ਟੇਲਰ ਨੇ ਕਿਹਾ ਕਿ ਚੀਨ ਜ਼ਮੀਨ, ਹਵਾ, ਸਮੁੰਦਰ, ਪੁਲਾੜ ਅਤੇ ਸੂਚਨਾ ਦੇ ਖੇਤਰ ਵਿਚ ਸਮਰਥਾ ਦਾ ਵਿਸਤਾਰ ਕਰਨ ਦੇ ਨਾਲ ਹੀ ਮਜ਼ਬੂਤ ਘਾਤਕ ਤਾਕਤਾਂ ਦਾ ਵੀ ਨਿਰਮਾਣ ਕਰ ਰਿਹਾ ਹੈ।
ਵਾਸ਼ਿੰਗਟਨ : ਅਮਰੀਕਾ ਦੇ ਇਕ ਸੀਨੀਅਰ ਖੁਫੀਆ ਅਧਿਕਾਰੀ ਨੇ ਕਿਹਾ ਹੈ ਕਿ ਚੀਨ ਜ਼ਮੀਨ, ਹਵਾ, ਸਮੁੰਦਰ, ਪੁਲਾੜ ਅਤੇ ਸਾਈਬਰ ਖੇਤਰ ਵਿਚ ਹਮਲਾ ਕਰਨ ਲਈ ਉੱਚ ਸਮਰਥਾ ਵਾਲੀ ਫ਼ੌਜ ਤਿਆਰ ਕਰ ਰਿਹਾ ਹੈ। ਇਸ ਨੂੰ ਉਹ ਛੇਤੀ ਹੀ ਖੇਤਰ ਦੇ ਅੰਦਰ ਅਤੇ ਉਸ ਦੇ ਬਾਹਰ ਵੀ ਤੈਨਾਤ ਕਰੇਗਾ। ਅਧਿਕਾਰੀ ਦਾ ਦਾਅਵਾ ਹੈ ਕਿ ਚੀਨੇ ਦੇ ਨੇਤਾਵਾਂ ਦਾ ਮਕਸਦ ਦੇਸ਼ ਨੂੰ ਵੱਧ ਤੋਂ ਵੱਧ ਮਜ਼ਬੂਤ ਬਣਾਉਣਾ ਹੈ। ਇਸ ਦੇ ਲਈ ਚੀਨ ਦੇ ਆਧੁਨਿਕੀਕਰਣ 'ਤੇ ਜ਼ੋਰ ਦਿਤਾ ਜਾ ਰਿਹਾ ਹੈ। ਡੈਨ ਟੇਲਰ ਨੇ ਪੇਂਟਾਗਨ ਵਿਖੇ ਇਕ ਕਾਨਫਰੰਸ ਦੌਰਾਨ ਮੀਡੀਆ ਨਾਲ ਗੱਲਬਾਤ ਕਰਦੇ ਹੋਏ
ਕਿਹਾ ਕਿ ਚੀਨ ਦੀ ਕਮਿਊਨਿਸਟ ਪਾਰਟੀ ਦੇ ਕੂਟਨੀਤਕ ਮਕਸਦਾਂ ਵਿਚ ਚੀਨ ਨੂੰ ਮਹਾਨ ਦਰਜਾ ਦਿਲਾਉਣ ਦਾ ਮਕਸਦ ਵੀ ਸ਼ਾਮਲ ਹੈ। ਇਸ ਮੌਕੇ 'ਤੇ ਰੱਖਿਆ ਵਿਭਾਗ ਵੱਲੋਂ ਕਾਂਗਰਸ ਦੀ 'ਚੀਨ : ਫ਼ੌਜੀ ਤਾਕਤਾਂ ਦੇ ਜੰਗ ਲੜਨ ਅਤੇ ਜਿੱਤਣ ਲਈ ਤਾਕਤਾਂ ਦਾ ਆਧੁਨਿਕੀਕਰਣ ਕਰਨਾ' ਰੀਪੋਰਟ ਨੂੰ ਜਾਰੀ ਕੀਤਾ ਗਿਆ। ਟੇਲਰ ਨੇ ਕਿਹਾ ਕਿ ਯਕੀਨੀ ਤੌਰ 'ਤੇ ਚੀਨ ਜ਼ਮੀਨ, ਹਵਾ, ਸਮੁੰਦਰ, ਪੁਲਾੜ ਅਤੇ ਸੂਚਨਾ ਦੇ ਖੇਤਰ ਵਿਚ ਸਮਰਥਾ ਦਾ ਵਿਸਤਾਰ ਕਰਨ ਦੇ ਨਾਲ ਹੀ ਮਜ਼ਬੂਤ ਘਾਤਕ ਤਾਕਤਾਂ ਦਾ ਵੀ ਨਿਰਮਾਣ ਕਰ ਰਿਹਾ ਹੈ।
ਟੇਲਰ ਨੇ ਕਿਹਾ ਕਿ ਪਿਛਲੇ ਦਹਾਕੇ ਦੌਰਾਨ ਅਦਨ ਦੀ ਖਾੜੀ ਵਿਚ ਸਮੁੰਦਰੀ ਡਕੈਤੀ ਵਿਰੁਧ ਮੁਹਿੰਮ ਤੋਂ ਲੈ ਕੇ ਪੂਰਬੀ ਅਤੇ ਦੱਖਣੀ ਚੀਨ ਸਾਗਰਾਂ ਵਿਚ ਫ਼ੌਜ ਦੀ ਮੌਜੂਦਗੀ ਨੂੰ ਵਧਾਉਣ ਤੱਕ ਚੀਨ ਨੇ ਪੀਪਲਸ ਲਿਬਰੇਸ਼ਨ ਆਰਮੀ ਨੂੰ ਰਾਸ਼ਟਰੀ ਤਾਕਤ ਦਿਖਾਉਣ ਲਈ ਇਕ ਹਥਿਆਰ ਦੇ ਤੌਰ 'ਤੇ ਵਰਤੇ ਜਾਣ ਦੀ ਇੱਛਾ ਪ੍ਰਗਟ ਕੀਤੀ ਹੈ। ਉਹਨਾਂ ਕਿਹਾ ਕਿ ਭਵਿੱਖ ਵਿਚ ਪਰਮਾਣੂ ਊਰਜਾ ਸੰਤੁਲਨ, ਪਾਵਰ ਪ੍ਰੋਜੈਕਸ਼ਨ, ਸਾਈਬਰ ਖੇਤਰ, ਪੁਲਾੜ ਅਤੇ ਇਲੈਕਟ੍ਰੋਮੈਗਨੇਟਿਕ ਸਪੈਕਟ੍ਰਮ ਜਿਹੇ ਖੇਤਰਾਂ ਵਿਚ ਆਧੁਨਿਕੀਕਰਣ ਪੀਐਲਏ ਦੀ ਵੱਧ ਰਹੀ ਸਮਰਥਾ ਵਿਚ ਮਹਤੱਵਪੂਰਨ ਅਤੇ ਅਹਿਮ ਤੱਥ ਹਨ।
ਟੇਲਰ ਨੇ ਕਿਹਾ ਕਿ ਚੀਨ ਗ਼ੈਰ ਜੰਗੀ ਮੁਹਿੰਮਾਂ ਜਿਵੇਂ ਕਿ ਮਨੁੱਖੀ ਸਹਾਇਤਾ, ਆਪਦਾ ਰਾਹਤ, ਸਮੁੰਦਰੀ ਡਕੈਤੀ ਵਿਰੁਧ ਅਤੇ ਸ਼ਾਂਤੀ ਰੱਖਿਆ ਮੁਹਿੰਮਾਂ ਲਈ ਵੀ ਅਪਣੀ ਸਮਰਥਾ ਦਾ ਵਿਕਾਸ ਕਰ ਰਿਹਾ ਹੈ। ਆਉਣ ਵਾਲੇ ਸਾਲਾਂ ਵਿਚ ਪੀਐਲਏ ਹੋਰਨਾਂ ਆਧੁਨਿਕ ਫ਼ੌਜੀਆਂ ਦੇ ਮੁਕਾਬਲੇ ਤਕਨੀਕੀ ਪੱਖ ਤੋਂ ਵੱਧ ਸਮਰਥ ਹੋ ਸਕਦੀ ਹੈ। ਚੀਨ ਅਜਿਹੇ ਬੰਬਾਂ ਦਾ ਵੀ ਨਿਰਮਾਣ ਕਰ ਰਿਹਾ ਹੈ ਜਿਹਨਾਂ ਵਿਚ ਖੇਤਰੀ ਅਤੇ ਵਿਸ਼ਵ ਪੱਧਰ ਦੇ ਟੀਚਿਆਂ ਤੱਕ ਮਾਰ ਕਰਨ ਦੀ ਸਮਰਥਾ ਹੈ।