ਮਾਸਟਰ ਬਲਾਸਟਰ ਸਚਿਨ ਤੇਂਦੁਲਕਰ ਦੇ ਪੁੱਤਰ ਅਰਜੁਨ ਤੇਂਦੁਲਕਰ ਨੇ ਮੁੰਬਈ ਟੀ-20 ਲੀਗ ਤੋਂ ਆਪਣਾ ਨਾਂ ਵਾਪਸ ਲੈ ਲਿਆ ਹੈ। ਇਸ ਤੋਂ ਪਹਿਲਾਂ ਖਬਰ ਸੀ ਕਿ ਅਰਜੁਨ ਤੇਂਦੁਲਕਰ 11 ਮਾਰਚ ਤੋਂ ਲੈ ਕੇ 21 ਮਾਰਚ ਤੱਕ ਚਲਣ ਵਾਲੀ ਇਸ ਲੀਗ ਵਿਚ ਹਿੱਸਾ ਲੈਣਗੇ, ਪਰ ਹੁਣ ਉਨ੍ਹਾਂ ਨੇ ਇਹ ਕਹਿ ਕੇ ਆਪਣਾ ਨਾਂ ਵਾਪਸ ਲੈ ਲਿਆ ਹੈ ਕਿ ਉਹ ਹੁਣ ਇਸਦੇ ਲਈ ਤਿਆਰ ਨਹੀਂ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਅਰਜੁਨ ਤੇਂਦੁਲਕਰ ਨੇ ਇਹ ਫੈਸਲਾ ਆਪਣੇ ਪਿਤਾ ਅਤੇ ਮਹਾਨ ਬੱਲੇਬਾਜ਼ ਸਚਿਨ ਤੇਂਦੁਲਕਰ ਤੋਂ ਪੁੱਛਕੇ ਹੀ ਲਿਆ ਹੈ। ਜ਼ਿਕਰੇਯੋਗ ਹੈ ਕਿ ਸਚਿਨ ਤੇਂਦੁਲਕਰ ਹੀ ਮੁੰਬਈ ਟੀ-20 ਲੀਗ ਦੇ ਬਰਾਂਡ ਅੰਬੈਸਡਰ ਹਨ। ਅਰਜੁਨ ਤੇਂਦੁਲਕਰ ਦੇ ਅਚਾਨਕ ਲੀਗ ਤੋਂ ਨਾਂ ਵਾਪਸ ਲੈ ਲੈਣ ਦੇ ਕਾਰਨ ਲੀਗ ਦੇ ਆਯੋਜਕਾਂ ਨੂੰ ਝਟਕਾ ਲੱਗਾ ਹੈ। 

ਮੁੰਬਈ ਟੀ-20 ਲੀਗ ਦੇ ਪ੍ਰਬੰਧਕ ਇਸ ਲਈ ਵੀ ਪਰੇਸ਼ਾਨ ਹਨ ਕਿ ਮੁੰਬਈ ਦੇ ਜ਼ਿਆਦਾਤਰ ਵੱਡੇ ਖਿਡਾਰੀ ਹੋਰ ਮੁਕਾਬਲਿਆਂ ਵਿਚ ਰੁਝੇ ਹੋਏ ਹਨ। ਕੁਝ ਖਿਡਾਰੀ ਸ਼੍ਰੀਲੰਕਾ ਵਿਚ ਹੋਣ ਵਾਲੀ ਤਿਕੋਣੀ ਲੜੀ ਵਿਚ ਰੁਝੇ ਹੋਏ ਹਨ। ਜਦਕਿ ਕੁਝ ਖਿਡਾਰੀ ਈਰਾਨੀ ਟਰਾਫੀ ਦੀਆਂ ਤਿਆਰੀਆਂ ਵਿਚ ਲੱਗੇ ਹਨ। ਹੁਣ ਅਰਜੁਨ ਤੇਂਦੁਲਕਰ ਦੇ ਵੀ ਨਾਂ ਵਾਪਸ ਲੈ ਲੈਣ ਨਾਲ ਪ੍ਰਬੰਧਕ ਪਰੇਸ਼ਾਨ ਹਨ। 

ਫਿਲਹਾਲ ਅਰਜੁਨ ਤੇਂਦੁਲਕਰ ਇਨ੍ਹਾਂ ਦਿਨਾਂ 'ਚ ਸਖਤ ਟ੍ਰੇਨਿੰਗ ਕਰ ਰਹੇ ਹਨ ਅਤੇ ਸਚਿਨ ਤੇਂਦੁਲਕਰ ਦੀ ਉਨ੍ਹਾਂ 'ਤੇ ਨਜ਼ਰ ਹੈ। ਅਰਜੁਨ ਦੇ ਬਾਲਿੰਗ ਕੋਚ ਉਨ੍ਹਾਂ ਦੇ ਐਕਸ਼ਨ ਸਣੇ ਹਰ ਚੀਜ 'ਤੇ ਕੰਮ ਕਰ ਰਹੇ ਹਨ। ਹਾਲਾਂਕਿ ਪਿਛਲੇ ਲਗਭਗ ਇਕ ਸਾਲ ਤੋਂ ਅਰਜੁਨ ਤੇਂਦੁਲਕਰ ਸੱਟਾਂ ਤੋਂ ਪਰੇਸ਼ਾਨ ਰਹੇ ਹਨ, ਪਰ ਹੁਣ ਉਨ੍ਹਾਂ ਦਾ ਪੂਰਾ ਧਿਆਨ ਆਪਣੀ ਟ੍ਰੇਨਿੰਗ 'ਤੇ ਹੈ।