ਕਿਹਾ, ਮੀਟਿੰਗਾਂ ਕੇਵਲ ਈਟਿੰਗ ਅਤੇ ਚੀਟਿੰਗ ਕਰਨ ਲਈ ਹੁੰਦੀਆਂ ਹਨ
ਅੰਮ੍ਰਿਤਸਰ : ਸਿੱਖ ਵਿਦਵਾਨ ਅਤੇ ਸਿੱਖ ਰੈਫ਼ਰੈਂਸ ਲਾਇਬ੍ਰੇਰੀ ਦੇ ਸਾਬਕਾ ਡਾਇਰੈਕਟਰ ਡਾਕਟਰ ਅਨੁਰਾਗ ਸਿੰਘ ਨੇ ਕਿਹਾ ਹੈ ਕਿ ਜਾਂਚ ਕਮੇਟੀਆਂ ਕਦੇ ਵੀ ਕਿਸੇ ਮਾਮਲੇ ਦਾ ਸਾਰਥਕ ਹੱਲ ਨਹੀ ਕਢਦੀਆਂ। ਮੀਟਿੰੰਗਾਂ ਕਦੇ ਵੀ ਕਿਸੇ ਵੀ ਮਸਲੇ ਦਾ ਹੱਲ ਨਹੀਂ ਦਸਦੀਆਂ । ਇਹ ਮੀਟਿੰਗਾਂ ਈਟਿੰਗ ਅਤੇ ਚੀਟਿੰਗ ਕਰਨ ਲਈ ਹੁੰਦੀਆਂ ਹਨ।
ਅੱਜ ਪੱਤਰਕਾਰਾਂ ਨਾਲ ਗੱਲ ਕਰਦਿਆਂ ਡਾਕਟਰ ਅਨੁਰਾਗ ਸਿੰਘ ਨੇ ਕਿਹਾ,''10 ਸਾਲ ਪਹਿਲਾਂ ਮੈਂ ਸ਼੍ਰੋਮਣੀ ਕਮੇਟੀ ਨੂੰ ਸਿੱਖ ਰੈਫ਼ਰੈਂਸ ਲਾਇਬ੍ਰੇਰੀ ਬਾਰੇ ਇਕ ਵਿਸਥਾਰਤ ਜਾਂਚ ਰੀਪੋਰਟ ਪੇਸ਼ ਕੀਤੀ ਸੀ ਪਰ ਇਸ ਰੀਪੋਰਟ ਨੂੰ ਦਸ ਸਾਲ ਤਕ ਦਬਾਅ ਕੇ ਕਿਉਂ ਰਖਿਆ ਗਿਆ?'' ਉਨ੍ਹਾਂ ਕਿਹਾ ਕਿ ਚੰਦ ਵਿਅਕਤੀਆਂ ਦੇ ਕਾਰਨ ਪੂਰੀ ਸੰਸਥਾ ਬਦਨਾਮ ਹੋ ਰਹੀ ਹੈ। ਡਾਕਟਰ ਅਨੁਰਾਗ ਸਿੰਘ ਨੇ ਕਿਹਾ ਕਿ ਸੰਸਥਾ ਦੀ ਇਮਾਨਦਾਰੀ ਦਾ ਅੰਦਾਜ਼ਾ ਇਸ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਪੰਜਾਬ ਤੇ ਹਰਿਆਣਾ ਹਾਈ ਕੋਰਟ ਵਿਚ ਚਲ ਰਹੇ ਕੇਸ 'ਤੇ 16 ਸਾਲ ਤਕ ਸ਼੍ਰੋਮਣੀ ਕਮੇਟੀ ਇਕ ਹਲਫ਼ੀਆ ਬਿਆਨ ਵੀ ਨਹੀਂ ਦਾਇਰ ਕਰ ਸਕੀ।
ਉਨ੍ਹਾਂ ਕਿਹਾ,''ਮੇਰੇ ਵਿਰੁਧ ਅੱਜ ਸ਼੍ਰੋਮਣੀ ਕਮੇਟੀ ਨੇ ਇਕ ਸਕਾਲਰ ਖੜਾ ਕਰ ਕੇ ਮੈਨੂੰ ਝੂਠਾ ਸਾਬਤ ਕਰਨ ਦੀ ਕੋਸ਼ਿਸ਼ ਕੀਤੀ।'' ਉਨ੍ਹਾਂ ਕਿਹਾ ਕਿ ਅੱਜ ਦੀ ਮੀਟਿੰਗ ਵਿਚ ਜਥੇਦਾਰ ਜੋਗਿੰਦਰ ਸਿੰਘ ਵੇਦਾਂਤੀ ਆਪ ਮੰਨ ਰਹੇ ਹਨ ਕਿ ਦਸਮ ਗ੍ਰੰਥ ਦਾ ਇਕ ਸੁਨਹਿਰੀ ਸਰੂਪ ਉਹ ਆਪ ਲੈ ਕੇ ਆਏ ਸਨ। ਇਸ ਤੋਂ ਸਾਫ਼ ਜ਼ਾਹਰ ਹੁੰਦਾ ਹੈ ਕਿ ਸਿੱਖ ਰੈਫ਼ਰੈਂਸ ਲਾਇਬ੍ਰੇਰੀ ਦਾ ਕੋਈ ਵਾਲੀ ਵਾਰਸ ਨਹੀਂ ਹੈ।
ਉਨ੍ਹਾਂ ਕਿਹਾ ਕਿ ਅਕਾਲੀ ਦਲ ਦਾ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਕੋਲ ਸਿੱਖ ਰੈਫ਼ਰੈਂਸ ਲਾਇਬ੍ਰੇਰੀ ਦਾ ਸਮਾਨ ਮੰਗਣ ਜਾਂਦਾ ਹੈ ਪਰ ਉਸ ਨੂੰ ਇਹ ਵੀ ਨਹੀਂ ਪਤਾ ਕਿ ਸਮਾਨ ਆਖ਼ਰ ਹੈ ਕੀ? ਜਦ ਗ੍ਰਹਿ ਮੰਤਰੀ ਪੂਰੀ ਸੂਚੀ ਮੰਗਦਾ ਹੈ ਤਾਂ ਸੱਭ ਨੂੰ ਹੱਥਾਂ ਪੈਰਾਂ ਦੀ ਪੈ ਜਾਂਦੀ ਹੈ। ਉਨ੍ਹਾਂ ਕਿਹਾ ਕਿ ਇਕ ਗੱਲ ਚੰਗੀ ਹੋਈ ਕਿ ਇਨ੍ਹਾਂ ਮੰਨ ਲਿਆ ਕਿ 2305 ਸਰੂਪ ਵਾਪਸ ਆਏ ਹਨ।