ਮਿਸਰ ਦੀ ਸੈਨਾ ਦੀ ਜਾਣਕਾਰੀ ਮੁਤਾਬਕ ਉੱਤਰੀ ਸਿਨਾਈ ਵਿਚ ਇਕ ਸੈਨਿਕ ਨਾਕੇ 'ਤੇ ਹੋਏ ਕਾਰ ਬੰਬ ਧਮਾਕੇ ਵਿਚ ਦੋ ਬੱਚਿਆਂ ਸਮੇਤ 7 ਨਾਗਰਿਕਾਂ ਦੀ ਮੌਤ ਹੋ ਗਈ।
ਕਾਹਿਰਾ, 25 ਜੁਲਾਈ : ਮਿਸਰ ਦੀ ਸੈਨਾ ਦੀ ਜਾਣਕਾਰੀ ਮੁਤਾਬਕ ਉੱਤਰੀ ਸਿਨਾਈ ਵਿਚ ਇਕ ਸੈਨਿਕ ਨਾਕੇ 'ਤੇ ਹੋਏ ਕਾਰ ਬੰਬ ਧਮਾਕੇ ਵਿਚ ਦੋ ਬੱਚਿਆਂ ਸਮੇਤ 7 ਨਾਗਰਿਕਾਂ ਦੀ ਮੌਤ ਹੋ ਗਈ। ਸੈਨਾ ਵਲੋਂ ਜਾਰੀ ਇਕ ਬਿਆਨ ਮੁਤਾਬਕ ਇਹ ਧਮਾਕਾ ਸੈਨਿਕ ਨਾਕੇ ਦੇ ਕਰੀਬ 200 ਮੀਟਰ ਦੀ ਦੂਰੀ 'ਤੇ ਉਸ ਵੇਲੇ ਹੋਇਆ, ਜਦੋਂ ਮਿਸਰ ਦੇ ਇਕ ਸੈਨਿਕ ਨੇ ਇਕ ਗੱਡੀ ਨੂੰ ਰੋਕਣ ਲਈ ਟੈਂਕ ਦੀ ਵਰਤੋਂ ਕੀਤੀ।
ਇਸ ਧਮਾਕੇ ਵਿਚ ਮਰਨ ਵਾਲਿਆਂ ਵਿਚ ਤਿੰਨ ਵਿਅਕਤੀ, ਦੋ ਔਰਤਾਂ ਅਤੇ ਦੋ ਬੱਚੇ ਸ਼ਾਮਲ ਹਨ, ਜੋ ਧਮਾਕੇ ਦੌਰਾਨ ਉਥੇ ਮੌਜੂਦ ਸਨ। ਸੈਨਾ ਦੇ ਇਕ ਬੁਲਾਰੇ ਮੁਤਾਬਕ ਇਹ ਧਮਾਕਾ ਬਹੁਤ ਵੱਡਾ ਸੀ। ਇਸ ਵਿਚ ਕਰੀਬ 100 ਕਿਲੋਗ੍ਰਾਮ ਸ਼ਕਤੀਸ਼ਾਲੀ ਵਿਸਫ਼ੋਟਕ ਲਗਾਇਆ ਗਿਆ ਸੀ। ਜ਼ਿਕਰਯੋਗ ਹੈ ਕਿ ਇਸ ਸਮੇਂ ਮਿਸਰ ਦੀ ਸੈਨਾ ਇਸਲਾਮਿਕ ਸਟੇਟ ਸਮੂਹ ਦੇ ਇਕ ਸਥਾਨਕ ਸਹਿਯੋਗੀ ਨਾਲ ਜੂਝ ਰਹੀ ਹੈ, ਜਿਸ ਨੇ ਸਿਨਾਈ ਵਿਚ ਇਕ ਘਾਤਕ ਹਮਲਾ ਕੀਤਾ ਸੀ ਅਤੇ ਸੁਰੱਖਿਆ ਬਲਾਂ ਦੇ ਸੈਂਕੜਾਂ ਕਰਮੀਆਂ ਦੀ ਹਤਿਆ ਕਰ ਦਿਤੀ ਸੀ। ਦਸੰਬਰ ਤੋਂ ਹੁਣ ਤਕ, ਇਸਲਾਮਿਕ ਸਟੇਟ ਸਮੂਹ ਨੇ ਕਾਹਿਰਾ ਸਮੇਤ ਮਿਸਰ ਦੇ ਹੋਰ ਹਿੱਸਿਆਂ ਵਿਚ ਈਸਾਈਆਂ ਨੂੰ ਨਿਸ਼ਾਨਾ ਬਣਾਇਆ ਹੈ ਅਤੇ ਕਬੀਲੇ ਦੇ ਦਰਜਨਾਂ ਮੈਂਬਰਾਂ ਦੀ ਹਤਿਆ ਕਰ ਦਿਤੀ ਹੈ। (ਪੀਟੀਆਈ)
