ਹੁਣ ਰਾਹੁਲ ਨੇ ਵੇਖਣਾ ਹੈ ਕਿ 'ਬੁੱਢੀ ਔਰਤ' ਦਾ ਕੀ ਕੀਤਾ ਜਾਵੇ : ਰਾਊਤ
ਰਾਹੁਲ ਨੂੰ ਕਾਂਗਰਸ ਦੀ ਅਗਵਾਈ ਕਰਨ ਤੋਂ ਰੋਕਣਾ ਪਾਰਟੀ ਨੂੰ ਬਰਬਾਦ ਕਰ ਦੇਵੇਗਾ
ਮੁੰਬਈ, 30 ਅਗੱਸਤ : ਸ਼ਿਵ ਸੈਨਾ ਸੰਸਦ ਮੈਂਬਰ ਸੰਜੇ ਰਾਊਤ ਨੇ ਕਿਹਾ ਹੈ ਕਿ ਰਾਹੁਲ ਗਾਂਧੀ ਨੂੰ ਕਾਂਗਰਸ ਦੀ ਅਗਵਾਈ ਸੰਭਾਲਣ ਤੋਂ ਰੋਕਣਾ ਦੇਸ਼ ਦੀ ਇਸ ਪੁਰਾਣੀ ਪਾਰਟੀ ਦੇ ਵਜੂਦ ਨੂੰ ਹੀ ਨਸ਼ਟ ਕਰਨ ਵਾਲਾ ਸਿੱਧ ਹੋਵੇਗਾ। ਰਾਊਤ ਨੇ ਸ਼ਿਵ ਸੈਨਾ ਦੇ ਅਖ਼ਬਾਰ 'ਸਾਮਨਾ' ਵਿਚ ਛਪੇ ਅਪਣੇ ਹਫ਼ਤਾਵਾਰੀ ਲੇਖ 'ਰੋਕਟੋਕ' ਵਿਚ ਲਿਖਿਆ ਹੈ ਕਿ ਕਾਂਗਰਸ ਵਿਚ ਅਜਿਹੇ ਆਗੂ ਦੀ ਕਮੀ ਹੈ ਜੋ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵਿਰੁਧ ਪੂਰੀ ਮਜ਼ਬੂਤੀ ਨਾਲ ਖੜਾ ਹੋ ਰਹੇ। ਉਨ੍ਹਾਂ 23 ਕਾਂਗਰਸੀ ਆਗੂਆਂ ਦੁਆਰਾ ਸੋਨੀਆ ਗਾਂਧੀ ਨੂੰ ਕੁਲਵਕਤੀ ਸਗਗਰਮ ਆਗੂ ਬਾਰੇ ਲਿਖੇ ਪੱਤਰ ਦਾ ਜ਼ਿਕਰ ਕਰਦਿਆਂ ਸਵਾਲ ਕੀਤਾ ਕਿ ਇਨ੍ਹਾਂ ਆਗੂਆਂ ਨੂੰ ਸਰਗਰਮ ਕਰਨ ਤੋਂ ਕੌਣ ਰੋਕ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਕਾਂਗਰਸ ਦੇ ਸੀਨੀਅਰ ਆਗੂ ਮਰਹੂਮ ਵੀ ਐਨ ਗਾਡਵਿਲ ਨੇ ਕਾਂਗਰਸ ਨੂੰ ਕਦੇ ਵੀ ਨਾ ਮਰਨ ਵਾਲੀ ਬੁੱਢੀ ਔਰਤ ਦਸਿਆ ਸੀ। ਰਾਊਤ ਨੇ ਕਿਹਾ ਕਿ ਇਸ ਬੁੱਢੀ ਔਰਤ ਦਾ ਕੀ ਕੀਤਾ ਜਾਵੇ, ਇਹ ਰਾਹੁਲ ਗਾਂਧੀ ਨੂੰ ਹੀ ਤੈਅ ਕਰਨਾ ਚਾਹੀਦਾ ਹੈ।
ਰਾਊਤ ਨੇ ਕਿਹਾ, 'ਰਾਹੁਲ ਗਾਂਧੀ ਨੂੰ ਰੋਕਣ ਦੀ ਸਰਗਰਮੀ ਪਾਰਟੀ ਦੇ ਵਜੂਦ ਨੂੰ ਹੀ ਨਸ਼ਟ ਕਰਨ ਵਾਲੀ ਸਿੱਧ ਹੋਵੇਗੀ।' ਰਾਊਤ ਨੇ ਕਿਹਾ ਕਿ ਇਕ ਗ਼ੈਰ ਗਾਂਧੀ ਦਾ ਕਾਂਗਰਸ ਪ੍ਰਧਾਨ ਹੋਣਾ ਚੰਗਾ ਵਿਚਾਰ ਹੈ ਪਰ 
imageਇਨ੍ਹਾਂ 23 ਵਿਚੋਂ ਕਿਸੇ ਅੰਦਰ ਵੀ ਇਹ ਸਮਰੱਥਾ ਨਹੀਂ। ਰਾਊਤ ਦੀ ਪਾਰਟੀ ਸ਼ਿਵ ਸੈਨਾ ਮਹਾਰਾਸ਼ਟਰ ਵਿਚ ਕਾਂਗਰਸ ਅਤੇ ਐਨਸੀਪੀ ਨਾਲ ਮਿਲ ਕੇ ਸੱਤਾ ਵਿਚ ਹੈ। ਰਾਊਤ ਨੇ ਸਾਬਕਾ ਕਾਂਗਰਸ ਆਗੂਆਂ ਦੁਆਰਾ ਕਾÎਇਮ ਕੀਤੀਆਂ ਗਈਆਂ ਖੇਤਰੀ ਪਾਰਟੀਆਂ ਦਾ ਜ਼ਿਕਰ ਕਰਦਿਆਂ ਕਿਹਾ, 'ਕਾਂਗਰਸ ਹਾਲੇ ਵੀ ਪੂਰੇ ਭਾਰਤ ਵਿਚ ਮੌਜੂਦ ਹੈ, ਸਿਰਫ਼ ਮੂਲ ਚਿਹਰੇ 'ਤੇ ਮੁਖੌਟੇ ਬਦਲ ਗਏ ਹਨ। ਜੇ ਇਨ੍ਹਾਂ ਮੁਖੌਟਿਆਂ ਨੂੰ ਲਾਹ ਕੇ ਸੁੱਟ ਦਿਤਾ ਜਾਵੇ ਤਾਂ ਪਾਰਟੀ ਦੇਸ਼ ਵਿਚ ਮਜ਼ਬੂਤ ਪਾਰਟੀ ਦੇ ਰੂਪ ਵਿਚ ਖੜੀ ਹੋ ਜਾਵੇਗੀ।' (ਏਜੰਸੀ)
