ਨੋਬਲ ਸ਼ਾਂਤੀ ਪੁਰਸਕਾਰ ਵਿਜੇਤਾ ਮਲਾਲਾ ਯੂਸਫ਼ਜਈ ਕਰੀਬ ਛੇ ਸਾਲ ਬਾਅਦ ਅਪਣੇ ਵਤਨ ਪਾਕਿਸਤਾਨ ਵਾਪਸ ਪਰਤ ਰਹੀ ਹੈ।
ਇਸਲਾਮਾਬਾਦ : ਨੋਬਲ ਸ਼ਾਂਤੀ ਪੁਰਸਕਾਰ ਵਿਜੇਤਾ ਮਲਾਲਾ ਯੂਸਫ਼ਜਈ ਕਰੀਬ ਛੇ ਸਾਲ ਬਾਅਦ ਅਪਣੇ ਵਤਨ ਪਾਕਿਸਤਾਨ ਵਾਪਸ ਪਰਤ ਰਹੀ ਹੈ। ਸਾਲ 2012 ਵਿਚ ਤਾਲਿਬਾਨੀ ਅਤਿਵਾਦੀਆਂ ਵਲੋਂ ਕੀਤੇ ਗਏ ਹਮਲੇ ਤੋਂ ਬਾਅਦ ਮਲਾਲਾ ਦੀ ਇਹ ਪਹਿਲੀ ਪਾਕਿਸਤਾਨ ਯਾਤਰਾ ਹੈ। ਮਲਾਲਾ ਨੂੰ ਪਾਕਿਸਤਾਨ ਵਿਚ 9 ਅਕਤੂਬਰ 2012 ਨੂੰ ਅਤਿਵਾਦੀਆਂ ਨੇ ਸਿਰ ਵਿਚ ਗੋਲੀ ਮਾਰ ਦਿਤੀ ਸੀ। ਇਸ ਹਮਲੇ ਵਿਚ ਉਹ ਗੰਭੀਰ ਜ਼ਖ਼ਮੀ ਹੋ ਗਈ ਸੀ ਅਤੇ ਉਨ੍ਹਾਂ ਨੂੰ ਇਲਾਜ ਲਈ ਬ੍ਰਿਟੇਨ ਲਿਜਾਇਆ ਗਿਆ ਸੀ।
ਪਾਕਿਸਤਾਨੀ ਅਧਿਕਾਰੀ ਨੇ ਦਸਿਆ ਕਿ ਮਲਾਲਾ ਉਸ ਘਟਨਾ ਤੋਂ ਬਾਅਦ ਪਹਿਲੀ ਵਾਰ ਪਾਕਿਸਤਾਨ ਪਰਤੀ ਹੈ, ਜਦੋਂ ਸਾਲ 2012 ਵਿਚ ਲੜਕੀਆਂ ਦੇ ਲਈ ਸਿੱਖਿਆ ਦੀ ਵਕਾਲਤ ਕਰਨ ਦੇ ਲਈ ਤਾਲਿਬਾਨ ਦੇ ਇਕ ਹਮਲਾਵਰ ਨੇ ਉਸ ਦੇ ਸਿਰ ਵਿਚ ਗੋਲੀ ਮਾਰ ਦਿਤੀ ਸੀ। ਦਸ ਦਈਏ ਕਿ ਇਸ ਹਮਲੇ ਤੋਂ ਬਾਅਦ ਮਲਾਲਾ ਨੇ ਪਾਕਿਸਤਾਨ ਛੱਡ ਦਿਤਾ ਸੀ ਅਤੇ ਉਹ ਇੰਗਲੈਂਡ ਵਿਚ ਰਹਿਣ ਲੱਗੀ ਸੀ।
ਪਾਕਿ ਮੀਡੀਆ ਮੁਤਾਬਕ ਵੀਰਵਾਰ ਨੂੰ ਸਵੇਰੇ ਕਰੀਬ 1.41 ਵਜੇ ਪਾਕਿਸਤਾਨ ਦੇ ਬੇਨਜ਼ੀਰ ਭੁੱਟੋ ਇੰਟਰਨੈਸ਼ਨਲ ਏਅਰਪੋਰਟ 'ਤੇ ਉਨ੍ਹਾਂ ਦਾ ਜਹਾਜ਼ ਉਤਰਿਆ। ਉਨ੍ਹਾਂ ਦੇ ਪਾਕਿਸਤਾਨ ਪੁੱਜਣ 'ਤੇ ਸੁਰੱਖਿਆ ਦੇ ਪੁਖ਼ਤਾ ਇੰਤਜ਼ਾਮ ਕੀਤੇ ਗਏ ਸਨ। ਜਹਾਜ਼ ਤੋਂ ਉਤਰਨ ਦੇ ਬਾਅਦ ਉਨ੍ਹਾਂ ਨੂੰ ਸਖ਼ਤ ਸੁਰੱਖਿਆ ਦੇ ਵਿਚਕਾਰ ਇਕ ਸਥਾਨਕ ਹੋਟਲ ਵਿਚ ਲਿਜਾਇਆ ਗਿਆ। ਸੁਰੱਖਿਆ ਦੇ ਮੱਦੇਨਜ਼ਰ ਉਨ੍ਹਾਂ ਦੀ ਯਾਤਰਾ ਦਾ ਵੇਰਵਾ ਗੁਪਤ ਰੱਖਿਆ ਗਿਆ ਹੈ।
ਜ਼ਿਕਰਯੋਗ ਹੈ ਕਿ ਮਲਾਲਾ ਨੇ 2018 ਦੇ ਜਨਵਰੀ ਵਿਚ ਦਾਵੋਸ ਵਿਚ ਕਰਵਾਈ ਵਿਸ਼ਵ ਆਰਥਿਕ ਮੰਚ ਦੀ ਸਾਲਾਨਾ ਮੀਟਿੰਗ ਵਿਚ ਕਿਹਾ ਸੀ ਕਿ ਮੈਨੂੰ ਵਿਸਵਾਸ਼ ਹੈ ਕਿ ਮੈਂ ਇਕ ਦਿਨ ਪਾਕਿਸਤਾਨ ਜ਼ਰੂਰ ਜਾਵਾਂਗੀ ਅਤੇ ਅਪਣੇ ਦੇਸ਼ ਨੂੰ ਦੇਖਾਂਗੀ। ਦਸਿਆ ਜਾ ਰਿਹਾ ਹੈ ਕਿ ਮਲਾਲਾ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਸ਼ਾਹਿਦ ਖਾਕਾਨ ਅੱਬਾਸੀ ਨਾਲ ਵੀ ਮੁਲਾਕਾਤ ਕਰ ਸਕਦੀ ਹੈ। ਰਵਾਇਤੀ ਪਾਕਿਸਤਾਨੀ ਪਹਿਰਾਵੇ ਵਿਚ ਪਾਕਿਸਤਾਨ ਪੁੱਜੀ ਮਲਾਲਾ ਨਾਲ ਉਨ੍ਹਾਂ ਦੀ ਮਾਂ ਅਤੇ ਪਿਤਾ ਵੀ ਏਅਰਪੋਰਟ 'ਤੇ ਦੇਖੇ ਗਏ।
ਜਾਣਕਾਰੀ ਅਨੁਸਾਰ ਮਲਾਲਾ ਅਪਣੇ ਪਰਿਵਾਰ ਅਤੇ ਮਲਾਲਾ ਫੰਡ ਦੇ ਸੀਈਓ ਦੇ ਨਾਲ 'ਮੀਟ ਦਿ ਮਲਾਲਾ' ਪ੍ਰੋਗਰਾਮ ਵਿਚ ਸ਼ਾਮਲ ਹੋਵੇਗੀ। ਉਹ ਚਾਰ ਦਿਨਾਂ ਤਕ ਪਾਕਿਸਤਾਨ ਵਿਚ ਰਹੇਗੀ। ਜ਼ਿਕਰਯੋਗ ਹੈ ਕਿ ਦੁਨੀਆਂ ਭਰ ਵਿਚ ਲੜਕੀਆਂ ਦੀ ਸਿੱਖਿਆ ਲਈ ਮਲਾਲਾ ਨੇ ਮਲਾਲਾ ਫ਼ੰਡ ਦੀ ਸਥਾਪਨਾ ਕੀਤੀ ਹੈ। ਦਰਅਸਲ ਮਲਾਲਾ ਪੱਛਮ ਉੱਤਰ ਪਾਕਿਸਤਾਨ ਵਿਚ ਸਾਰੇ ਬੱਚਿਆਂ ਲਈ ਸਿੱਖਿਆ ਦੇ ਅਧਿਕਾਰ ਲਈ ਮੁਹਿੰਮ ਚਲਾ ਰਹੀ ਸੀ। ਉਹ ਸਾਰੇ ਲੋਕਾਂ ਨੂੰ ਤਾਲਿਬਾਨੀ ਦੇ ਹੁਕਮਨਾਮਿਆਂ ਨੂੰ ਦਰਕਿਨਾਰ ਕਰਕੇ ਅਪਣੀਆਂ ਭੈਣਾਂ-ਬੇਟੀਆਂ ਨੂੰ ਸਕੂਲ ਭੇਜਣ ਦੀ ਵਕਾਲਤ ਕਰਦੀ ਸੀ। ਇਸੇ ਤੋਂ ਨਰਾਜ਼ ਹੋ ਕੇ ਤਾਲਿਬਾਨੀਆਂ ਨੇ ਉਸ 'ਤੇ ਹਮਲਾ ਕੀਤਾ ਸੀ।