ਸਕੂਲ ਸਿੱਖਿਆ ਵਿਭਾਗ, ਪੰਜਾਬ ਨੇ ਸਾਹਿਤਕਾਰ ਅਧਿਆਪਕਾਂ ਨਾਲ ਮਿਲਣੀ ਕਰਕੇ ਮਿਆਰੀ ਸਾਹਿਤ ਰਚਨ ਤੇ ਪੜ੍ਹਣ ਲਈ ਉਤਸ਼ਾਹਿਤ ਕੀਤਾ ਹੈ।
ਐਸਏਐਸ ਨਗਰ: ਸਕੂਲ ਸਿੱਖਿਆ ਵਿਭਾਗ, ਪੰਜਾਬ ਨੇ ਸਾਹਿਤਕਾਰ ਅਧਿਆਪਕਾਂ ਨਾਲ ਮਿਲਣੀ ਕਰਕੇ ਮਿਆਰੀ ਸਾਹਿਤ ਰਚਨ ਤੇ ਪੜ੍ਹਣ ਲਈ ਉਤਸ਼ਾਹਿਤ ਕੀਤਾ ਹੈ। ਮੀਟਿੰਗ ਵਿਚ ਹਾਜਰ ਅਧਿਆਪਕਾਂ ਨੂੰ ਸੰਬੋਧਨ ਕਰਦਿਆਂ ਸਕੱਤਰ ਸਕੂਲ ਸਿੱਖਿਆ ਕ੍ਰਿਸ਼ਨ ਕੁਮਾਰ ਨੇ ਕਿਹਾ ਸਿੱਖਿਆ ਵਿਭਾਗ ਪੰਜਾਬ ਦੇ ਸਰਕਾਰੀ ਸਕੂਲਾਂ ਵਿਚ ਪੜ੍ਹਾ ਰਹੇ ਅਧਿਆਪਕ ਸਾਹਿਤਕ ਲੇਖਣੀ ਪੱਖੋਂ ਮਜਬੂਤ ਹਨ। ਜਿੰਨੇ ਅਧਿਆਪਕ ਇਸ ਸਮੇਂ ਮੀਟਿੰਗ ਵਿਚ ਬੈਠੇ ਹਨ ਇਸ ਤੋਂ ਕਈ ਗੁਣਾ ਜ਼ਿਆਦਾ ਸਕੂਲਾਂ ਵਿਚ ਹਨ ਜਿਨ੍ਹਾਂ ਨਾਲ ਸਿੱਖਿਆ ਵਿਭਾਗ ਨੇ ਆਉਣ ਵਾਲੇ ਦਿਨਾਂ ਵਿਚ ਅਜਿਹੀਆਂ ਹੀ ਮੀਟਿੰਗਾਂ ਕਰਨੀਆਂ ਹਨ।
ਵਿਭਾਗ ਵੱਲੋਂ ਆਉਣ ਵਾਲੇ ਦਿਨਾਂ ਵਿਚ ਈ ਪੋਰਟਲ 'ਤੇ ਸਾਹਿਤਕ ਰੁਚੀ ਨਾਲ ਸਬੰਧਤ ਲਿੰਕ ਦਿੱਤਾ ਜਾਵੇਗਾ ਜਿਸ ਨਾਲ ਸਾਹਿਤਕਾਰ ਅਧਿਆਪਕ ਆਪਣੀ ਲਿਖਤਾਂ ਅਨੁਸਾਰ ਇੰਦਰਾਜ ਕਰ ਸਕਣਗੇ। ਸਾਹਿਤਕ ਮਿਲਣੀ ਵਿਚ ਸਕੱਤਰ ਸਕੂਲ ਸਿੱਖਿਆ ਕ੍ਰਿਸ਼ਨ ਕੁਮਾਰ ਨੇ ਅਧਿਆਪਕ ਲੇਖਕਾਂ ਨੂੰ ਕਲਮ ਰਾਹੀਂ ਬੱਚਿਆਂ ਦੇ ਦਾਖ਼ਲੇ ਵਧਾਉਣ, ਸਮਾਰਟ ਸਕੂਲਾਂ ਬਾਰੇ ਵਿਸ਼ੇਸ਼ ਪਰਚੇ ਲਿਖਣ, ਮਾਂ ਬੋਲੀ ਦੀ ਸੇਵਾ ਕਰਨ ਬਾਰੇ ਉਤਸ਼ਾਹਿਤ ਕੀਤਾ। ਉਹਨਾਂ ਸਾਹਿਤ ਰਾਹੀਂ ਵਿਦਿਆਰਥੀਆਂ ਨੂੰ ਸ਼ੁੱਧ ਲਿਖਣ, ਸ਼ੁੱਧ ਬੋਲਣ ਅਤੇ ਸ਼ੁੱਧ ਸੋਚਣ ਬਾਰੇ ਪ੍ਰੇਰਿਤ ਕਰਨ ਲਈ ਕਿਹਾ।
ਸਿਹਤਮੰਦ ਤੇ ਉਸਾਰੂ ਸਮਾਜ ਸਿਰਜਣ ਬਾਰੇ, ਬੱਚਿਆਂ ਨੂੰ ਲਿਖਣ ਲਈ ਬਾਲ ਸਭਾ ਤੇ ਸਵੇਰ ਦੀ ਸਭਾ ਵਿਚ ਪ੍ਰੇਰਿਤ ਕਰਨ ਬਾਰੇ, ਸੁੰਦਰ ਲਿਖਾਈ ਤੇ ਕੰਮ ਕਰਨ, ਬੋਰਡ ਮੁਕਾਬਲਿਆਂ ਵਿਚ ਵਧੀਆ ਉਪਰਾਲਿਆਂ ਬਾਰੇ, ਪਾਠ ਨੂੰ ਨਾਟਕੀ ਤਰੀਕੇ ਨਾਲ ਪੜ੍ਹਾ ਕੇ ਰੌਚਿਕ ਬਣਾਉਣ, ਆਪਣੇ ਨੇੜੇ ਦੇ ਸਕੂਲਾਂ ਲਈ ਮੈਗਜ਼ੀਨ ਤੇ ਰਸਾਲੇ ਦੀ ਤਿਆਰੀ ਵਿਚ ਸਹਾਇਤਾ ਕਰਨ, ਕੰਧ-ਪੱਤ੍ਰਿਕਾ ਨੂੰ ਸਕੂਲਾਂ ਵਿਚ ਅਮਲੀ ਜਾਮਾ ਪਹਿਨਾਉਣ, ਲੇਖਣੀ ਦੇ ਨਾਲ ਸਿੱਖਿਆ ਜਗਤ ਬਾਰੇ ਲਿਖਣਾ ਆਦਿ ਬਾਰੇ ਵਿਚਾਰਾਂ ਸਾਂਝੀਆਂ ਕੀਤੀਆਂ ਗਈਆਂ।
ਸਕੱਤਰ ਸਕੂਲ ਸਿੱਖਿਆ ਕ੍ਰਿਸ਼ਨ ਕੁਮਾਰ ਨੇ ਕਿਹਾ ਕਿ ਜੇਕਰ ਕਿਸੇ ਸਾਹਿਤਕਾਰ ਅਧਿਆਪਕਾਂ ਨੂੰ ਕੋਈ ਸਮੱਸਿਆ ਆਉਂਦੀ ਹੈ ਤਾਂ ਉਹ ਆਪਣੇ ਜ਼ਿਲ੍ਹੇ ਦੇ ਨੋਡਲ ਅਫ਼ਸਰ ਨਾਲ ਸੰਪਰਕ ਕਰ ਸਕਦੇ ਹਨ। ਇਸ ਮੌਕੇ ਡੀ.ਪੀ.ਆਈ. ਐਲੀਮੈਂਟਰੀ ਸਿੱਖਿਆ ਪੰਜਾਬ ਇੰਦਰਜੀਤ ਸਿੰਘ ਨੇ ਪੰਜਾਬੀਅਤ ਲਈ ਨਰੋਏ ਸਾਹਿਤ, ਨਰੋਈ ਸੋਚ ਤੇ ਨੈਤਿਕ ਕਦਰਾਂ ਕੀਮਤਾਂ ਵਿਕਸਿਤ ਕਰਨ ਹਿੱਤ ਉਪਰਾਲੇ ਕਰਨ ਲਈ ਪ੍ਰੇਰਿਤ ਕੀਤਾ। ਮੀਟਿੰਗ ਦੌਰਾਨ ਡਾ. ਦਵਿੰਦਰ ਸਿੰਘ ਬੋਹਾ ਨੇ ਕਿਹਾ ਕਿ ਸਿੱਖਿਆ ਵਿਭਾਗ ਵੱਲੋਂ ਕੀਤਾ ਗਿਆ ਇਹ ਇਕ ਇਤਿਹਾਸਿਕ ਉਪਰਾਲਾ ਹੈ ਜਿਸ ਵਿਚ ਪੰਜਾਬ ਦੇ ਨਾਮਵਰ ਅਧਿਆਪਕ ਸਾਹਿਤਕਾਰਾਂ ਨੇ ਆਪਣੇ ਵਿਚਾਰ ਇਕ ਮੰਚ ਤੋਂ ਸਾਂਝੇਂ ਕੀਤੇ ਹਨ| ਇਸ ਨਾਲ ਭਵਿੱਖ ਵਿਚ ਸਿੱਖਿਆ ਦੇ ਖੇਤਰ ਲਈ ਨਵੇਂ ਦਿਸਹੱਦੇ ਕਾਇਮ ਹੋਣਗੇ।
ਸਾਹਿਤਕਾਰ ਅਮਰਜੀਤ ਕਾਉਂਕੇ ਤੇ ਬਲਜਿੰਦਰ ਮਾਨ ਨੇ ਬਾਲ ਮੈਗਜ਼ੀਨਾਂ ਵੱਲ ਜਿਆਦਾ ਧਿਆਨ ਦੇਣ ਲਈ ਅਪੀਲ ਕੀਤੀ। ਸਾਹਿਤਕਾਰ ਮਦਨ ਵੀਰਾ ਨੇ ਅਧਿਆਪਕ ਦੇ ਸਾਹਿਤਕਾਰ ਵੱਜੋਂ ਸਮਾਜ ਵਿਚ ਵਿਚਰਣ ਨੂੰ ਮਹੱਤਵ ਦਿੰਦਿਆਂ ਕਿਹਾ ਕਿ ਅਧਿਆਪਕਾਂ ਨੂੰ ਸਿੱਖਿਆ ਵਿਭਾਗ ਵੱਲੋਂ ਸਾਹਿਤ ਦੀਆਂ ਪ੍ਰਾਪਤੀਆਂ ਸਬੰਧੀ ਵਿਸ਼ੇਸ਼ ਤਵੱਜੋਂ ਦਿੱਤੀ ਜਾਣੀ ਬਣਦੀ ਹੈ ਤਾਂ ਜੋ ਭਵਿੱਖ ਵਿਚ ਅਧਿਆਪਕ ਉਤਸ਼ਾਹਿਤ ਹੋ ਕੇ ਹੋਰ ਵੀ ਮਿਆਰੀ ਬਾਲ ਸਾਹਿਤ ਸਿਰਜ ਸਕਣ।
ਸੁਖਵਿੰਦਰ ਕੌਰ ਸਿੱਧੂ ਬਾਲ ਸਾਹਿਤਕਾਰ ਨੇ ਕਿਹਾ ਕਿ ਇਹ ਉਪਰਾਲਾ ਅਧਿਆਪਕਾਂ ਦੇ ਸ਼ੌਂਕ ਨੂੰ ਜਿੰਮੇਵਾਰੀ ਵੱਲ ਲੈ ਕੇ ਜਾਣ ਲਈ ਹੈ ਜੋ ਕਿ ਅਧਿਆਪਕਾਂ ਅਤੇ ਵਿਦਿਆਰਥੀਆਂ ਦੋਵਾਂ ਲਈ ਫ਼ਾਇਦੇਮੰਦ ਹੋਵੇਗਾ। ਕਰਮਜੀਤ ਗਰੇਵਾਲ ਨੇ 'ਹਰ ਮੋੜ ਤੇ ਸਲੀਬਾਂ' ਨੂੰ ਤਰੱਨੂੰਮ ਵਿਚ ਗਾ ਕੇ ਮੀਟਿੰਗ ਦੇ ਮਹੌਲ ਨੂੰ ਵਧੀਆ ਬਣਾਇਆ। ਇਸ ਮੀਟਿੰਗ ਦੌਰਾਨ ਅਧਿਆਪਕ ਸਾਹਿਤਕਾਰਾਂ ਨੇ ਆਪਣੀਆਂ ਲਿਖੀਆਂ ਪੁਸਤਕਾਂ ਸਕੱਤਰ ਸਕੂਲ ਸਿੱਖਿਆ ਕ੍ਰਿਸ਼ਨ ਕੁਮਾਰ ਨੂੰ ਭੇਂਟ ਕੀਤੀਆਂ।