ਉਨ੍ਹਾਂ ਦੀ ਚੋਣ ਮਕੈ (ਆਸਟਰੇਲੀਆ) ਵਿਖੇ 31 ਅਗੱਸਤ ਤੋਂ ਸ਼ੁਰੂ ਹੋ ਰਹੀ 'ਓਸ਼ੀਆਨਾ ਮਾਸਟਰਜ਼ ਐਥਲੈਟਿਕਸ ਚੈਂਪੀਅਨਸ਼ਿਪ 2019' ਲਈ ਹੋਈ ਹੈ
ਔਕਲੈਂਡ (ਹਰਜਿੰਦਰ ਸਿੰਘ ਬਸਿਆਲਾ) : ਭਾਰਤ ਦੀਆਂ ਖਾਦੀਆਂ ਖੁਰਾਕਾਂ ਨਿਊਜ਼ੀਲੈਂਡ ਵਰਗੇ ਮੁਲਕਾਂ 'ਚ ਮਿਲਦੇ ਮੌਕੇ ਜਦੋਂ ਉਮਰਾਂ ਨੂੰ ਪਰ੍ਹਾਂ ਕਰ ਕੇ ਅੰਗੜਾਈ ਲੈ ਲੈਣ ਤਾਂ ਸਾਡੇ ਬਾਬੇ 82 ਸਾਲ ਦੀ ਉਮਰੀ ਅੱਖਰਾਂ ਨੂੰ ਘੁੰਮਾ ਕੇ 28 ਸਾਲਾਂ ਦੇ ਕਰ ਵਿਖਾਉਂਦੇ ਨੇ। ਗੱਲ ਹੈ ਬਸ ਜਜ਼ਬਾ ਰੱਖਣ ਦੀ ਫਿਰ ਉਮਰਾਂ 'ਚ ਕੀ ਰੱਖਿਆ। ਗੱਲ ਕਰਾਂਗੇ 82 ਸਾਲ ਦੇ ਸ. ਜਗਜੀਤ ਸਿੰਘ ਕਥੂਰੀਆ ਦੀ।
ਬਾਪੂ ਜੀ ਨੇ ਜਿੱਥੇ 30ਵੀਆਂ ਨਿਊਜ਼ੀਲੈਂਡ ਮਾਸਟਰ ਗੇਮਾਂ 'ਚ ਸੋਨੇ ਅਤੇ ਚਾਂਦੀ ਦਾ ਤਮਗ਼ਾ ਜਿੱਤ ਕੇ ਨਿਊਜ਼ੀਲੈਂਡ ਵਸਦੇ ਭਾਰਤੀਆਂ ਦਾ ਮਾਣ ਵਧਾਇਆ ਸੀ ਉਥੇ ਬਾਪੂ ਜੀ ਨੇ ਅਪਣੀ ਮਿਹਨਤ ਅਤੇ ਸ਼ੌਕ ਨੂੰ ਬਰਕਰਾਰ ਰੱਖਦਿਆਂ ਹੁਣ ਅਪਣੀ ਉਡਾਰੀ ਅੰਤਰਰਾਸ਼ਟਰੀ ਪੱਧਰ ਦੀ ਕਰ ਲਈ ਹੈ। ਉਨ੍ਹਾਂ ਦੀ ਚੋਣ ਮਕੈ (ਆਸਟਰੇਲੀਆ) ਵਿਖੇ 31 ਅਗੱਸਤ ਤੋਂ ਸ਼ੁਰੂ ਹੋ ਰਹੀ 'ਓਸ਼ੀਆਨਾ ਮਾਸਟਰਜ਼ ਐਥਲੈਟਿਕਸ ਚੈਂਪੀਅਨਸ਼ਿਪ 2019' ਲਈ ਹੋਈ ਹੈ। ਉਹ 30 ਅਗੱਸਤ ਨੂੰ ਇਸ 'ਚ ਭਾਗ ਲੈਣ ਜਾ ਰਹੇ ਹਨ। ਉਹ ਟ੍ਰਿਪਲ ਜੰਪ ਅਤੇ ਤਿੰਨ ਕਿਲੋਮੀਟਰ ਦੇ ਪੈਦਲ ਕਦਮੀ ਮੁਕਾਬਲੇ 'ਚ ਭਾਗ ਲੈਣਗੇ।
ਉਹ ਅਪਣਾ ਸਾਰਾ ਖ਼ਰਚਾ ਖ਼ੁਦ ਹੀ ਕਰ ਰਹੇ ਹਨ ਅਤੇ ਹੋਟਲ ਆਦਿ ਦਾ ਵੀ ਖ਼ੁਦ ਹੀ ਪ੍ਰਬੰਧ ਕਰ ਰਹੇ ਹਨ। ਮੇਰੇ ਪੁੱਛਣ 'ਤੇ ਕਿ ਇਥੇ ਬਹੁਤ ਸਾਰੇ ਖੇਡ ਕਲੱਬ ਹਨ ਜੋ ਖਿਡਾਰੀਆਂ ਦੀ ਮਦਦ ਕਰਦੇ ਹਨ, ਉਹ ਤੁਹਾਡੀ ਮਦਦ ਵਾਸਤੇ ਆ ਸਕਦੇ ਹਨ ਤਾਂ ਉਨ੍ਹਾਂ ਕਿਹਾ,''ਮੈਂ ਕਦੀ ਕਿਸੇ ਨੂੰ ਕਿਹਾ ਨਹੀਂ। ਪੈਨਸ਼ਨ 'ਚੋਂ ਅਪਣਾ ਖ਼ਰਚਾ ਕਰਾਂਗਾ
ਜੇਕਰ ਕਿਸੀ ਖੇਡ ਕਲੱਬ ਨੂੰ ਮੈਨੂੰ ਸਪਾਂਸਰ ਕਰ ਕੇ ਖ਼ੁਸ਼ੀ ਮਿਲਦੀ ਹੋਵੇ ਤਾਂ ਉਹ ਮੇਰੇ ਲਈ ਹੌਂਸਲਾ ਅਫ਼ਜ਼ਾਈ ਅਤੇ ਸ਼ਾਬਾਸ਼ੀ ਹੋਵੇਗੀ।'' ਉਨ੍ਹਾਂ ਦਾ ਖੇਡ ਜਜ਼ਬਾ ਤੇ ਸਿੱਖੀ ਸਰੂਪ ਸਾਰੇ ਭਾਈਚਾਰੇ ਲਈ ਮਾਣ ਵਾਲੀ ਗੱਲ ਹੈ ਜੋ ਕਿ ਨਿਊਜ਼ੀਲੈਂਡ ਤੋਂ ਆਸਟ੍ਰੇਲੀਆ ਜਾ ਕੇ ਸਾਡਾ ਮਾਣ ਵਧਾਉਣਗੇ। ਉਨ੍ਹਾਂ ਦੀ ਟਰੈਵਲ ਇੰਸ਼ੋਰੈਂਸ 'ਪੰਜਾਬੀ ਹੈਰਲਡ' ਵਲੋਂ ਸਪਾਂਸਰ ਕੀਤੀ ਜਾਵੇਗੀ।