ਇਸ ਹਮਲੇ 'ਚ ਮਲਕੀਤ ਸਿੰਘ ਉਰਫ ਬਲਜੀਤ ਢਿੱਲੋਂ ਤੋਂ ਇਲਾਵਾ...
ਸੁਲਤਾਨਪੁਰ ਲੋਧੀ: ਸ਼ਨੀਵਾਰ ਸ਼ਾਮ ਲੰਡਨ 'ਚ 7 ਸਿੱਖ ਨੌਜਵਾਨਾਂ ਦੇ ਸਮੂਹ 'ਤੇ ਕੁਝ ਲੋਕਾਂ ਨੇ ਚਾਕੂ ਨਾਲ ਜਾਨਲੇਵਾ ਹਮਲਾ ਕੀਤਾ। ਇਸ ਹਮਲੇ 'ਚ 3 ਸਿੱਖ ਨੌਜਵਾਨਾਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਇਹ ਹਮਲਾ ਪੂਰਬੀ ਲੰਡਨ ਦੇ ਐਸਫੋਰਡ ਵਿਚ ਸ਼ਨੀਵਾਰ ਸ਼ਾਮ 7:30 ਵਜੇ ਸੱਤ ਕਿੰਗਸ ਸਟੇਸ਼ਨ ਨੇੜੇ ਹੋਇਆ ਸੀ। ਤਿੰਨੇ ਪੀੜਤ ਸਿੱਖ ਸਥਾਨਕ ਸਿੱਖ ਭਾਈਚਾਰੇ ਦੇ ਮੈਂਬਰ ਸਨ। ਇਸ ਹਮਲੇ 'ਚ ਮਲਕੀਤ ਸਿੰਘ ਉਰਫ ਬਲਜੀਤ ਢਿੱਲੋਂ ਤੋਂ ਇਲਾਵਾ ਨਰਿੰਦਰ ਸਿੰਘ ਅਤੇ ਹਰਿੰਦਰ ਕੁਮਾਰ ਮਾਰੇ ਗਏ ਸਨ।
Photo
ਮੌਤ ਦਾ ਸ਼ਿਕਾਰ ਹੋਏ ਤਿੰਨ ਸਿੱਖ ਨੌਜਵਾਨਾਂ 'ਚੋਂ ਇਕ ਸਿੱਖ ਸੁਲਤਾਨਪੁਰ ਲੋਧੀ ਦੇ ਪਿੰਡ ਸਰਾਏ ਜੱਟਾ ਦਾ ਰਹਿਣ ਵਾਲਾ ਮਲਕੀਤ ਸਿੰਘ ਉਰਫ ਬਲਜੀਤ ਸਿੰਘ ਉਰਫ ਬੱਲੀ ਢਿੱਲੋਂ ਸੀ। ਉਸ ਦੀ ਮੌਤ ਦੀ ਖਬਰ ਜਿਵੇਂ ਹੀ ਉਸ ਦੇ ਪਿੰਡ ਪੁੱਜੀ ਤਾਂ ਪੂਰੇ ਪਿੰਡ 'ਚ ਸੋਗ ਦੀ ਲਹਿਰ ਛਾ ਗਈ। ਧਾਹਾਂ ਮਾਰਦੀ ਮਾਂ ਦੇ ਮੂੰਹੋਂ ਇਕੋ ਬੋਲ ਹੀ ਨਿਕਲ ਰਹੇ ਸਨ ਕਿ ਵੇ ਪੁੱਤਰਾਂ ਆ ਕੇ ਕੋਠੀ ਬਣਾ ਜਾ। ਮੌਤ ਦਾ ਸ਼ਿਕਾਰ ਹੋਇਆ ਨੌਜਵਾਨ ਮਲਕੀਤ ਸਿੰਘ (38) ਸਾਬਕਾ ਸਰਪੰਚ ਸਵ. ਮੋਹਨ ਸਿੰਘ ਦਾ ਸਭ ਤੋਂ ਛੋਟਾ ਪੁੱਤਰ ਸੀ।
Photo
ਜਿਸ ਦੇ ਚਲੇ ਜਾਣ ਨਾਲ ਬੁਢਾਪੇ ਦੀ ਲਾਠੀ ਟੁੱਟ ਗਈ ਹੈ। ਮ੍ਰਿਤਕ ਮਲਕੀਤ ਸਿੰਘ ਉਰਫ ਬੱਲੀ ਢਿੱਲੋਂ ਦੇ ਭਤੀਜੇ ਸੁਖਵਿੰਦਰ ਸਿੰਘ ਨੇ ਦੱਸਿਆ ਕਿ ਚਾਚੇ ਸਣੇ ਇਹ ਤਿੰਨ ਭਰਾ ਹਨ, ਜਿਨ੍ਹਾਂ 'ਚੋਂ ਮਲਕੀਤ ਸਿੰਘ ਸਭ ਤੋਂ ਛੋਟੇ ਸਨ। ਛੋਟੇ ਹੁੰਦੇ ਤੋਂ ਹੀ ਮਲਕੀਤ ਸਿੰਘ ਨੂੰ ਵਿਦੇਸ਼ ਜਾਣ ਦੀ ਇੱਛਾ ਸੀ। ਉਨ੍ਹਾਂ ਦੱਸਿਆ ਕਿ ਕਰੀਬ 15 ਸਾਲ ਪਹਿਲਾਂ ਘਰ ਦੀ ਆਰਥਿਕ ਸਥਿਤੀ ਨੂੰ ਦੇਖਦੇ ਹੋਏ ਡਾਲਰ, ਪੌਂਡ ਕਮਾਉਣ ਖਾਤਿਰ ਮਲਕੀਤ ਸਿੰਘ ਇੰਗਲੈਂਡ 'ਚ ਗਏ ਸਨ।
Photo
ਇੰਗਲੈਂਡ ਵਿਖੇ ਸਖਤ ਮਿਹਨਤ ਕਰਕੇ ਇਨ੍ਹਾਂ ਨੇ ਪੈਸਾ ਕਮਾਇਆ। ਇੰਗਲੈਂਡ 'ਚ ਕਾਨੂੰਨ ਸਖਤ ਹੋਣ ਕਰਕੇ ਮਲਕੀਤ ਸਿੰਘ ਉਥੋਂ ਦੀ ਨਾਗਰਿਕਤਾ ਨਹੀਂ ਮਿਲੀ ਸੀ, ਜਿਸ ਕਰਕੇ ਉਹ ਵਾਪਸ ਆਪਣੇ ਸ਼ਹਿਰ ਆਉਣ ਤੋਂ ਅਸਮਰਥ ਸਨ। ਉਨ੍ਹਾਂ ਦੱਸਿਆ ਕਿ ਮਲਕੀਤ ਦੇ ਦੂਜੇ ਭਰਾ ਬਲਕਾਰ ਸਿੰਘ ਅਤੇ ਅਮਰਜੀਤ ਸਿੰਘ ਦੋਵੇਂ ਵਿਆਹੇ ਹੋਏ ਸਨ। ਮੌਤ ਦੀ ਖਬਰ ਸੁਣਦੇ ਹੀ ਵਿਧਵਾ ਮਾਂ ਹਰਭਜਨ ਕੌਰ ਦਾ ਰੋ-ਰੋ ਕੇ ਬੁਰਾ ਹਾਲ ਹੋ ਗਿਆ ਹੈ।
Photo
ਦਿਮਗੀ ਸੰਤੁਲਨ ਖਰਾਬ ਹੋਣ ਕਰਕੇ ਪਹਿਲਾਂ ਤਾਂ ਉਸ ਨੂੰ ਕੁਝ ਨਹੀਂ ਦੱਸਿਆ ਪਰ ਜਿਉਂ ਹੀ ਸਾਰੀ ਗੱਲ ਉਸ ਨੂੰ ਦੱਸੀ ਗਈ ਤਾਂ ਉਹ ਧਾਹਾਂ ਮਾਰ ਕੇ ਰੋ ਪਈ ਅਤੇ ਵਾਰ-ਵਾਰ ਪੁੱਤਰ ਨੂੰ ਵਾਜਾਂ ਮਾਰ ਰਹੀ ਸੀ। ਪਿੰਡ ਸਰਾਂ ਜੱਟਾ ਦੇ ਸਾਬਕਾ ਸਰਪੰਚ ਚਰਨਜੀਤ ਸਿੰਘ ਢਿੱਲੋਂ ਨੇ ਕਿਹਾ ਕਿ ਮਲਕੀਤ ਮੇਰੇ ਨਾਲ ਹੀ ਬਚਪਨ 'ਚ ਪੜ੍ਹਦਾ ਸੀ ਅਤੇ ਉਸ ਨੂੰ ਕਬੱਡੀ ਦਾ ਵੀ ਬੇਹੱਦ ਸ਼ੌਂਕ ਸੀ।
ਜਦੋਂ ਖੇਡ 'ਚ ਉਹ ਕਿੱਧਰੇ ਰੇਡ ਕਰਨ ਆਉਂਦਾ ਸੀ ਤਾਂ ਖਿਡਾਰੀ ਉਸ ਨੂੰ ਬਿਜਲੀ ਦੇ ਨਾਂ ਨਾਲ ਬੁਲਾਉਂਦੇ ਸਨ। ਉਨ੍ਹਾਂ ਦੱਸਿਆ ਕਿ ਮਲਕੀਤ ਕਹਿੰਦਾ ਸੀ ਕਿ ਵਿਦੇਸ਼ ਜਾ ਕੇ ਵੀ ਉਹ ਕਬੱਡੀ ਨੂੰ ਖੂਬ ਉਤਸ਼ਾਹਤ ਕਰੇਗਾ। ਪਰਿਵਾਰਕ ਮੈਂਬਰਾਂ ਮੁਤਾਬਕ ਮ੍ਰਿਤਕ ਮਲਕੀਤ ਸਿੰਘ ਦੀ ਮ੍ਰਿਤਕ ਦੇਹ ਭਾਰਤ ਲਿਆ ਕੇ ਉਸ ਦੇ ਜੱਦੀ ਪਿੰਡ ਸਰਾਂ ਜੱਟਾ ਵਿਖੇ ਹੀ ਉਸ ਦਾ ਅੰਤਿਮ ਸੰਸਕਾਰ ਕੀਤਾ ਜਾਵੇਗਾ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।
