ਬਟਾਲਾ, ਬਟਾਲਾ ਤੋਂ ਇਕ ਨੌਜਵਾਨ ਦੀ 11 ਵਿਅਕਤੀਆਂ ਵੱਲੋਂ ਕਥਿਤ ਤੌਰ 'ਤੇ ਕੁੱਟ ਮਾਰ ਕਰਕੇ ਹੱਤਿਆ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ
ਬਟਾਲਾ, ਬਟਾਲਾ ਤੋਂ ਇਕ ਨੌਜਵਾਨ ਦੀ 11 ਵਿਅਕਤੀਆਂ ਵੱਲੋਂ ਕਥਿਤ ਤੌਰ 'ਤੇ ਕੁੱਟ ਮਾਰ ਕਰਕੇ ਹੱਤਿਆ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਥੇ 11 ਵਿਅਕਤੀਆਂ ਵੱਲੋਂ ਇਸ ਨੌਜਵਾਨ ਨੂੰ ਬੁਰੀ ਤਰ੍ਹਾਂ ਮਾਰ ਕੁਟਾਈ ਕਰਕੇ ਮੌਤ ਦੇ ਘਾਟ ਉਤਾਰ ਦਿੱਤਾ ਗਿਆ ਹੈ। ਮ੍ਰਿਤਕ ਦੀ ਪਛਾਣ ਹੀਰਾ ਮਸੀਹ ਵਾਸੀ ਪਿੰਡ ਮਸਾਣੀਆਂ ਵੱਜੋਂ ਹੋਈ ਹੈ। ਮਾਮਲਾ ਇਹ ਹੈ ਕਿ 'ਹੀਰਾ ਮਸੀਹ' ਨੇ ਆਪਣੇ ਇਕ ਦੋਸਤ ਦੀ ਭੈਣ ਦਾ ਰਿਸ਼ਤਾ ਕਰਵਾਇਆ ਸੀ ਜੋ ਕਿ ਵਿਆਹ ਤੋਂ ਬਾਅਦ ਸੁਖੀ ਨਹੀਂ ਸੀ ਰਹਿ ਪਾ ਰਹੀ ਸੀ। ਦੋਸ਼ੀ ਰੱਬੀ ਮਸੀਹ ਨੇ ਆਪਣੀ ਭੈਣ ਦੀਆਂ ਵਿਆਹੁਤਾ ਸਮੱਸਿਆਵਾਂ ਲਈ ਹੀਰਾ ਮਸੀਹ ਨੂੰ ਜ਼ਿੰਮੇਵਾਰ ਠਹਿਰਾਇਆ।
ਦੱਸ ਦਈਏ ਕਿ, ਹੀਰਾ ਮਸੀਹ, ਕਾਦੀਆਂ ਠਾਣੇ ਦੇ ਅਧੀਨ ਪੈਂਦੇ ਇਲਾਕੇ ਦੇ ਪਿੰਡ ਮਸਾਣੀਆਂ ਦਾ ਵਾਸੀ ਸੀ। ਇਸ ਘਟਨਾ ਬਾਰੇ ਜਾਣਕਾਰੀ ਦਿੰਦਿਆਂ ਐਸਪੀ ਓਪਿੰਦਰਜੀਤ ਸਿੰਘ ਘੁੰਮਣ ਨੇ ਕਿਹਾ ਕਿ ਦੋਸ਼ੀ ਦੇ ਖਿਲਾਫ ਆਈ.ਪੀ.ਸੀ. ਦੀ ਧਾਰਾ 302 ਦੇ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ। ਪ੍ਰਾਪਤ ਜਾਣਕਾਰੀ ਤੋਂ ਪਤਾ ਲੱਗਿਆ ਕਿ ਹੀਰਾ ਮੰਗਲਵਾਰ ਨੂੰ ਦੁਬਈ ਜਾਣ ਵਾਲਾ ਸੀ, ਜਿੱਥੇ ਉਸ ਨੂੰ ਕੋਈ ਨੌਕਰੀ ਮਿਲ ਗਈ ਸੀ। ਪੁਲਿਸ ਸੂਤਰਾਂ ਨੇ ਦੱਸਿਆ ਕਿ ਐਤਵਾਰ ਦੀ ਰਾਤ ਨੂੰ ਉਸ ਉੱਤੇ ਉਸ ਦੇ ਦੋਸਤਾਂ, ਰੱਬੀ ਮਸੀਹ ਅਤੇ ਹੋਰਨਾਂ ਨੇ ਮਿਲਕੇ ਹਮਲਾ ਕਰ ਦਿੱਤਾ ਅਤੇ ਤੇਜ਼ਧਾਰ ਹਥਿਆਰਾਂ ਦੀ ਵਰਤੋਂ ਕਰਦੇ ਹੋਏ ਉਸਦਾ ਕਤਲ ਕਰ ਦਿੱਤਾ।
ਦੱਸ ਦਈਏ ਕਿ ਹੀਰਾ ਮਸੀਹ ਨੇ ਕੁਝ ਮਹੀਨੇ ਪਹਿਲਾਂ ਰਬੀ ਮਸੀਹ ਦੀ ਭੈਣ ਲਈ ਕੋਈ ਰਿਸ਼ਤਾ ਲੱਭਿਆ ਸੀ। ਜੋ ਕਿ ਵਿਆਹ ਦੇ ਰੂਪ 'ਚ ਸਿਰੇ ਚੜ੍ਹਨ ਵਿਚ ਸਫ਼ਲ ਹੋ ਗਿਆ। ਪਰ ਰੱਬੀ ਦੀ ਸ਼ਿਕਾਇਤ ਸੀ ਕਿ ਵਿਆਹ ਤੋਂ ਬਾਅਦ ਉਸਦੀ ਭੈਣ ਦੀ ਜ਼ਿੰਦਗੀ ਵਿਚ ਮੁਸੀਬਤਾਂ ਪੈਦਾ ਹੋ ਗਈਆਂ। ਇਸਦੇ ਚਲਦੇ ਰੱਬੀ ਨੇ ਵਿਆਹ ਤੋਂ ਬਾਅਦ ਹੀਰਾ ਨੂੰ ਦੋਸ਼ ਦੇਣੇ ਸ਼ੁਰੂ ਕਰ ਦਿੱਤੇ।
ਇਸੇ ਰਿਸ਼ਤੇ ਨੂੰ ਲੈਕੇ ਗੁੱਸੇ ਵਿਚ ਆਏ ਰੱਬੀ ਨੇ ਆਪਣੇ ਨਾਲ ਹੋਰ 11 ਸਾਥੀਆਂ ਨਾਲ ਮਿਲਕੇ ਹੀਰਾ ਉੱਤੇ ਭਿਆਨਕ ਹਮਲਾ ਬੋਲ ਦਿੱਤਾ ਜਿਸ ਵਿਚ ਹੀਰਾ ਦੀ ਮੌਤ ਹੋ ਗਈ। ਬੁਰੀ ਤਰ੍ਹਾਂ ਜ਼ਖਮੀ ਹੋਏ ਹੀਰਾ ਮਸੀਹ ਨੂੰ ਪਿੰਡ ਵਾਲਿਆਂ ਨੇ ਬਟਾਲਾ ਸਿਵਲ ਹਸਪਤਾਲ ਵਿਚ ਦਾਖਲ ਕਰਵਾਇਆ। ਹੀਰਾ ਦੀ ਹਾਲਤ ਨੂੰ ਮੱਦੇਨਜ਼ਰ ਰੱਖਦੇ ਹੋਏ, ਡਾਕਟਰਾਂ ਨੇ ਉਸਦੇ ਰਿਸ਼ਤੇਦਾਰਾਂ ਨੂੰ ਉਸ ਨੂੰ ਅੰਮ੍ਰਿਤਸਰ ਹਸਪਤਾਲ ਲਿਜਾਣ ਲਈ ਕਿਹਾ, ਜਿੱਥੇ ਦਾਖਲ ਹੋਣ ਤੋਂ ਕੁਝ ਘੰਟਿਆਂ ਬਾਅਦ ਡਾਕਟਰਾਂ ਨੇ ਉਸਨੂੰ ਮ੍ਰਿਤ ਘੋਸ਼ਿਤ ਕਰ ਦਿੱਤਾ।
ਪੁਲਿਸ ਨੇ ਰੱਬੀ ਮਸੀਹ, ਵਿਜੇ ਮਸੀਹ, ਸੁੱਖੀ ਮਸੀਹ, ਗਗਨ, ਭੋਲਾ, ਵਿਸ਼ਾਲ, ਬਿੱਲਾ, ਰਾਜਾ, ਬੱਗਾ ਅਤੇ ਸੰਨੀ ਦੋਸ਼ੀਆਂ ਵਿਰੁੱਧ ਕੇਸ ਦਰਜ ਕਰ ਲਿਆ ਹੈ। ਫ਼ਿਲਹਾਲ ਦੋਸ਼ੀਆਂ ਤਕ ਅਜੇ ਪੁਲਿਸ ਦੇ ਹੱਥ ਨਹੀਂ ਪਹੁੰਚ ਸਕੇ ਹਨ ਅਤੇ ਉਨ੍ਹਾਂ ਦੀ ਭਾਲ ਜਾਰੀ ਹੈ। ਐਸਪੀ ਨੇ ਜਾਣਕਾਰੀ ਦਿੰਦਿਆਂ ਹੋਇਆ ਕਿਹਾ ਕਿ ਦੋਸ਼ੀਆਂ ਨੂੰ ਫ਼ੜਨ ਲਈ ਪੁਲਿਸ ਕਰਮੀਆਂ ਨੂੰ ਤਿੰਨ ਸਪੈਸ਼ਲ ਟੁਕੜੀਆਂ ਵਿਚ ਵੰਡਿਆ ਗਿਆ ਹੈ।