ਫ਼ਲਸਤੀਨ ਨੂੰ ਯੂਨੈਸਕੋ ਮੈਂਬਰ ਵਜੋਂ ਸ਼ਾਮਲ ਕੀਤੇ ਜਾਣ ਦੇ ਰੋਸ ਵਜੋਂ ਛਡਿਆ ਸੀ ਸੰਗਠਨ
ਵਾਸ਼ਿੰਗਟਨ: ਸੰਯੁਕਤ ਰਾਸ਼ਟਰ ਦੀ ਸੱਭਿਆਚਾਰਕ ਅਤੇ ਵਿਗਿਆਨਕ ਏਜੰਸੀ ਯੂਨੈਸਕੋ ਨੇ ਐਲਾਨ ਕੀਤਾ ਹੈ ਕਿ ਅਮਰੀਕਾ ਨੇ ਇਸ ਵਿਚ ਦੁਬਾਰਾ ਸ਼ਾਮਲ ਹੋਣ ਅਤੇ ਬਕਾਇਆ ਰਾਸ਼ੀ ਵਜੋਂ 60 ਕਰੋੜ ਅਮਰੀਕੀ ਡਾਲਰ ਤੋਂ ਵੱਧ ਦਾ ਭੁਗਤਾਨ ਕਰਨ ਦਾ ਫ਼ੈਸਲਾ ਕੀਤਾ ਹੈ। ਅਮਰੀਕਾ ਦਾ ਇਹ ਕਦਮ ਫ਼ਲਸਤੀਨ ਨੂੰ ਯੂਨੈਸਕੋ ਦੇ ਮੈਂਬਰ ਵਜੋਂ ਸ਼ਾਮਲ ਕਰਨ ਨੂੰ ਲੈ ਕੇ ਕਰੀਬ ਇਕ ਦਹਾਕੇ ਦੇ ਵਿਵਾਦ ਤੋਂ ਬਾਅਦ ਆਇਆ ਹੈ।
ਅਮਰੀਕੀ ਰਾਸ਼ਟਰਪਤੀ ਜੋਅ ਬਾਈਡਨ ਦੇ ਪ੍ਰਸ਼ਾਸਨ ਨੇ ਕਿਹਾ ਹੈ ਕਿ ਅਮਰੀਕਾ ਸੰਯੁਕਤ ਰਾਸ਼ਟਰ ਵਿਦਿਅਕ ਅਤੇ ਵਿਗਿਆਨਕ ਅਤੇ ਸੱਭਿਆਚਾਰਕ ਸੰਗਠਨ (ਯੂਨੈਸਕੋ) ਵਿਚ ਮੁੜ ਸ਼ਾਮਲ ਹੋਵੇਗਾ। ਸਾਬਕਾ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਕਾਰਜਕਾਲ ਦੌਰਾਨ ਅਮਰੀਕਾ ਪੰਜ ਸਾਲ ਤਕ ਇਸ ਤੋਂ ਦੂਰ ਰਿਹਾ।
ਵਿਦੇਸ਼ ਵਿਭਾਗ ਮੁਤਾਬਕ ਅਮਰੀਕਾ ਨੇ ਯੂਨੈਸਕੋ 'ਚ ਮੁੜ ਸ਼ਾਮਲ ਹੋਣ ਲਈ ਪਿਛਲੇ ਹਫ਼ਤੇ ਇਕ ਪੱਤਰ ਭੇਜਿਆ ਸੀ।ਮੰਤਰਾਲੇ ਦੇ ਅਨੁਸਾਰ, ਪ੍ਰਬੰਧਨ ਮਾਮਲਿਆਂ ਦੇ ਉਪ ਸਕੱਤਰ ਰਿਚਰਡ ਵਰਮਾ ਦੁਆਰਾ 8 ਜੂਨ ਨੂੰ ਭੇਜੇ ਗਏ ਇਕ ਪੱਤਰ ਵਿਚ "ਸੰਸਥਾ ਵਿਚ ਅਮਰੀਕਾ ਦੇ ਮੁੜ ਦਾਖ਼ਲੇ ਲਈ ਇਕ ਯੋਜਨਾ" ਦਾ ਪ੍ਰਸਤਾਵ ਕੀਤਾ ਗਿਆ ਸੀ।
ਇਹ ਵੀ ਪੜ੍ਹੋ: ਪਾਕਿਸਤਾਨ ਪੁਲਿਸ ਨੇ ਅਗਵਾ ਕੀਤੀ ਹਿੰਦੂ ਲੜਕੀ ਨੂੰ ਕਰਾਚੀ ਤੋਂ ਕੀਤਾ ਬਰਾਮਦ
ਵਿਦੇਸ਼ ਮੰਤਰਾਲੇ ਨੇ ਇਕ ਬਿਆਨ ਵਿਚ ਕਿਹਾ, "ਇਸ ਤਰ੍ਹਾਂ ਦੇ ਕਿਸੇ ਵੀ ਕਦਮ ਲਈ ਯੂਨੈਸਕੋ ਦੇ ਮੌਜੂਦਾ ਮੈਂਬਰਾਂ ਦੀ ਸਹਿਮਤੀ ਦੀ ਲੋੜ ਹੋਵੇਗੀ।" ਅਸੀਂ ਉਮੀਦ ਕਰਦੇ ਹਾਂ ਕਿ ਆਉਣ ਵਾਲੇ ਦਿਨਾਂ ਵਿਚ ਯੂਨੈਸਕੋ ਦੀ ਅਗਵਾਈ ਸਾਡੇ ਪ੍ਰਸਤਾਵ ਬਾਰੇ ਮੈਂਬਰਾਂ ਨੂੰ ਸੂਚਿਤ ਕਰੇਗੀ। ਪ੍ਰਸਤਾਵ ਦੇ ਵੇਰਵੇ ਤੁਰਤ ਨਹੀਂ ਦਿਤੇ ਗਏ ਸਨ।
ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਰੋਨਾਲਡ ਰੀਗਨ ਨੇ 1983 ਵਿਚ ਯੂਨੈਸਕੋ ਤੋਂ ਹਟਣ ਦਾ ਫ਼ੈਸਲਾ ਕੀਤਾ ਸੀ। ਸਾਬਕਾ ਰਾਸ਼ਟਰਪਤੀ ਜਾਰਜ ਡਬਲਯੂ ਬੁਸ਼ ਨੇ 2002 ਵਿਚ ਅਮਰੀਕਾ ਨੂੰ ਸੰਗਠਨ ਵਿਚ ਮੁੜ ਦਾਖ਼ਲਾ ਦਿਤਾ। ਟਰੰਪ ਨੇ ਕਥਿਤ ਤੌਰ 'ਤੇ 2017 ਵਿਚ ਅਪਣੇ ਇਜ਼ਰਾਈਲ ਵਿਰੋਧੀ ਪੱਖਪਾਤ ਦਾ ਹਵਾਲਾ ਦਿਤਾ ਅਤੇ ਅਮਰੀਕਾ ਨੂੰ ਇਸ ਤੋਂ ਵਾਪਸ ਲੈ ਲਿਆ। ਇਜ਼ਰਾਈਲ ਨੇ ਵੀ ਉਸੇ ਸਮੇਂ ਯੂਨੈਸਕੋ ਤੋਂ ਅਪਣੇ ਹਟਣ ਦਾ ਐਲਾਨ ਕੀਤਾ ਸੀ, ਹਾਲਾਂਕਿ ਇਸ ਨੇ ਜਨਵਰੀ 2018 ਵਿਚ ਅਜਿਹਾ ਕੀਤਾ ਸੀ।
ਅਮਰੀਕੀ ਵਿਦੇਸ਼ ਵਿਭਾਗ ਦੇ ਅਧਿਕਾਰੀ ਜੌਹਨ ਬਾਸ ਨੇ ਕਿਹਾ ਕਿ ਯੂਨੈਸਕੋ ਵਿਚ ਮੁੜ ਸ਼ਾਮਲ ਹੋਣ ਨਾਲ ਸਾਨੂੰ ਉਨ੍ਹਾਂ ਚੁਨੌਤੀਆਂ ਦਾ ਹੱਲ ਕਰਨ ਦਾ ਮੌਕਾ ਮਿਲੇਗਾ ਜੋ ਚੀਨ ਨਾਲ ਵਿਸ਼ਵ ਪੱਧਰੀ ਮੁਕਾਬਲੇ ਵਿਚ ਸਾਡੀ ਗ਼ੈਰ-ਮੌਜੂਦਗੀ ਪੈਦਾ ਕਰ ਰਹੀਆਂ ਹਨ ।
