ਕਵਿਤਾ ਖੰਨਾ ਲੜਨਗੇ ਆਜ਼ਾਦ ਚੋਣ ਤੇ ਵਿਜੇ ਸਾਂਪਲਾ ਚੁੱਪ
ਚੰਡੀਗੜ੍ਹ : ਬੀਤੇ ਕਲ ਭਾਜਪਾ ਨੇ ਪੰਜਾਬ ਦੀਆਂ ਬਾਕੀ ਰਹਿੰਦੀਆਂ 2 ਸੀਟਾਂ 'ਤੇ ਉਮੀਦਵਾਰ ਐਲਾਨ ਦਿਤੇ ਪਰ ਇਸ ਐਲਾਨ ਦੇ ਨਾਲ ਹੀ ਪਾਰਟੀ ਨੇ ਆਪਣੇ ਆਗੂਆਂ ਦੀ ਨਾਰਾਜ਼ਗੀ ਵੀ ਸਹੇੜ ਲਈ ਹੈ। ਪਾਰਟੀ ਦੀ ਜਿੱਤ ਨੂੰ ਯਕੀਨੀ ਬਣਾਉਣ ਲਈ ਪਾਰਟੀ ਹਾਈ ਕਮਾਨ ਨੇ ਗੁਰਦਾਸਪੁਰ ਤੋਂ ਨਾਮਦਾਰ ਸੰਨੀ ਦਿਉਲ ਨੂੰ ਟਿਕਟ ਦੇ ਦਿਤੀ ਜਿਸ ਕਾਰਨ ਮਰਹੂਮ ਵਿਨੋਦ ਖੰਨਾ ਦੀ ਪਤਨੀ ਕਵਿਤਾ ਖੰਨਾ ਨਾਰਾਜ਼ ਹੋ ਗਏ ਹਨ। ਇਸੇ ਤਰ੍ਹਾਂ ਹੁਸ਼ਿਆਰਪੁਰ ਵਿਜੇ ਸਾਂਪਲਾ ਦੀ ਟਿਕਟ ਕੱਟ ਕੇ ਸੋਮ ਪ੍ਰਕਾਸ਼ ਨੂੰ ਟਿਕਟ ਦਿਤੀ ਗਈ ਹੈ ਇਸ 'ਤੇ ਵਿਜੇ ਸਾਂਪਲਾ ਖ਼ਫ਼ਾ ਹੋ ਗਏ ਹਨ।
Kavita Khanna
ਪਾਰਟੀ ਦੇ ਇਸ ਫ਼ੈਸਲੇ ਤੋਂ ਬਾਅਦ ਕਵਿਤਾ ਖੰਨਾ ਤਾਂ ਇੰਨੇ ਗੁੱਸੇ 'ਚ ਹਨ ਕਿ ਉਨ੍ਹਾਂ ਨੇ ਗੁਰਦਾਸਪੁਰ ਤੋਂ ਆਜ਼ਾਦ ਉਮੀਦਵਾਰ ਵਜੋਂ ਚੋਣ ਲੜਨ ਦਾ ਮਨ ਬਣਾ ਲਿਆ ਹੈ। ਸੂਤਰਾਂ ਦੇ ਹਵਾਲੇ ਤੋਂ ਤਾਂ ਇਹ ਵੀ ਖ਼ਬਰ ਹੈ ਕਿ ਕਵਿਤਾ ਖੰਨਾ ਗੁਰਦਾਸਪੁਰ ਤੋਂ ਆਜ਼ਾਦ ਚੋਣ ਲੜ ਸਕਦੇ। ਇਸ ਦੇ ਲਈ ਕਵਿਤਾ ਖੰਨਾ ਸੋਮਵਾਰ ਨੂੰ ਨਾਮਜ਼ਦਗੀ ਭਰ ਸਕਦੇ ਹਨ। ਦੂਜੇ ਪਾਸੇ ਵਿਜੇ ਸਾਂਪਲਾ ਅੰਦਰੋ-ਅੰਦਰੀ ਨਾਰਾਜ਼ ਹਨ। ਉਨ੍ਹਾਂ ਅਪਣੇ ਫ਼ੇਸਬੁੱਕ ਤੇ ਟਵਿੱਟਰ ਤੋਂ ਮੋਦੀ ਵਲੋਂ ਬਖ਼ਸ਼ਿਆ ਸ਼ਬਦ 'ਚੌਕੀਦਾਰ' ਵੀ ਹਟਾ ਦਿਤਾ ਹੈ।
Vijay Sampla
ਸਾਂਪਲਾ ਨੇ ਪਾਰਟੀ ਨੂੰ ਪੁਛਿਆ ਹੈ ਕਿ ਉਨ੍ਹਾਂ ਦੀ ਟਿਕਟ ਕਿਸ ਕਾਰਨ ਤੋਂ ਕੱਟੀ ਗਈ ਜਦਕਿ ਉਨ੍ਹਾਂ ਉਪਰ ਕਿਸੇ ਪ੍ਰਕਾਰ ਦੇ ਭ੍ਰਿਸ਼ਟਾਚਾਰ ਦਾ ਦੋਸ਼ ਨਹੀਂ ਹੈ ਤੇ ਨਾ ਹੀ ਪਾਰਟੀ ਨੂੰ ਕੋਈ ਨੁਕਸਾਨ ਪਹੁੰਚਾਇਆ ਹੈ। ਸਾਂਪਲਾ ਨੇ ਅਪਣਾ ਰਿਪੋਰਟ ਕਾਰਡ ਵੀ ਪੇਸ਼ ਕੀਤਾ ਹੈ ਤੇ ਕਿਹਾ ਹੈ ਕਿ ਉਨ੍ਹਾਂ ਹੁਸ਼ਿਆਰਪੁਰ ਹਲਕੇ ਦੇ ਵਿਕਾਸ ਲਈ ਕੋਈ ਕਸਰ ਨਹੀਂ ਛੱਡੀ। ਉਨ੍ਹਾਂ ਅਪਣੀ ਟਿਕਟ ਕੱਟਣ ਨੂੰ 'ਗਊ ਕਤਲ' ਕਰਨ ਸਮਾਨ ਦਸਿਆ ਹੈ। ਇਸ ਤੋਂ ਇਲਾਵਾ ਅੰਮ੍ਰਿਤਸਰ ਤੋਂ ਟਿਕਟ ਦੀ ਝਾਕ 'ਚ ਬੈਠੇ ਭਾਜਪਾ ਦੇ ਪ੍ਰਬਲ ਦਾਅਵੇਦਾਰ ਰਾਜਿੰਦਰ ਮੋਹਨ ਸਿੰਘ ਛੀਨਾ ਵੀ ਦਸਿਆ ਜਾ ਰਿਹਾ ਹੈ ਕਿ ਪੂਰੀ ਤਰ੍ਹਾਂ ਖ਼ੁਸ਼ ਨਹੀਂ ਹਨ।
Rajinder Mohan Singh Chhina
ਉਨ੍ਹਾਂ ਕਦੇ ਸੋਚਿਆ ਵੀ ਨਹੀਂ ਸੀ ਕਿ ਉਨ੍ਹਾਂ ਨੂੰ ਟਿਕਟ ਨਹੀਂ ਮਿਲੇਗੀ। ਭਾਵੇਂ ਉਹ ਇਸ ਬਾਰੇ ਅਜੇ ਤਕ ਖੁਲ੍ਹ ਕੇ ਤਾਂ ਕੁੱਝ ਨਹੀਂ ਬੋਲੇ ਪਰ ਸੂਤਰ ਦਸਦੇ ਹਨ ਕਿ ਛੀਨਾ ਵੀ ਅੰਦਰੋ-ਅੰਦਰੀ ਨਾਰਾਜ਼ ਹਨ। ਪਾਰਟੀ ਹਾਈਕਮਾਨ ਇਨ੍ਹਾਂ ਨਾਰਾਜ਼ ਆਗੂਆਂ ਨੂੰ ਕਿਵੇਂ ਨਾਲ ਤੋਰਦੀ ਹੈ ਤੇ ਕਿਵੇਂ ਅਪਣੇ ਪੱਖ 'ਚ ਨਤੀਜੇ ਲਿਆਉਂਦੀ ਹੈ, ਇਹ ਤਾਂ ਅਜੇ ਭਵਿੱਖ ਦੇ ਗਰਭ 'ਚ ਹੈ ਪਰ ਫਿਲਹਾਲ ਭਾਜਪਾ ਅੰਦਰ 'ਸੱਭ ਕੁਛ ਅੱਛਾ ਨਹੀਂ' ਹੈ।
ਤਸਵੀਰਾਂ - ਕਵਿਤਾ ਖੰਨਾ, ਵਿਜੇ ਸਾਂਪਲਾ ਤੇ ਰਜਿੰਦਰ ਮੋਹਨ ਛੀਨਾ
