ਬੈਠਕਾਂ ਦੀ ਸਾਲਾਨਾ ਔਸਤ ਵੀ 40 ਤੋਂ ਡਿਗ ਕੇ 15 ਰਹਿ ਗਈ
ਚੰਡੀਗੜ੍ਹ, : ਅਗਲੇ ਹਫ਼ਤੇ 20 ਤਰੀਕ ਤੋਂ ਸ਼ੁਰੂ ਹੋਣ ਵਾਲੇ ਪੰਜਾਬ ਵਿਧਾਨ ਸਭਾ ਦੇ ਅਹਿਮ ਬਜਟ ਸੈਂਸ਼ਨ ਵਾਸਤੇ ਕੇਵਲ 8 ਬੈਠਕਾਂ ਦਾ ਹੀ ਪ੍ਰਸਤਾਵਿਤ ਪ੍ਰੋਗਰਾਮ ਉਲੀਕਿਆ ਜੋ ਪੰਜਾਬ ਦੀਆਂ ਹੁਣ ਤਕ 15 ਵਿਧਾਨ ਸਭਾਵਾਂ ਦੇ ਇਤਿਹਾਸ 'ਚ ਸਭ ਤੋਂ ਛੋਟਾ ਇਜਲਾਸ ਕਹਾਉਣ ਅਤੇ ਦਰਜ ਕਰਾਉਣ ਵਲ ਵਧ ਰਿਹਾ ਹੈ।
ਇਕ ਨਵੰਬਰ 1966 ਤੋਂ ਨਵੀਂ ਹੋਂਦ 'ਚ ਆਏ ਇਸ ਛੋਟੇ ਜਿਹੇ ਸੂਬੇ ਦੀ ਵਿਧਾਨ ਸਭਾ ਸਕੱਤ੍ਰੇਤ ਤੋਂ ਮਿਲੇ ਅੰਕੜਿਆਂ ਤੋਂ ਪਤਾ ਲੱਗਦਾ ਹੈ ਕਿ ਲੋਕਾਂ ਵਲੋਂ ਚੁਦੀ ਹੋਈ ਇਸ ਸਪਾ ਦੇ ਨੁਮਾਇੰਦੇ ਚਾਹੇ ਕਿਸੇ ਵੀ ਪਾਰਟੀ ਜਾਂ ਸੰਗਠਨ ਨਾਲ ਸਬੰਧ ਰਖਦੇ ਹੋਣ, ਲੋਕ ਹਿਤ ਦੇ ਮੁੱਦਿਆਂ 'ਤੇ ਬਹਿਸ ਕਰਨ ਤੋਂ ਭੱਜਦੇ ਹਨ। ਵਿਸ਼ੇਸ਼ ਕਰ ਕੇ ਜਦੋਂ ਇਹ ਵਿਧਾਇਕ ਸਰਕਾਰ 'ਚ ਹੁੰਦੇ ਹਨ ਤਾਂ ਮੰਤਰੀ ਦੇ ਤੌਰ 'ਤੇ ਲੋਕ ਸਮੱਸਿਆਵਾਂ ਨੂੰ ਹੱਲ ਕਰਨ ਜਾਂ ਚਰਚਾ ਕਰਨ ਤੋਂ ਵੀ ਕੰਨੀ ਕਤਰਾਉਂਦੇ ਹਨ।
1952 ਤੋਂ ਬਣੀਆਂ ਇਨ੍ਹਾਂ ਵਿਧਾਨ ਸਭਾਵਾਂ ਦੇ ਸੈਸ਼ਨਾਂ ਦੀਆਂ ਕੁੱਲ ਸਾਲਾਨਾ ਬੈਠਕਾਂ ਜੋ 35 ਤੋਂ 40 ਤਕ ਹੁੰਦੀਆਂ ਸਨ, ਅੱਜ ਉਹ ਘੱਟ ਕੇ 14 ਜਾਂ 15 ਤਕ ਡਿਗ ਚੁਕੀਆਂ ਹਨ।
ਵਿਧਾਨ ਸਭਾ ਸਾਲ ਕੁਲ ਬੈਠਕਾਂ ਔਸਤ ਬਜਟ ਸੈਸ਼ਨ ਬੈਠਕਾਂ
ਤੀਜੀ 1966 32 32 29
ਚੌਥੀ 1967-68 55 36 29
5ਵੀਂ 1969-71 80 40 29
6ਵੀਂ 1972-77 148 30 28
7ਵੀਂ 1977-79 75 30 28
8 ਵੀਂ 1980-83 103 33 24
9 ਵੀਂ 1985-87 54 21 19
10ਵੀਂ 1992-97 121 24 23
11ਵੀਂ 1997-2002 95 19 13
12ਵੀਂ 2002-07 81 16 14
13ਵੀਂ 2007-12 88 18 13
14ਵੀਂ 2012-17 77 16 10
15ਵੀਂ 2017-20 52 17 8
ਮੌਜੂਦਾ 15 ਵੀਂ ਵਿਧਾਨ ਸਭਾ ਦੇ ਅਜੇ 3 ਸਾਲ ਪੂਰੇ ਹੋਏ ਹਨ ਅਤੇ ਆਉਣ ਵਾਲੇ ਬਜਟ ਸੈਸ਼ਨ ਦੀਆਂ ਸੰਭਾਵੀ 8 ਬੈਠਕਾਂ ਰਲਾਉਣ ਨਾਲ ਪਿਛਲੇ 3 ਸਾਲ ਦੀ ਔਸਤ ਬੈਠਕਾਂ ਦੀ ਗਿਣਤੀ ਕੇਵਲ 17 'ਤੇ ਪਹੁੰਚੀ ਹੈ ਜੋ ਕਿ ਕਾਫ਼ੀ ਨਿਗੂਣੀ ਹੈ। ਗੁਆਂਢੀ ਰਾਜਾਂ ਹਰਿਆਣਾ ਅਤੇ ਹਿਮਾਚਲ ਪ੍ਰਦੇਸ਼ ਦੀਆਂ ਵਿਧਾਨ ਸਭਾਵਾਂ ਦੇ ਅੰਕੜੇ ਸਰਸ਼ਾਉਂਦੇ ਹਨ ਕਿ ਉਥੇ ਵੀ ਪਿਛਲੇ ਸਾਲਾ ਨਾਲੋਂ ਹੁਣ ਕਾਫ਼ੀ ਨਿਘਾਰ ਆਇਆ ਹੈ ਪਰ ਪੰਜਾਬ ਨਾਲੋਂ ਸਥਿਤੀ ਕੁਝ ਚੰਗੀ ਹੈ ਕਿਉਂਕਿ ਹਰਿਆਦਾ 'ਚ ਬੈਠਕਾਂ ਦੀ ਔਸਤ 20 ਤੋਂ ਵੱਧ ਹੈ ਜਦੋਂ ਕਿ ਹਿਮਾਚਲ 'ਚ ਸਾਲਾਨਾ ਬੈਠਕਾਂ ਦੀ ਔਸਤ 25 ਦੇ ਨੇੜੇ ਹੈ।
ਪੰਜਾਬ ਵਿਧਾਨ ਸਭਾ ਦੇ ਆਉਂਦੇ ਹਫ਼ਤੇ ਸ਼ੁਰੂ ਹੋਣ ਵਾਲੇ ਬਜਟ ਸੈਸ਼ਨ ਦੇ ਪਹਿਲੇ ਦਿਨ ਵਿਛੜੀਆ ਰੂਹਾਂ ਨੂੰ ਸ਼ਰਧਾਂਜਲੀਆ ਦੇਣ ਉਪਰੰਤ ਕੁਝ ਵਕਫ਼ੇ ਮਗਰੋਂ ਗ਼ੈਰ ਸਰਕਾਰੀ ਦਿਨ ਯਾਨੀ ਵੀਰਵਾਰ ਹੋਣ ਕਰ ਕੇ ਕੇਵਲ ਇਕ ਦੋ ਮਤੇ ਪਾਸ ਕੀਤੇ ਜਾਣਗੇ। ਤਿੰਨ ਛੁੱਟੀਆਂ ਮਗਰੋਂ ਸੋਮਵਾਰ ਨੂੰ ਹੀ 2 ਬੈਠਕਾਂ ਕਰ ਕੇ, ਰਾਜਪਾਲ ਦੇ 17 ਜਨਵਰੀ ਵਾਲੇ ਭਾਸ਼ਣ ਸਬੰਧੀ ਧੰਨਵਾਦ ਦਾ ਮਤਾ ਪਾਸ ਕੀਤਾ ਜਾਣਾ ਹੈ ਅਤੇ ਅਗਲੇ ਦਿਨ 25 ਫ਼ਰਵਰੀ ਨੂੰ ਸਾਲ 2020-21 ਦੇ ਬਜਟ ਪ੍ਰਸਤਾਵ ਪੇਸ਼ ਕੀਤੇ ਜਾਣਗੇ। ਅਗਲੇ ਦਿਨ ਬੁਧਵਾਰ ਨੂੰ ਦੋ ਬੈਠਕਾਂ ਕਰ ਕੇ ਬਜਟ ਪਾਸ ਕੀਤਾ ਜਾਵੇਗਾ ਅਤੇ ਵੀਰਵਾਰ ਨੂੰ ਫ਼ਿਰ ਗ਼ੈਰ ਸਰਕਾਰੀ ਮਤੇ ਪਾਸ ਹੋਣੇ ਹਨ ਜਦੋਂ ਕਿ ਸ਼ੁਕਰਵਾਰ ਕੁਝ ਬਿਲ ਪਾਸ ਕਰ ਕੇ ਇਜਲਾਸ ਉਠਾ ਦਿਤਾ ਜਾਵਗਾ।