ਸਲਾਮੀ ਬੱਲੇਬਾਜ਼ ਉਨਮੁਕਤ ਚੰਦ ਨੇ ਟੁੱਟੇ ਜਬਾੜੇ ਦੇ ਬਾਵਜੂਦ ਸੈਂਕੜਾ ਲਗਾ ਕੇ ਕ੍ਰਿਕਟ ਪ੍ਰੇਮੀਆਂ ਨੂੰ ਖ਼ੁਸ਼ ਕਰ ਦਿੱਤਾ। ਉਨ੍ਹਾਂ ਨੇ ਇਸ ਮੈਚ ਦੌਰਾਨ ਜ਼ਬਰਦਸਤ ਪਾਰੀ ਖੇਡੀ ਜਦੋਂ ਕਿ ਕੁਲਵੰਤ ਖੇਜਰੋਲਿਆ ਅਤੇ ਕਪਤਾਨ ਪ੍ਰਦੀਪ ਸਾਂਗਵਾਨ ਨੇ ਵੀ ਸ਼ਾਨਦਾਰ ਗੇਂਦਬਾਜ਼ੀ ਦਾ ਪ੍ਰਦਰਸ਼ਨ ਕੀਤਾ। ਇਸ ਦੇ ਨਾਲ ਦਿੱਲੀ ਨੇ ਵਿਜੇ ਹਜ਼ਾਰੇ ਟਰਾਫੀ ਵਨਡੇ ਕ੍ਰਿਕਟ ਟੂਰਨਾਮੈਂਟ ਦੇ ਪੂਲ ਬੀ ਮੈਚ ਵਿਚ ਉੱਤਰ ਪ੍ਰਦੇਸ਼ ਨੂੰ 55 ਦੌੜਾਂ ਨਾਲ ਹਰਾ ਦਿੱਤਾ। ਪੂਲ ਬੀ ਦੇ ਹੋਰ ਮੈਚਾਂ ਵਿਚ ਮਹਾਰਾਸ਼ਟਰ ਨੇ ਬੰਗਾਲ ਨੂੰ ਸੱਤ ਵਿਕਟ ਨਾਲ ਮਾਤ ਦਿੱਤੀ ਜਦੋਂ ਕਿ ਹਿਮਾਚਲ ਪ੍ਰਦੇਸ਼ ਨੇ ਤ੍ਰਿਪੁਰਾ ਨੂੰ ਛੇ ਵਿਕਟ ਨਾਲ ਹਰਾਇਆ।
ਦਿੱਲੀ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਉਨਮੁਕਤ (116) ਦੇ ਸੈਂਕੜੇ ਦੀ ਬਦੌਲਤ ਛੇ ਵਿਕਟਾਂ 'ਤੇ 307 ਦੌੜਾਂ ਦਾ ਪਹਾੜ ਜਿੱਡਾ ਸਕੋਰ ਖੜ੍ਹਾ ਕੀਤਾ। ਉਨਮੁਕਤ ਨੇ 125 ਗੇਂਦ ਦੀ ਆਪਣੀ ਪਾਰੀ ਵਿਚ 12 ਚੌਕੇ ਅਤੇ ਤਿੰਨ ਛੱਕੇ ਲਗਾਏ। ਉਨ੍ਹਾਂ ਨੇ ਸਾਥੀ ਸਲਾਮੀ ਬੱਲੇਬਾਜ਼ ਹਿਤੇਨ ਦਲਾਲ (55) ਦੇ ਨਾਲ ਪਹਿਲੇ ਵਿਕਟ ਲਈ 107 ਰਨ ਜੋੜਕੇ ਟੀਮ ਨੂੰ ਸ਼ਾਨਦਾਰ ਸ਼ੁਰੂਆਤ ਦਵਾਈ।
ਭਾਰਤ ਦੇ ਸਾਬਕਾ ਅੰਡਰ-19 ਵਿਸ਼ਵ ਕੱਪ ਜੇਤੂ ਕਪਤਾਨ ਉਨਮੁਕਤ ਮੈਚ ਦੀ ਸ਼ੁਰੂਆਤ ਤੋਂ ਪਹਿਲਾਂ ਹੀ ਨੈੱਟ 'ਤੇ ਜ਼ਖਮੀ ਹੋ ਗਏ ਸਨ। ਉੱਤਰ ਪ੍ਰਦੇਸ਼ ਤੋਂ ਕਾਰਤਕ ਤਿਆਗੀ ਨੇ 50 ਜਦੋਂ ਕਿ ਅੰਕਿਤ ਰਾਜਪੂਤ ਨੇ 61 ਰਨ ਦੇਕੇ ਦੋ - ਦੋ ਵਿਕਟ ਲਏ। ਇਸਦੇ ਜਵਾਬ ਵਿਚ ਉੱਤਰ ਪ੍ਰਦੇਸ਼ ਦੀ ਟੀਮ ਉਮੰਗ ਸ਼ਰਮਾ (102) ਦੇ ਸ਼ਤਕ ਅਤੇ ਕਪਤਾਨ ਅਕਸ਼ਦੀਪ ਨਾਥ (54) ਦੇ ਵਿਚ ਚੌਥੇ ਵਿਕਟ ਦੀ 101 ਰਨ ਦੀ ਸਾਂਝੇਦਾਰੀ ਦੇ ਬਾਵਜੂਦ 45.3 ਓਵਰ ਵਿਚ 252 ਰਨ ਉਤੇ ਢੇਰ ਹੋ ਗਈ। ਦਿੱਲੀ ਤੋਂ ਕੁਲਵੰਤ ਨੇ 34 ਰਨ ਦੇਕੇ ਚਾਰ ਜਦੋਂ ਕਿ ਸਾਂਗਵਾਨ ਨੇ 28 ਰਨ ਦੇਕੇ ਤਿੰਨ ਵਿਕਟ ਲਏ।
ਦੂਜੇ ਪਾਸੇ ਮਹਾਰਾਸ਼ਟਰ ਨੇ ਰਾਹੁਲ ਤ੍ਰਿਪਾਠੀ ਦੀ 102 ਗੇਂਦ ਵਿਚ 125 ਰਨ ਦੀ ਤੂਫਾਨੀ ਪਾਰੀ ਦੀ ਬਦੌਲਤ ਪਿਛਲੇ ਸਾਲ ਦੇ ਉਪ ਜੇਤੂ ਬੰਗਾਲ ਨੂੰ ਸੱਤ ਵਿਕਟ ਨਾਲ ਹਰਾਇਆ। ਬੰਗਾਲ ਨੇ ਪਹਿਲਾਂ ਬੱਲੇਬਾਜੀ ਕਰਦੇ ਹੋਏ ਸਲਾਮੀ ਬੱਲੇਬਾਜ਼ ਅਭਿਮਨਿਉ ਈਸ਼ਵਰਨ ਦੇ 103 ਅਤੇ ਕਪਤਾਨ ਮਨੋਜ ਤੀਵਾਰੀ ਦੇ ਨਾਬਾਦ 80 ਰਨ ਦੀ ਬਦੌਲਤ ਨੌਂ ਵਿਕਟ 'ਤੇ 293 ਰਨ ਬਣਾਏ। ਈਸ਼ਵਰਨ ਨੇ 114 ਗੇਂਦ ਦੀ ਆਪਣੀ ਪਾਰੀ ਵਿਚ 12 ਚੌਕੇ ਜੜੇ ਜਦਕਿ ਤੀਵਾਰੀ ਨੇ 76 ਗੇਂਦ ਦਾ ਸਾਹਮਣਾ ਕਰਦੇ ਹੋਏ ਚਾਰ ਚੌਕੇ ਅਤੇ ਦੋ ਛੱਕੇ ਮਾਰੇ।
ਮਹਾਰਾਸ਼ਟਰ ਨੇ ਹਾਲਾਂਕਿ ਤਿਵਾਰੀ ਅਤੇ ਨੌਸ਼ਾਦ ਸ਼ੇਖ (ਨਾਬਾਦ 39) ਦੇ ਵਿਚ ਚੌਥੇ ਵਿਕਟ ਦੀ 107 ਰਨ ਦੀ ਅਟੁੱਟ ਸਾਂਝੇਦਾਰੀ ਦੀ ਬਦੌਲਤ 45.5 ਓਵਰ ਵਿਚ ਤਿੰਨ ਵਿਕਟ ਉਤੇ 294 ਦੌੜਾਂ ਬਣਾ ਕੇ ਆਸਾਨ ਜਿੱਤ ਦਰਜ ਕੀਤੀ। ਤਿਵਾਰੀ ਨੇ ਆਪਣੀ ਪਾਰੀ ਵਿਚ 12 ਚੌਕੇ ਅਤੇ ਚਾਰ ਛੱਕੇ ਮਾਰੇ। ਇਸ ਤੋਂ ਪਹਿਲਾਂ ਰੁਤੁਰਾਜ ਗਾਇਕਵਾੜ (77) ਅਤੇ ਵਿਜੇ ਜੋਲ (24) ਨੇ ਪਹਿਲੇ ਵਿਕਟ ਲਈ 65 ਦੌੜਾਂ ਜੋੜ ਕੇ ਟੀਮ ਨੂੰ ਚੰਗੀ ਸ਼ੁਰੂਆਤ ਦਵਾਈ।
ਧਰਮਸ਼ਾਲਾ ਵਿਚ ਮੇਜ਼ਬਾਨ ਹਿਮਾਚਲ ਨੇ ਤ੍ਰਿਪੁਰਾ ਨੂੰ ਛੇ ਵਿਕਟ ਨਾਲ ਹਰਾਇਆ। ਤ੍ਰਿਪੁਰਾ ਦੀ ਟੀਮ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਯਸ਼ਪਾਲ ਸਿੰਘ (ਨਾਬਾਦ 113) ਦੇ ਸ਼ਤਕ ਦੇ ਬਾਵਜੂਦ ਨੌਂ ਵਿਕਟ 'ਤੇ 229 ਦੌੜਾਂ ਹੀ ਬਣਾ ਸਕੀ। ਹਿਮਾਚਲ ਨੇ ਇਸਦੇ ਜਵਾਬ ਵਿਚ ਅਮਿਤ ਕੁਮਾਰ (ਨਾਬਾਦ 101) ਦੇ ਸੈਂਕੜੇ ਅਤੇ ਨਿਖਿਲ ਗੰਗਟਾ (40) ਅਤੇ ਸੁਮਿਤ ਵਰਮਾ (55) ਦੀਆਂ ਸ਼ਾਨਦਾਰ ਪਾਰੀਆਂ ਦੀ ਵਜ੍ਹਾ ਨਾਲ 45.2 ਓਵਰ ਵਿਚ ਚਾਰ ਵਿਕਟ 'ਤੇ 230 ਦੌੜਾਂ ਬਣਾ ਕੇ ਸ਼ਾਨਦਾਰ ਜਿੱਤ ਦਰਜ ਕੀਤੀ।
