ਪੰਥਕ ਜਥੇਬੰਦੀਆਂ ਸ਼ਹੀਦਾਂ ਬਾਰੇ ਸਹੀ ਜਾਣਕਾਰੀ ਜੁਟਾਉਣ ਤੇ ਪਿੰਡ-ਪਿੰਡ ਜਾ ਕੇ ਸ਼ਹੀਦ ਸਿੰਘਾਂ ਬਾਰੇ ਪਤਾ ਕਰਨ
ਅੰਮ੍ਰਿਤਸਰ : ਦਲ ਖ਼ਾਲਸਾ ਨੇ ਜੂਨ 1984 ਦੇ ਘੱਲੂਘਾਰੇ ਦੌਰਾਨ ਜੂਝ ਕੇ ਸ਼ਹਾਦਤਾਂ ਪਾਉਣ ਵਾਲਿਆਂ ਸਿੰਘ-ਸਿੰਘਣੀਆਂ ਦੀ 'ਸ਼ਹੀਦੀ ਡਾਇਰੈਟਕਟਰੀ ਦਾ ਚੌਥਾ ਐਡੀਸ਼ਨ ਛਾਪਣ ਦਾ ਫ਼ੈਸਲਾ ਕੀਤਾ ਹੈ। ਸ਼ਹੀਦੀ ਡਾਇਰੈਟਕਟਰੀ ਦੇ ਅਗਲੇ ਐਡੀਸ਼ਨ ਨੂੰ ਛਾਪਣ ਦਾ ਐਲਾਨ ਕਰਦਿਆਂ ਦਲ ਖ਼ਾਲਸਾ ਆਗੂ ਕੰਵਰਪਾਲ ਸਿੰਘ ਅਤੇ ਸਰਬਜੀਤ ਸਿੰਘ ਘੁਮਾਣ ਨੇ ਸਿੱਖ ਸੰਗਤਾਂ, ਸ਼੍ਰੋਮਣੀ ਕਮੇਟੀ ਮੈਂਬਰ ਅਤੇ ਪੰਥਕ ਜਥੇਬੰਦੀਆਂ ਨੂੰ ਅਪੀਲ ਕੀਤੀ ਕਿ ਉਹ ਅਪਣੇ ਇਲਾਕੇ ਵਿਚ ਜੂਨ 84 ਦੇ ਉਨ੍ਹਾਂ ਸ਼ਹੀਦ ਪਰਵਾਰਾਂ ਤਕ ਪੁਹੰਚ ਕਰਨ ਜਿਨਾਂ ਦੇ ਪਰਵਾਰਕ ਮੈਂਬਰ ਦਰਬਾਰ ਸਾਹਿਬ ਵਿਖੇ ਸ਼ਹਾਦਤਾਂ ਪ੍ਰਾਪਤ ਕਰ ਗਏ ਸਨ। ਜਥੇਬੰਦੀ ਵਲੋਂ ਪਹਿਲਾਂ ਛਾਪੇ ਗਏ ਵੇਰਵਿਆਂ ਵਿਚ ਵੀ ਲੋੜੀਂਦੀ ਤਰਮੀਮ ਲਈ ਪਰਵਾਰਾਂ ਤਕ ਮੁੜ ਪਹੁੰਚ ਕਰਨ ਦੇ ਉਪਰਾਲੇ ਹੋ ਰਹੇ ਹਨ। ਉਨ੍ਹਾਂ ਸਹੀਦ ਪਰਵਾਰਾਂ ਨੂੰ ਵੀ ਬੇਨਤੀ ਕੀਤੀ ਕਿ ਉਹ ਜਥੇਬੰੰਦੀ ਦੇ ਅੰਮ੍ਰਿਤਸਰ ਸਥਿਤ ਦਫ਼ਤਰ ਤਕ ਸਿੱਧੀ ਪਹੁੰਚ ਕਰਨ।
Jarnail Singh Bhindranwale
ਇਹ ਸਵਾਲ ਬੇਹੱਦ ਅਹਿਮ ਹੈ ਕਿ ਆਖਿਰ ਸੰਤ ਗਿਆਨੀ ਜਰਨੈਲ ਸਿੰਘ ਜੀ ਖ਼ਾਲਸਾ ਭਿੰਡਰਾਂਵਾਲਿਆਂ ਦੇ ਨਾਲ ਮੋਢਾ ਜੋੜ ਕੇ ਜੂਝਣ ਵਾਲੇ ਕੁੱਲ ਕਿੰਨੇ ਕੁ ਸਿੰਘ-ਸਿੰਘਣੀਆਂ ਸਨ ਜਿਨ੍ਹਾਂ ਨੇ ਹਥਿਆਰਬੰਦ ਹੋ ਕੇ 'ਧਰਮ ਹੇਤ ਸੀਸ ਵਾਰੇ' ਇਸ ਮੰਤਵ ਦੀ ਪੂਰਤੀ ਲਈ ਦਲ ਖ਼ਾਲਸਾ ਨੇ 2005 ਵਿਚ ਇਕ ਮਤਾ ਪਾ ਕੇ ਉਨ੍ਹਾਂ ਸਿੰਘ-ਸਿੰਘਣੀਆਂ ਦਾ ਵੇਰਵਾ ਇਕੱਠਾ ਕਰਨ ਦਾ ਅਹਿਦ ਕੀਤਾ ਸੀ ਜਿਹੜੇ ਘੱਲੂਘਾਰੇ ਮੌਕੇ ਦਰਬਾਰ ਸਾਹਿਬ ਵਿਖੇ ਜੂਝਦੇ ਹੋਏ ਸ਼ਹਾਦਤਾਂ ਪਾ ਗਏ ਹਨ। ਦਲ ਖ਼ਾਲਸਾ ਦੀ ਇਕ ਟੀਮ ਨੇ ਪਿੰਡ-ਪਿੰਡ, ਘਰ-ਘਰ ਜਾ ਕੇ ਵੇਰਵੇ ਇਕੱਠੇ ਕੀਤੇ ਤੇ ਜਾਂਚ-ਪੜਤਾਲ ਮਗਰੋਂ ਸ਼ਹੀਦੀ ਡਾਇਰੈਕਟਰੀ ਛਾਪੀ ਗਈ।
1984 Sikh Genocide
ਪਹਿਲਾ ਐਡੀਸ਼ਨ ਵਿਚ 167 ਸ਼ਹੀਦਾਂ ਦੇ ਤਸਵੀਰਾਂ ਸਮੇਤ ਵੇਰਵੇ ਦਰਜ ਸਨ ਜੋ 2006 ਵਿਚ ਛਾਪਿਆ ਗਿਆ ਸੀ। ਦੂਜੇ ਐਡੀਸ਼ਨ ਵਿਚ 207 ਸ਼ਹੀਦਾਂ ਦੇ ਵੇਰਵੇ ਅਤੇ ਤੀਜਾ ਐਡੀਸ਼ਨ ਜੋ 2012 ਵਿਚ ਛਪਿਆ ਸੀ, ਉਸ ਵਿਚ 221 ਸ਼ਹੀਦਾਂ ਦੇ ਵੇਰਵੇ ਦਰਜ ਸਨ। ਪਹਿਲਾ ਅਤੇ ਦੂਜਾ ਐਡੀਸ਼ਨ ਦੀ ਸੇਵਾ ਜਥੇਬੰਦੀ ਵਲੋਂ ਆਪ ਕੀਤੀ ਗਈ ਸੀ ਤੇ ਤੀਜੇ ਭਾਗ ਦੀ ਸੇਵਾ ਦਮਦਮੀ ਟਕਸਾਲ ਵਲੋਂ ਕੀਤੀ ਗਈ ਸੀ। ਚੌਥੇ ਭਾਗ ਦੀ ਛਪਾਈ ਦੀ ਸੇਵਾ ਅਸਟ੍ਰੇਲੀਆ ਦੀ ਸੰਗਤ ਵਲੋਂ ਕੀਤੀ ਜਾਵੇਗੀ। ਉਹਨਾਂ ਦਸਿਆ ਕਿ ਹਜ਼ੂਰ ਸਾਹਿਬ ਵਾਲੇ ਸਵਰਗਵਾਸੀ ਬਾਬਾ ਸ਼ੀਸ਼ਾ ਸਿੰਘ ਨਾਲ ਸਬੰਧਤ 30 ਸਿੰਘ ਜੋ ਦਰਬਾਰ ਸਾਹਿਬ ਵਿਖੇ ਸੰਤ ਜਰਨੈਲ ਸਿੰਘ ਭਿੰਡਰਾਂਵਾਲਿਆਂ ਦੀ ਅਗਵਾਈ ਹੇਠ ਸ਼ਹੀਦੀਆਂ ਪਾ ਗਏ ਸਨ ਬਾਰੇ ਮੁਕੰਮਲ ਵੇਰਵੇ ਇੱਕਠੇ ਕਰਨ ਲਈ ਸਿਰਤੋੜ ਕੋਸ਼ਿਸ਼ਾਂ ਕਰ ਰਹੇ ਹਨ।
1984 Darbar Sahib
ਉਨ੍ਹਾਂ ਅੱਗੇ ਦਸਿਆ ਕਿ ਸਾਕਾ ਦਰਬਾਰ ਸਾਹਿਬ ਵਿਖੇ ਸ਼ਹੀਦ ਹੋਣ ਵਾਲੇ ਸਿੰਘ-ਸਿੰਘਣੀਆਂ ਦਾ ਸਬੰਧ ਦਮਦਮੀ ਟਕਸਾਲ, ਅਖੰਡ ਕੀਰਤਨੀ ਜਥਾ, ਆਲ ਇੰਡੀਆ ਸਿੱਖ ਸਟੂਡੈਂਟਸ ਫੈਡਰੇਸ਼ਨ ਅਤੇ ਬਾਬਾ ਸ਼ੀਸ਼ਾ ਸਿੰਘ ਜਥਾ ਕਾਰ ਸੇਵਾ ਸੀ। ਉਨ੍ਹਾਂ ਕਿਹਾ ਕਿ ਇਹ ਸਵਾਲ ਸਦਾ ਹੀ ਚਰਚਾ ਵਿਚ ਰਹੇਗਾ ਕਿ ਜੂਨ 1984 ਨੂੰ ਘੱਲੂਘਾਰੇ ਮੌਕੇ ਕੁੱਲ ਕਿੰਨੇ ਸਿੱਖ ਦਰਬਾਰ ਸਾਹਿਬ ਕੰਪਲੈਕਸ ਵਿਚ ਭਾਰਤੀ ਫ਼ੌਜ ਦੀਆਂ ਗੋਲੀਆਂ ਦਾ ਸ਼ਿਕਾਰ ਬਣੇ? ਭਾਰਤ ਸਰਕਾਰ ਦੇ ਆਪਦੇ ਵਾਈਟ ਪੇਪਰ ਵਿਚ ਦਰਜ਼ ਹੈ ਕਿ ਕੁੱਲ਼ 492 ਵਿਅਕਤੀ ਮਾਰੇ ਗਏ ਸਨ ਜਿਨਾਂ ਵਿਚ 309 ਸਿਵਲੀਅਨ ਤੇ 83 ਮਿਲਟਰੀ ਦੇ ਬੰਦੇ ਸਨ ਪਰ ਰਾਜੀਵ ਗਾਂਧੀ ਨੇ ਨੈਸ਼ਨਲ ਸਟੂਡੈਂਟਸ ਯੂਨੀਅਨ ਦੇ ਇਕ ਸਮਾਗਮ ਵਿਚ ਕਿਹਾ ਸੀ ਕਿ ਹਮਲੇ ਦੌਰਾਨ 700 ਸਿਪਾਹੀ ਤੇ ਅਫ਼ਸਰ ਮਾਰੇ ਗਏ।
1984 Darbar Sahib
ਇੰਦਰਜੀਤ ਸਿੰਘ ਜੇਜੀ ਨੇ ਜੋ 'ਨਸਲਕੁਸ਼ੀ ਦੀ ਰਾਜਨੀਤੀ' ਨਾਮੀ ਰਿਪੋਰਟ ਯੂਨਾਈਟਡ ਨੇਸ਼ਨਸ ਕਮਿਸ਼ਨ ਔਨ ਹਿਊਮਨ ਰਾਈਟਸ ਨੂੰ ਭੇਜੀ ਸੀ, ਉਸ ਵਿਚ ਅੰਦਾਜ਼ੇ ਅਨੁਸਾਰ ਘੱਲੂਘਾਰੇ ਦੌਰਾਨ 10,000 ਵਿਅਕਤੀਆਂ ਦੇ ਮਾਰੇ ਜਾਣ ਦਾ ਅੰਕੜਾ ਦਿਤਾ ਗਿਆ ਹੈ। ਦਰਬਾਰ ਸਾਹਿਬ ਕੰਪਲੈਕਸ ਵਿਚ ਮਾਰੇ ਗਏ ਲੋਕਾਂ ਵਿਚ ਬਹੁਤੇ ਆਮ ਸ਼ਰਧਾਲੂ ਹੀ ਸਨ ਜਦਕਿ ਜੂਝਦੇ ਹੋਏ ਸ਼ਹੀਦ ਹੋਣ ਵਾਲੇ ਸਿੱਖ ਜੁਝਾਰੂ ਤਕਰੀਬਨ 300 ਹੋਣਗੇ।
