ਸਕੂਲ ਖੋਲ੍ਹਣ ਦਾ ਫ਼ੈਸਲਾ ਸਰਕਾਰ ਨੇ ਕਿਸ ਦੇ ਦਬਾਅ 'ਚ ਲਿਆ? : ਸ਼ੈਲਜਾ 

ਚੰਡੀਗੜ੍ਹ, 14 ਜੁਲਾਈ (ਸੁਰਜੀਤ ਸਿੰਘ ਸੱਤੀ) : ਹਰਿਆਣਾ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਕੁਮਾਰੀ ਸ਼ੈਲਜਾ ਨੇ ਸਵਾਲ ਕੀਤਾ ਕਿ ਹੈ ਰਾਜ ਵਿਚ ਸਕੂਲ ਖੋਲ੍ਹਣ ਦਾ ਫ਼ੈਸਲਾ ਸਰਕਾਰ ਨੇ ਕਿਸ ਦੇ ਦਬਾਅ ਵਿਚ ਲਿਆ? ਮੁੱਖ ਮੰਤਰੀ ਅਤੇ ਸਿਖਿਆ ਮੰਤਰੀ  ਦੱਸਣ ਕੀ ਕੋਰੋਨਾ ਦੀ ਤੀਜੀ ਲਹਿਰ ਦਾ ਖ਼ਤਰਾ ਸਿਰ ਉੱਤੇ ਨਹੀਂ, ਕੀ ਦੂਜੀ ਲਹਿਰ ਖ਼ਤਮ ਹੋ ਚੁੱਕੀ, ਕੀ ਇਕ ਵੀ ਬੱਚੇ ਨੂੰ  ਵੈਕਸੀਨ ਲੱਗੀ ਹੈ? ਇੰਨਾ ਸੱਭ ਹੋਣ 'ਤੇ ਵੀ ਸਕੂਲ ਖੋਲ੍ਹਣ ਦਾ ਫ਼ੈਸਲਾ ਕੀ ਤਰਕਸੰਗਤ, ਨਿਆਸੰਗਤ ਹੈ? ਕੀ ਬੱਚਿਆਂ  ਦੇ ਜੀਵਨ ਦੀ ਸੁਰੱਖਿਆ ਜ਼ਰੂਰੀ ਨਹੀਂ? 
ਇਥੇ ਜਾਰੀ ਬਿਆਨ ਵਿਚ ਕੁਮਾਰੀ ਸ਼ੈਲਜਾ ਨੇ ਕਿਹਾ ਕਿ ਇਸ ਤੋਂ ਸਾਫ਼ ਹੋ ਰਿਹਾ ਹੈ ਕਿ ਸਰਕਾਰ ਵਿਚ ਫ਼ੈਸਲਾ  ਲੈਣ ਦੀ ਸਮਰਥਾ ਨਹੀਂ ਹੈ | ਕੋਈ ਦਬਾਅ ਤੰਤਰ ਕੋਈ ਲਾਬੀ ਉਸ ਉੱਤੇ ਹਾਵੀ ਹੈ ਜੋ ਉਸ ਦੇ ਫ਼ੈਸਲਿਆਂ ਨੂੰ  ਪ੍ਰਭਾਵਤ ਕਰ ਰਹੀ ਹੈ | ਉਨ੍ਹਾਂ ਮੰਗ ਕੀਤੀ ਕਿ ਜਦੋਂ ਤਕ ਸਾਰੇ ਬੱਚਿਆਂ ਨੂੰ  ਵੈਕਸੀਨ ਨਹੀਂ ਲਗਾਈ ਜਾਂਦੀ ਤੱਦ ਤਕ ਸਕੂਲ ਨਾ ਖੋਲ੍ਹੇ ਜਾਣ  | ਕੁਮਾਰੀ ਸ਼ੈਲਜਾ ਨੇ ਕਿਹਾ ਕਿ ਲੱਗ ਤਾਂ ਇਹ ਵੀ ਰਿਹਾ ਹੈ ਕਿ ਸਰਕਾਰ ਦੀ ਇੱਛਾ ਉਸ ਦੇ ਅਹੁਦੇਦਾਰਾਂ ਦੀ ਹਿੱਸੇਦਾਰੀ ਵਿਚ ਚੱਲ ਰਹੇ ਪ੍ਰਾਈਵੇਟ ਸਕੂਲਾਂ ਨੂੰ  ਮੁਨਾਫ਼ਾ ਪਹੁੰਚਾਉਣ ਦੀ ਹੈ | ਪ੍ਰਦੇਸ਼ ਸਰਕਾਰ ਨੇ 16 ਜੁਲਾਈ ਵਲੋਂ 9ਵੀ ਤੋਂ 12ਵੀ ਜਮਾਤ ਤੱਕ ਅਤੇ 23 ਜੁਲਾਈ ਵਲੋਂ ਛੇਵੀਂ ਤੋਂ ਅਠਵੀਂ ਜਮਾਤ ਤਕ ਦੇ ਸਕੂਲ ਖੋਲ੍ਹਣ ਦਾ ਫ਼ੈਸਲਾ ਲਿਆ ਹੈ | 
ਕੁਮਾਰੀ ਸੈਲਜਾ ਨੇ ਕਿਹਾ ਕਿ ਸਕੂਲ ਖੋਲ੍ਹਣ ਦਾ ਫ਼ੈਸਲਾ ਬਿਲਕੁਲ ਗ਼ਲਤ ਹੈ |  ਸ਼ੈਲਜਾ ਨੇ ਕਿਹਾ ਕਿ ਏਮਜ਼ ਦੇ ਡਾਇਰੈਕਟਰ ਡਾ. ਰਣਦੀਪ ਗੁਲੇਰਿਆ ਅਤੇ ਆਈਸੀਏਮਆਰ ਕੋਰੋਨਾ ਦੀ ਤੀਜੀ ਲਹਿਰ ਨੂੰ  ਲੈ ਕੇ ਲਗਾਤਾਰ ਸੁਚੇਤ ਕਰ ਰਹੇ ਹਨ |  ਡਾ. ਗੁਲੇਰੀਆ ਨੇ ਤੀਜੀ ਲਹਿਰ ਦਾ ਸੱਭ ਤੋਂ ਜਿਆਦਾ ਅਸਰ 18 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਉੱਤੇ ਪੈਣ ਦੀ ਸ਼ੰਕਾ ਜਤਾਈ ਹੈ | ਗੰਭੀਰ ਖ਼ਤਰਾ ਸਿਰ ਉੱਤੇ ਹੈ ਪਰ ਰਾਜ ਸਰਕਾਰ ਅੱਖਾਂ ਮੀਟ ਕੇ ਤੁਗਲਕੀ ਆਦੇਸ਼ ਜਾਰੀ ਕਰ ਰਹੀ ਹੈ |