'ਆਪ' ਅਤੇ ਕਾਂਗਰਸ, ਦੁਹਾਂ ਦੀ ਫੁੱਟ ਸਾਹਮਣੇ ਹੈ ਅਤੇ ਨਵਾਂ ਅਕਾਲੀ ਦਲ ਸਾਰੇ ਰੁੱਸੇ ਲੀਡਰਾਂ ਨੂੰ ਖਿੱਚ ਸਕਦਾ ਹੈ........
'ਆਪ' ਅਤੇ ਕਾਂਗਰਸ, ਦੁਹਾਂ ਦੀ ਫੁੱਟ ਸਾਹਮਣੇ ਹੈ ਅਤੇ ਨਵਾਂ ਅਕਾਲੀ ਦਲ ਸਾਰੇ ਰੁੱਸੇ ਲੀਡਰਾਂ ਨੂੰ ਖਿੱਚ ਸਕਦਾ ਹੈ
ਅੱਜ ਲੋਕ ਇਨ੍ਹਾਂ ਸਾਰੇ ਬਾਗ਼ੀਆਂ ਵਲ ਨੀਝ ਲਾ ਕੇ ਵੇਖ ਰਹੇ ਹਨ ਕਿਉਂਕਿ ਇਨ੍ਹਾਂ ਨੇ ਸਿਧਾਂਤਾਂ ਖ਼ਾਤਰ ਅਪਣੇ ਹਾਈਕਮਾਂਡ ਵਿਰੁਧ ਬਗ਼ਾਵਤ ਕੀਤੀ ਹੈ। ਬਗ਼ਾਵਤ ਵੀ ਉਨ੍ਹਾਂ ਵਿਰੁਧ ਕਰ ਰਹੇ ਹਨ ਜਿਨ੍ਹਾਂ ਕੋਲ ਪੈਸਾ ਹੈ, ਤਾਕਤ ਹੈ ਤੇ ਮੀਡੀਆ ਹੈ। ਪਰ ਅੱਜ ਬਾਗ਼ੀਆਂ ਲਈ ਲੋਕਾਂ ਦੇ ਮਨਾਂ ਵਿਚ ਇੱਜ਼ਤ ਹੈ। ਨਵਾਂ ਅਕਾਲੀ ਦਲ ਪੰਜਾਬ ਦੀ ਸਿਆਸਤ ਵਿਚ ਇਕ ਵੱਡੀ ਹਲਚਲ ਲਿਆ ਸਕਦਾ ਹੈ। ਇਹ ਸਿਰਫ਼ ਅਕਾਲੀ ਦਲ ਬਾਦਲ ਹੀ ਨਹੀ, 'ਆਪ' ਅਤੇ ਕਾਂਗਰਸ ਨੂੰ ਵੀ ਚੁਨੌਤੀ ਦੇਣ ਦੇ ਸਮਰੱਥ ਹੈ।
Ranjit Singh Brahmpura
ਅਕਾਲੀ ਦਲ 'ਚੋਂ ਬਾਹਰ ਕੱਢੇ ਜਾਣ ਤੋਂ ਇਕ ਮਹੀਨਾ ਬਾਅਦ ਅਕਾਲੀ ਦਲ ਦੇ ਸੀਨੀਅਰ ਆਗੂ ਰਣਜੀਤ ਸਿੰਘ ਬ੍ਰਹਮਪੁਰਾ, ਰਤਨ ਸਿੰਘ ਅਜਨਾਲਾ, ਸੇਵਾ ਸਿੰਘ ਸੇਖਵਾਂ ਅਤੇ ਇਨ੍ਹਾਂ ਦੇ ਸਪੁੱਤਰਾਂ ਨੇ ਸੁਖਬੀਰ ਸਿੰਘ ਬਾਦਲ ਅਤੇ ਬਿਕਰਮ ਸਿੰਘ ਮਜੀਠੀਆ ਵਿਰੁਧ ਵੱਡਾ ਕਦਮ ਚੁੱਕ ਲਿਆ ਹੈ। 2020 ਵਿਚ ਅਕਾਲੀ ਦਲ ਨੇ 100 ਸਾਲ ਦਾ ਹੋ ਜਾਣਾ ਹੈ ਪਰ ਇਸ ਵਾਰ ਸ਼ਾਇਦ ਬਾਦਲ ਪ੍ਰਵਾਰ ਅਪਣੇ ਆਪ ਨੂੰ 'ਅਕਾਲੀ ਦਲ' ਅਖਵਾਉਣ ਵਾਲਾ ਇਕੱਲਾ ਪ੍ਰਵਾਰ ਨਹੀਂ ਹੋਵੇਗਾ ਤੇ ਹੋ ਸਕਦੈ, ਉਦੋਂ ਤਕ ਅਸਲੀ ਅਕਾਲੀ ਦਲ ਹੋਣ ਦਾ ਦਾਅਵਾ ਕਿਸੇ ਹੋਰ ਪਾਸੇ ਤੋਂ ਵਜਣਾ ਸ਼ੁਰੂ ਹੋ ਜਾਏ।
Sewa Singh Sekhwan
ਨਵੇਂ ਅਕਾਲੀ ਦਲ ਵਿਚ ਹੁਣ 'ਆਪ' 'ਚੋਂ ਕੱਢੇ ਗਏ ਸੁਖਪਾਲ ਸਿੰਘ ਖਹਿਰਾ ਅਤੇ ਸਾਥੀ ਵੀ ਸ਼ਾਮਲ ਹੋਣ ਦੀ ਤਿਆਰੀ ਵਿਚ ਹਨ। ਬੈਂਸ ਭਰਾ ਵੀ ਇਸ ਪਾਰਟੀ 'ਚ ਸ਼ਾਮਲ ਹੋ ਸਕਦੇ ਹਨ। ਇਹ ਪਾਰਟੀ ਨਾ ਸਿਰਫ਼ ਅਕਾਲੀ ਦਲ ਲਈ ਚੁਨੌਤੀ ਬਣ ਕੇ ਆ ਰਹੀ ਹੈ ਸਗੋਂ ਆਮ ਆਦਮੀ ਪਾਰਟੀ (ਆਪ) ਅਤੇ ਕਾਂਗਰਸ ਦੀ ਅੰਦਰੂਨੀ ਦੁਫੇੜ ਦਾ ਫ਼ਾਇਦਾ ਵੀ ਲੈ ਸਕਦੀ ਹੈ। 'ਆਪ' ਨੇ ਸੁਖਪਾਲ ਸਿੰਘ ਖਹਿਰਾ ਨੂੰ ਪਾਰਟੀ 'ਚੋਂ ਕੱਢ ਕੇ ਅਪਣੀ ਗ਼ਲਤੀ ਦਾ ਅਹਿਸਾਸ ਕਰ ਲਿਆ ਹੈ। ਹੁਣ ਉਹ ਚਾਹੁੰਦੇ ਹਨ ਕਿ ਸੱਭ ਨਾਰਾਜ਼ ਲੋਕ ਵਾਪਸ ਆ ਜਾਣ। ਪਰ ਹੁਣ 'ਆਪ' ਵਿਚ ਪੰਜਾਬ ਦਾ ਤੀਜਾ ਧੜਾ ਬਣੇ ਰਹਿਣ ਦੀ ਸਮਰੱਥਾ ਨਹੀਂ ਰਹੀ।
Rattan Singh Ajnala
ਕੇਜਰੀਵਾਲ ਨੇ ਬਿਕਰਮ ਸਿੰਘ ਮਜੀਠੀਆ ਤੋਂ ਮਾਫ਼ੀ ਮੰਗ ਕੇ ਅਪਣੀ ਕਥਨੀ ਦੀ ਅਹਿਮੀਅਤ ਗਵਾ ਲਈ ਅਤੇ ਭਗਵੰਤ ਮਾਨ ਨੇ ਉਸ ਵੇਲੇ ਕੇਜਰੀਵਾਲ ਦਾ ਸਾਥ ਦੇ ਕੇ ਅਪਣਾ ਅਕਸ ਵਿਗਾੜ ਲਿਆ। ਅੱਜ ਦੇ ਹਾਲਾਤ ਵਿਚ 2019 ਵਿਚ 'ਆਪ' ਸ਼ਾਇਦ ਇਕ ਸੀਟ ਵੀ ਨਾ ਜਿੱਤ ਸਕੇ। ਇਸ ਨਵੇਂ ਬਣਨ ਜਾ ਰਹੇ ਅਕਾਲੀ ਦਲ ਨੇ ਨਵਜੋਤ ਸਿੰਘ ਸਿੱਧੂ ਨੂੰ ਵੀ ਸੱਦਾ ਦੇ ਦਿਤਾ ਹੈ ਅਤੇ ਉਨ੍ਹਾਂ ਵਲੋਂ ਕਰਤਾਰਪੁਰ ਸਾਹਿਬ ਲਾਂਘੇ ਦਾ ਸਾਰਾ ਸਿਹਰਾ ਨਵਜੋਤ ਸਿੰਘ ਸਿੱਧੂ ਦੇ ਸਿਰ ਬੰਨ੍ਹ ਕੇ ਕਾਂਗਰਸ ਦੀ ਅੰਦਰੂਨੀ ਕਮਜ਼ੋਰੀ ਦਾ ਫ਼ਾਇਦਾ ਉਠਾਇਆ ਜਾ ਰਿਹਾ ਹੈ।
Sukhdev Singh Dhindsa
ਪੰਜਾਬ ਦੇ ਕਾਂਗਰਸੀ ਆਗੂਆਂ ਨੇ ਨਵਜੋਤ ਸਿੰਘ ਸਿੱਧੂ ਵਿਰੁਧ ਆਵਾਜ਼ ਚੁਕ ਕੇ ਸਪੱਸ਼ਟ ਸੰਕੇਤ ਦੇ ਦਿਤਾ ਹੈ ਕਿ ਕਾਂਗਰਸ ਅੰਦਰ ਸੱਭ ਠੀਕ ਨਹੀਂ ਹੈ। ਵਿਰੋਧੀਆਂ ਵਲੋਂ ਨਵਜੋਤ ਸਿੰਘ ਸਿੱਧੂ ਦੇ ਬਿਆਨਾਂ ਨੂੰ ਤੋੜ-ਮਰੋੜ ਕੇ ਪੇਸ਼ ਕਰਨਾ ਤਾਂ ਸਮਝ ਵਿਚ ਆਉਂਦਾ ਹੈ ਪਰ ਸਿੱਧੂ ਦੀ ਅਪਣੀ ਪਾਰਟੀ ਨੇ ਉਨ੍ਹਾਂ ਦੇ ਬਿਆਨ ਨੂੰ ਤੋੜ-ਮਰੋੜ ਕੇ ਖ਼ੁਦ ਗ਼ਲਤੀ ਕਰ ਲਈ ਹੈ। ਰਾਹੁਲ ਗਾਂਧੀ ਕਾਂਗਰਸ ਦੇ ਪ੍ਰਧਾਨ ਹਨ, ਇਹ ਤਾਂ ਸਾਰੇ ਹੀ ਜਾਣਦੇ ਹਨ। ਮੁੱਖ ਮੰਤਰੀ ਨੂੰ ਖ਼ੁਦ ਚੋਣਾਂ ਤੋਂ ਪਹਿਲਾਂ ਇਹੀ ਕਬੂਲਣਾ ਪਿਆ ਅਤੇ ਮੁੱਖ ਮੰਤਰੀ ਛੱਡੋ, ਸਾਬਕਾ ਪ੍ਰਧਾਨ ਮੰਤਰੀ ਡਾ. ਮਨਮੋਹਨ ਸਿੰਘ ਨੂੰ ਵੀ ਰਾਹੁਲ ਗਾਂਧੀ ਸਾਹਮਣੇ ਚੁਪ ਰਹਿਣਾ ਪਿਆ ਸੀ।
Navjot Singh Sidhu
ਸੋ ਕੈਪਟਨ ਕਹੋ, ਪ੍ਰਧਾਨ ਕਹੋ, ਕਾਂਗਰਸ ਦੀ ਵਾਗਡੋਰ ਰਾਹੁਲ ਗਾਂਧੀ ਦੇ ਹੱਥ ਵਿਚ ਹੈ। ਇਹ ਮੁੱਦਾ ਚੁੱਕ ਕੇ ਕਾਂਗਰਸੀਆਂ ਨੇ ਕੇਜਰੀਵਾਲ ਵਾਂਗ ਅਪਣੇ ਪੈਰਾਂ ਉਤੇ ਕੁਹਾੜੀ ਮਾਰ ਲਈ ਹੈ। ਕਾਂਗਰਸ, ਖ਼ਾਸ ਕਰ ਕੇ ਪੰਜਾਬ ਪ੍ਰਦੇਸ਼ ਕਾਂਗਰਸ ਕੋਲ ਬੜਾ ਸ਼ਾਨਦਾਰ ਮੌਕਾ ਸੀ ਕਿ ਉਹ ਪੰਜਾਬ ਦੇ ਲੋਕਾਂ ਦਾ ਦਿਲ ਜਿੱਤ ਲੈਂਦੀ ਅਤੇ ਸਿੱਧੂ ਦੀ ਪ੍ਰਾਪਤੀ ਨੂੰ ਕਾਂਗਰਸ ਅਤੇ ਕੈਪਟਨ ਅਮਰਿੰਦਰ ਸਿੰਘ ਦੀ ਪ੍ਰਾਪਤੀ ਬਣਾ ਕੇ ਪੇਸ਼ ਕਰਦੀ। ਜੋ ਕੰਮ 70 ਸਾਲਾਂ ਤੋਂ ਕੋਈ ਸਰਕਾਰ ਨਹੀਂ ਸੀ ਕਰ ਸਕੀ, ਅਤੇ ਜੋ ਕਾਂਗਰਸ ਦੇ ਇਕ ਮੰਤਰੀ ਦੇ ਨਿਜੀ ਸਬੰਧਾਂ ਕਰ ਕੇ ਹੀ ਹੋ ਗਿਆ, ਉਹ ਕਾਂਗਰਸ ਦੀ ਜਿੱਤ ਵਜੋਂ ਪੇਸ਼ ਕੀਤਾ ਜਾ ਸਕਦਾ ਸੀ।
Arvind Kejriwal And Sukhpal Khaira
ਪਰ ਕਾਂਗਰਸ ਦੇ ਆਗੂਆਂ ਨੇ ਅਪਣੀ ਈਰਖਾ ਦਾ ਪ੍ਰਦਰਸ਼ਨ ਕਰ ਕੇ ਇਸ ਨੂੰ ਸਿਰਫ਼ ਅਤੇ ਸਿਰਫ਼ ਨਵਜੋਤ ਸਿੰਘ ਸਿੱਧੂ ਦੀ ਜਿੱਤ ਬਣਾ ਧਰਿਆ ਹੈ। ਅੱਜ ਅਕਾਲੀ ਦਲ ਬੜਾ ਖ਼ੁਸ਼ ਹੈ ਕਿ ਕਾਂਗਰਸ ਅੰਦਰ ਲੜਾਈਆਂ ਚਲ ਰਹੀਆਂ ਹਨ ਜਿਸ ਨਾਲ ਧਿਆਨ ਉਨ੍ਹਾਂ ਵਲੋਂ ਹੱਟ ਗਿਆ ਹੈ। ਉਹ ਸੋਚਣ ਲੱਗ ਪਏ ਹਨ ਕਿ ਕਾਂਗਰਸ ਵੀ ਕਮਜ਼ੋਰ ਹੋ ਰਹੀ ਹੈ ਜਿਸ ਦਾ ਫ਼ਾਇਦਾ 2019 'ਚ ਉਨ੍ਹਾਂ ਨੂੰ ਮਿਲ ਸਕਦਾ ਹੈ। ਪਰ ਨਵੇਂ ਅਕਾਲੀ ਦਲ ਨੇ ਸਾਰੀਆਂ ਪਾਰਟੀਆਂ ਦੇ ਰੁੱਸੇ ਹੋਏ ਆਗੂਆਂ ਨੂੰ ਇਕੱਠੇ ਕਰਨ ਦੀ ਤਿਆਰੀ ਕਰ ਲਈ ਹੈ ਜੋ ਕਿ ਉਨ੍ਹਾਂ ਨੂੰ ਪੰਜਾਬ ਦਾ ਤੀਜਾ ਧੜਾ ਬਣਾ ਸਕਦੀ ਹੈ।
Bhagwant Mann
ਹੁਣ ਇਸ ਪਾਰਟੀ ਵਾਸਤੇ ਬੜਾ ਜ਼ਰੂਰੀ ਹੈ ਕਿ ਉਹ ਉਨ੍ਹਾਂ ਸਾਰੇ ਮੁੱਦਿਆਂ ਤੋਂ ਸਬਕ ਸਿਖੇ ਜਿਨ੍ਹਾਂ ਨੇ ਅਕਾਲੀ ਦਲ (ਬਾਦਲ) ਨੂੰ ਕਮਜ਼ੋਰ ਕੀਤਾ ਹੈ। ਅੱਜ ਲੋਕ ਇਨ੍ਹਾਂ ਸਾਰੇ ਬਾਗ਼ੀਆਂ ਵਲ ਨੀਝ ਲਾ ਕੇ ਵੇਖ ਰਹੇ ਹਨ ਕਿਉਂਕਿ ਇਨ੍ਹਾਂ ਨੇ ਸਿਧਾਂਤਾਂ ਖ਼ਾਤਰ ਅਪਣੇ ਹਾਈਕਮਾਂਡ ਵਿਰੁਧ ਬਗ਼ਾਵਤ ਕੀਤੀ ਹੈ। ਬਗ਼ਾਵਤ ਵੀ ਉਨ੍ਹਾਂ ਵਿਰੁਧ ਕਰ ਰਹੇ ਹਨ ਜਿਨ੍ਹਾਂ ਕੋਲ ਪੈਸਾ ਹੈ, ਤਾਕਤ ਹੈ ਤੇ ਮੀਡੀਆ ਹੈ। ਪਰ ਅੱਜ ਬਾਗ਼ੀਆਂ ਲਈ ਲੋਕਾਂ ਦੇ ਮਨਾਂ ਵਿਚ ਇੱਜ਼ਤ ਹੈ। ਨਵਾਂ ਅਕਾਲੀ ਦਲ ਪੰਜਾਬ ਦੀ ਸਿਆਸਤ ਵਿਚ ਇਕ ਵੱਡੀ ਹਲਚਲ ਲਿਆ ਸਕਦਾ ਹੈ। ਇਹ ਸਿਰਫ਼ ਅਕਾਲੀ ਦਲ ਬਾਦਲ ਹੀ ਨਹੀਂ, 'ਆਪ' ਅਤੇ ਕਾਂਗਰਸ ਨੂੰ ਵੀ ਚੁਨੌਤੀ ਦੇਣ ਦੇ ਸਮਰੱਥ ਹੋ ਸਕਦਾ ਹੈ।
-ਨਿਮਰਤ ਕੌਰ
