ਪੰਜਾਬ ਦੇ ਮੁਕਤਸਰ ‘ਚ ਅੱਜ ਸਵੇਰੇ ਬਿਊਟੀਪਾਰਲਰ ਆਈ ਇਕ ਦੁਲਹਨ ਨੂੰ ਹਥਿਆਰਬੰਦ ਬਦਮਾਸ਼ਾਂ ਨੇ ਅਗਵਾਹ...
ਸ਼੍ਰੀ ਮੁਕਤਸਰ ਸਾਹਿਬ : ਪੰਜਾਬ ਦੇ ਮੁਕਤਸਰ ‘ਚ ਅੱਜ ਸਵੇਰੇ ਬਿਊਟੀਪਾਰਲਰ ਆਈ ਇਕ ਦੁਲਹਨ ਨੂੰ ਹਥਿਆਰਬੰਦ ਬਦਮਾਸ਼ਾਂ ਨੇ ਅਗਵਾਹ ਕਰ ਲਿਆ। ਵਾਰਦਾਤ ਨੂੰ ਉਸ ਸਮੇਂ ਅੰਜਾਮ ਦਿਤਾ ਗਿਆ ਜਦੋਂ ਦੁਲਹਨ ਦਾ ਭਰਾ ਉਸ ਨੂੰ ਪਾਰਲਰ ਵਿਚ ਛੱਡ ਕੇ ਬਜ਼ਾਰ ਵਿਚ ਖ਼ਰੀਦਦਾਰੀ ਕਰਨ ਗਿਆ ਸੀ। ਉਦੋਂ ਕਾਰ ਵਿਚ ਛੇ ਬਦਮਾਸ਼ ਆਏ ਅਤੇ ਹਥਿਆਰਾਂ ਦੇ ਬਲ ਉਤੇ ਦੁਲਹਨ ਨੂੰ ਗੱਡੀ ਵਿਚ ਪਾਇਆ ਅਤੇ ਉਥੋਂ ਭੱਜ ਗਏ। ਅਗਵਾਹ ਦੀ ਇਹ ਪੂਰੀ ਘਟਨਾ ਉਥੇ ਲੱਗੇ ਹੋਏ ਇਕ ਸੀਸੀਟੀਵੀ ਵਿਚ ਕੈਦ ਹੋ ਗਈ।
Kidnapped Bride
ਫੁਟੇਜ ਦੀ ਮਦਦ ਨਾਲ ਪੁਲਿਸ ਦੋਸ਼ੀਆਂ ਦੀ ਪਹਿਚਾਣ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ। ਪੁਲਿਸ ਨੇ ਦੱਸਿਆ ਕਿ ਕੁੜੀ ਚੱਕ ਪਾਲੀ ਵਾਲਾ ਪਿੰਡ ਦੀ ਰਹਿਣ ਵਾਲੀ ਹੈ। ਅੱਜ ਉਸ ਦੀ ਬਰਾਤ ਆਉਣੀ ਸੀ। ਸਵੇਰੇ-ਸਵੇਰੇ ਉਹ ਅਪਣੀ ਦਾਦੀ, ਇਕ ਹੋਰ ਔਰਤ ਅਤੇ ਭਰਾ ਦੇ ਨਾਲ ਗਾਂਧੀ ਚੌਕ ਸਥਿਤ ਪਾਰਲਰ ਵਿਚ ਆਈ ਸੀ। ਲੜਕੀ ਨੂੰ ਪਾਰਲਰ ਵਿਚ ਛੱਡ ਕੇ ਔਰਤਾਂ ਅਤੇ ਉਸ ਦਾ ਭਰਾ ਬਜ਼ਾਰ ਵਿਚ ਕਿਤੇ ਚਲੇ ਗਏ।
ਇਸ ਦੌਰਾਨ 6:17 ਵਜੇ ਕਾਰ ਵਿਚ ਸਵਾਰ ਛੇ ਹਥਿਆਰਬੰਦ ਨੌਜਵਾਨ ਪਾਰਲਰ ਵਿਚ ਵੜ ਗਏ ਅਤੇ ਕੁੜੀ ਨੂੰ ਪਾਰਲਰ ਤੋਂ ਘਸੀਟ ਕੇ ਬਾਹਰ ਲੈ ਆਏ। ਪੁਲਿਸ ਕੁੜੀ ਦੀਆਂ ਸਹੇਲੀਆਂ ਅਤੇ ਦੋਸਤਾਂ ਤੋਂ ਪੁੱਛਗਿਛ ਕਰ ਰਹੀ ਹੈ। ਐਸਪੀਡੀ ਰਣਬੀਰ ਸਿੰਘ ਨੇ ਦੱਸਿਆ ਕਿ ਦੋਸ਼ੀ ਮੁੰਡੇ ਦੀ ਪਹਿਚਾਣ ਹੋ ਗਈ ਹੈ, ਜੋ ਫਾਜ਼ਿਲਕਾ ਦੇ ਪਿੰਡ ਬਰਨਾਵਾਲੀ ਦਾ ਦੱਸਿਆ ਜਾ ਰਿਹਾ ਹੈ। ਪੁਲਿਸ ਉਸ ਨੂੰ ਗ੍ਰਿਫ਼ਤਾਰ ਕਰਨ ਉਸ ਦੇ ਪਿੰਡ ਪਹੁੰਚੀ ਪਰ ਉਹ ਉਥੇ ਨਹੀਂ ਮਿਲਿਆ।
ਜਾਣਕਾਰੀ ਮਿਲੀ ਹੈ ਕਿ ਕੁੜੀ ਇਸ ਪਾਰਲਰ ਵਿਚ ਦੋ ਦਿਨ ਪਹਿਲਾਂ ਵੀ ਮੇਕਅੱਪ ਲਈ ਗਈ ਸੀ। ਪੁਲਿਸ ਸ਼ਹਿਰ ਦੇ ਸੀਸੀਟੀਵੀ ਕੈਮਰੇ ਖੰਗਾਲਨ ਵਿਚ ਜੁੱਟੀ ਹੈ।
