ਏਐਫਪੀ ਦੀ ਰੀਪੋਰਟ ਅਨੁਸਾਰ, ਇਹ ਟੀਕਾ ਯੂਰਪ ਦੇ ਵਾਲਨੇਵਾ ਦੁਆਰਾ ਵਿਕਸਤ ਕੀਤਾ ਗਿਆ ਹੈ, ਜਿਸ ਨੂੰ Ixchiq ਨਾਮ ਨਾਲ ਵੇਚਿਆ ਜਾਵੇਗਾ।
US Approves 1st Vaccine Against Chikungunya Virus News: ਅਮਰੀਕਾ ਦੇ ਸਿਹਤ ਅਧਿਕਾਰੀਆਂ ਨੇ ਵੀਰਵਾਰ ਨੂੰ ਚਿਕਨਗੁਨੀਆ ਵਾਇਰਸ ਲਈ ਦੁਨੀਆਂ ਦੀ ਪਹਿਲੀ ਵੈਕਸੀਨ ਨੂੰ ਮਨਜ਼ੂਰੀ ਦੇ ਦਿਤੀ ਹੈ। ਇਹ ਵਾਇਰਸ, ਸੰਕਰਮਿਤ ਮੱਛਰਾਂ ਦੁਆਰਾ ਫੈਲਦਾ ਹੈ, ਜਿਸ ਨੂੰ ਫੂਡ ਐਂਡ ਡਰੱਗ ਐਡਮਨਿਸਟ੍ਰੇਸ਼ਨ (ਐਫਡੀਏ) ਨੇ "ਇਕ ਉੱਭਰਦਾ ਹੋਇਆ ਵਿਸ਼ਵਵਿਆਪੀ ਸਿਹਤ ਖਤਰਾ" ਕਰਾਰ ਦਿਤਾ ਹੈ। ਏਐਫਪੀ ਦੀ ਰੀਪੋਰਟ ਅਨੁਸਾਰ, ਇਹ ਟੀਕਾ ਯੂਰਪ ਦੇ ਵਾਲਨੇਵਾ ਦੁਆਰਾ ਵਿਕਸਤ ਕੀਤਾ ਗਿਆ ਹੈ, ਜਿਸ ਨੂੰ Ixchiq ਨਾਮ ਨਾਲ ਵੇਚਿਆ ਜਾਵੇਗਾ।
ਐਫਡੀਏ ਨੇ ਕਿਹਾ, Ixchiq ਨੂੰ 18 ਸਾਲ ਅਤੇ ਇਸ ਤੋਂ ਵੱਧ ਉਮਰ ਦੇ ਲੋਕਾਂ ਲਈ ਮਨਜ਼ੂਰੀ ਦਿਤੀ ਗਈ ਸੀ ਜਿਨ੍ਹਾਂ ਦੇ ਸੰਪਰਕ ਵਿਚ ਆਉਣ ਦਾ ਖਤਰਾ ਵਧ ਗਿਆ ਹੈ। ਯੂਐਸ ਡਰੱਗ ਰੈਗੂਲੇਟਰ ਦੁਆਰਾ Ixchiq ਨੂੰ ਦਿਤੀ ਗਈ ਹਰੀ ਝੰਡੀ ਨਾਲ ਉਨ੍ਹਾਂ ਦੇਸ਼ਾਂ ਵਿਚ ਵੈਕਸੀਨ ਦੇ ਰੋਲਆਉਟ ਨੂੰ ਤੇਜ਼ ਕਰਨ ਦੀ ਉਮੀਦ ਹੈ ਜਿਥੇ ਵਾਇਰਸ ਸੱਭ ਤੋਂ ਵੱਧ ਫੈਲਿਆ ਹੋਇਆ ਹੈ।
ਚਿਕਨਗੁਨੀਆ ਰੋਗ ਮੱਛਰਾਂ ਦੁਆਰਾ ਪ੍ਰਸਾਰਤ ਚਿਕਨਗੁਨੀਆ ਵਾਇਰਸ ਕਾਰਨ ਹੁੰਦਾ ਹੈ ਅਤੇ ਬੁਖਾਰ ਅਤੇ ਜੋੜਾਂ ਦੇ ਦਰਦ ਦਾ ਕਾਰਨ ਬਣਦਾ ਹੈ। ਇਸ ਦੌਰਾਨ, ਮਰੀਜ਼ਾਂ ਨੂੰ ਸਿਰ ਦਰਦ, ਮਾਸਪੇਸ਼ੀਆਂ ਵਿਚ ਦਰਦ, ਜੋੜਾਂ ਵਿਚ ਸੋਜ ਜਾਂ ਧੱਫੜ ਵੀ ਹੋ ਸਕਦੇ ਹਨ। ਇਹ ਅਫ਼ਰੀਕਾ, ਦੱਖਣ-ਪੂਰਬੀ ਏਸ਼ੀਆ ਅਤੇ ਅਮਰੀਕਾ ਦੇ ਕੁੱਝ ਹਿੱਸਿਆਂ ਦੇ ਗਰਮ ਖੰਡੀ ਅਤੇ ਉਪ-ਉਪਖੰਡੀ ਖੇਤਰਾਂ ਵਿਚ ਸੱਭ ਤੋਂ ਵੱਧ ਫੈਲਿਆ ਹੋਇਆ ਹੈ, ਜਿਸ ਨਾਲ ਬਿਮਾਰੀ ਦੇ ਵਿਸ਼ਵਵਿਆਪੀ ਫੈਲਣ ਵਿਚ ਵਾਧਾ ਹੋਇਆ ਹੈ।
ਦੱਸ ਦੇਈਏ ਕਿ ਚਿਕਨਗੁਨੀਆ ਵੈਕਸੀਨ ਦੇ ਸਬੰਧ ਵਿਚ ਉੱਤਰੀ ਅਮਰੀਕਾ ਵਿਚ 3,500 ਲੋਕਾਂ ਉੱਤੇ ਦੋ ਕਲੀਨਿਕਲ ਟਰਾਇਲ ਕੀਤੇ ਗਏ ਸਨ। ਇਸ ਮਿਆਦ ਦੇ ਦੌਰਾਨ, ਸਿਰ ਦਰਦ, ਥਕਾਵਟ, ਮਾਸਪੇਸ਼ੀ ਅਤੇ ਜੋੜਾਂ ਵਿਚ ਦਰਦ, ਬੁਖਾਰ ਅਤੇ ਮਤਲੀ ਵਰਗੇ ਆਮ ਮਾੜੇ ਪ੍ਰਭਾਵ ਦੇਖੇ ਗਏ।
