ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਵਲੋਂ ਕੱਟਰਪੰਥੀਆਂ ਦੇ ਦਬਾਅ ਵਿਚ ਆ ਕੇ ਕੀਤਾ ਗਿਆ ਇਕ ਫੈਸਲਾ ਹੁਣ ਉਨ੍ਹਾਂ ਲਈ ਮੁਸੀਬਤ ਬਣਦਾ ਜਾ ਰਿਹਾ ਹੈ। ਅੱਠ ਨੋ...
ਨਵੀਂ ਦਿੱਲੀ : ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਵਲੋਂ ਕੱਟਰਪੰਥੀਆਂ ਦੇ ਦਬਾਅ ਵਿਚ ਆ ਕੇ ਕੀਤਾ ਗਿਆ ਇਕ ਫੈਸਲਾ ਹੁਣ ਉਨ੍ਹਾਂ ਲਈ ਮੁਸੀਬਤ ਬਣਦਾ ਜਾ ਰਿਹਾ ਹੈ। ਅੱਠ ਨੋਬਲ ਇਨਾਮ ਜੇਤੂਆਂ ਨੇ ਆਤੀਫ ਮੀਆਂ ਨੂੰ ਪ੍ਰਧਾਨ ਮੰਤਰੀ ਦੀ ਆਰਥਕ ਸਲਾਹਕਾਰ ਪਰਿਸ਼ਦ ਤੋਂ ਹਟਾਏ ਜਾਣ ਦਾ ਵਿਰੋਧ ਕੀਤਾ ਹੈ। ਇਹਨਾਂ ਅੱਠ ਨੋਬਲ ਜੇਤੂਆਂ ਸਮੇਤ ਕੁੱਲ 93 ਮਸ਼ਹੂਰ ਅਰਥ-ਸ਼ਾਸਤਰੀਆਂ ਨੇ ਅਪਣੇ ਹਸਤਾਖ਼ਰ ਦੇ ਨਾਲ ਇਕ ਬਿਆਨ ਜਾਰੀ ਕਰ ਇਸ ਫੈਸਲੇ 'ਤੇ ਨਿਰਾਸ਼ਾ ਅਤੇ ਅਸਹਿਮਤੀ ਜਤਾਈ ਹੈ।
ਅੱਠ ਨੋਬਲ ਪੁਰਸਕਾਰ ਜੇਤੂਆਂ ਦੇ ਆਤੀਫ ਮੀਆਂ ਦੇ ਸਮਰਥਨ ਵਿਚ ਆਉਣ ਦੇ ਕਾਰਨ ਪਾਕਿਸਤਾਨ 'ਤੇ ਹੁਣ ਦਬਾਅ ਵੱਧ ਗਿਆ ਹੈ ਅਤੇ ਜੇਕਰ ਉਹ ਅਪਣਾ ਫੈਸਲਾ ਵਾਪਸ ਨਹੀਂ ਲੈਂਦੇ ਹਨ ਤਾਂ ਦੁਨੀਆਂ ਵਿਚ ਪਾਕਿਸਤਾਨ ਦੀ ਗਰੀਬੀ ਤੈਅ ਹੈ। ਦੁਨੀਆਂ ਵਿਚ ਇਹ ਸਾਬਤ ਹੋ ਜਾਵੇਗਾ ਕਿ ਪਾਕਿਸਤਾਨ ਧਾਰਮਿਕ ਕੱਟੜਤਾ ਨੂੰ ਉਤਸ਼ਾਹਿਤ ਕਰਨ ਵਾਲਾ ਦੇਸ਼ ਹੈ। ਆਤੀਫ ਮੀਆਂ ਦੁਨੀਆਂ ਦੇ ਮਸ਼ਹੂਰ ਅਰਥ-ਸ਼ਾਸਤਰੀ ਹੈ ਅਤੇ ਉਨ੍ਹਾਂ ਨੂੰ ਪਾਕਿਸਤਾਨ ਵਿਚ ਪੀਐਮ ਦੀ ਸਲਾਹਕਾਰ ਪਰਿਸ਼ਦ ਤੋਂ ਸਿਰਫ ਇਸ ਲਈ ਹਟਾ ਦਿਤਾ ਗਿਆ ਕਿਉਂਕਿ ਉਹ ਘੱਟ ਗਿਣਤੀ ਅਹਿਮਦੀਆ ਭਾਈਚਾਰਾ ਤੋਂ ਆਉਂਦੇ ਹਨ ਅਤੇ ਮੁਸਲਮਾਨ ਕੱਟਰਪੰਥੀ ਉਨ੍ਹਾਂ ਦੀ ਨਿਯੁਕਤੀ ਦਾ ਵਿਰੋਧ ਕਰ ਰਹੇ ਸਨ।
ਤੁਰਕੀ ਦੇ ਅਰਥਸ਼ਾਤਰੀ ਅਤੇ ਫੋਰਡ ਫਾਉਂਡੇਸ਼ਨ ਦੇ ਪ੍ਰੋਫੈਸਰ ਦਾਨੀ ਰੋਡਰਿਕ ਨੇ ਕਿਹਾ ਕਿ ਇਹ ਬਹੁਤ ਦੁਖਦ ਹੈ ਕਿ ਪ੍ਰਿਸੰਟਨ ਦੇ ਆਤੀਫ ਮੀਆਂ, ਜੋ ਵਿੱਤ ਅਤੇ ਮਾਈਕਰੋ ਇਕਨਾਮਿਕਸ ਦੇ ਚੰਗੇ ਮਾਹਰ ਹਨ, ਉਨ੍ਹਾਂ ਨੂੰ ਪਾਕਿਸਤਾਨ ਦੀ ਆਰਥਕ ਸਲਾਹਕਾਰ ਪਰਿਸ਼ਦ ਤੋਂ ਉਨ੍ਹਾਂ ਦੇ ਧਾਰਮਿਕ ਵਿਸ਼ਵਾਸ ਕਾਰਨ ਹਟਾ ਦਿਤਾ ਗਿਆ। ਅਸੀਂ ਆਤੀਫ ਮੀਆਂ ਦੇ ਸਮਰਥਨ ਵਿਚ ਇਕ ਬਿਆਨ ਜਾਰੀ ਕਰ ਰਹੇ ਹਾਂ। ਇਸ ਵਿਚ 93 ਦਿੱਗਜ ਅਰਥਸ਼ਾਤਰੀਆਂ ਦੇ ਹਸਤਾਖ਼ਰ ਹਨ, ਜਿਨ੍ਹਾਂ ਵਿਚੋਂ 26 ਪਾਕਿਸਤਾਨ ਵਿਚ ਕੰਮ ਕਰ ਰਹੇ ਹਨ ਅਤੇ ਅੱਠ ਨੋਬਲ ਇਨਾਮ ਜੇਤੂ ਹਨ।
ਇਸ ਤੋਂ ਪਹਿਲਾਂ ਕੱਟਰਪੰਥੀ ਮੌਲਾਨਾਵਾਂ ਦੇ ਦਬਾਅ ਵਿਚ ਆਤੀਫ ਮੀਆਂ ਨੂੰ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਨੇ ਅਪਣੀ ਈਐਸੀ ਤੋਂ ਹਟਾ ਦਿਤਾ ਸੀ। ਇਸ ਫੈਸਲੇ ਦੇ ਵਿਰੋਧ ਵਿਚ ਈਏਸੀ ਵਿਚ ਸ਼ਾਮਿਲ ਕਈ ਹੋਰ ਮੈਬਰਾਂ ਨੇ ਵੀ ਅਪਣੇ ਇਸਤੀਫੇ ਦੇ ਦਿਤੇ ਸਨ। ਆਤੀਫ ਮੀਆਂ ਨੂੰ ਉਨ੍ਹਾਂ ਦੇ ਘੱਟ ਗਿਣਤੀ ਅਹਿਮਦੀਆ ਭਾਈਚਾਰਾ ਨਾਲ ਸਬੰਧਤ ਹੋਣ ਦੇ ਕਾਰਨ ਹਟਾਇਆ ਗਿਆ ਹੈ। ਅਹਮਦਿਆ ਭਾਈਚਾਰੇ ਨੂੰ ਭਾਰਤ ਵਿਚ ਇਸਲਾਮ ਦਾ ਹਿੱਸਾ ਮੰਨਿਆ ਜਾਂਦਾ ਹੈ ਪਰ ਪਾਕਿਸਤਾਨ ਵਿਚ ਕੱਟਰਪੰਥੀਆਂ ਦੇ ਦਬਾਅ ਵਿਚ ਉਨ੍ਹਾਂ ਨੂੰ ਮੁਸਲਮਾਨ ਹੋਣ ਦਾ ਦਰਜਾ ਖੌਹ ਲਿਆ ਗਿਆ ਹੈ।