ਦੇਖੋ ਕਿਵੇਂ ਆਪਣੀ ਕਮਾਈ ਕੱਢ ਕੇ ਵੀ ਸਸਤੇ ਭਾਅ 'ਤੇ ਵੇਚ ਰਹੀ ਦਵਾਈਆਂ
ਤਰਨਤਾਰਨ: ਲੁਧਿਆਣਾ ਜ਼ਿਲ੍ਹੇ ਵਿਚ ਗੁਰੂ ਨਾਨਕ ਮੋਦੀਖਾਨਾ ਖੁੱਲ੍ਹਣ ਤੋਂ ਬਾਅਦ ਲਗਭਗ ਹਰ ਜ਼ਿਲ੍ਹੇ ਵਿਚ ਬਾਬੇ ਨਾਨਕ ਦੇ ਨਾਮ ਤੇ ਮੋਦੀਖਾਨੇ ਖੁੱਲ੍ਹਦੇ ਨਜ਼ਰ ਆ ਰਹੇ ਹਨ। ਇਸੇ ਤਰ੍ਹਾਂ ਪੱਟੀ ਵਿਚ ਵੀ ਮੋਦੀਖਾਨਾ ਖੁੱਲ੍ਹਣ ਕਾਰਨ ਮੈਡੀਕਲ ਸਟੋਰ ਵਾਲਿਆਂ ਨੂੰ ਭਾਰੀ ਨੁਕਸਾਨ ਝੱਲਣਾ ਪੈ ਰਿਹਾ ਹੈ ਕਿਉਂ ਕਿ ਲੋਕਾਂ ਦਾ ਰੁਝਾਨ ਗੁਰੂ ਨਾਨਕ ਮੋਦੀਖਾਨੇ ਵੱਲ ਦਿਨੋਂ-ਦਿਨ ਵਧਦਾ ਜਾ ਰਿਹਾ ਹੈ।
ਦਰਅਸਲ ਇਕ ਪੰਜਾਬੀ ਧੀ ਵੱਲੋਂ ਮੋਦੀਖਾਨਾ ਖੋਲ੍ਹਿਆ ਗਿਆ ਹੈ ਤਾਂ ਕਿ ਗਰੀਬਾਂ ਨੂੰ ਮੁਫ਼ਤ ਦਵਾਈਆਂ ਮਿਲ ਸਕਣ ਅਤੇ ਬਾਕੀ ਲੋਕਾਂ ਨੂੰ ਘਟ ਭਾਅ ਤੇ ਦਵਾਈਆਂ ਦਿੱਤੀਆਂ ਜਾ ਸਕਣ। ਇਸ ਧੀ ਦਾ ਕਹਿਣਾ ਹੈ ਕਿ ਘਟ ਰੇਟ ਤੇ ਦਵਾਈਆਂ ਵੇਚ ਕੇ ਵੀ ਕਮਾਈ ਕਰ ਰਹੀ ਹੈ ਤੇ ਕੈਮਿਸਟ ਕਿਉਂ ਨਹੀਂ ਕਰ ਸਕਦੇ?
ਅੱਜ ਸਾਰੇ ਕੰਮ ਠਪ ਹਨ ਤੇ ਲੋਕਾਂ ਦੀ ਆਰਥਿਕ ਹਾਲਤ ਵੀ ਮਾੜੀ ਹੋ ਚੁੱਕੀ ਹੈ ਜਿਸ ਦੇ ਚਲਦੇ ਉਹਨਾਂ ਨੂੰ ਘਰੇਲੂ ਚੀਜ਼ਾਂ ਖਰੀਦਣ ਵਿਚ ਵੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਇਸ ਧੀ ਦਾ ਕਹਿਣਾ ਹੈ ਕਿ ਮਾਰਜਨ ਤਾਂ ਘਟ ਹੁੰਦਾ ਹੈ ਪਰ ਪ੍ਰਿੰਟ ਰੇਟ ਬਹੁਤ ਜ਼ਿਆਦਾ ਹੁੰਦਾ ਹੈ। ਉਹਨਾਂ ਦਾ ਕਹਿਣਾ ਹੈ ਕਿ ਕੁੱਝ ਕੁ ਮੈਡੀਕਲ ਵਾਲੇ ਉਹਨਾਂ ਤੇ ਦਬਾਅ ਪਾ ਰਹੇ ਹਨ ਕਿ ਜੇ ਉਹ ਸਸਤੇ ਭਾਅ ਉਹਨਾਂ ਨੂੰ ਦਵਾਈ ਦੇਣਗੇ ਤਾਂ ਉਹ ਉਹਨਾਂ ਤੋਂ ਦਵਾਈ ਨਹੀਂ ਲੈਣਗੇ।
ਇਕ ਪਾਸੇ ਉਹ ਸਾਰੇ ਹਨ ਤੇ ਇਕ ਪਾਸੇ ਉਹ ਇਕੱਲੇ ਲੜਾਈ ਲੜ ਰਹੇ ਹਨ। ਉਹ ਬਹੁਤ ਦੂਰ-ਦੂਰ ਤੋਂ ਦਵਾਈ ਲਿਆ ਕੇ ਲੋਕਾਂ ਦੀਆਂ ਮੁਸ਼ਕਿਲਾਂ ਘਟ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਉਹਨਾਂ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਇਸ ਕੰਮ ਵਿਚ ਉਹ ਵੀ ਉਸ ਦਾ ਸਾਥ ਦੇਣ। ਉਹਨਾਂ ਨੇ ਕੁੱਝ ਦਵਾਈਆਂ ਦੀਆਂ ਕੀਮਤਾਂ ਦਿਖਾਉਂਦੇ ਹੋਏ ਕਿਹਾ ਕਿ ਉਹ ਇਸ ਦਵਾਈ ਵਿਚੋਂ ਆਪ ਵੀ ਕਮਾਈ ਕਰ ਰਹੇ ਹਨ ਤੇ ਲੋਕਾਂ ਦੀ ਵੀ ਮਦਦ ਕਰ ਰਹੇ ਹਨ।
ਪੈਸੇ ਨਾ ਹੋਣ ਕਾਰਨ ਕਈ ਲੋਕਾਂ ਦੇ ਇਲਾਜ ਰਹਿ ਜਾਂਦੇ ਹਨ ਤੇ ਉਹਨਾਂ ਨੂੰ ਅਪਣੀ ਜਾਨ ਤੋਂ ਹੱਥ ਧੋਣਾ ਪੈਂਦਾ ਹੈ। ਜਾਣਕਾਰੀ ਮੁਤਾਬਕ ਕੈਮਿਸਟਾਂ ਨੇ ਇਸ ਮੋਦੀਖਾਨੇ ਦੀ ਸਪਲਾਈ ਵੀ ਬੰਦ ਕਰ ਦਿੱਤੀ ਹੈ, ਸਪਲਾਈ ਬੰਦ ਹੋਣ ਕਾਰਨ ਲੋਕਾਂ ਨੂੰ ਕਾਫੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਇਸ ਲਈ ਇਹਨਾਂ ਵੱਲੋਂ ਸਮਾਜ ਸੇਵੀਆਂ ਨੂੰ ਮਦਦ ਲਈ ਅਪੀਲ ਵੀ ਕੀਤੀ ਜਾ ਰਹੀ ਹੈ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।