ਮੰਨਾ ਨੇ ਕਿਹਾ ਕਿ ਸੰਗਤ ਦੇ ਚੜਾਵੇ ਅਤੇ ਗੁਰੂ ਦੀ ਗੋਲਕ ਦੀ ਲੁੱਟ ਵਿਰੁਧ ਅੰਤਰਰਾਸ਼ਟਰੀ ਪੱਧਰ ਤੇ ਆਵਾਜ਼ ਬੁਲੰਦ ਕੀਤੀ ਜਾਵੇਗੀ
ਅੰਮ੍ਰਿਤਸਰ: ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਸਾਬਕਾ ਸੈਕਟਰੀ ਅਤੇ ਬੁਲਾਰੇ ਮਨਦੀਪ ਸਿੰਘ ਮੰਨਾ ਨੇ ਸ਼੍ਰੀ ਹਰਿਮੰਦਰ ਸਾਹਿਬ ਵਿਚ ਸ਼੍ਰੀ ਗੁਰੂ ਰਾਮਦਾਸ ਲੰਗਰ ਲਈ ਸਪਲਾਈ ਹੋਣ ਵਾਲੇ ਦੇਸੀ ਘਿਓ ਦੇ ਟੀਨਾਂ ਵਿਚ ਲੱਖਾਂ ਦਾ ਘੁਟਾਲੇ ਦਾ ਖੁਲਾਸਾ ਕਰਦੇ ਹੋਏ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਤੋਂ ਜਾਂਚ ਕਰਨ ਦੀ ਮੰਗ ਕੀਤੀ ਹੈ।
ਮਨਦੀਪ ਸਿੰਘ ਦਾ ਕਹਿਣਾ ਹੈ ਕਿ ਇਸ ਮਾਮਲੇ ਨੂੰ ਐਸਜੀਪੀਸੀ ਦੇ ਸਾਹਮਣੇ ਆਉਣ ਤੋਂ ਪਹਿਲਾਂ ਹੀ ਦਬਾਇਆ ਜਾ ਰਿਹਾ ਹੈ, ਕਿਉਂ ਕਿ ਇਸ ਵਿਚ ਸੁਖਬੀਰ ਸਿੰਘ ਬਾਦਲ ਦੇ ਇਕ ਚਹੇਤੇ ਅਤੇ ਐਸਜੀਪੀਸੀ ਦੇ ਸੀਨੀਅਰ ਅਧਿਕਾਰੀ ਦਾ ਹੱਥ ਹੋਣ ਦੀ ਚਰਚਾ ਹੈ। ਇਸ ਮਾਮਲੇ ਨੂੰ ਪ੍ਰਧਾਨ ਗੋਬਿੰਦ ਸਿੰਘ ਲੌਂਗੋਵਾਲ, ਸੈਕਟਰੀ ਡਾ. ਰੂਪ ਸਿੰਘ, ਨਿਜੀ ਸਹਾਇਕ ਦਰਸ਼ਨ ਸਿੰਘ ਅਤੇ ਕੈਬਨਿਟ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ ਦੇ ਧਿਆਨ ਵਿਚ ਲਿਆ ਚੁੱਕੇ ਹਨ।
ਉੱਥੇ ਹੀ ਰੰਧਾਵਾ ਨੇ ਭਰੋਸਾ ਦਿੱਤਾ ਹੈ ਕਿ ਉਹ ਸਹਿਕਾਰੀ ਸਭਾ ਦੇ ਅਧਿਕਾਰੀਆਂ ਤੇ ਸਖ਼ਤ ਕਾਰਾਵਾਈ ਕਰਨਗੇ। ਉਹਨਾਂ ਨੇ ਇਕ ਵੀਡੀਉ ਜਾਰੀ ਕਰਦੇ ਹੋਏ ਇਸ ਦਾ ਖੁਲਾਸਾ ਕੀਤਾ ਹੈ ਕਿ ਮਾਰਚ 2018 ਵਿਚ ਐਸਜੀਪੀਸੀ ਨੇ 20 ਹਜ਼ਾਰ ਕੁਇੰਟਲ ਦੇਸੀ ਘਿਓ ਖਰੀਦਣ ਲਈ ਟੈਂਡਰ ਜਾਰੀ ਕੀਤਾ ਸੀ। ਇਕ ਸਹਿਕਾਰੀ ਸਭਾ ਨੇ 80 ਕਰੋੜ ਰੁਪਏ ਦਾ ਟੈਂਡਰ ਭਰਿਆ ਸੀ ਜਦਕਿ ਕਈ ਕੰਪਨੀਆਂ ਦੇ ਇਸ ਤੋਂ ਘਟ ਰੇਟ ਸਨ। ਪਰ ਐਸਜੀਪੀਸੀ ਦਾ ਇਕ ਸੀਨੀਅਰ ਉਪ ਪ੍ਰਧਾਨ ਸਹਿਕਾਰੀ ਸਭਾ ਨੂੰ ਟੈਂਡਰ ਦੇਣ ਤੇ ਅੜਿਆ ਗਿਆ।
ਐਸਜੀਪੀਸੀ ਮੈਂਬਰ ਗੁਰਬਚਨ ਸਿੰਘ ਕਰਮੂਵਾਲ ਨੇ ਵਿਰੋਧ ਕੀਤਾ ਤਾਂ ਉਹਨਾਂ ਨੇ ਟੈਂਡਰ ਰੱਦ ਕਰ ਕੇ ਦੁਬਾਰਾ ਨਵੀਆਂ ਸ਼ਰਤਾਂ ਵਾਲਾ ਟੈਂਡਰ ਜਾਰੀ ਕੀਤਾ। ਜਿਸ ਵਿਚ ਸਿਰਫ ਸਹਿਕਾਰੀ ਸਭਾ ਹੀ ਸ਼ਰਤਾਂ ਪੂਰੀਆਂ ਕਰਦੀ ਸੀ। ਇਸ ਤੋਂ ਬਾਅਦ ਸਹਿਕਾਰੀ ਸਭਾ ਨੇ 72 ਕਰੋੜ ਵਿਚ ਟੈਂਡਰ ਭਰ ਦਿੱਤਾ। ਕੁਝ ਦਿਨ ਪਹਿਲਾਂ ਟੀਨ ਵਿਚ ਘਿਓ ਦੀ ਮਾਤਰਾ ਘਟ ਹੋਣ ਦੀ ਗੱਲ ਸਾਹਮਣੇ ਆਈ ਤਾਂ ਐਸਜੀਪੀਸੀ ਦੇ ਫਲਾਇੰਗ ਵਿੰਗ ਅਤੇ ਲੰਗਰ ਦੇ ਮੈਨੇਜਰ ਮਨਜਿੰਦਰ ਸਿੰਘ ਮੰਡ ਨੇ ਚੈਕਿੰਗ ਕੀਤੀ ਤਾਂ ਟੀਨਾਂ ਵਿਚ ਘਿਓ ਨਿਰਧਾਰਤ ਮਾਤਰਾ ਤੋਂ ਘਟ ਮਿਲਿਆ।
ਇਸ ਦੀ ਰਿਪੋਰਟ ਤੇ ਵੀ ਕੋਈ ਕਾਰਵਾਈ ਨਹੀਂ ਹੋਈ। ਮੰਨਾ ਨੇ ਕਿਹਾ ਕਿ ਇਹ ਸਭ ਕੁੱਝ ਸੁਖਬੀਰ ਬਾਦਲ ਦੇ ਇਸ਼ਾਰਿਆਂ ਤੇ ਐਸਜੀਪੀਸੀ ਵਿਚ ਤੈਨਾਤ ਉਹਨਾਂ ਦੇ ਏਜੰਟ ਕਰ ਰਹੇ ਹਨ। ਇਹ ਵੀ ਪਤਾ ਲੱਗਿਆ ਹੈ ਕਿ ਹਰ ਸਾਲ ਕਰੋੜਾਂ ਰੁਪਏ ਦਾ ਗੁਪਤ ਫੰਡ ਐਸਜੀਪੀਸੀ ਦੇ ਖਾਤਿਆਂ ਵਿਚੋਂ ਅਕਾਲੀ ਦਲ ਨੂੰ ਜਾ ਰਹੀ ਹੈ ਜਿਸ ਵਿਚ ਭੂਮਿਕਾ ਸੁਖਬੀਰ ਬਾਦਲ ਦੀ ਹੀ ਸਿਫਾਰਿਸ਼ ਤੇ ਤੈਨਾਤ ਇਕ ਸੀਐਸ ਨਿਭਾ ਰਹੇ ਹਨ ਜਿਸ ਨੂੰ ਹਰ ਸਾਲ ਡੇਢ ਕਰੋੜ ਰੁਪਏ ਦਿੱਤੇ ਜਾ ਰਹੇ ਹਨ।
ਮੰਨਾ ਨੇ ਕਿਹਾ ਕਿ ਸੰਗਤ ਦੇ ਚੜਾਵੇ ਅਤੇ ਗੁਰੂ ਦੀ ਗੋਲਕ ਦੀ ਲੁੱਟ ਵਿਰੁਧ ਅੰਤਰਰਾਸ਼ਟਰੀ ਪੱਧਰ ਤੇ ਆਵਾਜ਼ ਬੁਲੰਦ ਕੀਤੀ ਜਾਵੇਗੀ। ਦਰਬਾਰ ਸਾਹਿਬ ਦੇ ਮੈਨੇਜਰ ਜਸਵਿੰਦਰ ਸਿੰਘ ਦੀਨਪੁਰ ਨੇ ਮੰਨਾ ਦੁਆਰਾ ਲਗਾਏ ਸਾਰੇ ਆਰੋਪਾਂ ਨੂੰ ਬੇਬੁਨਿਆਦ ਦਸਦੇ ਹੋਏ ਕਿਹਾ ਕਿ ਲੰਗਰ ਹਾਲ ਲਈ ਜੋ ਵੀ ਖਰੀਦ ਕੀਤੀ ਜਾਂਦੀ ਹੈ ਉਸ ਦੀ ਪੂਰੀ ਜਾਂਚ ਤੋਂ ਬਾਅਦ ਭੁਗਤਾਨ ਕੀਤਾ ਜਾਂਦਾ ਹੈ।
ਘਿਓ ਦੇ 600 ਟੀਨਾਂ ਵਿਚ ਜਾਂਚ ਦੌਰਾਨ 38 ਟੀਨਾਂ ਦਾ ਵਜਨ 40 ਕਿਲੋ ਘਟ ਨਿਕਲਿਆ ਜਿਸ ਤੇ ਵੇਰਕਾ ਮਾਰਕਫੈਡ ਨੂੰ ਚਿੱਠੀ ਲਿੱਖ ਕੇ ਜਾਣਕਾਰੀ ਦਿੱਤੀ ਗਈ ਅਤੇ ਇਹ ਵੀ ਕਿਹਾ ਗਿਆ ਕਿ ਭਵਿੱਖ ਵਿਚ ਅਜਿਹੀ ਗਲਤੀ ਦੁਹਰਾਈ ਗਈ ਤਾਂ ਉਹਨਾਂ ਦਾ ਜੁਰਮਾਨੇ ਦੇ ਨਾਲ ਨਾਲ ਟੈਂਡਰ ਵੀ ਰੱਦ ਕੀਤਾ ਜਾਵੇਗਾ। ਜਿਹੜੇ ਘਿਓ ਦੇ ਟੀਨਾਂ ਦਾ ਭਾਰ ਘਟ ਨਿਕਲਿਆ ਹੈ ਉਸ ਦਾ ਭੁਗਤਾਨ ਵੀ ਉਸੇ ਹਿਸਾਬ ਨਾਲ ਕੀਤਾ ਗਿਆ ਹੈ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।