਸ਼ੁਕਰਵਾਰ ਸ਼ਾਮੀਂ 3:50 ਵਜੇ ਵਾਪਰੀ ਦੱਸੀ ਜਾ ਰਹੀ ਹੈ।
ਜਾਣਕਾਰੀ ਅਨੁਸਾਰ ਮ੍ਰਿਤਕਾਂ ਵਿਚ ਦਾਦੀ ਗੁਰਵਿੰਦਰ ਕੌਰ (52), ਉਨ੍ਹਾਂ ਦੀ 8 ਸਾਲਾ ਪੋਤਰੀ ਮਨਦੀਪ ਕੌਰ ਤੇ 7 ਸਾਲਾ ਪੋਤਰੇ ਹਿਤਿਕ ਬਾਸੀ ਦੇ ਨਾਮ ਸ਼ਾਮਲ ਹਨ। ਲੋਕਾਂ ਨੇ ਦਸਿਆ ਕਿ ਮ੍ਰਿਤਕਾ ਬਜ਼ੁਰਗ ਔਰਤ ਗੁਰਵਿੰਦਰ ਕੌਰ ਦੇ ਪਤੀ ਪਾਠੀ ਹਨ ਜੋ ਕਿਸੇ ਗੁਰਦੁਆਰਾ ਸਾਹਿਬ ਵਿਚ ਪਾਠ ਕਰਦੇ ਹਨ। ਜਦੋਂ ਉਹ ਬਾਅਦ ਦੁਪਹਿਰ ਘਰ ਪਰਤੇ ਤਾਂ ਉਨ੍ਹਾਂ ਵੇਖਿਆ ਕਿ ਘਰ ਵਿਚ ਉਨ੍ਹਾਂ ਦੀ ਪਤਨੀ ਤੇ ਪੋਤਰੀ ਤੇ ਪੋਤਰੇ ਦੀਆਂ ਖ਼ੂਨ ਨਾਲ ਲੱਥਪਥ ਲਾਸ਼ਾਂ ਪਈਆਂ ਹਨ। ਕਾਤਲ ਨੇ ਉਨ੍ਹਾਂ ਦੇ ਸਿਰਾਂ ਵਿਚ ਹਥੌੜੇ ਨਾਲ ਵਾਰ ਕੀਤੇ ਹੋਏ ਸਨ।
ਸ਼ੱਕ ਪ੍ਰਗਟਾਇਆ ਜਾ ਰਿਹਾ ਹੈ ਕਿ ਮ੍ਰਿਤਕਾ ਗੁਰਵਿੰਦਰ ਕੌਰ ਦੇ ਇਕ 35 ਸਾਲਾ ਬੇਰੋਜ਼ਗਾਰ ਰਿਸ਼ਤੇਦਾਰ ਰਾਜਵਿੰਦਰ ਸਿੰਘ ਵਲੋਂ ਇਸ ਘਿਨਾਉਣੀ ਕਾਰਵਾਈ ਨੂੰ ਅੰਜ਼ਾਮ ਦਿਤਾ ਹੋ ਸਕਦਾ ਹੈ ਕਿਉਂਕਿ ਉਹ ਘਰ ਵਿਚ ਪਹਿਲਾਂ ਵੀ ਅਕਸਰ ਆਉਂਦਾ ਜਾਂਦਾ ਰਹਿੰਦਾ ਸੀ ਪਰ ਹੁਣ ਉਸ ਦਾ ਕੋਈ ਪਤਾ ਟਿਕਾਣਾ ਨਹੀਂ ਲੱਗ ਰਿਹਾ ਕਿ ਉਹ ਕਿਥੇ ਗਿਆ ਹੈ? ਇਸ ਤੋਂ ਇਲਾਵਾ ਇਹ ਘਟਨਾ ਲੁੱਟ ਦੀ ਨੀਅਤ ਨਾਲ ਕੀਤੀ ਗਈ ਹੈ ਕਿਉਂਕਿ ਘਰ ਵਿਚ ਪਏ 45 ਹਜ਼ਾਰ ਰੁਪਏ ਤੇ ਹੋਰ ਕੀਮਤੀ ਸਮਾਨ ਗ਼ਾਇਬ ਪਾਇਆ ਗਿਅ ਹੈ।
ਤਿੰਨ ਕਤਲਾਂ ਦੀ ਹੋਈ ਇਸ ਵਾਰਦਾਤ ਕਾਰਨ ਇਲਾਕੇ ਵਿਚ ਦਹਿਸ਼ਤ ਦਾ ਮਾਹੌਲ ਪਾਇਆ ਜਾ ਰਿਹਾ ਹੈ। ਪੁਲਿਸ ਬੜੀ ਸਰਗਰਮੀ ਨਾਲ ਇਸ ਮਾਮਲੇ ਦੀ ਤਫ਼ਤੀਸ਼ ਕਰਨ ਵਿਚ ਜੁੱਟ ਗਈ ਹੈ ਤਾਂ ਜੋ ਅਸਲ ਕਾਤਲ ਨੂੰ ਫੜਿਆ ਜਾ ਸਕੇ। ਦਸ ਦਈਏ ਕਿ ਪਿਛਲੇ ਕੁੱਝ ਸਮੇਂ ਤੋਂ ਲੁਧਿਆਣਾ ਵਿਚ ਇਕ ਤੋਂ ਬਾਅਦ ਇਕ ਕਤਲ ਦੀਆਂ ਵਾਰਦਾਤਾਂ ਸਾਹਮਣੇ ਆ ਰਹੀਆਂ ਹਨ। ਹਾਲੇ ਕੁੱਝ ਦਿਨ ਪਹਿਲਾਂ ਹੀ ਟਿੱਬਾ ਰੋਡ ਵਿਖੇ ਵੀ ਇਕ ਘਟਨਾ ਸਾਹਮਣੇ ਆਈ ਸੀ, ਜਿਥੇ ਇਕ ਬਜ਼ੁਰਗ ਔਰਤ ਦਾ ਕਤਲ ਕਰ ਦਿਤਾ ਗਿਆ ਸੀ ਪਰ ਉਸ ਘਟਨਾ ਦੇ ਪਿਛੇ ਨਾਜਾਇਜ਼ ਸਬੰਧਾਂ ਦਾ ਸ਼ੱਕ ਜਤਾਇਆ ਗਿਆ ਸੀ।