ਸਿੰਗਾਪੁਰ ਦੀ ਰਾਸ਼ਟਰਪਤੀ ਹਲੀਮਾ ਯਾਕੂਬ ਨੇ ਬਹੁ ਸਭਿਆਚਾਰਕ ਅਤੇ ਬਹੁਨਸਲੀ ਦੇਸ਼ ਵਿਚ ਅੰਤਰ ਨਸਲੀ ਅਤੇ ਅੰਤਰ ਧਾਰਮਿਕ...
ਆਈਸਲੈਂਡ : ਸਿੰਗਾਪੁਰ ਦੀ ਰਾਸ਼ਟਰਪਤੀ ਹਲੀਮਾ ਯਾਕੂਬ ਨੇ ਬਹੁ ਸਭਿਆਚਾਰਕ ਅਤੇ ਬਹੁਨਸਲੀ ਦੇਸ਼ ਵਿਚ ਅੰਤਰ ਨਸਲੀ ਅਤੇ ਅੰਤਰ ਧਾਰਮਿਕ ਪਿਆਰ ਵਿਚ ਸਰਗਰਮੀ ਦਿਖਾਉਣ ਲਈ ਸਿੱਖ ਸਮਾਜ ਦੀ ਤਾਰੀਫ਼ ਕੀਤੀ ਹੈ। ਰਾਸ਼ਟਰਪਤੀ ਨੇ ਗੁਰੂ ਸਿੰਘ ਸਭਾ ਦੇ ਸੌ ਸਾਲ ਪੂਰੇ ਹੋਣ 'ਤੇ ਜਸ਼ਨ ਮਨਾ ਰਹੇ ਸਿੱਖ ਸਮਾਜ ਨੂੰ ਇਕ ਪੁਸਤਕ ਰਿਲੀਜ਼ ਕਰਨ ਮੌਕੇ ਇਕ ਸੰਦੇਸ਼ ਵਿਚ ਕਿਹਾ ਕਿ ਸਭ ਤੋਂ ਪੁਰਾਣੇ ਗੁਰਦੁਆਰਿਆਂ ਵਿਚ ਇਕ ਇਸ ਗੁਰਦੁਆਰਾ ਸਾਹਿਬ ਨੇ ਇਕ ਦੂਜੇ ਦੀ ਚਿੰਤਾ ਕਰਨ ਅਤੇ ਬਰਾਬਰਤਾ ਦੇ ਸਮਾਜ ਨਿਰਮਾਣ ਦੇ ਯਤਨਾ ਵਿਚ ਬਹੁਤ ਵੱਡਾ ਯੋਗਦਾਨ ਦਿਤਾ ਹੈ।
ਉਨ੍ਹਾਂ ਨੇ 'ਦਾਸਤਾਨ ਸ੍ਰੀ ਗੁਰੂ ਗੋਬਿੰਦ ਸਿੰਘ ਸਭਾ ਸਿੰਗਾਪੁਰ ਜਰਨੀ' ਵਿਚ ਲਿਖਿਆ ਕਿ ਸਿੰਗਾਪੁਰ ਨੂੰ ਬਹੁ ਸੱਭਿਆਚਾਰਕ ਅਤੇ ਬਹੁ ਨਸਲੀ ਸਮਾਜ 'ਤੇ ਮਾਣ ਹੈ। ਸਾਲਾਂ ਦੌਰਾਨ ਵੱਖ-ਵੱਖ ਸਮਾਜਾਂ ਨੇ ਸਿੰਗਾਪੁਰ ਦੇ ਸਮਾਜਿਕ ਤਾਣੇ ਬਾਣੇ ਨੂੰ ਮਜ਼ਬੂਤ ਕਰਨ ਵਿਚ ਅਪਣੀ ਭੂਮਿਕਾ ਨਿਭਾਈ ਹੈ। ਉਨ੍ਹਾਂ ਨੇ ਸਿੰਗਾਪੁਰ ਦੇ ਸਿੱਖਾਂ ਦੀਆਂ ਸਮਾਜਿਕ ਸੇਵਾਵਾਂ ਦਾ ਜ਼ਿਕਰ ਕਰਦੇ ਹੋਹੇ ਕਿਹਾ ਕਿ ਸਿੱਖ ਸਮਾਜ ਅਪਣੇ ਸਮਾਜ ਦੀਆਂ ਲੋੜਾਂ ਪੂਰੀਆਂ ਕਰਨ ਅਤੇ ਵਿਆਪਕ ਸਮਾਜ ਨਾਲ ਜੁੜੇ ਰਹਿਣ ਵਿਚ ਵੀ ਸਰਗਰਮ ਰਿਹਾ ਹੈ। ਸਿੰਗਾਪੁਰ ਵਿਚ 13 ਹਜ਼ਾਰ ਤੋਂ ਜ਼ਿਆਦਾ ਸਿੱਖ ਹਨ।
ਦਸ ਦਈਏ ਕਿ ਇਸ ਤੋਂ ਪਹਿਲਾਂ ਸਿੰਗਾਪੁਰ ਦੇ ਪ੍ਰਧਾਨ ਮੰਤਰੀ ਲੀ ਸੀਨ ਲੂੰਗ ਨੇ ਦੇਸ਼ ਦੇ ਸਿੱਖ ਸਮਾਜ ਦੀ ਸ਼ਲਾਘਾ ਕਰਦੇ ਹੋਏ ਕਿਹਾ ਸੀ ਕਿ ਸਰਕਾਰ ਕਈ ਤਰੀਕਿਆਂ ਨਾਲ ਉਨ੍ਹਾਂ ਦੀ ਸਹਾਇਤਾ ਕਰਦੀ ਰਹੇਗੀ। ਦਸ ਦਈਏ ਕਿ ਸਿੰਗਾਪੁਰ ਸਰਕਾਰ ਪਹਿਲਾਂ ਹੀ ਸਿੰਗਾਪੁਰ ਦੇ ਪਬਲਿਕ ਸਕੂਲਾਂ ਵਿਚ ਪੰਜਾਬੀ ਨੂੰ ਦੂਜੀ ਭਾਸ਼ਾ ਦੇ ਤੌਰ 'ਤੇ ਮਾਨਤਾ ਦੇ ਚੁੱਕੀ ਹੈ ਅਤੇ ਪੰਜਾਬੀ ਦੇ ਸਿੱਖਿਆ ਦੀ ਸਹੂਲਤ ਲਈ ਸਿੱਖਿਆ ਮੰਤਰਾਲਾ ਜ਼ਰੀਏ ਸਿੰਗਾਪੁਰ ਸਿੱਖ ਫਾਊਂਡੇਸ਼ਨ ਦੀ ਸਥਾਪਨਾ ਵਿਚ ਮਦਦ ਕੀਤੀ ਸੀ।
ਸਰਕਾਰ ਨੇ ਸਮਾਜ ਦੀਆਂ ਲੋੜਾਂ 'ਤੇ ਧਿਆਨ ਦੇਣ ਲਈ ਸੈਂਟਰਲ ਸਿੱਖ ਗੁਰਦੁਆਰਾ ਬੋਰਡ ਦੀ ਸਥਾਪਨਾ ਦੀ ਪ੍ਰਕਿਰਿਆ ਸ਼ੁਰੂ ਕੀਤੀ ਹੇ ਅਤੇ ਧਨ ਰਾਸ਼ੀ ਇਕੱਠੀ ਕਰਨ ਵਿਚ ਮਦਦ ਲਈ ਸਿੱਖ ਵੈਲਫ਼ੇਅਰ ਕੌਂਸਲ ਨੂੰ ਜਨਤਕ ਚਰਿੱਤਰ ਦੀ ਸੰਸਥਾ ਦਾ ਦਰਜਾ ਦਿਤਾ ਸੀ। ਲੀ ਨੇ ਕਿਹਾ ਸੀ ਕਿ ਮੈਨੂੰ ਇਹ ਦੇਖ ਦੇ ਬਹੁਤ ਖ਼ੁਸ਼ੀ ਹੋ ਰਹੀ ਹੈ ਕਿ ਇਨ੍ਹਾਂ ਗਤੀਵਿਧੀਆਂ ਦੀ ਮੰਗ ਵੀ ਵਧ ਰਹੀ ਹੈ, ਮੈਨੂੰ ਪਤਾ ਹੈ ਕਿ ਤੁਹਾਡੇ ਕੋਲ ਜਗ੍ਹਾ ਦੀ ਕਮੀ ਦੀ ਸਮੱਸਿਆ ਹੈ।
ਸਮਾਜ ਦੇ ਪ੍ਰਤੀ ਸਾਡੇ ਲਗਾਤਾਰ ਸਮਰਥਨ ਨੂੰ ਬਰਕਰਾਰ ਰੱਖਦੇ ਹੋਏ ਅਸੀਂ ਇਹ ਦੇਖਣ ਲਈ ਸਿੱਖ ਸਮਾਜ ਦੀਆਂ ਵਧਦੀਆਂ ਲੋੜਾਂ 'ਤੇ ਸਕਰਾਤਮਕ ਰੂਪ ਨਾਲ ਧਿਆਨ ਦੇਵਾਂਗੇ ਕਿ ਅਸੀਂ ਕਿਵੇਂ ਮਦਦ ਦੇ ਸਕਦੇ ਹਾਂ। ਲੀ ਨੇ ਕਿਹਾ ਸੀ ਕਿ ਸਭ ਤੋਂ ਪਹਿਲਾਂ ਸਿੱਖ ਦੇਸ਼ ਵਿਚ 1881 ਵਿਚ ਆਏ ਸਨ ਅਤੇ ਪੁਲਿਸ ਬਲ ਦੀ ਰੀੜ੍ਹ ਦੀ ਹੱਡੀ ਬਣ ਗਏ। ਉਨ੍ਹਾਂ ਨੇ ਗੁਰਦੁਆਰਿਆਂ ਵਿਚ ਭੋਜਨ ਪਰੋਸਣ ਅਤੇ ਲੋਕਾਂ ਨੂੰ ਸਹਾਰਾ ਦੇਣ ਦੀ ਸਿੱਖ ਪਰੰਪਰਾ ਨੂੰ ਕੇਂਦਰਤ ਕਰਦੇ ਹੋਏ ਸਿੱਖਾਂ ਦੀ ਜਮ ਕੇ ਤਾਰੀਫ਼ ਕੀਤੀ ਸੀ।