ਕਿਹਾ - ਇੰਟਰਨੈਟ 'ਤੇ ਵੀ ਸ਼ਹੀਦ ਸੁਖਦੇਵ ਸਿੰਘ ਦੀ ਇਹੀ ਤਸਵੀਰ ਮੌਜੂਦ ਹੈ
ਐਸਏਐਸ ਨਗਰ : ਪੰਜਾਬ ਸਕੂਲ ਸਿੱਖਿਆ ਬੋਰਡ ਵੱਲੋਂ ਚੌਥੀਂ ਜਮਾਤ ਦੀ ਪੰਜਾਬੀ ਦੀ ਕਿਤਾਬ 'ਚ ਸ਼ਹੀਦ ਰਾਜਗੁਰੂ ਦੀ ਤਸਵੀਰ ਛਾਪੇ ਜਾਣ ਦੀ ਖ਼ਬਰ ਮਗਰੋਂ ਸਿੱਖਿਆ ਵਿਭਾਗ ਨੇ ਆਪਣਾ ਸਪਸ਼ਟੀਕਰਨ ਦਿੱਤਾ ਹੈ। ਪੰਜਾਬ ਸਕੂਲ ਸਿੱਖਿਆ ਬੋਰਡ ਦੇ ਚੇਅਰਮੈਨ ਮਨੋਹਰ ਕਾਂਤ ਕਲੋਹੀਆ ਨੇ ਦੱਸਿਆ ਕਿ ਕਿਤਾਬ 'ਚ ਛਾਪੀ ਗਈ ਤਸਵੀਰ ਗਲਤ ਨਹੀਂ ਹੈ। ਇੰਟਰਨੈਟ 'ਤੇ ਵੀ ਸ਼ਹੀਦ ਸੁਖਦੇਵ ਸਿੰਘ ਦੀ ਇਹੀ ਤਸਵੀਰ ਹੈ। ਸਾਲ 2017 'ਚ ਜਦੋਂ ਸੂਬਾ ਸਰਕਾਰ ਨੇ ਸ਼ਹੀਦ ਸੁਖਦੇਵ ਸਿੰਘ ਦੀ ਜਨਮ ਸ਼ਤਾਬਦੀ ਮਨਾਈ ਸੀ ਤਾਂ ਇਹੀ ਤਸਵੀਰ ਵਰਤੀ ਗਈ ਸੀ। ਉਨ੍ਹਾਂ ਨੇ ਕਈ ਹੋਰ ਕਿਤਾਬਾਂ ਵਿਖਾਈਆਂ, ਜਿਸ 'ਤੇ ਸੁਖਦੇਵ ਸਿੰਘ ਦੀ ਤਸਵੀਰ ਲੱਗੀ ਹੋਈ ਹੈ।
ਮਨੋਹਰ ਕਾਂਤ ਕਲੋਹੀਆ ਨੇ ਦੱਸਿਆ ਕਿ ਫਿਰ ਵੀ ਇਸ ਮਾਮਲੇ ਦੀ ਗੰਭੀਰਤਾ ਨੂੰ ਵੇਖਦਿਆਂ ਜਾਂਚ ਕਰਵਾਈ ਜਾ ਰਹੀ ਹੈ। ਕਿਤਾਬ 'ਚ ਛਪੀ ਤਸਵੀਰ ਬਾਰੇ ਬੱਚਿਆਂ 'ਚ ਪੈਦਾ ਹੋਏ ਭੰਬਲਭੂਸੇ 'ਤੇ ਉਨ੍ਹਾਂ ਕਿਹਾ ਕਿ ਪਿਛਲੇ ਸਾਲ ਵੀ ਇਹੀ ਕਿਬਾਤ ਸੀ ਅਤੇ ਤਸਵੀਰ ਵੀ ਇਹੀ ਸੀ। ਗੂਗਲ 'ਤੇ ਵੀ ਸੁਖਦੇਵ ਸਿੰਘ ਦੀ ਇਹੀ ਤਸਵੀਰ ਹੈ।
ਜ਼ਿਕਰਯੋਗ ਹੈ ਕਿ ਬੀਤੇ ਦਿਨੀਂ ਪੰਜਾਬ ਸਕੂਲ ਸਿੱਖਿਆ ਬੋਰਡ ਵੱਲੋਂ ਚੌਥੀਂ ਜਮਾਤ ਦੀ ਪੰਜਾਬੀ ਦੀ ਕਿਤਾਬ 'ਚ ਸ਼ਹੀਦਾਂ ਬਾਰੇ ਗਲਤ ਜਾਣਕਾਰੀ ਦਿੱਤੇ ਜਾਣ ਦੀ ਖ਼ਬਰ ਚਰਚਾ 'ਚ ਆਈ ਸੀ। ਕਿਤਾਬ ਦੇ ਤੀਜੇ ਪਾਠ ਵਿਚ ਸ਼ਹੀਦ ਸੁਖਦੇਵ ਸਿੰਘ ਬਾਰੇ ਦੱਸਿਆ ਗਿਆ ਹੈ, ਜਦਕਿ ਫ਼ੋਟੋ ਰਾਜਗੁਰੂ ਦੀ ਲਗਾਈ ਗਈ ਹੈ। ਉਸ 'ਤੇ ਲਿਖਿਆ ਹੈ 'ਬਾਲ ਸੁਖਦੇਵ'।