ਬੀਤੀ 17 ਮਈ ਨੂੰ ਅਦਾਲਤ ਵਿਚ ਪੇਸ਼ ਕਰ ਕੇ 21 ਮਈ ਤਕ ਪੁਲਿਸ ਰਿਮਾਂਡ ਲਿਆ ਗਿਆ
ਕੋਟਕਪੂਰਾ (ਗੁਰਿੰਦਰ ਸਿੰਘ) : ਪਾਵਨ ਸਰੂਪ ਚੋਰੀ ਕਰਨ, ਭੜਕਾਊ ਪੋਸਟਰ ਲਾਉਣ ਅਤੇ ਬੇਅਦਬੀ ਕਾਂਡ ਨੂੰ ਅੰਜਾਮ ਦੇਣ ਦੇ ਤਿੰਨ ਮਾਮਲਿਆਂ ਵਿਚ ਐਸਆਈਟੀ ਵਲੋਂ ਕਾਬੂ ਕੀਤੇ ਗਏ 6 ਡੇਰਾ ਪੇ੍ਰਮੀਆਂ ਨੂੰ ਅੱਜ ਪੁਲਿਸ ਰਿਮਾਂਡ ਖ਼ਤਮ ਹੋਣ ’ਤੇ ਸਖ਼ਤ ਸੁਰੱਖਿਆ ਪ੍ਰਬੰਧਾਂ ਹੇਠ ਇਲਾਕਾ ਮੈਜਿਸਟ੍ਰੇਟ ਦੀ ਅਦਾਲਤ ਵਿਚ ਪੇਸ਼ ਕੀਤਾ ਗਿਆ, ਜਿਥੇ ਅਦਾਲਤ ਨੇ ਤਿੰਨ ਡੇਰਾ ਪੇ੍ਰਮੀਆਂ ਕ੍ਰਮਵਾਰ ਬਲਜੀਤ ਸਿੱਖਾਂਵਾਲਾ, ਨਿਸ਼ਾਨ ਅਤੇ ਸੰਨੀ ਕੰਡਾ ਵਾਸੀਆਨ ਕੋਟਕਪੂਰਾ ਨੂੰ 1 ਜੂਨ ਤਕ ਜੁਡੀਸ਼ੀਅਲ ਹਿਰਾਸਤ ਵਿਚ ਭੇਜ ਦਿਤਾ ਜਦਕਿ ਸ਼ਕਤੀ ਡੱਗੋਰੋਮਾਣਾ, ਰਣਜੀਤ ਭੋਲਾ ਅਤੇ ਪ੍ਰਦੀਪ ਕੁਮਾਰ ਦਾ 24 ਮਈ ਤੱਕ ਪੁਲਿਸ ਰਿਮਾਂਡ ਦੇ ਦਿਤਾ।
ਬਲਜੀਤ, ਨਿਸ਼ਾਨ ਅਤੇ ਸੰਨੀ ਕੰਡਾ ਦੀ ਕੋਰੋਨਾ ਰੀਪੋਰਟ ਪਾਜ਼ੇਟਿਵ ਆਉਣ ਕਰ ਕੇ ਉਨਾਂ ਨੂੰ ਪੁਲਿਸ ਦੀ ਸੁਰੱਖਿਆ ਹੇਠ ਗੁਰੂ ਗੋਬਿੰਦ ਸਿੰਘ ਮੈਡੀਕਲ ਹਸਪਤਾਲ ਫਰੀਦਕੋਟ ਵਿਖੇ ਇਲਾਜ ਅਧੀਨ ਰੱਖਿਆ ਜਾਵੇਗਾ। ਜ਼ਿਕਰਯੋਗ ਹੈ ਕਿ ਉਕਤ ਡੇਰਾ ਪੇ੍ਰਮੀਆਂ ਨੂੰ ਐਸਆਈਟੀ ਨੇ 1 ਜੂਨ 2015 ਨੂੰ ਪਾਵਨ ਸਰੂਪ ਚੋਰੀ ਕਰਨ, 24 ਤੇ 25 ਸਤੰਬਰ ਦੀ ਦਰਮਿਆਨੀ ਰਾਤ ਨੂੰ ਭੜਕਾਊ ਪੋਸਟਰ ਲਾਉਣ ਅਤੇ 12 ਅਕਤੂਬਰ 2015 ਨੂੰ ਬਰਗਾੜੀ ਵਿਖੇ ਬੇਅਦਬੀ ਕਾਂਡ ਨੂੰ ਅੰਜਾਮ ਦੇਣ ਦੇ ਦੋਸ਼ਾਂ ਵਿਚ ਕਾਬੂ ਕੀਤਾ ਸੀ।
Beadbi Kand
ਬੀਤੀ 17 ਮਈ ਨੂੰ ਅਦਾਲਤ ਵਿਚ ਪੇਸ਼ ਕਰ ਕੇ 21 ਮਈ ਤਕ ਪੁਲਿਸ ਰਿਮਾਂਡ ਲਿਆ ਗਿਆ ਅਤੇ ਇਸ ਦੌਰਾਨ ਪੁਛਗਿੱਛ ਵਿਚ ਉਕਤ ਡੇਰਾ ਪੇ੍ਰਮੀਆਂ ਨੇ ਤਿੰਨਾਂ ਘਟਨਾਵਾਂ ਵਿਚ ਖ਼ੁਦ ਦੀ ਸ਼ਮੂਲੀਅਤ ਮੰਨੀ, ਐਸਆਈਟੀ ਨੇ ਬੇਅਦਬੀ ਕਾਂਡ ਵਿਚ ਵਰਤੀਆਂ ਦੋ ਕਾਰਾਂ ਵੀ ਬਰਾਮਦ ਕਰ ਲਈਆਂ। ਐਸਆਈਟੀ ਦੀ ਪੜਤਾਲ ਤੋਂ ਇਹ ਗੱਲ ਸਾਹਮਣੇ ਆਈ ਹੈ ਕਿ ਡੇਰਾ ਪ੍ਰੇਮੀਆਂ ਨੇ 12 ਅਕਤੂਬਰ 2015 ਨੂੰ ਬਰਗਾੜੀ ਵਿਚ ਗੁਰੂ ਗ੍ਰੰਥ ਸਾਹਿਬ ਦੇ 150 ਪੰਨੇ ਪਾੜ ਕੇ ਖਿਲਾਰੇ ਸਨ ਅਤੇ 100 ਪੰਨੇ ਪਿੰਡ ਹਰੀਨੋ ਵਿਚ ਖਿਲਾਰੇ ਜਾਣੇ ਸਨ।
ਜਿਸ ’ਤੇ ਬੇਅਦਬੀ ਮਾਮਲਿਆਂ ਦੀ ਜਾਂਚ ਕਰ ਰਹੀ ਐਸਆਈਟੀ ਵਲੋਂ ਐਸਪੀਐਸ ਪਰਮਾਰ ਆਈ.ਜੀ. ਦੀ ਅਗਵਾਈ ਵਿੱਚ ਆਈਪੀਸੀ ਦੀ ਧਾਰਾ 153ਏ ਦਾ ਵਾਧਾ ਕਰ ਕੇ ਕਾਬੂ ਕੀਤੇ ਗਏ 6 ਡੇਰਾ ਪੇ੍ਰਮੀਆਂ ਨੂੰ ਗਿ੍ਰਫਤਾਰ ਕੀਤਾ ਗਿਆ ਸੀ। ਦੂਜੇ ਪਾਸੇ ਡੇਰਾ ਪੇ੍ਰਮੀਆਂ ਦੇ ਵਕੀਲ ਵਿਨੋਦ ਮੌਂਗਾ ਨੇ ਇਕ ਅਰਜ਼ੀ ਅਦਾਲਤ ਵਿਚ ਪੇਸ਼ ਕਰ ਕੇ ਦੋਸ਼ ਲਾਇਆ ਕਿ ‘ਸਿੱਟ’ ਡੇਰਾ ਪ੍ਰੇਮੀਆਂ ਨੂੰ ਡਰਾ-ਧਮਕਾ ਕੇ ਇਕਬਾਲ ਕਰਾਉਣਾ ਚਾਹੁੰਦੀ ਹੈ, ਜਿਸ ’ਤੇ ਅਦਾਲਤ ਨੇ ‘ਸਿਟ’ ਟੀਮ ਨੂੰ ਇਸ ਅਰਜ਼ੀ ਦਾ ਨੋਟਿਸ ਦੇ ਕੇ 24 ਮਈ ਨੂੰ ਜਵਾਬ ਦੀ ਮੰਗ ਕੀਤੀ ਹੈ।
