ਦੇਵੀਗੜ੍ਹ ਵਿਖੇ ਘੱਗਰ ਦਰਿਆ ‘ਤੇ ਰੇਲਿੰਗ ਟੁੱਟੀ ਹੋਣ ਕਾਰਨ ਰਾਤ ਸਮੇਂ ਇਕ ਬੱਚਾ ਹਨੇਰੇ ਕਾਰਨ ਦਰਿਆ ਵਿਚ ਡਿੱਗ ਕੇ ਗੰਭੀਰ ਜ਼ਖ਼ਮੀ ਹੋ ਗਿਆ ਹੈ...
ਦੇਵੀਗੜ੍ਹ : ਦੇਵੀਗੜ੍ਹ ਵਿਖੇ ਘੱਗਰ ਦਰਿਆ ‘ਤੇ ਰੇਲਿੰਗ ਟੁੱਟੀ ਹੋਣ ਕਾਰਨ ਰਾਤ ਸਮੇਂ ਇਕ ਬੱਚਾ ਹਨੇਰੇ ਕਾਰਨ ਦਰਿਆ ਵਿਚ ਡਿੱਗ ਕੇ ਗੰਭੀਰ ਜ਼ਖ਼ਮੀ ਹੋ ਗਿਆ ਹੈ। ਕਸਬਾ ਦੇਵੀਗੜ੍ਹ ਦੇ ਵਿਚਕਾਰ ਦੀ ਲੰਘਦੇ ਘੱਗਰ ਦਰਿਆ ਉੱਤੇ ਅੱਧੀ ਸਦੀ ਤੋਂ ਪਹਿਲਾਂ ਬਣੇ ਮਿਆਦ ਲੰਘ ਚੁੱਕੀ ਹੈ। ਇਸ ਕਿਨੇਰੇ ਸੱਜੇ ਪਾਸੇ ਦੀ ਰੇਲਿੰਗ ਬੀਤੇ ਸਾਲ ਅਪਣੇ ਆਪ ਹੀ ਡਿੱਗ ਗਈ ਸੀ। ਇਹ ਪੁੱਲ ਹੁਣ ਇਨ੍ਹਾ ਕਮਜ਼ੋਰ ਹੋ ਗਿਆ ਹੈ ਕਿ ਇਸ ਦੀ ਰੇਲਿੰਗ ਖੁਰਨ ਅਤੇ ਡਿੱਗਣ ਲੱਗ ਪਈ ਹੈ।
ਇਸ ਪੁਲ ਦੇ ਨਾਲ ਹੀ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਅਤੇ ਕਈ ਹੋਰ ਪ੍ਰਾਈਵੇਟ ਸਕੂਲ ਹਨ। ਬੱਚੇ ਪੁੱਲ ਉੱਤੋਂ ਲੰਘ ਕੇ ਜਾਂਦੇ ਹਨ। ਇਸ ਤੋਂ ਇਲਾਵਾ ਇਸ ਪੁੱਲ ਦੀਆਂ ਨੀਹਾਂ ਵੀ ਕਮਜ਼ੋਰ ਹੋ ਗਈ ਹਨ ਜਦੋਂ ਕੋਈ ਭਾਰੀ ਵਾਹਨ ਉੱਤੋਂ ਦੀ ਲੰਘ ਜਾਂਦੇ ਹਨ ਤਾਂ ਪੁਲ ਕੰਬਣ ਲੱਗਦਾ ਹੈ। ਹਾਲਤ ਇੰਨੀ ਮਾੜੀ ਹੋਣ ਦੇ ਬਾਵਜੂਦ ਸਬੰਧਤ ਵਿਭਾਗ ਦੇ ਅਧਿਕਾਰੀਆਂ ਦੇ ਕੰਨ ‘ਤੇ ਜੂੰਅ ਨਹੀਂ ਸਰਕਦੀ।
ਕਿਸੇ ਅਧਿਕਾਰੀ ਨੇ ਇਸ ਪਾਸੇ ਧਿਆਨ ਤੱਕ ਨਹੀਂ ਦਿੱਤਾ। ਜੇਕਰ ਇਸੇ ਤਰਹਾਂ ਲਾਪ੍ਰਵਾਹੀ ਰਹੀ ਤਾਂ ਇੱਥੇ ਕੋਈ ਵੱਡਾ ਹਾਦਸਾ ਵੀ ਵਾਪਰ ਸਕਦਾ ਹੈ। ਇਸ ਸਬੰਧੀ ਜਦੋਂ ਸਬੰਧਤ ਮਹਿਕਮੇ ਦੇ ਐਕਸੀਅਨ ਦੀਪਕ ਗੋਇਲ ਨਾਲ ਸੰਪਰਕ ਕੀਤਾ ਤਾਂ ਉਨ੍ਹਾਂ ਦੱਸਿਆ ਕਿ ਮੀਰਾਂਪੁਰ ਤੋਂ ਜੋੜੀਆਂ ਤੱਕ ਸੜਕ ਬਣਾਉਣ ਦਾ ਕੰਮ ਚੱਲ ਰਿਹਾ ਹੈ। ਇਸ ਟੁੱਟੀ ਰੇਲਿੰਗ ਦੀ ਮੁਰੰਮਤ ਵੀ ਸੜਕ ਦੇ ਨਾਲ ਹੀ ਕਰਵਾ ਦਿੱਤੀ ਜਾਵੇਗੀ।
