ਕੌਮਾਂਤਰੀ ਸਰਹੱਦ ਨੇੜੇ ਤੋਂ ਬਾਰਡਰ ਸਕਿਉਰਿਟੀ ਫ਼ੋਰਸ ਅਤੇ ਪੰਜਾਬ ਪੁਲਿਸ ਦੇ ਵਿਸ਼ੇਸ਼ ਸੈੱਲ ਸੀ.ਆਈ.ਏ ਵਲੋਂ ਸਾਂਝੇ
ਫ਼ਿਰੋਜ਼ਪੁਰ, 22 ਮਈ (ਪਪ): ਕੌਮਾਂਤਰੀ ਸਰਹੱਦ ਨੇੜੇ ਤੋਂ ਬਾਰਡਰ ਸਕਿਉਰਿਟੀ ਫ਼ੋਰਸ ਅਤੇ ਪੰਜਾਬ ਪੁਲਿਸ ਦੇ ਵਿਸ਼ੇਸ਼ ਸੈੱਲ ਸੀ.ਆਈ.ਏ ਵਲੋਂ ਸਾਂਝੇ ਅਪ੍ਰੇਸ਼ਨ ਦੌਰਾਨ 40 ਕਰੋੜ ਰੁਪਏ ਕੀਮਤ ਦੀ ਹੈਰੋਇਨ ਬਰਾਮਦ ਕੀਤੀ ਹੈ। ਬੀ.ਐਸ.ਐਫ਼ ਮੁਤਾਬਕ ਅੱਜ ਸਵੇਰੇ ਕਰੀਬ 9.30 ਵਜੇ ਫ਼ਿਰੋਜ਼ਪੁਰ ਸੈਕਟਰ ਤਹਿਤ ਪੈਂਦੀ ਬਾਰੇ ਕੇ ਚੌਂਕੀ ਨੇੜੇ ਬਾਰਡਰ ਪੱਧਰ ਨੰਬਰ 192/13 ਤੋਂ ਜ਼ਮੀਨਾਂ ਵਿਚ ਦੱਬੇ ਅਸਮਾਨੀ ਰੰਗ ਦੇ ਕੈਨੇਡਾ ਅਤੇ ਪਲਾਸਟਿਕ ਦੀ ਬੋਤਲ ਮਿਲੀ, ਜਿਸ ਵਿਚੋਂ ਹੈਰੋਇਨ ਵਸਤੂ ਪਦਾਰਥ ਪਾਇਆ ਹੋਇਆ ਸੀ, ਜਿਸ ਦਾ ਕੁੱਲ ਭਾਰ 8 ਕਿਲੋ ਦਸਿਆ ਗਿਆ ਹੈ।
ਉਕਤ ਹੈਰੋਇਨ ਬੀ.ਐਸ.ਐਫ਼ ਦੀ 136 ਬਟਾਲੀਅਨ ਦੇ ਜਵਾਨਾਂ ਵਲੋਂ ਬਰਾਮਦ ਕੀਤੀ ਗਈ ਹੈ। ਪੁਲਿਸ ਕਾਰਵਾਈ ਲਈ ਬੀ.ਐਸ.ਐਫ਼ ਦੇ ਅਧਿਕਾਰੀਆਂ ਵਲੋਂ ਸਬੰਧਿਤ ਥਾਣੇ ਨੂੰ ਸੂਚਿਤ ਕਰ ਦਿਤਾ ਗਿਆ ਹੈ। ਖੇਮਕਰਨ, 22 ਮਈ (ਪਪ): ਹਿੰਦ-ਪਾਕਿ ਸਰਹੱਦ ਉਤੇ ਖੇਮਕਰਨ ਸੈਕਟਰ ਅੰਦਰ ਬੀ.ਐਸ.ਐਫ਼ ਦੀ 116 ਬਟਾਲੀਅਨ ਨੇ ਅੱਜ ਸੀਮਾ ਚੌਂਕੀ ਗੱਜਲ ਅਧੀਨ ਪੈਂਦੀ ਸਰਹੱਦ ਦੇ ਪਿੱਲਰ ਨੰਬਰ 169 ਨੇੜੇ ਤੋਂ ਹੈਰੋਇਨ ਨਾਲ ਭਰੀ ਦੋ ਲੀਟਰ ਦੀ ਪਲਾਸਟਿਕ ਦੀ ਬੋਤਲ ਅਤੇ ਇਕ ਪਾਕਿਸਤਾਨੀ 9 ਐਮ.ਐਮ ਪਿਸਤੌਲ ਬਰਾਮਦ ਕਰਨ ਵਿਚ ਸਫ਼ਲਤਾ ਹਾਸਲ ਕੀਤੀ ਹੈ। ਬੀ.ਐਸ.ਐਫ਼. ਵਲੋਂ ਘਟਨਾ ਦੀ ਬਰੀਕੀ ਨਾਲ ਜਾਂਚ ਸ਼ੁਰੂ ਕਰ ਦਿਤੀ ਹੈ।
ਅਟਾਰੀ, 22 ਮਈ (ਪਪ): ਭਾਰਤ ਪਾਕਿਸਤਾਨ ਸਰਹੱਦ ਸਥਿਤ ਬਾਹਰੀ ਸਰਹੱਦੀ ਚੌਂਕੀ ਦਾਉਕੇ ਨੇੜੇ ਤੋਂ ਬੀ.ਐਸ.ਐਫ਼. ਦੀ 71 ਵੀ ਬਟਾਲੀਅਨ ਦੇ ਜਵਾਨਾਂ ਨੇ 500 ਗ੍ਰਾਮ ਹੈਰੋਇਨ ਬਰਾਮਦ ਕੀਤੀ। ਇਹ ਬਰਾਮਦਗੀ ਤਲਾਸ਼ੀ ਦੌਰਾਨ ਕਣਕ ਦੇ ਸਾੜੇ ਗਏ ਨਾੜ ਦੇ ਵਿਚੋਂ ਕੀਤੀ ਗਈ। ਇਸ ਸਬੰਧੀ ਹੋਰ ਜਾਂਚ ਜਾਰੀ ਹੈ।
