53.62% ਵੋਟਾਂ ਨਾਲ ਹਾਸਲ ਕੀਤੀ ਜਿੱਤ
ਕੈਲੀਫੋਰਨੀਆ: ਪੰਜਾਬ ਦੇ ਬਰਨਾਲਾ ਜ਼ਿਲ੍ਹੇ ਨਾਲ ਸਬੰਧਤ ਮਨਪ੍ਰੀਤ ਕੌਰ ਨੇ ਸਿਟੀ ਕੌਂਸਲ ਚੋਣਾਂ ਵਿਚ ਸਿਟੀ ਆਫ ਬੇਕਰਸਫੀਲਡ ਦੇ ਵਾਰਡ ਨੰਬਰ 7 ਤੋਂ ਚੋਣ ਜਿੱਤੀ ਹੈ। ਮਨਪ੍ਰੀਤ ਕੌਰ ਨੇ 53.62% ਵੋਟਾਂ ਨਾਲ ਸ਼ਾਨਦਾਰ ਜਿੱਤ ਹਾਸਲ ਕੀਤੀ। ਮਨਪ੍ਰੀਤ ਕੌਰ ਦਾ ਜਨਮ ਅਤੇ ਪਾਲਣ ਪੋਸ਼ਣ ਬੇਕਰਸਫੀਲਡ ਵਿਚ ਹੀ ਹੋਇਆ।
ਉਹਨਾਂ ਨੇ ਰਿਜਵਿਊ ਹਾਈ ਸਕੂਲ ਤੋਂ ਗ੍ਰੈਜੂਏਸ਼ਨ ਕੀਤੀ, ਇਸ ਤੋਂ ਬਾਅਦ ਉਹਨਾਂ ਨੇ ਯੂਸੀ ਸੈਨ ਡਿਏਗੋ ਤੋਂ ਰਾਜਨੀਤੀ ਵਿਗਿਆਨ ਵਿਚ ਬੈਚਲਰ ਡਿਗਰੀ ਅਤੇ ਲਾਅ ਐਂਡ ਸੁਸਾਇਟੀ ਦੀ ਡਿਗਰੀ ਪ੍ਰਾਪਤ ਕੀਤੀ। ਪਿਛਲੇ ਸਾਲ ਮਨਪ੍ਰੀਤ ਕੌਰ ਨੇ ਵਿਸਕਾਨਸਿਨ ਯੂਨੀਵਰਸਿਟੀ ਤੋਂ ਦੋ ਮਾਸਟਰ ਡਿਗਰੀਆਂ ਹਾਸਲ ਕੀਤੀਆਂ।
ਮੌਜੂਦਾ ਸਮੇਂ ਵਿਚ ਮਨਪ੍ਰੀਤ ਕੌਰ ਪੰਜਾਬੀ ਭਾਈਚਾਰੇ ਵਿਚ ਨੌਜਵਾਨਾਂ ਦੇ ਵਿਕਾਸ, ਨਸ਼ੀਲੇ ਪਦਾਰਥਾਂ ਦੀ ਦੁਰਵਰਤੋਂ ਦੀ ਰੋਕਥਾਮ, ਰਿਹਾਇਸ਼ ਤੱਕ ਪਹੁੰਚ ਅਤੇ ਸਿਹਤ ਦੇਖਭਾਲ 'ਤੇ ਕੇਂਦਰਿਤ ਗੈਰ-ਲਾਭਕਾਰੀ ਸੰਸਥਾ ਜੈਕਾਰਾ ਮੂਵਮੈਂਟ ਲਈ ਵਿਕਾਸ ਦੇ ਨਿਰਦੇਸ਼ਕ ਹਨ। ਮਨਪ੍ਰੀਤ ਕੌਰ ਦੇ ਚੋਣ ਜਿੱਤਣ ਦੀ ਖ਼ਬਰ ਤੋਂ ਬਾਅਦ ਪੰਜਾਬੀ ਭਾਈਚਾਰੇ ਵਿਚ ਖੁਸ਼ੀ ਦੀ ਲਹਿਰ ਦੇਖਣ ਨੂੰ ਮਿਲ ਰਹੀ ਹੈ।