ਬੈਂਕਾਂ ਵਿਚ ਲਗਾਤਾਰ ਦਿਨ ਦਿਹਾੜੇ ਲੁਟ ਖੋਹ ਦੀਆਂ ਵਾਰਦਾਤਾਂ ਵਿਚ ਵਾਧਾ ਹੋ ਰਿਹਾ ਹੈ।
ਅੰਮ੍ਰਿਤਸਰ: ਬੈਂਕਾਂ ਵਿਚ ਲਗਾਤਾਰ ਦਿਨ ਦਿਹਾੜੇ ਲੁਟ ਖੋਹ ਦੀਆਂ ਵਾਰਦਾਤਾਂ ਵਿਚ ਵਾਧਾ ਹੋ ਰਿਹਾ ਹੈ। ਬੰਡਾਲਾ ਵਿਖੇ ਐਚਡੀਐਫ਼ਸੀ ਬੈਂਕ ਦੀ ਬ੍ਰਾਂਚ ਵਿਚੋਂ ਪੰਜ ਤੋਂ ਸੱਤ ਵਿਅਕਤੀਆਂ ਵਲੋਂ ਇਸ ਘਟਨਾ ਨੂੰ ਅੰਜਾਮ ਦਿਤਾ ਗਿਆ ਹੈ। ਲੁਟੇਰੇ ਕੈਸ਼ੀਅਰ ਕੋਲੋਂ ਚਾਰ ਤੋਂ ਪੰਜ ਲੱਖ ਦੇ ਲਗਭਗ ਕੈਸ਼ ਖੋਹ ਕੇ ਫ਼ਰਾਰ ਹੋ ਗਏ। ਸ਼ਨੀਵਾਰ ਨੂੰ ਚਾਰ ਲੁਟੇਰੇ ਦੁਪਹਿਰ ਲਗਭਗ ਡੇਢ ਵਜੇ ਬੈਂਕ ਵਿਚ ਆਏ।
Photo
ਇਕ ਲੁਟੇਰੇ ਨੇ ਬੈਂਕ ਮੈਨੇਜਰ ਪੁਨੀਤ ਕੁਮਾਰ ਦੇ ਕੈਬਿਨ ਵਿਚ ਜਾ ਕੇ ਅਤੇ ਦੋ ਨੇ ਕੈਸ਼ੀਅਰ ਦੇ ਕੈਬਿਨ ਵਿਚ ਜਾ ਕੇ ਪੰਜ ਲੱਖ ਦੇ ਲਗਭਗ ਪੈਸਿਆਂ ਦੀ ਲੁੱਟ ਕੀਤੀ। ਲੁਟੇਰਿਆਂ ਨੇ ਸਿਰਫ ਪੰਜ ਮਿੰਟ ਵਿਚ ਇਸ ਲੁੱਟ ਨੂੰ ਅੰਜਾਮ ਦਿੱਤਾ ਹੈ। ਬੈਂਕ ਦੇ ਬਾਹਰ ਪਹਿਲਾਂ ਤੋਂ ਇੰਤਜ਼ਾਰ ਕਰ ਰਹੇ ਸਵਿਫਟ ਕਾਰ ਵਿਚ ਬੈਠੇ ਲੁਟੇਰੇ ਦੇ ਨਾਲ ਉਸ ਦੇ ਸਾਥੀ ਫਰਾਰ ਹੋ ਗਏ।
Photo
ਲੁੱਟ ਦੌਰਾਨ ਇੱਥੇ ਕੁਝ ਗ੍ਰਾਹਕ ਵੀ ਮੌਜੂਦ ਸਨ। ਲੁਟੇਰਿਆਂ ਕੋਲ ਹਥਿਆਰ ਹੋਣ ਕਾਰਨ ਕਿਸੇ ਵੀ ਕਰਮਚਾਰੀ ਅਤੇ ਗ੍ਰਾਹਕ ਨੇ ਵਿਰੋਧ ਕਰਨ ਦੀ ਕੋਸ਼ਿਸ਼ ਨਹੀਂ ਕੀਤੀ। ਇਸ ਸਮੇਂ ਐਸਐਸਪੀ ਵਿਕਰਮਜੀਤ ਦੁਗਲ ਦਿਹਾਤੀ ਪੁਲਿਸ ਅੰਮ੍ਰਿਤਸਰ ਨੇ ਘਟਨਾ ਸਥਾਨ ਦਾ ਜਾਇਜ਼ਾ ਲੈਣ ਲਈ ਮੌਕੇ 'ਤੇ ਪਹੁੰਚੇ ਅਤੇ ਪੱਤਰਕਾਰਾਂ ਨੂੰ ਜਾਣਕਾਰੀ ਦਿੰਦਿਆਂ ਉਨ੍ਹਾਂ ਦਸਿਆ ਕਿ ਘਟਨਾ ਨੂੰ ਅੰਜਾਮ ਦੇਣ ਵਾਲਿਆਂ ਵਲੋਂ ਪਹਿਲਾਂ ਰੇਕੀ ਕੀਤੀ ਗਈ ਹੈ।
Photo
ਇਥੇ ਸੱਭ ਤੋਂ ਵੱਡੀ ਖਾਮੀ ਇਹ ਹੈ ਕਿ ਗਾਰਡ ਕੋਲ ਕੋਈ ਹਥਿਆਰ ਨਹੀਂ ਹੈ ਜਿਸ ਕਾਰਨ ਲੁਟੇਰੇ ਬੜੀ ਅਸਾਨੀ ਨਾਲ ਕੈਸ਼ੀਅਰ ਤੋਂ ਕੈਸ਼ ਖੋਹ ਕੇ ਲਿਜਾਣ ਵਿਚ ਸਫ਼ਲ ਹੋਏ ਹਨ। ਰਿਜ਼ਰਵ ਬੈਂਕ ਦੀਆਂ ਹਦਾਇਤਾਂ ਮੁਤਾਬਿਕ ਬੈਂਕਾਂ ਨੂੰ ਹਥਿਆਰਾਂ ਸਮੇਤ ਸੁਰੱਖਿਆ ਗਾਰਡ ਰਖਿਆ ਜਾਣਾ ਬਿਲਕੁਲ ਲਾਜ਼ਮੀ ਹੈ।
Photo
ਬੀਤੇ ਇਕ ਮਹੀਨੇ ਵਿਚ ਬਿਆਸ ਦੇ ਨਜ਼ਦੀਕ ਸਥਿਤ ਬੈਂਕਾ ਦੇ ਏਟੀਐਮ ਲੁੱਟਣ ਦੀਆਂ ਤਿੰਨ ਵਾਰਦਾਤਾਂ ਹੋ ਚੁੱਕੀਆਂ ਹਨ। ਸ਼ੁੱਕਰਵਾਰ ਨੂੰ ਤਰਨਤਾਰਨ ਪਿੰਡ ਵਿਚ ਵੀ ਬਿਨਾਂ ਸੁਰੱਖਿਆ ਗਾਰਡ ਵਾਲੇ ਐਕਸਿਸ ਬੈਂਕ ਦੀ ਬ੍ਰਾਂਚ ਨੂੰ ਸਵਿਫਟ ਕਾਰ ਸਵਾਰ ਲੁਟੇਰਿਆਂ ਨੇ ਨਿਸ਼ਾਨਾ ਬਣਾ ਕੇ ਪੈਸੇ ਲੁੱਟੇ ਸੀ।
