ਖਹਿਰਾ ਤੇ ਸੰਦੋਆ ਦਾ ਜਵਾਬ ਦੇਣ ਦਾ ਸਮਾਂ ਅੱਜ ਖ਼ਤਮ, ਮਾਨਸ਼ਾਹੀਆ ਵਿਰੁਧ ਨਵੀਂ ਪਟੀਸ਼ਨ
ਚੰਡੀਗੜ੍ਹ : ਪੰਜਾਬ ਵਿਧਾਨ ਸਭਾ 'ਚ 20 ਵਿਧਾਇਕਾਂ ਵਾਲੀ ਮੁੱਖ ਵਿਰੋਧੀ ਧਿਰ ਆਮ ਆਦਮੀ ਪਾਰਟੀ ਪਿਛਲੇ 2 ਸਾਲਾਂ ਤੋਂ ਵੱਖ ਵੱਖ ਕਰਾਨਾਂ ਕਰ ਕੇ 5 ਗੁਟਾਂ 'ਚ ਵੰਡੀ ਹੋਈ ਹੈ ਅਤੇ ਪਿਛਲੇ ਢੇਡ ਸਾਲ ਤੋਂ ਆਪ ਦੇ 4 ਵਿਧਾਇਕਾਂ ਸੁਖਪਾਲ ਖਹਿਰਾ, ਨਾਜਰ ਸਿੰਘ ਮਾਨਸ਼ਾਹੀਆ, ਅਮਰਜੀਤ ਸੰਦੋਆ ਅਤੇ ਬਲਦੇਵ ਸਿੰਘ ਜੈਤੋ ਦੀ ਗਰਦਨ 'ਤੇ 'ਆਯੋਗ' 'ਤੇ ਕਰਾਰ ਦੇਣ ਦੀ ਤਲਵਾਰ, ਜਿਉਂ ਦੀ ਤਿਉਂ ਲਟਕੀ ਹੋਈ ਹੈ।
ਸਖਪਾਲ ਖਹਿਰਾ ਦੀ ਪੁਜੀਸ਼ਨ ਬਤੌਰ ਵਿਰੋਧੀ ਧਿਰ ਦੇ ਨੇਤਾ ਉਸ ਵੇਲੇ ਮਿੱਟੀ 'ਚ ਅਰਵਿੰਦ ਕੇਜਰੀਵਾਲ ਨੇ ਰੋਲ ਦਿਤੀ ਜਦੋਂ ਉਸ ਨੂੰ ਹਟਾ ਕੇ ਹਰਪਾਲ ਚੀਮਾ ਨੂੰ ਲਗਾ ਦਿਤਾ। ਛੇ ਮਹੀਨੇ ਉਬਾਲੇ ਖਾਂਦੇ ਇਸ ਬੜਬੋਲੇ ਭੁਲੱਥ ਹਲਕੇ ਤੋਂ ਵਿਧਾਇਕ ਨੇ ਅਸਤੀਫ਼ਾ ਦੇਣ ਦਾ ਰੌਲਾ ਪਾ ਕੇ ਜਨਵਰੀ 2019 'ਚ ਨਵੀਂ ਪਾਰਟੀ 'ਪੰਜਾਬੀ ਏਕਤਾ ਪਾਰਟੀ' ਬਣਾਈ ਅਤੇ ਆਪ 'ਚ ਰਹਿੰਦੀਆਂ ਨਵੀਂ ਪਾਰਟੀ ਦੇ ਚੋਣ ਨਿਸ਼ਾਨ 'ਤੇ ਬਠਿੰਡਾ ਸੀਟ ਤੋਂ ਲੋਕ ਸਭਾ ਦੀ ਚੋਣ ਲੜੀ ਅਤੇ ਹਾਰ ਗਏ। ਇਸੇ ਤਰ੍ਹਾਂ ਮਾਸਟਰ ਬਲਦੇਵ ਸਿੰੰਘ ਨੇ ਆਪ ਦੇ ਜੈਤੋ ਹਲਕੇ ਤੋਂ ਵਿਧਾਇਕ ਹੁੰਦਿਆ ਖਹਿਰਾ ਦੀ ਪਾਰਟੀ ਦੇ ਟਿਕਟ 'ਤੇ ਫਰੀਦਕੋਟ ਰਿਜ਼ਰਵ ਸੀਟ ਤੋਂ ਲਕੋ ਸਭਾ ਦੀ ਚੋਣ ਲੜੀ, ਉਹ ਵੀ ਹਾਰ ਗਏ।
ਦੂਜੇ ਤਿੰਨੋਂ ਵਿਧਾਇਕਾਂ ਰੋਪੜ ਤੋਂ ਅਮਰਜੀਤ ਸੰਦੋਆ ਅਤੇ ਮਾਨਸਾ ਤੋਂ ਨਾਰ ਸਿੰਘ ਮਾਨਸ਼ਾਹੀਆ ਨੇ ਅਪ੍ਰੈਲ 2019 'ਚ ਸ਼ਰੇਆਮ ਸੱਤਾਧਾਰੀ ਕਾਂਗਰਸ 'ਚ ਸ਼ਮੂਲੀਅਤ ਕੀਤੀ, ਆਪ ਤੋਂ ਅਸਤੀਫ਼ੇ ਵੀ ਦੇ ਦਿਤੇ, ਪਰ ਪਿਛਲੇ ਢੇਡ ਸਾਲ ਤੋਂ ਵਿਧਾਨ ਸਭਾ ਦੇ ਹੋਏ ਸਾਰੇ ਇਜਲਾਸਾਂ 'ਚ ਹਾਜ਼ਰੀ ਭਰੀ ਅਤੇ ਵਿਰੋਧੀ ਧਿਰ ਵਲ ਹੀ ਬੈਠਦੇ ਰਹੇ। ਵਿਧਾਨ ਸਭਾ ਸਕੱਤਰੇਤ ਦੇ ਸੂਤਰਾਂ ਨੇ ਰੋਜ਼ਾਨਾ ਸਪੋਕਸਮੈਨ ਨੂੰ ਦਸਿਆ ਕਿ ਸਪੀਕਰ ਰਾਣਾ ਕੇ.ਪੀ ਸਿੰਘ ਨੇ ਖਹਿਰਾ ਨੂੰ 11 ਮਾਰਚ ਤਕ ਜੁਆਬ ਦੇਣ ਲਈ ਕਿਹਾ ਸੀ। ਸ.ਖਹਿਰਾ ਵਿਰੁਧ ਹਰਪਾਲ ਚੀਮਾ, ਮੌਜੂਦਾ ਵਿਰੁਧੀ ਧਿਰ ਦੇ ਨੇਤਾ ਨੇ ਹੀ ਪਟੀਸ਼ਨ ਪਾਈ ਹੋਈ ਹੈ ਕਿ ਇਸ ਨੂੰ 'ਅਯੋਗ' ਕਰਾਰ ਦਿਤਾ ਜਾਵੇ।
ਇੱਥੇ ਇਹ ਵੀ ਦੱਸਣਾ ਬਣਦਾ ਹੈ ਕਿ ਬਤੌਰ ਵਿਧਾਇਕ ਸ.ਖਹਿਰਾ ਨੇ ਨੈਤਿਕ ਕਦਰਾਂ ਕੀਮਤਾਂ ਨੂੰ ਲਾਂਭੇ ਕਰ ਕੇ, ਅਪਣਾ ਦਿਤਾ ਅਸਤੀਫ਼ਾ 22 ਅਕਤੂਬਰ ਨੂੰ ਪਿਛਲੇ ਸਾਲ ਵਾਪਸ ਲੈ ਲਿਆ ਸੀ। ਇਸੇ ਤਰ੍ਹਾਂ ਬਲਦੇਵ ਜੈਤੋ ਨੇ ਐਡਵੋਕੇਟ ਸਿਮਰਨਜਤੀ ਸਿੰਘ ਪਟੀਸ਼ਨਰ ਬਾਰੇ ਇਹ ਕਹਿ ਦਿਤਾ ਸੀ ਕਿ ਉਸ ਨੇ ਪਟੀਸ਼ਨ ਵਾਪਸ ਲੈ ਲਈ ਸੀ। ਵਿਧਾਇਕ ਵਲੋਂ ਝੂਠ ਬੋਲਣ ਅਤੇ ਪਟੀਸ਼ਨਰ ਦੇ ਖੁਦ ਸਕੱਤਰ ਸਾਹਮਣੇ ਪੇਸ਼ ਹੋ ਕੇ ਸੱਚਾਈ ਦੱਸਣ ਦੀ ਰੀਪੋਰਟ ਅਜੇ ਸਪੀਕਰ ਕੋਲ ਨਹੀਂ ਪਹੁੰਚੀ ਹੈ, ਜਿਸ ਉਪਰੰਤ ਹੀ ਕੋਈ ਏਕਸ਼ਨ ਲਿਆ ਜਾਵੇਗਾ।
ਨਾਜਰ ਸਿੰਘ ਮਾਨਸ਼ਾਹੀਆ ਦਾ ਅਸਤੀਫ਼ਾ ਸਪੀਕਰ ਵੋਲਂ ਰੱਦ ਕਰਨ ਉਪਰੰਤ ਹੁਣ ਆਪ ਦੇ ਮਾਨਸਾ ਤੋਂ ਨੇਤਾ ਗੁਰਪ੍ਰੀਤ ਵਲੋਂ ਇਕ ਪਟੀਸ਼ਨ ਹੁਣ ਮਾਨਸ਼ਾਹੀਆ ਵਿਰੁਧ ਵੀ ਆ ਗਈ ਹੈ। ਇਸ ਸਬੰਧ 'ਚ ਵਿਧਾਨ ਸਪਾ ਸਕੱਤਰੇਤ ਨੇ ਮਾਨਸ਼ਾਹੀਆ ਨੂੰ ਨੋਟਿਸ ਭੇਜ ਦਿਤਾ ਹੈ ਅਤੇ ਇਕ ਮਹੀਨੇ 'ਚ ਜੁਆਬ ਦੇਣ ਲਈ ਕਿਹਾ ਹੈ। ਕੁਲ ਮਿਲਾ ਕੇ ਸ.ਹਰਜਿੰਦਰ ਸਿੰਘ ਫੂਲਕਾ ਦੇ ਛੱਡ ਜਾਣ ਉਪਰੰਤ ਰਹਿੰਦੇ 19 ਵਿਧਾਇਕਾਂ 'ਚ 5 ਗੁੱਟ ਬਣੇ ਹੋਏ ਹਨ ਜਿਨ੍ਹਾਂ 'ਚ ਚੀਮਾ ਕੁਲਤਾਰ ਸੰਧਵਾ, ਕੰਵਰ ਸੰਧੂ, ਖਹਿਰਾ, ਸੰਦੋਆ ਤੇ ਇਕ ਦੋ ਹੋਰ ਮੁੱਖ ਹਨ।