ਲਗਭਗ 76 ਸਾਲ ਬਾਅਦ ਬੀਬੀ ਹਸਮਤ ਪਹੁੰਚੇ ਅਪਣੇ ਜੱਦੀ ਪਿੰਡ ਖਡੂਰ ਸਾਹਿਬ
ਪ੍ਰਵਾਰਕ ਮੈਂਬਰਾਂ ਤੇ ਇਲਾਕਾ ਨਿਵਾਸੀਆਂ ਨੇ ਕੀਤਾ ਭਰਵਾਂ ਸਵਾਗਤ
ਪੱਟੀ (ਦਰਸ਼ਨ ਸਿੰਘ ਸੰਧੂ) : ਜ਼ਿਲ੍ਹਾ ਤਰਨ ਤਾਰਨ ਦੇ ਕਸਬਾ ਖਡੂਰ ਸਾਹਿਬ ਦੀ ਜੰਮਪਲ ਬੀਬੀ ਹਸ਼ਮਤ ਦਾ ਅੱਜ ਲਗਭਗ 76 ਸਾਲ ਬਾਅਦ ਉਨ੍ਹਾਂ ਦੇ ਜੱਦੀ ਪਿੰਡ ਖਡੂਰ ਸਾਹਿਬ ਵਿਖੇ ਪੁੱਜਣ 'ਤੇ ਢੋਲ ਵਜਾ ਕੇ ਭਰਵਾਂ ਸਵਾਗਤ ਕੀਤਾ ਗਿਆ। ਲੰਬੇ ਅਰਸੇ ਬਾਅਦ ਅਪਣੇ ਪ੍ਰਵਾਰ ਨੂੰ ਮਿਲ ਕੇ ਬੀਬੀ ਹਸ਼ਮਤ ਬਹੁਤ ਖ਼ੁਸ਼ ਨਜ਼ਰ ਆ ਰਹੇ ਸਨ।
ਬੀਬੀ ਹਸ਼ਮਤ ਪੁੱਤਰੀ ਬੂਟਾ ਮੁਹੰਮਦ ਦੀ ਉਮਰ ਹੁਣ 90 ਸਾਲ ਦੇ ਕਰੀਬ ਹੈ ਅਤੇ ਉਹ ਹੁਣ ਪਾਕਿਸਤਾਨ ਦੇ ਪਿੰਡ ਬਾਰਾਂ ਚੱਕ ਜ਼ਿਲ੍ਹਾ ਬਿਹਾੜੀ ਵਿਚ ਰਹਿ ਰਹੇ ਹਨ। ਬੀਬੀ ਹਸਮਤ ਨੇ ਦਸਿਆ ਕਿ ਉਨ੍ਹਾਂ ਦੇ ਪਤੀ ਦਾ ਨਾਂਅ ਰਹਿਮਤ ਅਲੀ ਹੈ। ਹਾਲਾਂਕਿ ਪਾਕਿਸਤਾਨ ਵਿਚ ਉਹ ਖ਼ੁਸ਼ਹਾਲ ਜ਼ਿੰਦਗੀ ਬਤੀਤ ਕਰ ਰਹੇ ਹਨ ਪਰ ਵੰਡ ਵੇਲੇ ਵਿਛੜੇ ਭੈਣ ਭਰਾਵਾਂ ਨੂੰ ਮਿਲਣ ਲਈ ਹਰ ਵੇਲੇ ਤੜਪਦੇ ਰਹਿੰਦੇ ਸਨ।
ਇਹ ਵੀ ਪੜ੍ਹੋ: ‘ਬਾਹੂਬਲੀ’ ਸਮੋਸੇ ਨੂੰ ਖਾਣ ਵਾਲੇ ਨੂੰ ਮਿਲੇਗਾ 71 ਹਜ਼ਾਰ ਰੁਪਏ ਦਾ ਇਨਾਮ
ਪ੍ਰਵਾਰਕ ਮੈਂਬਰਾਂ ਨੇ ਵਿਛੋੜੇ ਦੀ ਗੱਲ ਸਾਂਝੀ ਕਰਦਿਆਂ ਦਸਿਆ ਕਿ ਬੀਬੀ ਹਸਮਤ ਜ਼ਿਲ੍ਹਾ ਕਪੂਰਥਲਾ ਦੇ ਪਿੰਡ ਉੱਚੇ ਵਿਖੇ ਵਿਆਹ ਦੇਖਣ ਗਏ ਸਨ ਜਦ ਉਨ੍ਹਾਂ ਦੀ ਉਮਰ 15 ਸਾਲ ਸੀ। ਉਸ ਵੇਲੇ 1947 ਦੀ ਘਟਨਾ ਵਾਪਰੀ ਤਾਂ ਉਥੋਂ ਹੀ ਇਹ ਪਾਕਿਸਤਾਨ ਚਲੇ ਗਏ। ਕੁੱਝ ਸਮੇਂ ਬਾਅਦ ਚਿੱਠੀ ਪੱਤਰ ਰਾਹੀ ਪ੍ਰਵਾਰ ਨੂੰ ਪਤਾ ਲੱਗਾ ਕਿ ਉਹ ਪਾਕਿਸਤਾਨ ਹਨ।
ਉਸ ਤੋਂ ਬਾਅਦ ਪ੍ਰਵਾਰਕ ਮੈਂਬਰ ਪਾਕਿਸਤਾਨ ਜਾ ਕੇ ਬੀਬਾ ਹਸ਼ਮਤ ਨੂੰ ਮਿਲ ਕੇ ਆਉਂਦੇ ਸਨ। ਪ੍ਰਵਾਰਕ ਮੈਂਬਰਾਂ ਨੇ ਦਸਿਆ ਕਿ ਬੀਬੀ ਹਸਮਤ ਦੀ ਦਿਲੀ ਇੱਛਾ ਸੀ ਕਿ ਇਕ ਵਾਰ ਉਹ ਅਪਣੀ ਜਨਮ ਭੂਮੀ ਜ਼ਰੂਰ ਆਵੇ। ਜਿਸ ਤੋਂ ਬਾਅਦ ਉਨ੍ਹਾਂ ਦੇ ਪਾਸਪੋਰਟ ਆਦਿ ਬਣਵਾਉਣ ਦੀ ਪ੍ਰਕਿਰਿਆ ਸ਼ੁਰੂ ਕੀਤੀ ਗਈ ਅਤੇ ਪ੍ਰਵਾਰਕ ਮੈਂਬਰਾ ਦੇ ਜਤਨਾਂ ਸਦਕਾ ਅੱਜ ਉਹ ਅਪਣੇ ਜੱਦੀ ਪਿੰਡ ਖਡੂਰ ਸਾਹਿਬ ਵਿਖੇ ਪਹੁੰਚੇ ਹਨ। ਬੀਬੀ ਨੇ ਕਿਹਾ ਕਿ ਉਨ੍ਹਾਂ ਦੇ ਭਰਾ ਭਾਵੇਂ ਅੱਜ ਇਸ ਦੁਨੀਆਂ 'ਤੇ ਨਹੀਂ ਰਹੇ ਪਰ ਉਨ੍ਹਾਂ ਦੇ ਬੱਚਿਆਂ ਨੂੰ ਮਿਲ ਕੇ ਅੱਜ ਉਸ ਦੀ ਖ਼ੁਸ਼ੀ ਦਾ ਕੋਈ ਟਿਕਾਣਾ ਨਹੀਂ ਹੈ। ਪ੍ਰਵਾਰ ਨਾਲ ਮੁੜ ਮਿਲਾਪ 'ਤੇ ਬੀਬੀ ਹਸਮਤ ਪ੍ਰਮਾਤਮਾ ਦਾ ਸ਼ੁਕਰਾਨਾ ਕਰਦੇ ਨਜ਼ਰ ਆਏ।
