ਮਜੀਠੀਆ ਦੀ ਨਰਾਜ਼ਗੀ ਕਾਰਨ ਖਟਾਈ 'ਚ ਪਿਆ ਮਾਮਲਾ
ਅੰਮ੍ਰਿਤਸਰ : ਟਕਸਾਲੀਆਂ ਦੀ ਛਤਰੀ ਤੋਂ ਉਡਾਰੀ ਮਾਰਨ ਦੀ ਤਿਆਰੀ ਕਰ ਰਹੇ ਅਜਨਾਲਾ ਹਲਕੇ ਦੇ ਸਾਬਕਾ ਵਿਧਾਇਕ ਅਮਰਪਾਲ ਸਿੰਘ ਬੋਨੀ ਦੇ ਪਰਾਂ ਦੀ ਪਰਵਾਜ਼ ਫ਼ਿਲਹਾਲ ਟਲ ਗਈ ਹੈ। ਉਨ੍ਹਾਂ ਦੀ ਪਰਵਾਜ਼ ਅੱਗੇ ਉਨ੍ਹਾਂ ਵਲੋਂ ਬੀਤੇ ਸਮੇਂ 'ਚ ਕੀਤੀ ਗਈ ਤਲਮ-ਕਲਾਮੀ ਆਣ ਖੜੀ ਹੋਈ ਹੈ। ਅਸਲ ਵਿਚ ਅਕਾਲੀ ਦਲ ਵਿਚੋਂ ਜਾਣ ਤੋਂ ਬਾਅਦ ਉਨ੍ਹਾਂ ਨੇ ਬਿਮਰਮ ਸਿੰਘ ਮਜੀਠੀਆ ਖਿਲਾਫ਼ ਕਾਫ਼ੀ ਹਮਲਾਵਰ ਤੇਵਰ ਅਪਣਾਏ ਸਨ ਜਿਸ ਕਾਰਨ ਮਜੀਠੀਆ ਉਨ੍ਹਾਂ ਤੋਂ ਕਾਫ਼ੀ ਨਰਾਜ਼ ਹਨ।
Photo
ਪਾਰਟੀ ਅੰਦਰ ਪਹਿਲਾਂ ਹੀ ਖਾਨਾਜੰਗੀ ਵਰਗੇ ਹਾਲਾਤ ਬਣੇ ਹੋਏ ਹਨ ਜਿਸ ਦੇ ਚਲਦਿਆਂ ਪਾਰਟੀ ਪ੍ਰਧਾਨ ਸੁਖਬੀਰ ਬਾਦਲ ਬਿਕਰਮ ਮਜੀਠੀਆ ਵਰਗੇ ਕੱਦਾਵਰ ਆਗੂ ਦੇ ਨਰਾਜ਼ਗੀ ਲੈਣ ਦੇ ਮੂੜ ਵਿਚ ਨਹੀਂ ਹਨ। ਸੋ ਉਨ੍ਹਾਂ ਨੇ ਬੋਨੀ ਅਜਨਾਲਾ ਦੀ ਪਾਰਟੀ ਅੰਦਰ ਵਾਪਸੀ ਨੂੰ ਫਿਲਹਾਲ ਠੰਡੇ ਬਸਤੇ ਵਿਚ ਪਾ ਦਿਤਾ ਹੈ।
Photo
ਸੂਤਰਾਂ ਮੁਤਾਬਕ ਸੁਖਬੀਰ ਬਾਦਲ ਨੇ ਅਪਣੀ ਅੰਮ੍ਰਿਤਸਰ ਫੇਰੀ ਦੌਰਾਨ ਬੋਨੀ ਅਜਨਾਲਾ ਦੇ ਘਰ ਜਾਣ ਦਾ ਪ੍ਰੋਗਰਾਮ ਉਲੀਕਿਆ ਗਿਆ ਸੀ ਜੋ ਐਨ ਮੌਕੇ 'ਤੇ ਰੱਦ ਕਰ ਦਿਤਾ। ਇਸ ਤੋਂ ਬਾਅਦ ਸੁਖਬੀਰ ਬਾਦਲ ਨੇ ਅਕਾਲੀ ਆਗੂ ਵਿਰਸਾ ਸਿੰਘ ਵਲਟੋਹਾ ਦੇ ਘਰ ਵਿਖੇ ਮਾਂਝੇ ਦੇ ਆਗੂਆਂ ਨਾਲ ਮੁਲਾਕਾਤ ਕੀਤੀ। ਮੀਟਿੰਗ ਦੌਰਾਨ 13 ਫ਼ਰਵਰੀ ਦੀ ਰੈਲੀ ਸਬੰਧੀ ਵਿਚਾਰ ਵਟਾਂਦਰਾ ਕੀਤਾ ਗਿਆ।
Photo
ਬੋਨੀ ਅਜਨਾਲਾ ਦੀ ਪਾਰਟੀ ਅੰਦਰ ਵਾਪਸੀ ਬਾਰੇ ਸੁਖਬੀਰ ਬਾਦਲ ਦਾ ਕਹਿਣਾ ਹੈ ਕਿ ਉਹ ਜਦੋਂ ਚਾਹੁਣ ਪਾਰਟੀ 'ਚ ਆ ਸਕਦੇ ਹਨ ਜਦਕਿ ਬਿਕਰਮ ਮਜੀਠੀਆ ਨੇ ਇਸ ਸਬੰਧੀ ਅਜੇ ਤਕ ਚੁਪੀ ਧਾਰੀ ਹੋਈ ਹੈ। ਚੱਲ ਰਹੀਆਂ ਚਰਚਾਵਾਂ ਅਨੁਸਾਰ 13 ਫ਼ਰਵਰੀ ਨੂੰ ਹੋਣ ਵਾਲੀ ਰੈਲੀ ਦੌਰਾਨ ਬੋਨੀ ਅਜਨਾਲਾ ਦੇ ਪਾਰਟੀ ਅੰਦਰ ਸ਼ਾਮਲ ਹੋਣ ਦੀ ਸੰਭਾਵਨਾ ਮੱਧਮ ਪੈ ਗਈ ਹੈ।
Photo
ਸੂਤਰਾਂ ਅਨੁਸਾਰ ਮਾਂਝੇ ਅੰਦਰਲੇ ਸਾਰੇ ਫ਼ੈਸਲੇ ਬਿਕਰਮ ਮਜੀਠੀਆ ਦੀ ਸਹਿਮਤੀ ਨਾਲ ਲਏ ਜਾਂਦੇ ਰਹੇ ਹਨ ਪਰ ਟਕਸਾਲੀਆਂ ਨੂੰ ਝਟਕਾ ਦੇਣ ਦੀ ਕਾਹਲੀ 'ਚ ਸੁਖਬੀਰ ਬਾਦਲ ਬੋਨੀ ਅਜਨਾਲਾ ਨੂੰ ਪਾਰਟੀ ਅੰਦਰ ਲਿਆਉਣ ਦੇ ਰੌਂਅ ਵਿਚ ਸਨ ਜੋ ਮਜੀਠੀਆ ਨੂੰ ਰਾਸ ਨਹੀਂ ਆਇਆ। ਦੂਜੇ ਪਾਸੇ ਬੋਨੀ ਅਜਨਾਲਾ ਦਾ ਕਹਿਣਾ ਹੈ ਕਿ ਉਹ ਪੰਥ ਦੀ ਚੜ੍ਹਦੀ ਕਲਾਂ ਲਈ ਹਮੇਸ਼ਾ ਸਰਗਰਮ ਰਹੇ ਹਨ। ਉਨ੍ਹਾਂ ਅਪਣੇ ਅਗਲੇ ਕਦਮਾਂ ਬਾਰੇ 13 ਫ਼ਰਵਰੀ ਤੋਂ ਬਾਅਦ ਦੱਸਣ ਦੀ ਗੱਲ ਕਹੀ ਹੈ।
