ਬਰਗਾੜੀ ਬੇਅਦਬੀ ਕਾਂਡ ਦਾ ਸੱਚ ਸਾਹਮਣੇ ਲਿਆਉਣ ਲਈ ਡੇਰਾ ਪ੍ਰੇਮੀਆਂ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਜ਼ਿਲ੍ਹਾ ਪੁਲਿਸ ਨੇ ਇਨ੍ਹਾਂ ਵਿਅਕਤੀਆਂ ਦੇ ਪਰਵਾਰਾਂ ਅਤੇ ...
ਕੋਟਕਪੂਰਾ, ਬਰਗਾੜੀ ਬੇਅਦਬੀ ਕਾਂਡ ਦਾ ਸੱਚ ਸਾਹਮਣੇ ਲਿਆਉਣ ਲਈ ਡੇਰਾ ਪ੍ਰੇਮੀਆਂ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਜ਼ਿਲ੍ਹਾ ਪੁਲਿਸ ਨੇ ਇਨ੍ਹਾਂ ਵਿਅਕਤੀਆਂ ਦੇ ਪਰਵਾਰਾਂ ਅਤੇ ਜਾਨ ਮਾਲ ਦੀ ਰਖਿਆ ਲਈ ਜ਼ਿਲ੍ਹੇ ਵਿਚ ਚੌਕਸੀ ਵਧਾਈ ਹੋਈ ਹੈ ਜਿਸ ਲਈ ਪੀਏਪੀ ਜਲੰਧਰ ਤੋਂ ਤਿੰਨ ਆਰਮਡ ਫ਼ੋਰਸ ਕੰਪਨੀਆਂ ਬੁਲਾਈਆਂ ਗਈਆਂ ਹਨ ਪਰ ਪੁਲਿਸ ਕੋਲ ਇਨ੍ਹਾਂ ਮੁਲਾਜ਼ਮਾਂ ਦੇ ਖਾਣੇ ਲਈ ਫ਼ੰਡ ਨਹੀ ਹੈ ਜਿਸ ਬਾਬਤ ਗੁਰਦਵਾਰਾ ਪ੍ਰਬੰਧਕਾਂ ਦੀ ਮਦਦ ਲਈ ਜਾ ਰਹੀ ਹੈ।
ਆਰਮਡ ਫ਼ੋਰਸ ਕੰਪਨੀਆਂ ਦੇ 300 ਮੁਲਾਜ਼ਮਾਂ ਨੇ ਇਸ ਜ਼ਿਲ੍ਹੇ ਵਿਚ ਨਾਕੇ ਲਾਏ ਹੋਏ ਹਨ ਇਨ੍ਹਾਂ ਜਵਾਨਾਂ ਦੇ ਖਾਣ ਪੀਣ ਦਾ ਖ਼ਰਚਾ ਜ਼ਿਲ੍ਹਾ ਪੁਲਿਸ ਵਲੋਂ ਅਪਣੇ ਪੱਧਰ 'ਤੇ ਕੀਤਾ ਜਾਣਾ ਹੁੰਦਾ ਹੈ ਪਰ ਪੁਲਿਸ ਕੋਲ ਫ਼ੰਡ ਨਹੀਂ ਹਨ ਤੇ ਸਬੰਧਤ ਥਾਣਾ ਮੁਖੀਆਂ ਨੇ ਇਹ ਜ਼ਿੰਮੇਵਾਰੀ ਕੁੱਝ ਗੁਰਦਵਾਰਿਆਂ 'ਤੇ ਪਾ ਦਿਤੀ ਹੈ। ਪੁਲਿਸ ਜਵਾਨਾਂ ਨੂੰ ਤਿੰਨ ਵੇਲੇ ਦਾ ਖਾਣਾ ਪਾਣੀ ਸਮੇਂ ਸਿਰ ਨਾਕਿਆਂ 'ਤੇ ਪੁਜਦਾ ਕਰਨਾ ਜ਼ਿਲ੍ਹਾ ਪੁਲਿਸ ਲਈ ਵੱਡੀ ਚੁਨੌਤੀ ਬਣਿਆ ਹੋਇਆ ਹੈ ਹਾਲਾਂਕਿ ਗੁਰਦਵਾਰਿਆਂ ਦੇ ਸਹਿਯੋਗ ਨਾਲ ਪੁਲਿਸ ਦੀ ਮੁਸ਼ਕਲ ਕੁੱਝ ਘਟੀ ਹੈ।
ਪੀਏਪੀ ਜਲੰਧਰ ਤੋਂ ਬੁਲਾਏ 300 ਪੁਲਿਸ ਮੁਲਾਜ਼ਮ ਅਣਮਿਥੇ ਸਮੇਂ ਲਈ ਫ਼ਰੀਦਕੋਟ ਵਿਚ ਤਾਇਨਾਤ ਕੀਤੇ ਗਏ ਹਨ। ਪੁਲਿਸ ਦੀ ਬੇਨਤੀ ਤੇ ਮਾਤਾ ਖੀਵੀ ਜੀ ਗੁਰਦਵਾਰੇ ਵਿਚੋ ਪੁਲਿਸ ਨੂੰ ਲੰਗਰ ਭੇਜਿਆ ਜਾ ਰਿਹਾ ਹੈ। ਗੁਰਦਵਾਰੇ ਦੇ ਸੇਵਾਦਾਰ ਗੁਰਦਿਤ ਸਿੰਘ ਸੇਖੋਂ ਨੇ ਕਿਹਾ ਕਿ ਪੁਲਿਸ ਦੀ ਬੇਨਤੀ 'ਤੇ ਨਾਕਿਆਂ 'ਤੇ ਲੰਗਰ ਭੇਜਿਆ ਗਿਆ ਹੈ। ਜ਼ਿਲ੍ਹਾ ਪੁਲਿਸ ਮੁਖੀ ਡਾ. ਨਾਨਕ ਸਿੰਘ ਨੇ ਕਿਹਾ ਕਿ ਪੀਏਪੀ ਦੀਆਂ ਤਿੰਨ ਕੰਪਨੀਆਂ ਫ਼ਰੀਦਕੋਟ ਵਿਚ ਤਾਇਨਾਤ ਹਨ ਅਤੇ ਇਨ੍ਹਾਂ ਦੀ ਰਸਦ ਦਾ ਪ੍ਰਬੰਧ ਜ਼ਿਲ੍ਹਾ ਪੁਲਿਸ ਕਰ ਰਹੀ ਹੈ।
