ਸੁਸ਼ਾਂਤ ਸਿੰਘ ਰਾਜਪੂਤ ਵਲੋਂ ਕੀਤੀ ਗਈ ਖ਼ੁਦਕੁਸ਼ੀ ਦਾ ਸਦਮਾ ਹਰ ਆਮ ਖ਼ਾਸ ਨੂੰ ਲੱਗਾ ਹੈ,
ਸੁਸ਼ਾਂਤ ਸਿੰਘ ਰਾਜਪੂਤ ਵਲੋਂ ਕੀਤੀ ਗਈ ਖ਼ੁਦਕੁਸ਼ੀ ਦਾ ਸਦਮਾ ਹਰ ਆਮ ਖ਼ਾਸ ਨੂੰ ਲੱਗਾ ਹੈ, ਇਸ ਕਰ ਕੇ ਨਹੀਂ ਕਿ ਉਹ ਇਕ ਫ਼ਿਲਮੀ ਅਦਾਕਾਰ ਸੀ ਅਤੇ ਹਰ ਕੋਈ ਉਸ ਦੀ ਅਦਾਕਾਰੀ ਦਾ ਕਾਇਲ ਸੀ। ਸੁਸ਼ਾਂਤ ਸਿੰਘ ਰਾਜਪੂਤ ਦੀ ਮੌਤ ਮਸ਼ਹੂਰ ਅਭਿਨੇਤਰੀ ਸ੍ਰੀ ਦੇਵੀ ਦੀ ਮੌਤ ਨਹੀਂ ਬਲਕਿ ਇਕ ਭਾਰਤੀ ਸੁਪਨੇ ਦੀ ਮੌਤ ਹੋਈ ਹੈ। ਸੁਸ਼ਾਂਤ ਇਕ ਸਾਧਾਰਣ ਪ੍ਰਵਾਰ ਦਾ ਮੁੰਡਾ ਸੀ ਜਿਸ ਕੋਲ ਦਿਮਾਗ਼ ਵੀ ਸੀ ਅਤੇ ਹੁਨਰ ਵੀ ਸੀ।
Sushant Singh Rajput
ਉਹ ਇੰਜੀਨੀਅਰਿੰਗ ਦਾ ਇਮਤਿਹਾਨ ਪਾਸ ਕਰਨ ਦੇ ਬਾਵਜੂਦ ਅਪਣੇ ਡਾਂਸ ਅਤੇ ਐਕਟਿੰਗ ਦੇ ਹੁਨਰ ਨੂੰ ਹੋਰ ਚਮਕਾਉਣ ਲਈ ਨਿਕਲ ਤੁਰਿਆ। ਫ਼ਿਲਮਾਂ ਵਿਚ ਉਹ ਕਿਸੇ ਖ਼ਾਨਦਾਨੀ ਪਿਛੋਕੜ ਕਾਰਨ ਨਹੀਂ ਸੀ ਆਇਆ। ਫ਼ਿਲਮ ਇੰਡਸਟਰੀ ਵਿਚ ਉਸ ਦਾ ਦਾਖ਼ਲਾ ਏਕਤਾ ਕਪੂਰ ਨੇ ਕਰਵਾਇਆ। ਉਸ ਦਾ ਪਾਲਣ ਪੋਸ਼ਣ ਇਕ ਸਾਧਾਰਣ ਪ੍ਰਵਾਰ ਵਿਚ ਹੋਇਆ।
Sushant Singh Rajput
ਸੁਸ਼ਾਂਤ ਇਕ ਆਮ ਵਿਅਕਤੀ ਸੀ ਜੋ ਅਪਣੀ ਅਦਾਕਾਰੀ ਕਾਰਨ ਅਨੇਕਾਂ ਭਾਰਤੀਆਂ ਦੇ ਦਿਲਾਂ 'ਤੇ ਰਾਜ ਕਰਨ ਵਿਚ ਸਫ਼ਲ ਹੋਇਆ। ਸੁਸ਼ਾਂਤ ਨੇ ਸਿਤਾਰਿਆਂ ਦੀ ਮਹਾਂ ਨਗਰੀ ਬਾਲੀਵੁੱਡ ਵਿਚ ਥੋੜੇ ਸਮੇਂ ਵਿਚ ਹੀ ਉਚਾਈਆਂ ਨੂੰ ਛੂਹਿਆ। ਉਸ ਕੋਲ ਹੁਨਰ ਸੀ ਅਤੇ ਉਸ ਦੇ ਹੁਨਰ ਨੂੰ ਕਦਰ ਅਤੇ ਕਿਸਮਤ ਦਾ ਸਾਥ ਮਿਲਿਆ। ਪੈਸਾ, ਸ਼ੌਹਰਤ ਹੋਣ ਦੇ ਬਾਵਜੂਦ ਸ਼ੁਸ਼ਾਂਤ ਦੇ ਮਨ ਵਿਚ ਇਕ ਗਹਿਰੀ ਉਦਾਸੀ ਰਹੀ ਹੋਵੇਗੀ ਜਿਸ ਦੇ ਅਸਰ ਹੇਠ ਉਸ ਨੇ ਸੁਨਹਿਰੀ ਜੀਵਨ ਸਾਹਮਣੇ ਹੋਣ ਦੇ ਬਾਵਜੂਦ, ਖ਼ੁਦਕੁਸ਼ੀ ਕਰਨ ਦਾ ਫ਼ੈਸਲਾ ਕਰ ਲਿਆ।
Sushant Rajput
ਸੁਸ਼ਾਂਤ ਦੀ ਜ਼ਿੰਦਗੀ ਅਤੇ ਉਸ ਦਾ ਭਿਆਨਕ ਅੰਤ ਇਹ ਸਵਾਲ ਖੜੇ ਕਰਦਾ ਹੈ ਕਿ ਉਸ ਨੂੰ ਆਖ਼ਰ ਹੋਰ ਕੀ ਚਾਹੀਦਾ ਸੀ? ਜ਼ਿੰਦਗੀ ਕੋਲ ਜੋ ਕੁੱਝ ਵੀ ਸੀ, ਉਸ ਨੇ ਸੁਸ਼ਾਂਤ ਨੂੰ ਉਹ ਸੱਭ ਕੁੱਝ ਦੇ ਦਿਤਾ, ਫਿਰ ਉਹ ਉਦਾਸ ਕਿਉਂ ਸੀ? ਸੁਸ਼ਾਂਤ ਦਾ ਵਿਆਹ ਨਵੰਬਰ ਮਹੀਨੇ ਵਿਚ ਹੋਣਾ ਤੈਅ ਸੀ ਪਰ ਫਿਰ ਵੀ ਉਸ ਦਾ ਮਨ ਪੁਰਾਣੇ ਪਿਆਰ ਵਿਚ ਖੁਭਿਆ ਰਿਹਾ। ਕੀ ਇਹ ਹੀ ਉਸ ਦੀ ਮੌਤ ਦਾ ਇਕ ਕਾਰਨ ਸੀ?
Sanjana Sanghi & Sushant Rajput
ਜਾਂ ਫਿਰ ਸ਼ਾਇਦ ਉਸ ਨੂੰ ਕੁੱਝ ਆਰਥਕ ਦਿੱਕਤਾਂ ਹੋਣ। ਜੋ ਵੀ ਕਾਰਨ ਸੀ, ਉਸ ਨੇ ਕੁਦਰਤ ਅਤੇ ਦੁਨਿਆਵੀ ਤੋਹਫ਼ਿਆਂ ਨੂੰ ਨਕਾਰ ਦਿਤਾ ਅਤੇ ਬਾਕੀ ਸਾਰਿਆਂ ਲਈ ਇਕ ਸਵਾਲ ਖੜਾ ਕਰ ਦਿਤਾ। ਅਸੀ ਕਿਸ ਤਰ੍ਹਾਂ ਅੱਜ ਦੀ ਪੀੜ੍ਹੀ ਨੂੰ ਨਿਤ ਨਵੀਂ ਜੰਗ ਵਾਸਤੇ ਤਿਆਰ ਕਰੀਏ? ਸਾਡੇ ਪਾਲਣ-ਪੋਸਣ ਵਿਚ ਕੀ ਕਮੀ ਹੈ ਜੋ ਅੱਜ ਦੇ ਬੱਚੇ ਮਾਨਸਿਕ ਉਦਾਸੀ ਦਾ ਸ਼ਿਕਾਰ ਹੁੰਦੇ ਜਾ ਰਹੇ ਹਨ?
Mobile Game
ਕਦੇ ਕੋਈ ਗ਼ਰੀਬ, ਲਾਚਾਰ, ਬਿਮਾਰ ਜਾਂ ਕਰਜ਼ੇ 'ਚ ਡੁਬਿਆ ਵਿਅਕਤੀ ਅਪਣੀ ਜਾਨ ਖ਼ੁਦ ਗੁਆ ਲੈਂਦਾ ਹੈ ਤਾਂ ਉਸ ਦੀ ਜ਼ਿੰਦਗੀ 'ਚ ਹਾਰ ਦਾ ਮਤਲਬ ਸਮਝ ਵਿਚ ਆ ਜਾਂਦਾ ਹੈ ਪਰ ਸੱਭ ਕੁੱਝ ਹੋਣ ਦੇ ਬਾਵਜੂਦ ਜਿਹੜਾ ਅਪਣੇ ਆਪ ਨੂੰ ਖ਼ੁਸ਼ਨਸੀਬ ਨਾ ਸਮਝੇ, ਉਸ ਦਾ ਕੀ ਕੀਤਾ ਜਾਵੇ? ਸੁਸ਼ਾਂਤ ਇਕੱਲਾ ਹੀ ਇਸ ਬੀਮਾਰੀ ਦਾ ਮਰੀਜ਼ ਨਹੀਂ ਸੀ, ਅੱਜ ਦੀ ਪੀੜ੍ਹੀ ਆਮ ਤੌਰ 'ਤੇ ਮਾਨਸਕ ਪੱਖੋਂ ਕਮਜ਼ੋਰ ਹੈ। ਪਿਛਲੇ ਹਫ਼ਤੇ ਇਕ ਬੱਚੇ ਨੂੰ ਮੋਬਾਈਲ 'ਤੇ ਗੇਮ ਨਾ ਖੇਡਣ ਦਿਤੀ ਗਈ ਤਾਂ ਉਸ ਨੇ ਵੀ ਸੁਸ਼ਾਂਤ ਵਾਂਗ ਹਾਰ ਮੰਨ ਲਈ ਅਤੇ ਪੰਜਾਬ ਦੀ ਇਕ ਬੱਚੀ ਕੋਲ ਵੀ ਇਸੇ ਤਰ੍ਹਾਂ ਦਾ ਕੋਈ ਕਾਰਨ ਸੀ ਜਿਸ ਨੇ ਉਸ ਨੂੰ ਖ਼ੁਦਕੁਸ਼ੀ ਕਰਨ ਲਈ ਮਜਬੂਰ ਕਰ ਦਿਤਾ।
Sushant Singh Rajput
ਅੱਜ ਦੇ ਦੌਰ ਵਿਚ ਮਾਨਸਿਕ ਉਦਾਸੀ ਨੂੰ ਸੰਜੀਦਗੀ ਨਾਲ ਵੇਖਣ ਅਤੇ ਉਸ ਨੂੰ ਦੂਰ ਕਰਨ ਦੀ ਜ਼ਰੂਰਤ ਹੈ। ਇਹ ਉਹ ਪੀੜ੍ਹੀ ਨਹੀਂ ਜਿਸ ਨੂੰ ਪੁਰਾਣੇ ਜ਼ਮਾਨਿਆਂ ਵਿਚ ਥੱਪੜ ਮਾਰ ਕੇ ਸਿੱਧਾ ਕੀਤਾ ਜਾ ਸਕਦਾ ਸੀ। ਇਹ ਉਹ ਪੀੜ੍ਹੀ ਨਹੀਂ ਜਿਸ ਨੂੰ ਮੰਤਰ ਦੋਹਰਾ-ਦੋਹਰਾ ਕੇ ਇਕ ਖ਼ਾਸ ਦਿਸ਼ਾ ਵਲ ਚਲਾਇਆ ਜਾ ਸਕੇ। ਇਹ ਉਹ ਪੀੜ੍ਹੀ ਨਹੀਂ ਜਿਸ ਨੂੰ ਸਿਰਫ਼ ਰੋਟੀ, ਕਪੜੇ ਅਤੇ ਮਕਾਨ ਦੀ ਖੋਜ ਹੈ।
Sushant Singh Rajput
ਇਹ ਤਾਂ ਉਹ ਪੀੜ੍ਹੀ ਹੈ ਜਿਸ ਨੂੰ ਉੱਚੀਆਂ ਉਡਾਰੀਆਂ ਮਾਰਨ ਦੀ ਤਾਂਘ ਹੈ ਅਤੇ ਜਿਸ ਨੂੰ ਭੁੱਖਮਰੀ ਦਾ ਡਰ ਨਹੀਂ ਪਰ ਇਸ ਪੀੜ੍ਹੀ ਨੂੰ ਮਾਨਸਿਕ ਤੌਰ 'ਤੇ ਤਿਆਰ ਨਹੀਂ ਕੀਤਾ ਜਾ ਰਿਹਾ। ਅੱਜ ਦੀ ਪੀੜ੍ਹੀ ਨੂੰ ਜੀਵਨ ਵਿਚ ਖੁਸ਼ੀ ਦੇ ਨਾਲ ਨਾਲ ਗ਼ਮ ਨੂੰ ਕਬੂਲਣਾ ਨਹੀਂ ਸਿਖਾਇਆ ਜਾ ਰਿਹਾ। ਇਸ ਪੀੜ੍ਹੀ ਨੂੰ ਪਾਲਣ ਵਾਲੇ ਮਾਪਿਆਂ ਦਾ ਵੀ ਕੋਈ ਕਸੂਰ ਨਹੀਂ ਕਿਉਂਕਿ ਉਨ੍ਹਾਂ ਨੂੰ ਅਪਣੇ ਅਹਿਸਾਸਾਂ ਨੂੰ ਸਮਝਣ ਦੀ ਇਜਾਜ਼ਤ ਨਹੀਂ ਸੀ ਅਤੇ ਨਾ ਹੀ ਅਪਣੇ ਸੁਪਨਿਆਂ ਪਿਛੇ ਇੰਜੀਨੀਅਰਿੰਗ ਦੇ ਦਾਖ਼ਲੇ ਨੂੰ ਠੋਕਰ ਮਾਰਨ ਦੀ ਇਜਾਜ਼ਤ ਸੀ।
Sushant Singh Rajput
ਉਨ੍ਹਾਂ ਨੇ ਅਪਣੇ ਬੱਚਿਆਂ ਨੂੰ ਅਪਣੇ ਵਾਂਗ ਕੈਦ ਨਹੀਂ ਦਿਤੀ ਪਰ ਆਜ਼ਾਦੀ ਨਾਲ ਜ਼ਿੰਦਗੀ ਵਿਚ ਆਉਣ ਵਾਲੀਆਂ ਮੁਸ਼ਕਲਾਂ ਨਾਲ ਨਜਿੱਠਣ ਦੀ ਤਿਆਰੀ ਵੀ ਨਹੀਂ ਕਰਵਾਈ। ਅੱਜ ਦੀ ਪੀੜ੍ਹੀ ਜ਼ਿੰਦਗੀ ਵਿਚ ਥੋੜੀ ਜਿਹੀ ਸਮੱਸਿਆ ਆਉਣ 'ਤੇ ਉਸ ਨੂੰ ਸੁਲਝਾਉਣ ਦੀ ਬਜਾਏ ਨਸ਼ਿਆਂ ਦਾ ਸਹਾਰਾ ਲੈਂਦੀ ਹੈ। ਇਸ ਤਰ੍ਹਾਂ ਅੱਜਕਲ ਰਿਸ਼ਤੇ ਕਮਜ਼ੋਰ ਹੁੰਦੇ ਜਾ ਰਹੇ ਹਨ ਕਿਉਂਕਿ ਅੱਜ ਦੀ ਪੀੜ੍ਹੀ ਨੂੰ ਅਪਣੇ ਸੁਪਨਿਆਂ ਬਾਰੇ ਪਤਾ ਹੀ ਨਹੀਂ ਕਿਉਂਕਿ ਅਸੀ ਇਨ੍ਹਾਂ ਨੂੰ ਸਹੀ ਰਸਤਾ ਨਹੀਂ ਦਿਖਾ ਸਕੇ ਅਤੇ ਇਹ ਅੰਤ ਵਿਚ ਹਾਰ ਜਾਂਦੇ ਹਨ।
Sushant Singh Rajput
ਸੁਸ਼ਾਂਤ ਅਤੇ ਜ਼ਿਆ ਖ਼ਾਨ ਵਰਗੇ ਨਾਮਣਾ ਖੱਟਣ ਵਾਲਿਆਂ ਦੀ ਹਾਰ ਦੇ ਦੁਖਾਂਤ ਤੋਂ ਅਪਣੇ ਬੱਚਿਆਂ ਨੂੰ ਦੁੱਖ-ਸੁਖ ਦੋਹਾਂ ਨਾਲ ਦੋਸਤੀ ਦਾ ਪਾਠ ਸਿਖਾਉਣ ਦਾ ਸਬਕ ਲੈ ਸਕਦੇ ਹਾਂ ਤਾਕਿ ਸਾਡੇ ਬੱਚੇ ਸਿਰਫ਼ ਦੌਲਤ ਦੇ ਧਨੀ ਹੀ ਨਹੀਂ ਬਲਕਿ ਜ਼ਿੰਦਗੀ ਦੇ ਹਰ ਪਹਿਲੂ ਵਿਚ ਅਮੀਰ ਬਣ ਸਕਣ। -ਨਿਮਰਤ ਕੌਰ
