ਅਕਾਲੀ ਦਲ ਅੰਮ੍ਰਿਤਸਰ ਦੇ ਪ੍ਰਧਾਨ ਸਿਮਰਨਜੀਤ ਸਿੰਘ ਮਾਨ ਨੇ ਕਿਹਾ ਹੈ ਕਿ ਜਸਟਿਸ ਰਣਜੀਤ ਸਿੰਘ ਨੇ ਅਪਣੀ ਰੀਪੋਰਟ ਮੁੱਖ ਮੰਤਰੀ ਨੂੰ ਸੌਂਪ ਦਿਤੀ ਹੈ.........
ਕੋਟਕਪੂਰਾ : ਅਕਾਲੀ ਦਲ ਅੰਮ੍ਰਿਤਸਰ ਦੇ ਪ੍ਰਧਾਨ ਸਿਮਰਨਜੀਤ ਸਿੰਘ ਮਾਨ ਨੇ ਕਿਹਾ ਹੈ ਕਿ ਜਸਟਿਸ ਰਣਜੀਤ ਸਿੰਘ ਨੇ ਅਪਣੀ ਰੀਪੋਰਟ ਮੁੱਖ ਮੰਤਰੀ ਨੂੰ ਸੌਂਪ ਦਿਤੀ ਹੈ ਅਤੇ ਉਮੀਦ ਹੈ ਕਿ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਇਸ ਦਾ ਫ਼ੈਸਲਾ ਜਲਦ ਕਰਨਗੇ ਪਰ ਸਾਨੂੰ ਇਕ ਡਰ ਹੈ ਕਿ ਜੋ ਪੁਲਿਸ ਦਾ ਨਿਜ਼ਾਮ ਹੈ, ਉਹ ਉਹੀ ਹੈ, ਜਿਹੜਾ ਬਾਦਲ ਸਰਕਾਰ ਦਾ ਸੀ, ਇਹ ਸਾਰਾ ਕੁਝ ਬਾਦਲ ਸਰਕਾਰ ਨੇ ਕੀਤਾ ਹੈ, ਜਿਨ੍ਹਾਂ ਚਿਰ ਕੈਪਟਨ ਅਮਰਿੰਦਰ ਸਿੰਘ ਤਕੜੇ ਹੋ ਕੇ ਇਸ ਪੁਲਿਸ ਦੇ ਨਿਜ਼ਾਮ ਨੂੰ ਤੋੜਦੇ ਨਹੀਂ, ਉਨ੍ਹਾਂ ਚਿਰ ਪੁਲਿਸ ਦਾ ਪ੍ਰਬੰਧ ਅਸਫ਼ਲ ਰਹੇਗਾ।
ਨੇੜਲੇ ਪਿੰਡ ਬਰਗਾੜੀ ਦੀ ਧਰਤੀ 'ਤੇ ਭਾਈ ਧਿਆਨ ਸਿੰਘ ਮੰਡ ਦੀ ਅਗਵਾਈ ਹੇਠ ਚੱਲ ਰਹੇ 'ਇਨਸਾਫ਼ ਮੋਰਚੇ' ਤੋਂ ਹਾਜ਼ਰੀ ਲਵਾ ਕੇ ਪਰਤਦਿਆਂ ਉਨ੍ਹਾਂ ਕਿਹਾ ਕਿ ਉਹ ਪਹਿਲਾਂ ਵੀ ਬਰਗਾੜੀ ਮੋਰਚੇ 'ਚ ਕਾਫ਼ਲਿਆਂ ਸਮੇਤ ਪਹੁੰਚ ਚੁੱਕੇ ਹਨ ਅਤੇ ਕਾਫ਼ਲਿਆਂ ਸਮੇਤ ਲਗਾਤਾਰ ਪਹੁੰਚ ਰਹੇ ਹਨ ਅਤੇ ਜਦ ਤਕ ਬਰਗਾੜੀ ਮੋਰਚਾ ਜਾਰੀ ਹੈ।
ਉਦੋਂ ਤਕ ਉਹ ਵੱਡੇ ਕਾਫ਼ਲਿਆਂ ਸਮੇਤ ਇਥੇ ਪਹੁੰਚਦੇ ਰਹਿਣਗੇ ਅਤੇ ਇਹ ਮੋਰਚਾ ਉਸ ਸਮੇਂ ਤਕ ਜਾਰੀ ਰਹੇਗਾ ਜਦ ਤਕ ਸਰਕਾਰ ਬੇਅਦਬੀ ਕਾਂਡ ਦੇ ਦੋਸ਼ੀਆਂ ਵਿਰੁਧ ਕਾਰਵਾਈ, ਜਾਪ ਕਰਦੀਆਂ ਸੰਗਤਾਂ 'ਤੇ ਗੋਲੀ ਚਲਾਉਣ ਵਾਲੇ ਪੁਲਿਸ ਅਫ਼ਸਰਾਂ 'ਤੇ ਕਾਰਵਾਈ ਅਤੇ ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਉਪਰਾਲੇ ਨਹੀ ਕਰਦੀ।