ਗਿੱਦੜਬਾਹਾ ਦੇ ਕਾਂਗਰਸੀ ਵਿਧਾਇਕ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਵਲੋਂ ਹਨੂੰਮਾਨ ਚਾਲੀਸਾ ਦੀਆਂ ਗ਼ਲਤ ਤੁਕਾਂ ਟਵੀਟ ਕਰਕੇ ਹਿੰਦੂ ਸੰਗਠਨਾਂ ਦੀ ਨਾਰਾਜ਼ਗੀ ਸਹੇੜ ਲਈ ...
ਬਠਿੰਡਾ :- ਗਿੱਦੜਬਾਹਾ ਦੇ ਕਾਂਗਰਸੀ ਵਿਧਾਇਕ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਵਲੋਂ ਹਨੂੰਮਾਨ ਚਾਲੀਸਾ ਦੀਆਂ ਗ਼ਲਤ ਤੁਕਾਂ ਟਵੀਟ ਕਰਕੇ ਹਿੰਦੂ ਸੰਗਠਨਾਂ ਦੀ ਨਾਰਾਜ਼ਗੀ ਸਹੇੜ ਲਈ ਹੈ। ਇਸ ਤੋਂ ਭੜਕੇ ਹਿੰਦੂ ਸੰਗਠਨਾਂ ਨੇ ਬਠਿੰਡਾ ਵਿਖੇ ਰਾਜਾ ਵੜਿੰਗ ਵਿਰੁਧ ਜਮ ਕੇ ਰੋਸ ਪ੍ਰਦਰਸ਼ਨ ਕੀਤਾ ਅਤੇ ਰਾਜਾ ਵੜਿੰਗ ਦੇ ਪੋਸਟਰ ਸਾੜੇ।
ਦਰਅਸਲ ਬੀਤੇ ਦਿਨੀਂ ਕਾਂਗਰਸੀ ਵਿਧਾਇਕ ਰਾਜਾ ਵੜਿੰਗ ਨੇ ਟਵਿਟਰ 'ਤੇ ਹਨੂੰਮਾਨ ਚਾਲੀਸਾ ਦੀਆਂ ਗ਼ਲਤ ਤੁਕਾਂ ਲਿਖ ਕੇ ਟਵੀਟ ਕਰ ਦਿਤੀਆਂ ਸਨ, ਜਿਸ ਤੋਂ ਬਾਅਦ ਹੀ ਇਹ ਵਿਵਾਦ ਵਧਿਆ ਹੈ। ਰਾਜਾ ਵੜਿੰਗ ਵਲੋਂ ਟਵੀਟ ਕੀਤੇ ਹਨੂੰਮਾਨ ਚਾਲੀਸਾ ਵਿਚ ਹਨੂੰਮਾਨ ਨੂੰ ਦਲਿਤ, ਜਾਟ ਪੁੱਤਰ, ਮੁਸਲਿਮ, ਜੈਨ ਅਤੇ ਬ੍ਰਾਹਮਣ ਲਿਖਿਆ ਗਿਆ ਹੈ। ਹਨੂੰਮਾਨ ਚਾਲੀਸਾ ਦੀਆਂ ਗ਼ਲਤ ਤੁਕਾਂ ਟਵੀਟ ਕਰ ਰਾਜਾ ਵੜਿੰਗ ਨਵੇਂ ਵਿਵਾਦ ਵਿਚ ਫਸ ਗਏ ਹਨ।
Amrinder Singh Raja Warring tweet
ਪੰਜਾਬ ਦੇ ਕੁੱਝ ਹਿੰਦੂ ਸੰਗਠਨਾਂ ਵਲੋਂ ਉਨ੍ਹਾਂ ਤੋਂ ਅਸਤੀਫ਼ਾ ਲਏ ਜਾਣ ਦੀ ਮੰਗ ਕੀਤੀ ਜਾ ਰਹੀ ਹੈ। ਹਿੰਦੂ ਸੰਗਠਨਾਂ ਦੇ ਆਗੂਆਂ ਨੇ ਆਖਿਆ ਕਿ ਉਹ ਇਸ ਸਬੰਧੀ ਪੁਲਿਸ ਕੋਲ ਸ਼ਿਕਾਇਤ ਵੀ ਦਰਜ ਕਰਵਾਉਣਗੇ। ਦਸ ਦਈਏ ਕਿ ਹਨੂੰਮਾਨ ਨੂੰ ਲੈ ਕੇ ਛਿੜਿਆ ਵਿਵਾਦ ਕੋਈ ਨਵਾਂ ਨਹੀਂ ਹੈ, ਇਸ ਤੋਂ ਪਹਿਲਾਂ ਯੂਪੀ ਦੇ ਮੁੱਖ ਮੰਤਰੀ ਯੋਗੀ ਅਦਿਤਿਆਨਾਥ ਹਨੂੰਮਾਨ ਨੂੰ ਦਲਿਤ ਆਖ ਚੁੱਕੇ ਹਨ,
Amrinder Singh Raja Warring
ਮੋਦੀ ਸਰਕਾਰ ਦੇ ਇਕ ਮੰਤਰੀ ਸੱਤਿਆਪਾਲ ਸਿੰਘ ਨੇ ਹਨੂੰਮਾਨ ਨੂੰ ਆਰੀਆ ਆਖਿਆ ਸੀ, ਇਕ ਭਾਜਪਾ ਵਿਧਾਇਕ ਬੁੱਕਲ ਨਵਾਬ ਨੇ ਹਨੂੰਮਾਨ ਨੂੰ ਮੁਸਲਿਮ ਦੱਸ ਚੁੱਕੇ ਹਨ। ਇਸ ਤੋਂ ਇਲਾਵਾ ਯੂਪੀ ਦੇ ਇਕ ਮੰਤਰੀ ਚੌਧਰੀ ਲਕਸ਼ਮੀ ਨਰਾਇਣ ਹਨੂੰਮਾਨ ਨੂੰ ਜਾਟ ਦਸਿਆ ਸੀ।
Amrinder Singh Raja Warring
ਇਸ ਵਿਵਾਦ ਦੀ ਅਸਲ ਜੜ੍ਹ ਯੋਗੀ ਅਦਿਤਿਆਨਾਥ ਹਨ, ਜਿਨ੍ਹਾਂ ਨੇ ਹਨੂੰਮਾਨ ਨੂੰ ਦਲਿਤ ਆਖ ਕੇ ਇਸ ਵਿਵਾਦ ਨੂੰ ਜਨਮ ਦਿਤਾ ਸੀ। ਭਾਜਪਾ ਵਰਕਰ ਜਾਂ ਹਿੰਦੂ ਸੰਗਠਨ ਯੋਗੀ ਸਮੇਤ ਭਾਜਪਾ ਮੰਤਰੀਆਂ ਵਿਰੁਧ ਪ੍ਰਦਰਸ਼ਨ ਕਰਨ ਦੀ ਹਿਮਾਕਤ ਤਾਂ ਨਹੀਂ ਦਿਖਾ ਸਕੇ ਪਰ ਉਨ੍ਹਾਂ ਨੇ ਕਾਂਗਰਸੀ ਵਿਧਾਇਕ ਰਾਜਾ ਵੜਿੰਗ ਨੂੰ ਜ਼ਰੂਰ ਆੜੇ ਹੱਥੀਂ ਲੈ ਲਿਆ ਹੈ।
