ਨਹੀਂ ਰੱਖਿਆ ਸੋਸ਼ਲ ਡਿਸਟੈਂਸਿੰਗ ਦਾ ਧਿਆਨ
ਲੁਧਿਆਣਾ : ਕਰੋਨਾ ਕਾਲ ਨੇ ਇਨਸਾਨੀ ਜੀਵਨ ਵਿਚ ਵੱਡੇ ਬਦਲਾਅ ਲਿਆਂਦੇ ਹਨ। ਹੁਣ ਉਹ ਪਹਿਲਾਂ ਵਾਲੀ ਦੁਨੀਆਂ ਨਹੀਂ ਰਹੀ, ਜਦੋਂ ਇਨਸਾਨੀ ਨਜ਼ਦੀਕੀਆਂ ਨੂੰ ਸ਼ੁਭ-ਸ਼ਗਨ ਮੰਨਿਆ ਜਾਂਦਾ ਸੀ। ਹੁਣ ਦੂਰੋਂ ਫ਼ਤਹਿ ਬੁਲਾਉਣ ਦਾ ਜ਼ਮਾਨਾ ਆ ਗਿਐ। ਕਿਸੇ ਰਾਹ ਜਾਂਦੇ ਨੂੰ ਲਿਫ਼ਟ ਦੇ ਕੇ ਭਲਾਈ ਕਰਨਾ ਵੀ ਤੁਹਾਨੂੰ ਮਹਿੰਗਾ ਪੈ ਸਕਦੈ। ਇੰਨਾ ਹੀ ਨਹੀਂ, ਕਿਸੇ ਭੁੱਖੇ ਨੂੰ ਲੰਗਰ ਛਕਾਉਣ ਦਾ ਕਾਰਜ ਵੀ ਤੁਹਾਨੂੰ ਸਮਾਜਿਕ ਦੂਰੀ ਬਣਾ ਕੇ ਕਰਨਾ ਪਵੇਗਾ, ਵਰਨਾ ਕਾਨੂੰਨ ਦਾ ਡੰਡਾ ਤੁਹਾਨੂੰ ਪੜ੍ਹਨੇ ਪਾ ਸਕਦੈ।
Langer
ਅਜਿਹਾ ਹੀ ਇਕ ਮਾਮਲਾ ਲੁਧਿਆਣਾ ਵਿਖੇ ਸਾਹਮਣੇ ਆਇਆ ਹੈ ਜਿੱਥੇ ਕੁੱਝ ਨੌਜਵਾਨਾਂ ਨੂੰ ਲੰਗਰ ਵੰਡਣ ਦਾ ਖਮਿਆਜ਼ਾ ਅਦਾਲਤਾਂ ਦੇ ਚੱਕਰ ਕੱਟਣ ਦੇ ਰੂਪ ਵਿਚ ਭੁਗਤਣਾ ਪੈ ਗਿਆ। ਦਰਅਸਲ ਇਨ੍ਹਾਂ ਨੌਜਵਾਨਾਂ ਨੇ ਪੁਲਿਸ ਦੀਆਂ ਚਿਤਾਵਨੀਆਂ ਨੂੰ ਦਰਕਿਨਾਰ ਕਰਦਿਆਂ ਲੰਗਰ ਵਰਤਾਉਣ ਦਾ ਕਾਰਜ ਅਰੰਭਿਆ ਸੀ।
Langer
ਇਨ੍ਹਾਂ ਨੇ ਲੰਗਰ ਵਰਤਾਉਣ ਲੱਗਿਆ ਕਰੋਨਾ ਕਾਲ ਦੌਰਾਨ ਸਮਾਜਿਕ ਦੂਰੀ ਬਣਾਈ ਰੱਖਣ ਦੇ ਨਿਯਮ ਨੂੰ ਅਣਗੌਲਿਆ ਕਰ ਦਿਤਾ। ਪੁਲਿਸ ਨੇ ਹੋਰਨਾਂ ਨੂੰ ਅਜਿਹਾ ਨਾ ਕਰਨ ਦੀ ਨਸੀਹਤ ਦੇਣ ਦੇ ਮਕਸਦ ਨਾਲ ਇਨ੍ਹਾਂ ਨੌਜਵਾਨਾਂ ਖਿਲਾਫ਼ ਕੇਸ ਦਰਜ ਕਰ ਕੇ ਅਗਲੇਰੀ ਕਾਰਵਾਈ ਅਰੰਭ ਦਿਤੀ ਹੈ।
Langer
ਕਾਬਲੇਗੌਰ ਹੈ ਕਿ ਪੰਜਾਬ ਅੰਦਰ ਇਹ ਅਜਿਹਾ ਪਹਿਲਾ ਮੌਕਾ ਹੈ, ਜਦੋਂ ਕਿਸੇ ਨੂੰ ਲੰਗਰ ਛਕਾਉਣ ਦੇ ਕਾਰਨ ਮਾਮਲਾ ਦਰਜ ਹੋਇਆ ਹੋਵੇ। ਪੁਲਿਸ ਸੂਤਰਾਂ ਮੁਤਾਬਕ ਪ੍ਰਸ਼ਾਸਨ ਵਲੋਂ ਕਰੋਨਾ ਵਾਇਰਸ ਦੀ ਰੋਕਥਾਮ ਦੇ ਮੱਦੇਨਜ਼ਰ ਲਾਈਆਂ ਪਾਬੰਦੀਆਂ ਦੇ ਬਾਵਜੂਦ ਕੁੱਝ ਵਿਅਕਤੀਆਂ ਨੇ ਬ੍ਰਾਊਨ ਰੋਡ 'ਤੇ ਕਲਗੀਧਰ ਕੱਟ ਦੇ ਕੋਲ ਲੰਗਰ ਲਾ ਕੇ ਵੰਡਿਆ ਗਿਆ ਸੀ।
Langer
ਇਸ ਦੌਰਾਨ ਸੋਸ਼ਲ ਡਿਸਟੈਂਡਿੰਗ ਦੇ ਮਾਪਦੰਡਾਂ ਦਾ ਧਿਆਨ ਨਹੀਂ ਰੱਖਿਆ ਗਿਆ ਜਿਸ ਕਾਰਨ ਪੁਲਿਸ ਨੇ ਮਾਮਲਾ ਦਰਜ ਕੀਤਾ ਹੈ। ਐਸਐਚਓ ਸਤਪਾਲ ਮੁਤਾਬਕ ਜਿਨ੍ਹਾਂ ਖਿਲਾਫ਼ ਮਾਮਲਾ ਦਰਜ ਕੀਤਾ ਗਿਆ ਹੈ, ਉਨ੍ਹਾਂ 'ਚ ਪ੍ਰਭਜੋਤ ਸਿੰਘ, ਸਤਿੰਦਰਪਾਲ ਸਿੰਘ, ਵਿੱਕੀ, ਲਵਲੀ, ਚਰਨਪ੍ਰੀਤ ਸਿੰਘ, ਰਾਜਵੀਰ, ਵਿੱਕੀ, ਮੀਰਾ ਮੇਅਰ ਤੋਂ ਇਲਾਵਾ ਹੋਰ 7 ਅਣਪਛਾਤੇ ਵਿਅਕਤੀ ਸ਼ਾਮਲ ਹਨ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ
