ਸੂਬੇ ਦੇ ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਦੇ ਸਾਲਾ ਸਾਬ੍ਹ ਜੈਜੀਤ ਸਿੰਘ ਜੌਹਲ ਨੇ ਹਰਸਿਮਰਤ ਕੌਰ ਬਾਦਲ ਨੂੰ ਉਨ੍ਹਾਂ ਦੋਸ਼ਾਂ ਦਾ ਮੂੰਹਤੋੜ ਜਵਾਬ ਦਿਤਾ ਹੈ, ਜਿਸ...
ਹਰਸਿਮਰਤ ਬਾਦਲ ਨੂੰ ਦਸਿਆ 'ਝੂਠੀ', ਕਿਹਾ, ਹਰਸਿਮਰਤ ਨੇ ਧਾਰਨ ਕੀਤਾ ਅਪਣੇ ਪਤੀ ਦਾ 'ਝੂਠ ਬੋਲਣ ਵਾਲਾ' ਗੁਣ
ਬਠਿੰਡਾ : ਸੂਬੇ ਦੇ ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਦੇ ਸਾਲਾ ਸਾਬ੍ਹ ਜੈਜੀਤ ਸਿੰਘ ਜੌਹਲ ਨੇ ਹਰਸਿਮਰਤ ਕੌਰ ਬਾਦਲ ਨੂੰ ਉਨ੍ਹਾਂ ਦੋਸ਼ਾਂ ਦਾ ਮੂੰਹਤੋੜ ਜਵਾਬ ਦਿਤਾ ਹੈ, ਜਿਸ ਵਿਚ ਉਨ੍ਹਾਂ ਨੇ ਮਨਪ੍ਰੀਤ ਬਾਦਲ ਅਤੇ ਪੰਜਾਬ ਸਰਕਾਰ ਨੂੰ ਨਿਸ਼ਾਨਾ ਬਣਾਉਂਦਿਆਂ ਏਮਜ਼ ਦੀ ਉਸਾਰੀ ਵਿਚ ਅੜਿੱਕਾ ਡਾਹੁਣ ਦਾ ਦੋਸ਼ ਲਗਾਇਆ ਸੀ। ਜੈਜੀਤ ਜੌਹਲ ਨੇ ਹਰਸਿਮਰਤ ਬਾਦਲ 'ਤੇ ਤਿੱਖਾ ਸ਼ਬਦੀ ਵਾਰ ਕਰਦਿਆਂ ਆਖਿਆ ਕਿ ਹਰਸਿਮਰਤ ਨੇ 24 ਅਗੱਸਤ ਨੂੰ ਏਮਜ਼ ਹਸਪਤਾਲ ਦਾ ਨੀਂਹ ਪੱਥਰ ਰੱਖਣ ਮੌਕੇ ਮੀਡੀਆ ਅੱਗੇ ਝੂਠ ਬੋਲਿਆ ਹੈ ਕਿ ਸਰਕਾਰ ਇਸ ਵਿਚ ਅੜਿੱਕੇ ਡਾਹ ਰਹੀ ਹੈ।
Harsimrat Badal
ਜੈਜੀਤ ਨੇ ਦਸਿਆ ਕਿ ਹਰਸਿਮਰਤ ਨੇ ਪੱਤਰਕਾਰਾਂ ਨੇ ਗੱਲਬਾਤ ਕਰਦਿਆਂ ਦੋਸ਼ ਲਗਾਇਆ ਸੀ ਕਿ ਪੰਜਾਬ ਸਰਕਾਰ ਵਲੋਂ ਏਮਜ਼ ਲਈ ਇਨਵਾਇਰਮੈਂਟ ਕਲੀਅਰੈਂਸ ਨਹੀਂ ਦਿਤੀ ਜਾ ਰਹੀ ਹੈ, ਜਿਸ ਕਾਰਨ ਉਸਾਰੀ ਦਾ ਕੰਮ ਰੁਕਿਆ ਹੋਇਆ ਹੈ। ਜੈਜੀਤ ਨੇ ਕਿਹਾ ਕਿ ਹਰਸਿਮਰਤ ਵਲੋਂ ਲਗਾਏ ਗਏ ਦੋਸ਼ ਝੂਠੇ ਅਤੇ ਬੇਬੁਨਿਆਦ ਕਿਉਂਕਿ ਏਮਸ ਨੂੰ ਇਨਵਾਇਰਮੈਂਟ ਕਲੀਅਰੈਂਸ ਦੀ ਚਿੱਠੀ ਇਸ ਦੇ ਨੀਂਹ ਪੱਥਰ ਤੋਂ ਪਹਿਲਾਂ ਭਾਵ ਕਿ 23 ਅਗੱਸਤ ਨੂੰ ਹੀ ਜਾਰੀ ਕਰ ਦਿਤੀ ਗਈ ਸੀ।
Manpreet Badal-- Harsimrat Badal
ਜੌਹਲ ਨੇ ਕਿਹਾ ਕਿ ਹਰਸਿਮਰਤ ਬਾਦਲ ਨੇ ਸਿਆਸੀ ਲਾਹਾ ਲੈਣ ਅਤੇ ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਨੂੰ ਨੀਚਾ ਦਿਖਾਉਣ ਲਈ ਪ੍ਰੈੱਸ ਅੱਗੇ ਇੰਨਾ ਵੱਡਾ ਝੂਠ ਬੋਲਿਆ। ਜੈਜੀਤ ਨੇ ਅੱਗੇ ਬੋਲਦਿਆਂ ਆਖਿਆ ਕਿ ਇਸ ਤੋਂ ਬਾਅਦ ਹਰਸਿਮਰਤ ਨੇ ਇਹ ਵੀ ਝੂਠ ਬੋਲਿਆ ਕਿ ਉਥੇ ਬਠਿੰਡਾ ਜ਼ਿਲ੍ਹੇ ਦਾ ਕੋਈ ਅਫ਼ਸਰ ਮੌਜੂਦ ਨਹੀਂ ਸੀ ਜਦਕਿ ਏਡੀਸੀ ਅਤੇ ਐਸਡੀਐਮ ਹਰਸਿਮਰਤ ਬਾਦਲ ਨੂੰ ਸਟੇਜ 'ਤੇ ਮਿਲ ਕੇ ਆਏ ਸਨ। ਉਨ੍ਹਾਂ ਕਿਹਾ ਕਿ ਇੰਝ ਲਗਦਾ ਹੈ ਕਿ ਹੁਣ ਹਰਸਿਮਰਤ ਬਾਦਲ ਨੇ ਵੀ ਅਪਣੇ ਪਤੀ ਸੁਖਬੀਰ ਬਾਦਲ ਦਾ 'ਝੂਠ ਬੋਲਣ ਵਾਲਾ' ਗੁਣ ਧਾਰਨ ਕਰ ਲਿਆ ਹੈ।
Jaijeet Singh Johal
ਦਸ ਦਈਏ ਕਿ ਹਰਸਿਮਰਤ ਕੌਰ ਬਾਦਲ ਨੇ ਏਮਸ ਦਾ ਨੀਂਹ ਪੱਥਰ ਰੱਖਣ ਤੋਂ ਬਾਅਦ ਬੋਲਦਿਆਂ ਆਖਿਆ ਸੀ ਕਿ ਕੈਪਟਨ ਸਰਕਾਰ ਖ਼ਾਸ ਕਰਕੇ ਮਨਪ੍ਰੀਤ ਸਿੰਘ ਬਾਦਲ ਜਾਣਬੁੱਝ ਕੇ ਏਮਜ਼ ਦੇ ਰਾਹ ਵਿਚ ਰੋੜੇ ਅਟਕਾ ਰਹੇ ਹਨ। ਉਨ੍ਹਾਂ ਕਿਹਾ ਸੀ ਕਿ ਸਰਕਾਰ ਤੋਂ ਲੜ ਝਗੜ ਕੇ ਹਸਪਤਾਲ ਦੀ ਉਸਾਰੀ ਲਈ ਕਈ ਕਲੀਅਰੈਂਸ ਲਈਆਂ ਗਈਆਂ ਹਨ ਪਰ ਹਾਲੇ ਵੀ ਇਨਵਾਇਰਮੈਂਟ ਕਲੀਅਰੈਂਸ ਬਾਕੀ ਹੈ। ਹਰਸਿਮਰਤ ਨੇ ਇਹ ਵੀ ਕਿਹਾ ਸੀ ਕਿ ਹੁਣ ਉਸ ਦੇ ਸਬਰ ਦਾ ਪਿਆਲਾ ਭਰ ਗਿਆ ਹੈ, ਉਹ ਹੁਣ ਹੋਰ ਇੰਤਜ਼ਾਰ ਨਹੀਂ ਕਰ ਸਕਦੀ। ਅਸੀਂ ਏਮਜ਼ ਦਾ ਕੰਮ ਸ਼ੁਰੂ ਕਰਵਾ ਦਿਤਾ ਹੈ, ਜੇਕਰ ਪੰਜਾਬ ਸਰਕਾਰ ਇਸ ਵਿਚ ਕੋਈ ਟੰਗ ਅੜਾਏਗੀ ਤਾਂ ਫਿਰ ਅਸੀਂ ਦੇਖਾਂਗੇ।
Harsimrat Kaur Badal
ਦਸ ਦਈਏ ਕਿ ਬਾਦਲ ਪਰਵਾਰ ਵਿਚ ਪਿਛਲੇ ਕਾਫ਼ੀ ਸਮੇਂ ਤੋਂ ਚੱਲ ਰਹੀ ਸ਼ਰੀਕੇਬਾਜ਼ੀ ਕਈ ਵਾਰ ਮੀਡੀਆ ਵਿਚ ਆ ਚੁੱਕੀ ਹੈ। ਏਮਜ਼ ਨੂੰ ਲੈ ਕੇ ਦੋਵੇਂ ਦਿਓਰ-ਭਰਜਾਈ (ਮਨਪ੍ਰੀਤ ਬਾਦਲ ਅਤੇ ਹਰਸਿਮਰਤ ਬਾਦਲ) ਵਿਚਕਾਰ ਪਿਛਲੇ ਕਾਫ਼ੀ ਸਮੇਂ ਤੋਂ ਜ਼ੁਬਾਨੀ ਜੰਗ ਚਲਦੀ ਆ ਰਹੀ ਹੈ ਜੋ ਏਮਜ਼ ਦੇ ਨਿਰਮਾਣ ਵਿਚ ਇਕ ਦੂਜੇ ਨੂੰ ਦੋਸ਼ੀ ਠਹਿਰਾਉਂਦੇ ਆ ਰਹੇ ਹਨ। ਇਸੇ ਦੇ ਚਲਦਿਆਂ ਹਰਸਿਮਰਤ ਨੇ ਮਨਪ੍ਰੀਤ ਬਾਦਲ 'ਤੇ ਪ੍ਰੋਜੈਕਟ ਵਿਚ ਜਾਣਬੁੱਝ ਦੇਰੀ ਕਰਨ ਦਾ ਦੋਸ਼ ਲਗਾਏ ਸਨ, ਜਿਸ ਦਾ ਜਵਾਬ ਜੈਜੀਤ ਜੌਹਲ ਵਲੋਂ ਦਿਤਾ ਗਿਆ ਹੈ।
