ਚੀਨ ਦੀ ਇਕ ਅਦਾਲਤ ਨੇ ਅਮਰੀਕਾ ਦੀ ਦਿੱਗਜ ਸਮਾਰਟ ਫ਼ੋਨ ਕੰਪਨੀ ਐਪਲ ਦੇ ਕੁੱਝ ਸਮਾਰਟ ਫ਼ੋਨਾਂ ਦੀ ਵਿਕਰੀ ‘ਤੇ...
ਬੀਜਿੰਗ (ਭਾਸ਼ਾ) : ਚੀਨ ਦੀ ਇਕ ਅਦਾਲਤ ਨੇ ਅਮਰੀਕਾ ਦੀ ਦਿੱਗਜ ਸਮਾਰਟ ਫ਼ੋਨ ਕੰਪਨੀ ਐਪਲ ਦੇ ਕੁੱਝ ਸਮਾਰਟ ਫ਼ੋਨਾਂ ਦੀ ਵਿਕਰੀ ‘ਤੇ ਪਾਬੰਦੀ ਲਗਾ ਦਿਤੀ ਹੈ। ਇਸ ਪਾਬੰਦੀ ਦੇ ਬਾਵਜੂਦ ਚੀਨ ਦੇ ਐਪਲ ਸਟੋਰਾਂ ਵਿਚ ਮੰਗਲਵਾਰ ਨੂੰ ਕੰਮ-ਕਾਜ ਇਕੋ ਜਿਹਾ ਵੇਖਿਆ ਗਿਆ। ਅਮਰੀਕਾ ਦੀ ਮੰਗ ਉਤੇ ਹੁਆਵੇ ਦੀ ਇਕ ਅਧਿਕਾਰੀ ਦੀ ਗ੍ਰਿਫ਼ਤਾਰੀ ਦੇ ਕਾਰਨ ਅਮਰੀਕੀ ਸਮਾਰਟ ਫ਼ੋਨ ਕੰਪਨੀ ਨੂੰ ਹਾਲਾਂਕਿ ਚੀਨ ਵਿਚ ਰਾਸ਼ਟਰਵਾਦੀ ਲਹਿਰ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਐਪਲ ਦੇ ਫ਼ੋਨ ‘ਤੇ ਪਾਬੰਦੀ ਲਗਾਉਣ ਦੀ ਬੇਨਤੀ ਅਮਰੀਕੀ ਚਿਪ ਨਿਰਮਾਤਾ ਕੰਪਨੀ ਕਵਾਲਕਾਮ ਨੇ ਕੀਤੀ ਸੀ। ਕਵਾਲਕਾਮ ਦੇ ਮੁਤਾਬਕ ਫੂਝੋ ਇੰਟਰਮੀਡੀਏਟ ਪੀਪੁਲਸ ਕੋਰਟ ਨੇ ਐਪਲ ਦੀਆਂ ਚਾਰ ਸਹਾਇਕ ਕੰਪਨੀਆਂ ਨੂੰ ਆਈਫ਼ੋਨ ਦੇ ਪੁਰਾਣੇ ਮਾਡਲਾਂ ਦੀ ਵਿਕਰੀ ਰੋਕਣ ਦਾ ਹੁਕਮ ਦਿਤਾ ਹੈ। ਇਸ ਹੁਕਮ ਵਿਚ ਆਉਣ ਵਾਲੇ ਫੋਨਾਂ ਵਿਚ ਆਈਫ਼ੋਨ 7, 7 ਪਲੱਸ, ਆਈਫ਼ੋਨ 8 ਅਤੇ 8 ਪਲੱਸ ਵੀ ਸ਼ਾਮਲ ਹਨ।
ਬੀਜਿੰਗ, ਸ਼ੰਘਾਈ ਅਤੇ ਫੂਝੋ ਦੇ ਐਪਲ ਸਟੋਰਸ ਨੇ ਹਾਲਾਂਕਿ ਕੰਪਨੀ ਦੇ ਬਿਆਨ ਦੀ ਪੁਸ਼ਟੀ ਕਰਦੇ ਹੋਏ ਕਿਹਾ ਕਿ ਉਹ ਉਨ੍ਹਾਂ ਪੁਰਾਣੇ ਮਾਡਲਸ ਨੂੰ ਅਜੇ ਵੀ ਵੇਚ ਰਹੇ ਹਨ। ਐਪਲ ਨੇ ਕਿਹਾ ਸੀ ਕਿ ਉਨ੍ਹਾਂ ਦੇ ਸਾਰੇ ਫ਼ੋਨ ਚੀਨ ਵਿਚ ਉਪਲੱਬਧ ਹੈ। ਬੀਜਿੰਗ ਦੇ ਇਕ ਐਪਲ ਸਟੋਰ ਦੇ ਸੇਲਸ ਕਰਮਚਾਰੀ ਨੇ ਕਿਹਾ ਕਿ ਆਈਫ਼ੋਨ ਦੀ ਵਿਕਰੀ ਉਤੇ ਪਾਬੰਦੀ ਲਗਾਉਣ ਦੇ ਅਦਾਲਤੀ ਹੁਕਮ ਦੇ ਬਾਰੇ ਵਿਚ ਉਨ੍ਹਾਂ ਨੂੰ ਅੰਦਰੂਨੀ ਪੱਧਰ ‘ਤੇ ਕੋਈ ਸੂਚਨਾ ਨਹੀਂ ਮਿਲੀ ਹੈ।
ਰਿਸਰਚ ਕੰਪਨੀ ਆਈਡੀਸੀ ਦੇ ਉੱਚ ਬਾਜ਼ਾਰ ਵਿਸ਼ਲੇਸ਼ਕ ਵਾਂਗ ਸ਼ੀ ਨੇ ਕਿਹਾ ਕਿ ਜੇਕਰ ਪਾਬੰਦੀ ਲਾਗੂ ਹੁੰਦੀ ਹੈ, ਤਾਂ ਚੀਨ ਵਿਚ 940 ਡਾਲਰ (ਕਰੀਬ 67,000 ਰੁਪਏ) ਤੋਂ ਹੇਠਾਂ ਵਾਲਾ ਕੋਈ ਐਪਲ ਉਤਪਾਦਨ ਨਹੀਂ ਮਿਲੇਗਾ। ਇਸ ਤੋਂ ਹੁਆਵੇ ਵਰਗੇ ਚੀਨ ਦੇ ਬਰਾਂਡਾਂ ਨੂੰ ਕਾਫ਼ੀ ਮੁਨਾਫ਼ਾ ਮਿਲੇਗਾ। ਅਮਰੀਕੀ ਕੰਪਨੀਆਂ ਕਵਾਲਕਾਮ ਅਤੇ ਐਪਲ ਦੇ ਵਿਚ ਪੇਟੇਂਟ ਦੇ ਮਸਲੇ ਉਤੇ ਲੰਬੇ ਸਮੇਂ ਤੋਂ ਵਿਵਾਦ ਚੱਲ ਰਿਹਾ ਹੈ।
ਕਵਾਲਕਾਮ ਨੇ ਐਪਲ ਦੇ ਉਤਪਾਦਾਂ ਉਤੇ ਪਾਬੰਦੀ ਦੀ ਬੇਨਤੀ ਇਸ ਪ੍ਰਸੰਘ ਵਿਚ ਕੀਤੀ ਸੀ। ਉਧਰ ਚੀਨ ਦੀ ਕੰਪਨੀ ਹੁਆਵੇ ਦੀ ਮੁੱਖ ਵਿੱਤੀ ਅਧਿਕਾਰੀ ਦੇ ਕਨੇਡਾ ਵਿਚ ਅਮਰੀਕੀ ਸ਼ਹਿ ਉਤੇ ਗ੍ਰਿਫ਼ਤਾਰ ਹੋਣ ਤੋਂ ਬਾਅਦ ਐਪਲ ਨੂੰ ਇਨ੍ਹਾਂ ਦਿਨੀਂ ਚੀਨ ਵਿਚ ਰਾਸ਼ਟਰਵਾਦੀ ਲਹਿਰ ਦਾ ਵੀ ਸਾਹਮਣਾ ਕਰਨਾ ਪੈ ਰਿਹਾ ਹੈ।