ਭਾਰਤ ਇਕ ਹੋਰ ਜਿੱਤ ਨਾਲ ਸੈਮੀਫ਼ਾਈਨਲ ਵਿਚ ਅਪਣੀ ਥਾਂ ਪੱਕੀ ਕਰਨਾ ਚਾਹੇਗਾ
ਮੈਨਚੇਸਟਰ : ਭਾਰਤ ਵਿਸ਼ਵ ਕੱਪ 2019 ਦੇ ਅਪਣੇ ਛੇਵੇਂ ਲੀਗ ਮੈਚ ਵਿਚ 27 ਜੂਨ ਨੂੰ ਇਥੇ ਜਦੋਂ ਸੈਮੀਫ਼ਾਈਨਲ ਦੀ ਦੌੜ ਤੋਂ ਲਗਭਗ ਬਾਹਰ ਹੋ ਚੁੱਕੀ ਵੈਸਟਇੰਡੀਜ਼ ਦੀ ਖ਼ਤਰਨਾਕ ਟੀਮ ਨਾਲ ਭਿੜੇਗਾ ਤਾਂ ਟੀਮ ਪ੍ਰਬੰਧਨ ਦੀ ਮੁੱਖ ਚਿੰਤਾ ਮਹਿੰਦਰ ਸਿੰਘ ਧੋਨੀ ਦੀ ਬੱਲਬਾਜ਼ੀ ਅਤੇ ਉਨ੍ਹਾਂ ਦਾ ਬੱਲੇਬਾਜ਼ੀ ਕ੍ਰਮ ਹੋਵੇਗੀ। ਲੀਗ ਗੇੜ ਅਪਣੇ ਅੰਤ ਵੱਲ ਵੱਧ ਰਿਹਾ ਹੈ ਅਤੇ ਅਜਿਹੇ ਵਿਚ ਭਾਰਤ ਇਕ ਹੋਰ ਜਿੱਤ ਨਾਲ ਸੈਮੀਫ਼ਾਈਨਲ ਵਿਚ ਅਪਣੀ ਥਾਂ ਪੱਕੀ ਕਰਨਾ ਚਾਹੇਗਾ। ਪਰ ਇਹ ਕਹਿਣਾ ਆਸਾਨ ਹੈ ਅਤੇ ਕਰਨਾ ਓਨਾ ਆਸਾਨ ਨਹੀਂ ਹੋਵੇਗਾ। ਵੈਸਟਇੰਡੀਜ਼ ਦੀ ਟੀਮ ਕੋਲ ਗਵਾਉਣ ਲਈ ਕੁਝ ਨਹੀਂ ਹੈ ਅਤੇ ਉਹ ਬਾਕੀ ਮੈਚਾਂ ਵਿਚ ਹੋਰ ਟੀਮਾਂ ਦਾ ਗਣਿਤ ਵਿਗਾੜਨ ਦੀ ਕੋਸ਼ਿਸ਼ ਕਰੇਗੀ।
ਦੂਜੇ ਪਾਵਰ ਪਲੇਅ ਦੇ ਮਹੱਤਵਪੂਰਨ ਓਵਰਾਂ ਵਿਚ ਸਾਬਕਾ ਕਪਤਾਨ ਧੋਨੀ ਦੀ ਅਸਫ਼ਲਤਾ ਨੇ ਕਪਤਾਨ ਵਿਰਾਟ ਕੋਹਲੀ ਦੀ ਚਿੰਤਾ ਥੋੜ੍ਹੀ ਵਧਾ ਦਿਤੀ ਹੈ। ਧੋਨੀ ਨੇ ਅਫ਼ਗਾਨਿਸਤਾਨ ਵਿਰੁਧ ਬੇਹੱਦ ਹੌਲੀ ਬੱਲੇਬਾਜ਼ੀ ਕਰਦੇ ਹੋਏ 52 ਗੇਂਦਾਂ ਵਿਚ 28 ਦੌੜਾਂ ਬਣਾਈਆਂ ਅਤੇ ਇਸ ਲਈ ਉਨ੍ਹਾਂ ਨੂੰ ਕਾਫੀ ਆਲੋਚਨਾ ਦਾ ਸਾਹਮਣਾ ਕਰਨਾ ਪਿਆ। ਇਥੋਂ ਤਕ ਕਿ ਆਮ ਤੌਰ 'ਤੇ ਸ਼ਾਂਤ ਰਹਿਣ ਵਾਲ ਸਚਿਨ ਤੇਂਦੁਲਕਰ ਨੇ ਵੀ ਉਨ੍ਹਾਂ ਦੇ ਰਵਈਏ 'ਤੇ ਸਵਾਲ ਚੁੱਕੇ ਸਨ।
ਟੀਮ ਪ੍ਰਬੰਧਨ ਵੀ ਇਸ ਸਮੱਸਿਆ ਤੋਂ ਵਾਕਫ਼ ਹੈ ਪਰ ਹੁਣ ਜਦੋਂ ਚਾਰ ਲੀਗ ਮੈਚ ਬਚੇ ਹਨ ਉਦੋਂ ਉਨ੍ਹਾਂ ਕੋਲ ਇਕ ਮਾਤਰ ਬਦਲ ਧੋਨੀ ਦੀ ਬੱਲੇਬਾਜ਼ੀ ਕ੍ਰਮ ਵਿਚ ਬਦਲਾਅ ਕਰਨਾ ਹੈ। ਇਸ ਨਾਲ ਕੇਦਾਰ ਜਾਧਵ ਨੂੰ ਜ਼ਿਆਦਾ ਗੇਂਦਾਂ ਖੇਡਣ ਨੂੰ ਮਿਲ ਸਕਦੀਆਂ ਹਨ ਜੋ ਅਪਣੇ ਸ਼ਾਟ ਚੋਣ ਵਿਚ ਨਵਾਂਪਣ ਲਿਆਉਣ ਲਈ ਜਾਣੇ ਜਾਂਦੇ ਹਨ।
ਹਾਰਦਿਕ ਪੰਡੀਆ ਦਾ ਇਸਤੇਮਾਲ ਹੁਣ ਤਕ ਫ਼ਲੋਟਰ ਰੂਪ ਵਿਚ ਹੋਇਆ ਹੈ ਪਰ ਅਫ਼ਗਾਨਿਸਤਾਨ ਵਿਰੁਧ ਮੈਚ ਨੇ ਦਿਖੀਇਆ ਕਿ ਜੇਕਰ ਉਨ੍ਹਾਂ ਨੂੰ ਦੂਜੇ ਪਾਸੇਉ ਸਹਿਯੋਗ ਨਹੀਂ ਮਿਲਦਾ ਤਾਂ ਫਿਰ ਉਨ੍ਹਾਂ 'ਤੇ ਕਾਫੀ ਦਬਾਅ ਆ ਜਾਂਦਾ ਹੈ। ਕੋਹਲੀ ਅਤੇ ਕੋਚ ਰਵੀ ਸ਼ਾਸਤਰੀ ਹੁਣ ਤਕ ਰਿਸ਼ਭ ਪੰਤ ਦਾ ਇਸਤੇਮਾਲ ਕਰਨ ਲਈ ਕਾਫੀ ਕਾਹਲ 'ਚ ਨਜ਼ਰ ਨਹੀਂ ਆ ਰਹੇ। ਟੀਮ ਪ੍ਰਬੰਧਨ ਜੇਕਰ ਵਿਜੇ ਸ਼ੰਕਰ ਨੂੰ ਬਾਹਰ ਕਰਨ ਦਾ ਫ਼ੈਸਲਾ ਕਰਦਾ ਹੈ ਤਾਂ ਹੀ ਪੰਤ ਨੂੰ ਟੀਮ ਵਿਚ ਥਾਂ ਮਿਲ ਸਕਦੀ ਹੈ।
ਵੈਸਟਇੰਡੀਜ਼ ਦੀ ਟੀਮ 'ਚ ਕਾਫੀ ਤੇਜ਼ ਗੇਂਦਬਾਜ਼ ਹਨ ਅਤੇ ਅਜਿਹੇ ਵਿਚ ਧੋਨੀ ਨੂੰ ਖੇਡਣ ਵਿਚ ਆਸਾਨੀ ਹੋ ਸਕਦੀ ਹੈ ਕਿਉਂਕਿ ਉਹ ਹੌਲੀ ਗੇਂਦਬਾਜ਼ੀ ਵਿਰੁਧ ਸਹਿਜ ਹੋ ਕੇ ਨਹੀਂ ਖੇਡ ਰਹੇ। ਪਿਛਲੇ ਮੈਚ 'ਚ ਅਫ਼ਗਾਨਿਸਤਾਨ ਦੇ ਹੌਲੀ ਗੇਂਦਬਾਜ਼ਾਂ ਨੇ ਇਸ ਦਾ ਕਾਫੀ ਫ਼ਾਇਦਾ ਚੁਕਿਆ ਸੀ। ਵੈਸਟਇੰਡੀਜ਼ ਦੇ ਆਂਦਰੇ ਰਸੇਲ ਪੈਰ ਦੀਆਂ ਮਾਸਪੇਸ਼ੀਆਂ ਵਿਚ ਖਿਚਾਅ ਕਾਰਨ ਬਾਹਰ ਹੋ ਗਏ ਹਨ ਅਤੇ ਇਸ ਨਾਲ ਟੀਮ ਨੂੰ ਵੱਡਾ ਝਟਕਾ ਲੱਗਾ ਹੈ।
'ਯੂਨੀਵਰਸਲ ਬਾਸ' ਕਰਿਸ ਗੇਲ ਨੂੰ ਹੁਣ ਵੀ ਵੱਡੀ ਪਾਰੀ ਦਾ ਇੰਤਜ਼ਾਰ ਹੈ ਅਤੇ ਕੋਹਲੀ ਉਮੀਦ ਕਰ ਰਹੇ ਹੋਣਗੇ ਕਿ ਅੱਜ ਹੋਣ ਵਾਲੇ ਮੈਚ ਵਿਚ ਅਜਿਹਾ ਨਾ ਹੋਵੇ। ਗੇਲ ਵਿਰੁਧ ਜਸਪ੍ਰੀਤ ਬੁਮਰਾਹ ਦਾ ਸ਼ੁਰੂਆਤੀ ਸਪੈਲ ਮੈਚ ਦੀ ਰੂਪਰੇਖਾ ਤੈਅ ਕਰੇਗਾ ਜਦੋਂਕਿ ਵੈਸਟਇੰਡੀਜ਼ ਦੇ ਮੱਧ ਕ੍ਰਮ ਨੂੰ ਕੁਲਦੀਪ ਯਾਦਵ ਅਤਸੇ ਯੁਜਵਿੰਦਰ ਚਹਲ ਦੀ ਚੁਨੌਤੀ ਦਾ ਸਾਹਮਣਾ ਕਰਨਾ ਹੋਵੇਗਾ। ਕੁਲ ਮਿਲਾ ਕੇ ਭਾਰਤ ਦੀ ਰਾਹ ਆਸਾਨ ਨਹੀਂ ਹੋਵੇਗੀ ਪਰ ਇਸ ਦੇ ਬਾਵਜੂਦ ਹਾਲ ਦੇ ਪ੍ਰਦਾਸ਼ਨ ਨੂੰ ਦੇਖਦੇ ਹੋਏ ਟੀਮ ਜਿੱਤ ਦੀ ਪ੍ਰਬਲ ਦਾਵੇਦਾਰ ਹੈ।